Barre Hiiraale oo bixiyay lacag Magdhow ah
oo gaareysa..
Wararka naga soo gaaraya Magaalada
Kismaanyo ee Gobalka J/hoose waxay sheegayaan in maalintii shalay ahayd
guddoomiyaha Isbahaysiga Dooxadda Jubba uu bixiyay lacag magdhow ah oo la
siiyay rag lagu laayay magaalada Kismaayo oo taageersanaa ninkii ay Barre
Hiiraale sida aadka ah isku hayeen Magaalada Kismaayo ee Col. Cabdi Cigaal.
Lacagta magdhowga ah ee uu bixiyay Barre Hiiraale ayaa waxa ay gaareysaa
512-Milayan oo Shillin Soomaaliya ah, waxaana la siinayaa Magdhowgaasi
eheladii iyo qaraabadii ay ka geeryoodeen sadeed nin oo dhawaan ku dhintay
iska hor imaadyo dhex maray taageerayaasha Col. Cabdi Cigaal iyo Col. Barre
Hiiraal.
Lacagtaas magdhowga ah waxaa qaaday
odoyaal iyo waxgarad uu ka soo jeedo Barre Hiiraale, waxaana odoyaashu ay
sheegeen in ay sii wadi doonaan wada hadalada u dhexeeya labada Korneel
iyagoo sheegay in ay horey loogu heshiiyay dhowr qodob oo ay ka mid ahaayeen
in marka hore magdhow laga bixiyo raggii ku dhintay iska hor imadka, in la
qaybsado maamulka Gobalka, in si cadaalad ah iyana loo qaybsado kheyraadka
iyo canshuuraha ka soo xarooda Gobalka Jubba Hoose. Hesiiska hordhaca ayaa
waxaa si aad ah u soo dhaweeyay dadweynaha ku nool Magaalada Kismaany oo
iyagu ka cabsanayay in mar kale uu dagaal ka dhaco Magaaladaasi, sidoo kale
waxaa dhawaan la filayaa in la isku daro maleeshiyooyinkii kala taageersanaa
Barre Hiiraale oo ah Wasiirka dib u dhiska iyo dib u dejinta Dowladda
Federaalka iyo Col. Cabdi Cigaal kuwasoo la dejin doono Magaalada Kismaayo
duleedka xero ku taal.
Heshiis laga
gaaray xiisaddii ka taagneyd Waajid
Wararka ka imaanaya
Magaalada Waajid ee Gobalka Bakool, waxay sheegayaan in xiisaddii maalmahan
ka taagneyd Magaalada Waajid ee Gobalkaa inteeda badan la xaliyay kaddib
markii ay arrintaani dhex galeen guddi uu Madaxweyne C/llaahi Yuusuf u
magacaabay arrintaan.
Guddiga oo shalay kulamo la yeeshay
odoyaal iyo waxgarad ka tirsan ama uu ka soo jeedo ninkii dhawaan ay
Magaalada Waajid ku dileen ciidamadii laga keenay xerada Kongo ayaa waxaa la
iskula soo qaaday sidii loo qaboojin lahaa arrintaasi, iyadoo Odoyaasha iyo
Waxgaradka ay sheegeen in wixii loo soo go’aamiyo ay qaadan doonaan, taasoo
ay si aad ah u soo dhaweeyeen guddigii dhex dhexaadinta.
Madaxweynaha ayaa horey u sheegay in uu
bixin doono wax kasta oo lagu soo afjarayo xiisaddaasi, taas oo ay si aad ah
u soo dhaweeyeen Siyaasiyiinta iyo Waxgaradka Beelaha Digil iyo Mirifle.
Saddexda
mas’uul ee ugu sareysa Dowladda oo ka shiraya sidii….
Saddexda mas’uul ee ugu
sareysa Dowladda oo kala ah Madaxweyne C/llaahi Yuusuf, Guddoomiye Shariif
Xasan Shiikh Aadan iyo Ra’isul Wasaare Cali Max’ed Geedi ayaa la filayaa in
maanta ay Magaalada Nairobi ay kula kulmaan mas’uuliyiin ka socota urur
Gobaleedka IGAD.
Kulankaasi ayaa la iskula soo qaadi
doonaa sidii loo fulin lahaa go’aanadii dhawaan ka soo baxay madaxda IGAD oo
dhawaan kulan ku yeeshay Magaalada Nairobi, iyadoo qodobka ugu muhiimsan ee
la isla soo qaadi doono uu yahay sidii Soomaaliya loo keeni lahaa ciidamo
shisheeye oo gacan siiya Dowladda Federaalka.
Urur Gobaleedka IGAD ayaa isagu waxa uu
doonayaa in saddexda Mas’uul ee ugu sareysa Dowladda ay isku mowqif ka
istaagaan arrimaha keenista ciidamada, si urur Gobaleedka IGAD ugu fududaato
in Qaramada Midoobey in Soomaaliya laga aado cunaqabateynta hubka.
Shariif Xasan Shiikh Aadan ayaa isagu si
aad ah uga soo horjeeda in Soomaaliya la keeno Ciidamo nabad ilaalin ah waxa
uuna ku xiray in marka hore ogolaansho laga helo Golaha Baarlamaanka, sidoo
kale Ra’isul Wasaare Cali Max’ed Geedi ayaa shaaca ka qaaday maalintii
doraad ahayd in marka hore caalamka uu gacan ka siiyo sidii loo uruurin
lahaa ciidmadii xoogga dalka Soomaaliyeed.
Qaramada
Midoobey oo sheegtay in Soomaaliya u baahan tahay lacag Gaaraysa…
Qaramada Midoobey ayaa
digniin culus ka soo saartay abaaraha iyo biyo la’aant ka jira dalka
Soomaaliya, iyadoo sheegtay in dad gaaraya 2-Milyan oo qof ay qarka u saaran
yihiin Geeri, haddii aan gargaar deg deg ah lala soo gaarin dadkaasi oo
xoogooda ku nool Koonfurta Soomaaliya.
“Haddii aan la helin 320-Milyan oo Doolar
waxaa bil kasta dhimanaya 10-Kun oo qof, sidoo kale haddaan Roob Alle keenin,
waxaa sii kordhaya dhimashada dadka iyo xoolaha” ayaa lagu yiri qoraal ay
soo saartay qaramada Midoobey.
Ilaa iyo Hadda Qaramada Midoobey wax
gargaar ah oo la taaban karo oo ay gaarsiisay dadka ku tabaaleysan gobalada
Dalka Soomaaliya ma jiran, hase yeeshee shacabka Soomaali-yeed ayaa
sanadkaan muujiyay karti iyo dadaal dheeraad ah kaddib marki gurmad baaxad
weyn leh ay la gaareen dadku dhibaatadu ka soo gaartay abaaraha iyo Biyo
la’aanta.
Isbaaro taalay
inta u dhexeysa Muqdisho iyo Baydhabo oo lagula Wareegay.
Wararka naga soo gaaraya
Gobalka Bay waxay sheegayaan in maalintii shalay ahyd Isbaaro tiil inta u
dhexeysa Muqdisho iyo Baydhabo oo loo yaqaanay Isbaarada Qardho ay kooxdii
Dableyda ahayd ee horey u joogtayu kala wareegeen koox kale oo dabley ah oo
xoog ku muquunisay.
Isbaaradaasi oo ahayd mid
si aad ah loogu dhibi jiray dadka, ayaa markii ay dableyda kale la wareegtay
aysan waxba iska bedelin oo sidii ayaa Gawaarida isaga kooshta Muqdisho iyo
Baydhabo looga qaadayay lacagihii.
Kooxdii Isbaarada lagala
wareegay ayaa iyana haatan wadda abaabul ay ku dooneyso in ay dib ula soo
noqoto isbaaradeedii, waxaana markii uu dagaalkaasi dhacayay halkaasi ku
dhaawacmay labo ka mid ah maleeshiyooyinkii horey u joogay halkaaso.
Odoyaasha deegaanka ayaa
dadaal ugu jira sidii loo qabooji lahaa xasaradaasi, waxayna wada hadal la
leeyihiin labada kooxood ee ku dagaalamay isbaaradaasi.
Kal hore ayay ahayd markii
Magaalada Muqdisho lagu kala iibsaday Isbaaro tiilay duleedka Magaalada
Muqdisho, taasoo laga bixiyay lacag aad u fara badna oo la siiyay kooxdii
horey u haystay, waana arrintii ugu yaabka badneyd ee dhinaca isbaaryooyinka
ee ka dhacda dalka.
Cabdi Siyaad
“wax kulan ah oo Isbahaysiga SNA la yeeshay…..
Cabdi Siyaad Xasan Sabriye
oo ah ku simaha guddiga sare ee Arrimaha gudaha SNA ayaa si kulul u beeniyay
warar maalmahan ay faafinayeen saxaafadda oo ahaa in xubno ka tirsan
Isbahaysiga la dagaalanka argagixisada ay filo Soomaaliya kulan kula
yeesheen saraakiil ka tirsa Isbahaysiga SNA, waxa uuna wararkaasi ku
tilmaamay kuwo aan sal iyo raad toona lahayd.
“Isbahaysiga SNA waa
Isbahaysi nabadeed, wuxuuna dhex dhexaad ka yahay dagaaladii dhawaan ka
dhacay Magaalada Muqdisho” ayuu yiri Cabdi Siyaad oo sheegay in isbahaysigu
SNA uu aad uga xumaaday dagaaladii dhawaan ka dhacay Magaalada Muqdisho,
isagoo u soo jeediyay kooxaha dagaalamaya in ay gacan ka hadalkooda ku
dhameeyaan wada hadal iyo is afgarad.
“Isbahaysiga SNA waxa uu
ka soo horjeeda wax la yiraahdo dagaal, mowqifkiisuna waa nabad in lagu wada
noolaado” ayuu yiri Cabdi Siyaad oo taageerayaasha SNA u soo jeediyay in ay
ka wada shaqeeyaan nabadda iyo isku soo dhawaanshaha shacabka.
Markab laga
leeyahay wadanka Kuuriya oo lagu qafaashay….
Iyadoo maalmahan ay
kordhayeen weerarada lagu hayo Maraakiibt isaga gooshta xeebaaha Soomaaliya
ee isugu jira kuwa ganacsiga iyo kuwo Mucaawinada aya maalintii shalay waxay
koox dabley ahi ku afduubteen xeebaha Soomaaliya Markab laga leeyahay
wadanka Kuuriya.
Markabkaas oo ilaa iyo
haatan aan la garaneyn meesha la aaday ayaa haddana warar waxay sheegayaan
in Markabkaasi loo weeciyay dhinaca deegaanka Xarardheere oo horey loogu
haystay Markab laga lahaa wadanka Hindiya oo rar keenay dekedda Ceel-Macaan.
Odoyaal iyo Ganacsato ayaa
dhawaan u ambabaxaya deegaanka Xarardheere si ay u soo furdaamiyaan
Maraakiibta halkaas lagu haysto, maadaama mid ka mid ah maraakiibtaasi uu ka
tagay dekedda Ceel-Macaan uuna u kireysnaa ganacsato Soomaaliyeed oo
badeecooyin keenay dekedda Ceel-Macaan.
W/D: Amiin Yuusuf
Khasaaro.
E-mail:
amiinkhasaaro@hotmail.com
Faafin: SomaliTalk.com | April 6, 2006
Caasha Cabdala
“Cadde Muuse ayaa heshiis la soo Galay Shirkado Maafiyo ah...
»Cali
Geeddi “Afar Shaqsi Dowladdu u xaayirnaanmeyso..
»Isbahaysiga
SNA oo sheegay in ay dhexdhexaad ka yihiin..
»Wafdi
ka socda Beesha Caalamka oo Jowhar ku soo fool leh
»Bashiir
Goobe oo warbixin siiyay Golaha Wasiiradda ...
»Xaaladda
deeganka Majiyahan oo shalay Degeneyd...
»UNICEF
oo ka digtay dhibaato carruurta Oromiya la soo..
»Xaalad
colaadeed oo ka taagan Jaamacadaha Adis Ababa
Wararka oo dhan
ka akhri halkan... Guji... Apr 5