Max’ed Dheere oo ku soo laabtay Jowhar kaddib
markii ay isa soo khilaafeen Geeddi..
Max’ed Cumar Xabeeb (Max’ed
Dheere) oo ah Guddoomiyaha Gobalka Sh/dhexe ayaa shalay deg deg ugu soo
laabtay Magaalada Jowhar ee Gobalka Sh/dhexe, kaddib markii uu dhowr
maalmood ku maqnaa Magaalada Adis-Ababa. Max’ed Dheere ayaa waxaa uu
halkaasi u tagay sidii uu kulan ula yeelan lahaa Ra’isul Wasaare Cali Max’ed
Geedi kaddib markii uu Max’ed Dheere soo khilaaf soo kala dhexgalay isaga
iyo Dowladda Federaalka. Max’ed Dheere dhowr arrimood ayuu ku xiray
heshiiska Dowladda, hase yeeshee Cali Max’ed Geeddi arrimahaasi waxay
noqdeen kuwo u cuntami waayay, waxaana ka mid ah qodobadii uu soo jeediyay
Max’ed Dheere in uu Geeddi ka isaga soo baxo Magaalada Baydhabo oo uu
fariisin ka dhigto Magaalada Jowhar, waxaa kalloo ka mid ahaa in Geeddi uu
ku dhawaaqo in Maxkamadaha islaamiga ay yihiin kuwo argagixiso ah iyo in uu
xilka ka qaado Guddoomiyaha Gobalka Banaadir Cadde Gaabow.
Cali Max’ed
Geeddi waxa uu Max’ed Dheere u sheegay in dowladdu ay diyaar u tahay in ay
bixiso lacagihii uu ku lahaa Dowladda oo gaarayay ilaa 9-Milyan oo Doolar
iyo sidoo kale waxa uu sheegay in ay Dowladdu tababaro siineyso ciidamada ku
sugan Gobalka Sh/dhexe. Kulankaan waxaa soo qabanqaabiyay Dowladda Itoobiya
oo dooneysa in ay soo afjarto khilaafka u dhexeeya Dowladda iyo Max’ed
Dheere, hase yeeshee Max’ed ayaa la sheegay in uu ku qanci waayay wixii loo
soo jeediyay, iyadoo markii uu ka soo degayay Garoonka Diyaaradaha ee Jowhar
uu diiday in uu wax war ah siiyo saxaafadda.
Max’ed Dheere waxaa Magaalada
Adis-Ababa u raacay Wasiirka qorsheynta qaranka C/risaaq Jurile oo isna si
aad ah u doonayay in la soo afjaro khilaafka u dhexeeya Dowladda iyo Max’ed
Dheere, waxaana la filayaa in Ra’isul Wasaare Cali Max’ed Geeddi uu Maanta
soo gaaro Magaalada Baydhabo ee Gobalka Bay.
Siyaasiyiin ka tirsan beesh Cayr oo Nairobi kulan kula yeeshay xubno ka
tirsan Mareykanka…
Safaaradda
Mareykanka uu ku leeyahay Magaalada Nairobi ayaa waxaa ka dhacay Maalintii
shalay ahayd kulan ay isugu yimaadeen mas’uuliyiin ka tirsan Dowladda
Mareykanka iyo siyaasiyiin ka socotay beesha Cayr.
Siyaasiyiintii ka
socotay beesha Cayr ayaa waxaa ka mid ahaa Gen. Max’ed Nuur Galaal, Yuusuf
Mire Seeraar, Xasan Dhimbil Warsame, Maxamuud Cumar Tootoow, Siciid Nuur
Giriish iyo xubno kale, waxaana kulankaasi la iskula soo qaaday dagaaladii
dhawaan ka dhacay Magaalada Muqdisho iyo arrimo la xiriira waxa loogu
yeeray argagixisada.
Xubnihii ka
socday Beesha Cayr ayaa waxa ay Dowladda Mareykanka u gudbiyeen in
Soomaaliya aysan ku sugneyn wax argagixiso la yiraahdo, balse argagixisada
ku sugan ay yihiin kuwii 15-ka sano dhibaatada ku hayay ummadda Soomaaliyeed.
Sidoo kale waxa
ay sheegeen in Maxkamadaha Islaamiga ah ay ku abuurmeen rabitaanka Shacabka
Soomaaliyeed kaddib markii qabiilooyinka Soomaaliyeed ay adkeysan waayeen
dhibaatooyin-ka ay maleeshiyooyinka u gaysanayaan bulshada Soomaaliyeed,
iyagoo sheegay in Dowladda Mareykanka ay kala shaqeyn doonaan sidii loola
dagaalami lahaa waxa loogu yeeray kooxaha argagixisada ah.
Saraakiil ka tirsan CRD oo Magaalada Gaalkacyo
kula kulmay Odoyaal iyo Waxgarad ka tirsan beesha..
Hay’adda CRD oo maalmahan
ku holwneyd nabadeynta beelihii ku dagaalamay Gobalada Dhexe ayaa maalintii
shalay ahayd saraakiil ka tirsan Hay’adda CRD waxayna Koonfurta Gaalkacyo
kula kulmeen Odoyaal, Siyaasiyiin, iyo Waxgarad ka tirsan Beesha Sacad,
waxaana kulankaasi la iskula soo qaaday sidii loo soo gebagabeyn ahaa
heshiisiinta beelihii ku dagaalamay Gobalada Dhexe.
Kulankaan oo uu
ka qaybgalay Wasiirka howlaha Guud iyo Guryeynta Cusmaan Xasan Cali Caato
ayaa xubnihii ka qaybgalay waxaa ka mid ahaa madaxa Hay’adda CRD-da Jibriil
Ibraahim Cabdule, waxa uuna sheegay in 15-ka bishan la furi doono wajiga
labaad ee dib u heshiisiinta beelihii ku dagaalamay Gobalada dhexe, waxaa
kalloo uu sheegay in dhawaan tababaro loo furi doono maleeshiyooyinkii ku
dagaalamay Gobalada Dhexe.
Jibriil Ibraahim Cabdule
waxaa kalloo uu sheegay in wadamada Norway iyo Sweden ay diyaar u yihiin
bixinta wixii qarashaad ah oo lagu soo afjarayo dagaalkaas oo galaaftay dad
aad u fara badan isla markaana barakiciyay tiro intaa ka badan.
Cismaan Caato oo ka hadlay
kulankaasi waxa uu mahadceliyay ma’suuliyiinta Hay’adda CRD oo ay ka go’an
tahay in dalka oo dhan lagu soo dabaalo nabad.
Qaar ka mid ah Gobalada dalka oo uu ka curtay
Roobabkii Gu’ga..
Iyadoo abaar daran ay soo
wajahday qaar ka mid ah Gobalada Dalka ayaa haddana shalay iyo doraad waxaa
qaar ka mid ah Gobalada Dalka ka da’ay roobab si aad ah loogu diirsaday isla
markaana farax gelisay bulshada ku nool gobaladaasi.
Deegaano ka tirsan
Gobalada Bay iyo Bakool ayuu roobku biyo dhigay, sidoo kale Magaalada
Kismaayo ayaa waxaa ka da’ay roob socday mudo lix saacadood ah.
Haddii aan u dhaqaaqno
dhinaca waqooyi ee dalka la magacbaxay Somaliland waxaana iyana ka da’ay
roobab ay si aad ah ugu diirsadeen dadka iyo xoolaha, waxaana la Illaah laga
rajeynayaa in 15-ka April wixii ka dambeeya ay si rasmi ah u bilowdaan
roobakii Go’ga.,
Odoyaasha Digil iyo Mirifle oo shalay ku
guuleystay in ay Baydhabo ka qaadaan 18-Jidgooyo..
Odoyaasha Beelaha Digil
iyo Mirifle ayaa shalay ku guuleystay in Magaalada Baydhabo gudaheeda ka
qaadaan ilaa iyo 18 jid-gooyo oo ay dhigteen kooxo maleeshiyo ah oo dadka
iyo gaadiidka ka qaadayay baad.
Jidgooyadaas ayaa wararka
qaar waxay sheegayaan in ay ahayd mid lagu raadinayay dhaqaale, kaddib
markii ciidamadaasi loo waayay wixii dhaqaale ahaa ee ay u baahnaayeen
iyagoo ka soo gadooday xerada Daynuunaay, dhamaan odoyaasha ayaa waxay
ciidamadaasi dib ugu celiyeen xerada Daynuunaay halkaas oo la filayo in
dhawaan looga bilaabo tababar.
Jidgooyooyinkaan ayaa
waxay qalqal geliyeen ammaanka Magaalada Baydhabo kaddib markii Magaalada ay
ku soo bateen dhaca, boobka iyo dilka loo gaysanayo dadka, iyadoo dhawaan
wasiir ka tirsan Dowladda Federaalka laga dhacay gaarigiisii, ilaa iyo
haatanna gaarigaas laguma guuleysan in dib loo soo celiyo, sidoo kale waxaa
shalay dib u qabsoomay kulankii Baarlamaanka kaddib markii doraad jidgooyo
loo dhigtay.
Xuseen
Cusmaan “Qanyare waxba lagama weydiinayo amiga Qaranka”...
Wasiir ku
xigeenka amniga Qaranka Xuseen Cusmaan Xuseen ayaa ka hadlay halka ay
marayaan howlaha amniga Qaranka, waxa uuna sheegay in intii ay joogeen
Magaalada Baydhabo in ay ku guuleysteen in ay maleeshiyooyinkii halkaas ka
saaraan, isagoo intaa raaciyay in ay waliba rajeynayaan in aysan dib u soo
laaban.
“Gadoodka iyo jid
googooyinka ay dhigteen Maleeshiyooyinka Magaalada Baydhabo ma ahan mid
siyaasad la xiriirta ee waa duruuf la xiriirta dhinaca maleeshiyooyinka”
ayuu yiri Wasiir ku xigeenka oo sheegay inay wadaan qorshe la xiriira
ammaanka Dalka oo ay iska kaashanayaan wasaaradaha amniga gudaha,
Gaashaandhiga iyo dhaqancelinta maleeshiyoo-yinka.
Wasiir ku
xigeenka oo la weydiiyay sida ay noqoneyso howshaas mar haddii uu ka maqan
yahay Max’ed Qanyare oo ah Wasiirka amniga Qaranka ayaa waxa uu ku jawaabay
“Max’ed Qanyare waxba uma dhimi karo qorshaha ammaanka dalka, mar haddii uu
ka maqan yahay howshaas angaa wadeyna, ma ahan wax ku xiran joogintaanka
Max’ed Qanyare”.
Wuxuu sidoo kale
ka hadlay fikirka ah in ciidamo shisheeye la keeno iyo in kale, waxa uuna
yiri “ciidamo shisheeye oo dagaalama in la keeno anigu ma qabo, laakiin kuwo
hubka loo dhiibo waa loo baahan yahay, inkastoo go’aankas Baarlamaanku uu
leeyahay”, wuxuuna intaas raaciyay “in dhawaan tababar loogu qaadi doono
wadamada dibadda ah 231 askari oo lagu soo xulay habka 4.5-ka, kuwaasoo
isugu jira saraakiil iyo layli Sarkaal, waxaana loo kala qaadi doonaa
wadamada Suudaan iyo wadamo kale.
Ciidamadii ku xareysnaa Waajid oo dilay nin ka tirsan deegaanka..
Wararka naga soo
gaaraya Magaalada Waajid ee Gobalka Bakool waxay sheegayaan in Ciidamadii ku
xareysnaa xerada Waajid dhawaana laga keenay Magaalada Jowhar ay halkaasi ku
dileen nin ka mid ah dadka deegaanka.
Saddex askari oo
ka tirsan Ciidamadaasi ayaa waxa ay heshiis la soo gaareen in ka mid ah
dadka deegaanka iyagoo u sheegay in ay ka iibinayaan hub, hase yeeshee
markii uu ninkaasi soo qaaday wixii lacag ahaa ee uu ku gadan lahaa hubkaasi
ayaa mar ay la marayaan meel dhexe ayay dileen dabeedna ay ka qaateen wixii
lacaga ahaa ee uu wadatay.
Dilkaan ayaa
waxaa si weyn uga carooday dadka deegaanka oo iyagu soo jeediyay in gacanta
lagu soo dhigo ciddii ka dambeysay dilkaasi, waxaana Magaalada Waajid u
ambabaxi doono wafdi ka socda Dowladda Ku meel gaarka ah oo soo ogaan doona
xaalka dilka ninkaasi.
Doraad ayaa
xeradaas waxaa laga soo qaaday 70 –askari oo qayb ka ah ciidamo dhawaan loo
qaadi doono Magaalada Mombassa ee dalka Kenya, halkaas oo ay ku soo qaadan
doonaan tababar.
Shaqaaqo ka dhacday Magaalada Kismaayo...
Wararka ka
imaanaya Magaalada Kismaayo waxay sheegayaan in maalintii shalay ahayd ay ka
dhaceen shaqaaqo uu ku dhintay hal qof, ayna ku dhaawacmeen saddex kale,
kaddib markii iska hor imaad ku dhex maray suuqa Magaalada Kismaayo labo
kooxood oo maleeshiyo ah.
Shaqaaqadaas ayaa
waxay ka dhalatay kaddib markii koox maleeshiyo ah ay damacday in ay lacago
ka dhaco suuqaasi, halka kuwa kalana ay ahaayeen kuwo difaacayay, waxaana
markii dambe halkaasi yimid ciidamo ka socday isbahaysiga Dooxada Jubba.
Xaaladda
nabadgelyo ee Magaalada Kismaayo ayaa maalmahan ahayd mid ka sii dareysay,
iyadoo Magaalada ay ku soo badanayeen kooxo maleeshiyo ah oo qalqal geliyay
amniga Magaalada Kismaayo, kuwaasoo dhac iyo dil kula kaca bulshada ku nool
Magaalada Kismaayo ee Gobalka Jubadda Hoose.
Amiin Yuusuf
Khasaaro
E-Mail: amiinkhasaaro@hotmail.com
WARBIXIN:
GUDDIGA GURMADKA ABAARAHA SOOMAALIYA…
Gudiga gurmadaka
abaaraahu mudadii uu dhisnaa waxaa u suurtogalay howlo badan oo muhiim ah
kuwaas oo lagu daryeelayey bulshada tabaaleysan ee ay abaaruhu ku dhaceen
waxaana si gaar ah loo xusi karaa qodobada hoos ku qoran ...
AKHRI (PDF)
Tartankii
S.Y.L. MN oo Soo Gabagaboobay
Waxaan bishii February
10, 2006, ka bilowday Twincities, MN tartan loogu magacdaray SYL Indoor
Soccer Tournament, oo lagu qabtay Plymouth Indoor Creek Center, tartankaas
oo ay ka soo qayb galeen, sideed kooxood, oo lookala qaybiyey laba guruub,
oo kala ah:
Group A,
Firdhis, St. Paul
Team, Cedar Boys, Faa Cali Team.
Group B,
Buulo Team, Hilaal
Team, Eden Prairie, Shafici Team
Waxaa group A, ku soo
baxay kaalinta koowaad Firdhis, iyo kaalinta labaadna Faa Cali Team, Group B
na waxaa ka soo baxay kaalinta koowaad Hilaal Team, iyo kaalinta labaad
Buulo Team, waxaana la cayaaray cayaartii semi final ka.
March 24, 2006
Firdhis Team iyo Buulo
Team, waxayna ku dhamaatay Firdhis 6 Buulo Team 4.
Hilaal Team iyo Faa
Cali Team, waxayna ku dhamaatay Hilal 1 Faa Cali 1, waxayna noqotay in
laysla tago rigoorayaal, oo ay guushii ay ku raacday kooxdii Hilaal team oo
heshay 4 gool iyo Faa Cali team 3 gool.
March 31, 2006
Waxaa cayaartii
finalka ay ku dhexmartay labada kooxood oo kala ah, Firdhis Team iyo Hilaal
Team, halkaas ooy markiiba ay gacanta sare ay yeealatay kooxdii ku
cayaaraysay magaca Hilaal, kooxdaan oo noqotay, kooxdii ugu horeysay
taariikhda gobolkaan Minnesota, gaar ahaan cayaaraha Soomaalida, markii ugu
horaysay ka qayb gashay tartan xoogan oo timid Finalka, waxayna ubadan
yihiin dhalin wadan ka timid sadexdii sano ee ugu dambaysay, marka loo eego
kooxda Firdhis, oo badankoodu ahaayeen ragii gobolkaan dagistiisa ugu
horeeyey, ayna ka dhex muuqday cayaar yahanka weyn ee Soomaaliyeed laguna
magacaabo Cabdiraxmaan Cawaale Guuleed, loona yaqaano AAMAAN.
Yaanan waxba warka
kugu daaline, waxaa qaybtii koowaad ku soo gabagabowday 2 iyo 2, oo
barbardhac ah, walow aad looga itaal roonaa kooxdii Firdhis, ku soo
laabashadii qaybtii labaad, kooxda Firdhis kabtankooda Maxamed Rashiid,
wuxuu iisheegay in uu ka badin doona Hilaal team, waxayna ku dhamaatay 6
gool ay yeelatay Firdhis iyo 3 gool ay yeelatay kooxdii Hilaal.
Waxaa halkaas lagu
bixiyo abaal marino, ay kala heleen ugu horeyn, laba nin aad ula shaqeeyey,
abaabulaha koobkaan, oo layiraahdo,
Cabdicasis Cali Warsame (Biixi)
dadku u yaqaanin, labadaan nin oo lakal yiraahdo Abdilatif Osman iyo Abu
Jeylani oo la gudoonsiiyey abaalmarin howl karnimo, waxaa isna qaatay MVP,
Abdirisaq yare oo ah cayoortoygii ugu fiicna dhamaan cayoortoydii halkaas
isugu timid, una cayaaray kooxda St. Paul team, waxaa isna helay difaacii
ugu adkaa Abdirashid Mohamud, oo u cayaaray Hilaal team, waxaa isna helay
tababarihii ugu fiicna Xasan Waxar, oo ahaa tababarihii St. Paul, waxaa isna
helay Adan Sheekh Sahal, ninkii ugu goolasha badnaa tartankaan, dhaliyayna 7
gool, una safnaa Firdhis, iyo koobkii kaalinta koowaad oo ay heshay Firdhis,
iyo kii labaad oo ay heshay Hilaal team.
Diyaariye: Zaki Haji (Xaayow)
zakihaji@yahoo.com
Somalimedia mpls,mn
Faafin: SomaliTalk.com | April
3, 2006
Geeddi iyo Max’ed Dheere oo isku mari waayay qodobo
dhowr ah
»Roobab
lagu diirsaday oo ka da'ay magaalada kismaayo
»C/llaahi
Yuusuf oo codsi u diray Dowladda Kenya..
»Saraakiil
Soomaaliyeed oo tababar loogu qaadayo Suudaan..
»Shirkii
G/Wasiirada oo baaqday kaddib dhallinyaro hubeysan
»Muqdisho:
Qarax taayir oo sababay dhimasho..
»Iska
hor imaad ka dhacay isgooyska Km4...
»Nin
Meydkiisa Laga Helay Xeebta Magalada Bosaso..
»WAR
SAXAAFADEED kasoo baxay SCG...
Wararka oo dhan
ka akhri halkan.... Guji.... Apr 2
Geeddi oo ka
codsaday Mareykanka in ay xushmeeyaan Dowladiisa..
»Hay’adda CRD oo ka qaybqaadaneysa
Nabadeynta G/Dhexe
»Madaxweyne C/llaahi oo dib ugu soo laabtey Baydhabo..
»Geeddi iyo Max’ed Dheere oo kulan ku yeeshay Adis-Ababa..
»Beelaha Digil iyo Mirifle oo si weyn isugu Khilaafsan qaybsiga
»Tartan loogu jiro Guddoomiya ku xigeenada G/Banaadir...
»Saddex qof oo aano qabiil loogu dilay Bu’aale...
»Hay’adda Khaliif Huudow oo warbixin soo saartay...
»Meles oo Eritrea ku eedeeyay qaraxyada dalkiisa ka dhaca
Wararka oo dhan
ka akhri halkan...
April 1
Shirkadda
Xawaalada ee Global Money Transfer oo xustey Sannad Guuradeydii 4 aad