ALAY'LEHE KALA MUDAN KALANA
MAGAC ROON!!!!!
W/D:Mursal
Max'ed Max'uud(Garaad) Email
stethy1@yahoo.com
Nin walba wuxuu galo
iyo wuxuu gaystaba Taariikhada ayaa xusi doonta, Diiwaanka
ayeeyna u geli doontaa Xummaan, sammaan,khiyaano, iyo
Daacadnimo hadba tii uu ku shaqeeyo. Taariikhduna waa taxane
silsilad ah oon marnaba duugoobayn.
Sida aan kawada
warhayno, waxaa jiray Qorshe lagu doonayey in Dalka lagu
keeno Ciidamo ka socda Xukuumadda
Tigreega, qorshahaas oo laga lahaa dano gurracan oo
ay ka mid ahayd in lagu gummaado Ummadda Soomaaliyeed laguna
hoys geeyo Xukuumadda Tigreega
ayaa marka laga reebo Koox Xilmadhibaano ihi ay dhammaan
inta kale Dadku si isku mid ah uga dhiidhiyeen ugana
horyimaadeen Qorshaha Gummaysiga.
Waxay soo jiitantaba,
Gudoomiyaha Barlamaanka Mudane Shariif Xasan Sh.
Aaden ayaa 17kii bishan march iskugu yeeray Golaha
Barlamaanka Fadhi looga hadlayey Qorshaha lagu geynayo
Soomaaliya Ciidamada Xabashida,
waloow Xubno u adeegayey Cadawga iyo Dowladda Keny-ba ay
isku dayeen in ay dib u dhigaan Kalfadhiga Golaha
Barlamaanka haddana nasiib wanaag taasi ma'aanay dhicin, oo
go'aankiisii ayuu Gudoomiyuhu ku adkaystay isagoona xitaa
sheegay in ay shirka ku qabsan doonaan Hoteelada Nairobi,
haddii loo diido Xaruntii ay ku shirijireen ee
Mpagathi.
Shirkii Barlamaanka
sidii uu Qorshuhu ahaaba lama baajin wuxuuna qabsoomay 17kii
bishaan Maarso, isagoona ka dhacay Hoteelka Grand
Regency. Kulankaas oo ay ka soo qaybgaleen ilaa 217
Xildhibaan ayaa sidoo kale waxaa fadhiyey RW
Cali Max'ed Geeddi oo isagu soo gudbiyey motion-kii
Dowladdu ay wadatey ee Tigreega
loogu kacan gelinayey Soomaaliya. Hase yeeshee motion kale
oo kaas dhinac socday ayeey 30 ka mid ah Mudanayaasha
Barlamaanku ay soo gudbiyeen, wuxuuna sheegayey Mooshinkaas
danbe in loo baahanyahay Ciidamo ka socda J/Carabta, Midowga
Africa iyo IGAD oo aysan ku jiran Wadamadda sofka hore(front-line
states) Ilaa 100 iyo dhowr isku qoray in ay ka qayb
qaataan Doodaas ayaa70 ka mid ihi wxay ka horyimaadeen in la
keeno Ciidamadda Tigreega,
20kalena waxay sheegayn in loo hadlay halka tirada kaloo
yarna ay sheegayn in loo baahanyahay Ciidamadda Safka hore.
Hadaba markii ay
Dooddii soo gaban gabowday ayaa Gudoomiyaha Barlamaanka
Mudane Shariif Xasan Sh. Aaden wuxuu
sheegay in Cod sir ah lagelinayo si loo kala baxo.
Gudoomiyuhu wuxuu soo bandhigay 2-ba Warqadood oo ay ku kala
qoranyaayeen " waxaan raacsanahay in la keeno
Ciidamo kasocda Midowga Africa, J.Carabta iyo IGAD"
iyo mid kale oo ay ku qornayd " Waxaan raacsanahay
in lakeeno Ciidamo ka socda Midowga Africa, J.Carabta iyo
IGAD oo aanay ku jirin kuwa Safka hore" sida
caadiga ahba kolkii uu damcay Gudoomiyuhu in uu codbixinta
bilaabo oo uu isagu kiisa dhiibto ayaa Kooxdii
Amxaaro raaca ahayd oo runtii
aad looga badnaa ay abuurayn Fowdo iyagoo isku gadaamay
Santuuqii Codbixinta. Kooxdaan ayaa horay
ugu soo tala galay in ay Arbushaad sameeyaan haddii ay u
muuqato in Codka looga adkaanayo, si Gudoomiyuhu uu dib ugu
dhigo fadhiga Baarlamaanka xili kale. Hase yeeshee
Gudoomiyaha Barlamaanku markuu arkayey sida ay wax u socdaan
iyo hadafka Gummaysi kalkaalka
ayaa wuxuu qaatay go'aan deg-deg ah oo geesinimo oo aad ay
ugu bogayn inta badan Shacabka Soomaaliyeed, isagoo amray in
markan doorashadu ay tahay gacantaag! 156 xildhibaan ayaana
sidaas ugu codaysay in aan lagayn
Xabashi Dhulka Soomaaliyeed, halka 55-na ay u
codeeyeen in la keeno Askarta Tigreega,
iyadoo 6-da soo hartayna ay ka aamuseen. Mudane
Shariif Xasan Sh. Aaden ayaa loo aqoon saday
Halyeeyga Soomaaliyeed ee 2005-ta kadib markii aanu kalaba
labayn go'aankiisii wax ku oolka ahaa ee uu ku badbaadinayey
Dalkiisa. Waxaan hubaa in mudane Shariif Xasan Sh.
Aaden uu baal dahab ah ka galay Taariikhda laguna
xasuusan doono wixii uu Ummaddiisa u qabtay, ILAAHAY-na ka
abaal marin doono.
JAWAABTII GEEDDI OO MAS'UULIYAD DARRO KA MUUQATAY
RW
Geeddi oo ka hadlayey sida uu u arko go'aanka
u gaary Barlamanka Soomaaliyeed ayaa si ka fiirsasho la'aan
lagu tilmaami karay ku sheegay in aanu aqoonsanayn
natiijadii Barlamaanka, isagoona ku daray " Waxa
dhacay Gudoomiyaha ayaa ka danbeeyey, iska celiya buu lahaa
waa markii 2aad ee uu mugdi ku horkaco Xildhibaanada"
Hadaba waxii ka dhex
dhacay Barlamaanka 17kii bishaan iyo sidii
ay ku bilaabmayn waxaa lagala socday shaashadaha Caalamka,
laakiinse kaba soo qaad Doodda Geeddi in ay saxtahay oo
shariifku yiri iska celiya! Waxay tahay in la'iswaydiiyo
Ereyga "iskaceliya" goorma ayuu yimaadaa?
Dabcan markaca Daad(biyo)soo baxsaday aad iska moosaysid,
marka Col soo duulaan ah aad ka hortegayso amaba haddii
naftaada laguugu yimaado aad wax iska caabin galaysid.
Hadaba Geeddi, wuxuu doonayey miyaa in Kooxda qaska
wadayaasha ahaa ee bilaabay Dagaalka in gacmaha laga laabto
si wixii ay rabeen ay ku marsiiyaan?....Qaabka gacan iskula
tagga Barlamaanka ma'ahan wax lala yaabi karo, oo wuxuu ka
dhacaa Caalamka oo idil, waxaanse dhihi lahaa
Amxaaro wadayaashu wayba
mudnaayeen in la karbaasho.
Sidoo kale Mr. Geeddi
oo la hadlayey Warfidiyeenada wuxuu yiri "
Mucaaradku kama sii mid ahaan doonaan Golaha Xukuumadda,
talaabo ded-deg ah ayaan ka qaadi doonaa, ma jiro Nin awood
ku leh Soomaaliya". Sow akhristoow ma moodid in
Geeddi ay wax iskaga khaldanyihiin oo uu ku xisaabtamayo
awood aan jirin oo khiyaali ah?...Waa in sifiican loo fahmaa
sababta ay Xildhibaano iyo Wasiiro u yihiin Ragga hubaysani.
a) aqoontooda kuma aanay noqon Wasiir iyo Xildhibaan, oo
qaarkood ayaa lagu xantaa in aanay wax qorin. b) Xushmad iyo
karaamo ay Bulshadda ku dhexleeyihiin kuma aanay gelin
Dowladda, oo wixii dhacayba iyaga ayaa loo eedaynayaa.
C) Jagooyinka Hoggaamiyayaasha hubaysan kuma dhisna qaabka
wax qaybsiga Beelaha, oo 2 iyo ka badan oo isku jufo hoose
ah ayaa Wasiiro iyo Xildhibaanaba noqday. Hagaag imminka
dhammaanteen waxaa noo muuqada in Raggaasi lagu tixgelshay
Hubkooda si Dib u heshiisiintu ku hirgasho....halka uu
Geeddi ka hanjabi lahaa, miyaanay wannaag sanayn in uu
Maslaxad iyo wada hadal wax ku xaliyo, raacana halka ay
Ummaddu u badan tahay, islamarkaasna ayido rabitankooda ka
dhanka ah Gummaysiga?
Dhanka kale waa nasiib
darro ah in Mr. Geeddi, uu markasta u gefo Barlamaanka iyo
Guddoonkiisaba. Dec 11, 2004. Golaha Barlammaanku wuxuu Cod
ku riday Xukuumaddii uu soo dhisay Mr, Geedd. sidaan oo
kalena wuxuu ku hadlay wax aan marnaba laga filayn isagoo
leh " Shaqadayda waan sii wadanayaa, Dadkii gacmaha
taag taagay waxay ahaayeen Soomaali laga soo ururiyey
Xaafadda Islii iyo Suxufiyiintii goobta ku sugnaa"
wxuuna sida hadda uu sammeeyey oo kale eedda dusha uga
tuuray Gudoomiyaha Barlamanka Mudane Shariif Xasan
Sh. Aaden, Jawaabta Shacabkuse waa "Kala
mudan kalana maggac roon"
XARIGGA
XAAJIGA OO LOO XAGLINAYO XUBNAHA SARE
Waxaa wax aad loola
yaabo noqday in Kenya xirto Mudane ka tirsan Barlamaanka
Soomaaliyeed iyadoo shuruucda u degsan Caalamkuna aanay taa
ogolaanaynin. 17kii Bishaan march wixii ka
dhacay Gudaha Barlammaanka Soomaaliya, Boliiska Kenya
goobjoog buu ka ahaa, kalama aanu dhexgelin kolkii ay
dagaalamayeen Xubnaha Barlamaanku, markii la waydiiyeyna
waxay sheegayn in aanay fara gashanaynin Arinta Barlamaanka.
Haddaba maxaa keenay in maalin kadib ay ku xadgudbaan
Sharafta qaar ka mid ah Xildhibaanada Soomaaliyeed?.Taasi
way iska caddahay oo laaluush ayeey sidaasi ku dhacday.
Xaajiga waxaa lagu ogaa in uu aad uga soo horjeeday in Dalka
la keeno Ciidamo ka socda Safka hore,isagoo ahaa mid ka mid
ah raggii ugu hadalka kululaa Dooddii uu yeeshay
Barlamaanku. Waxaa la ogyahay Mudanayaal gaaraya 100 iyo
dhowr oo uu ku jiro Gudoomiyaha Barlamaanku in ay u galeen
dadaal wayn sidii Raggaas lagu sii dayn lahaa, iyagoo markii
danbena ku guulaystay. Su'aashuse waxay tahay Madaxweynaha
iyo Ra'isulwasaarihiisu dadaal intee la eg ayeey ka
gaystayn?...iska dhaaf dadaale waxaa la ogyahay in xittaa
aanay ka hadlin, taas maxaad akhristoow adiguba u qaadan
lahayd?..Xaajiga sida uu sheegayba waxay u tahay sharaf
isagoo ka horjeeda Cadawga Soomaaliyeed in loo xiro. isaga
iyo Gacma dheerana Shacabku waxay leeyihiin "Kala
mudan kalana magac roon"
Dhanka kale waxaa soo
baxaya warar sheegay in Gudoomiyaha Barlamaanka Soomaaliya
Mudane Shariif Xasan Sh. Aaden la soo
gaarsiiyey Warqad loogu sheego in uu isaga guuro Hoteelkii
uu ka degganaa Nairobi ee Grand Regency ,taasi
waxay marqaati cad ka tahay in kenya aanay raali ka ahayn
Qaran Soomaaliyeed oo dhisma, ugu yaraana ay aqbali karto
hoggaan iyaga iyo Ethiopia u daba dhilifeeya. Arinta Kenya
ay ku dhaqaaqday waxay na soo xusuusinaysaa hadalkii
Madaxweyihii hore ee kenya Mr. Moi uu ku sheegay in
Wadamadda Deriska la ah Soomaaliya aanay marnaba raali ka
ahayn Qaran soomaaliyeed oo dhisma, xili uu khudbad ka
jeedinayey Jaamicada American Defense University
ee Magaaladda Washinton. Haddaba Guddoomiye Shariif
Xasan waxaa la gudboon in uu go'aan kale oo Taariikhi ah
qaato kaas oo uu si deg-deg ah ugu laabanayo Caasimaddii.
Anigoo huba in si kawayn sidii hore loo soo dhawayn doono,
waxaana muuqata in Durbaba Sawiradda Shariifka
lagu dhejiyey Gidaarada, Gaadiidka Dadwaynaha iyo Meelaha ay
Bulshadu ku kulmaan. Ugu danbayntii hamalyo ayaan leeyahay
Mudane Shariif Xasan, halyeeyga 2005-ta.
W/D:Mursal Max'ed
Max'uud(Garaad) Email
stethy1@yahoo.com