Agaasimihii Idaacada Daljir oo Shil Gaari Ku Geeriyoodey

Gaalkacyo | March 30, 2005 | isha warka: Daljir radio

Adam Nuur Maxamed Islam - Innaa Lillaahi Wa Innaa Ilayhi Raajicuun!

Dhammaan Shaqaalaha Radio Daljir iyo Bahda Saxaafadda Puntland oo ka tiiraanyaysan geerida naxdinta leh ee Adam Nuur Maxamed Islam oo saacado ka hor ku geeriyooday shil gaari, waxaa ay tacsi u diriyaan Ehelka, Qaraabada & Asxaabta marxuumka.

Eebe ha u Naxariistee, Adam Nuur Maxamed waxaa uu dawr waafi ah ka soo qaatay dhismaha saxaafadda Puntland isaga oo soo qabtay xilal kala duwan. Adam labadii sano ee la soo dhaafay waxaa uu ahaa Agaasimaha Radio Daljir ee saldhigiisu yahay Galkacyo. Waxaa uu laga soo bilaabo sannadihii sagaashanaadkii hormood u ahaa saxaafadda ka hawlgasha gobollada Puntland isaga oo ka mid ahaa shaqaalaha Radio Galkacyo tan iyo sannadkii 1993-kii, uuna ka ahaa Madaxa Barnaamijyada.  

Eebe ha u Naxariistee, Adam waxaa uu ahaa Madaxa iyo Tifatiraha Jariiradda Yamayska oo ka soo baxda magaalada Galkacyo. Waxaa uu ka mid ahaa suxufiyiintii dhidibada u taagay Shabakada Suxufiyiinta Puntland ee PUMANET, uuna ka mid ahaa hawl-wadeenadeeda PUMANET; waxaana uu cilaaqaad wada-shaqayn ah la lahaa suxufiyiinta ka hawlgasha Gobollada Somaliya.  

Allaha u Naxariistee, Adam waxaa uu ahaa nin karmeed bulshay ah, hufan, karti iyo dad la socod qiimi lehna ay asxaabtiisu ku barteen.?  

Adam waxaa uu ifka kaga tagay xaas iyo 2 caruur ah (wiil & gabar) - Innaa Lillaahi Wa Innaa Ilayhi Raajicuun! 

Isha: Radio Daljir