C/llaahi Yuusuf oo gacan qaaday Guddoomiyaha Gobolka Shabeelada Dhexe..

Waxaa kulamo uga soceen labadii maalmood ee ugu dambeysay Magaalada Nairobi ee dalka Kenya madaxda Sare ee Dowladda sida Madaxweyne C/llaahi Yuusuf, Ra’isul Wasaare Cali Max’ed Geedi iyo Guddoomiyaha Baarlamaanka Shariif Xasan Shiikh Aadan, waxayna kulamadaasi ahaayeen kuwo ay albaabadu u xirnaayeen.

Wararka ayaa sheegaya in kulamadaasi si weyn loogu lafa guray habka ama qaabka ay Xukumaddu ugu shaqeyn karto Magaalada Jowhar iyo khilaafka meesha xun gaaray ee u dhexeeya Guddoomiyaha siyaasadda Gobalka Sh/dhexe Max’ed Cumar Xabeebe (Max’ed Dheere) iyo Dowladda Federaalka ah, iyadoo inta badan laga wada hadalku uu ku saleysnaa sidii Dowladda dib loogu celin lahaa Magaalada Jowhar kaddib markii ay Ra’isul Wasaare Cali Max’ed Geedi iyo Max’ed Dheere ay wada hadal ku yeesheen Magaalada Adis-Ababa, Waxaana kulan isaga yimid arrinkaa Madaxweyne C/llaahi Yuusuf,  Guddoomiye Shariif Xasan iyo Ra’isul waaare Cali Max’ed Geedi, iyadoo khilaaf ka taagan yahay qaabka loogu laaban karo Magaalada Jowhar, balse waxay Mas’uuliyiintu isku raaceen in goobaha Xukumaddu ku shaqeyneyso loo daayo Golaha Baarlamaanka.

Dhanka kale waxaa isna Magaalada Nairobi soo gaaray Max’ed Dheere oo ay kulan gaar ah wada yeesheen Madaxweyne C/llaahi Yuusuf Axmed, waxayna si rasmi ah uga heshiiyeen khilaafkii horey u kala dhex maray, waxaana Wasiirka Warfaafinta Dowladda oo wax laga weydiiyay kulanka Nairobi uu sheegay in natiijo wanaagsan laga gaaray oo uuna ku dhamaaday si afgarad ah iyo waji wanaagsan.

Wakiilka Ugaaska Beesha Cayr oo kulan la qaatay Safiirka Mareykanka..

Waxay shalay ku yeeshay Safaaradda Mareykanka ee Nairobi kulan ku yeeshay Safiirka Mareykanka ee Dalka Kenya William Blemy iyo waxgarad iyo siyaasiyiin ka tirsan Beesha Cayr oo uu horkacayo Wakiilka Ugaaska beesha Cayr Ugaas Cabdi Daahir Ugaas Nuur. Kulankaas waxaa la iskula soo qaaday arrimaha Magaalada Muqdisho iyo dagaaladii ugu dambeeyay ee dhawaan ka dhacay Magaalada Muqdisho, safiirka Mareykanka oo halkaasi ka hadlay waxa uu sheegay in Dowladda Mareykanku ay saaxiib wanaagsan la tahay shacabka ku nool Magaalada Muqdisho aysanna dooneyn in ay wax colaad ah dhex maraan Dowladda Mareykanka iyo Shacabka Muqdisho, isagoo sidood kalana ka codsaday Waxgaradka Beesha Cayr ee uu kulanku la qaatay in ay skaashi la yeeshaan Dowladda Mareykanka gaar ahaan Safaaradda Nairobi. Waxgaradkii shirka ka qaybgalay qaarkood oo ka jawaabayay su’aal uu safiirku weydiiyay suuragalnimada in Maxkamadaha Islaamka ee Magaalada Muqdisho ay xiriir la leeyihiin kooxo xagjir islaamiyin ah iyo in ay dhici karto in ay Qatar geliyaan danaha reer Galbeedka ee Geeska Afrika ayaa waxay sheegeen in Maxmadaha Islaamku ay yihiin maxkamado ay dhiseen beeluhu isla markaana ay awoodoodo ay ka hooseeyo sida ay reer galbeedku u buunbuuniyee, waxay kalloo sheegeen in Maxmadaha ay taageeraan ganacsatada, Beelaha, Aqoonyanada iyo siyaasiyiinta waaweyn ee reer Muqdisho sababtuna ay tahay in ay wax ka qabtaan Magaalada Muqdisho. 

C/raxmaan Baadiyow “waa ku ceeb madaxda Dowlada Federaalka..

             Cabdiraxmaan Baadiyow oo ka mid ah  Maamulka Jaamacada Muqdisho oo hadda ku sugan Magaalada Baydhabo ayaa ka waramay sida uu u arko maamul la,aanta ka jirta Magaalada Baydhabo iyadoo mas’uuliyiinta ugu saraysa DFKMG ay ku sugan yihiin waxa uu yiri.

             “Magaalo ay ku nool yihiin  kumanaan dad ah oo ay dowladuna ku sugan tahay, iyadoon wax maamul ah ka jirin waa ceeb, waxayna tusaale u tahay farsamo xumida DFKMG iyo mas’uuliyiinta Baydhabo in aysan awood saarin, waxaana lagama maarmaan ah in la sameeyo labo arimood oo kala ah, In la sameeyo maamul KMG ah oo aan sharci weyn loo fiirin, waxaa kale oo loo baahan yahay xubnaha DFKMG ee deegaanka ka soo jeeda in ay faraha kala baxaan maamul u sameynta deegaanka, mana aha markii gudoonka gobolka la sameynayo inay yiraahdaan igaa wasiiradii ah inagaana Gudoonka gobolka ka shaqaynayno, taasina ma soconayso”.

            Wuxuu sidoo kale ka hadlay maamul u sameynta Magaalada Muqdisho waxa una tilmaamay in sababihii ka hor istaagay maamul ay Muqdisho yeelato ay ugu wacneyd is jiidjiidsha siyaasadeed ee ka jira dalka, gaar ahaan siyaasiyiinta Muqdisho, waxa uu sheegay in maamulka hadda loo dhisay Gobalka uu yahay isku day aad u wanaagsan, haddana waxay ku xiran tahay in uu guuleyso maamulkaan sida ay u taageeraan shacabka ku nool Magaalada Muqdisho.

Beesha Sacad oo go’aan adag ka qaadatay Xaaladda ka taagan..

Maalintii shalay ahayd ayaa Magaalada Muqdisho waxaa shir ku yeeshay Beesha Sacad oo ka mid ah Beesha Habargidir, waxayna shirkaasi kaga hadleen arimihii ugu dambeeyay ee Magaalada Muqdihso, waxayna si gaar ah uga munaaqashoodeen abaabul dagaal oo ay sheegeen in rag ka mid ah beesha Sacad ay ka wadaan Magaalada Muqdisho.

Xasan Maxamuud Jimcaale oo ka mid ah waxgaradkii ka qaybgalay shirkii shalay ayaa sheegay in beeshu ay gebi ahaanba ka soo horjeedo wax colaad iyo dagaal dhalin kar oo laga sameeyo Magaalada Muqdisho, waxa uu sheegay in mas’uul ka tirsan beesha Sacad ay ka wadaan Magaalada Muqdisho abaabul dagaal oo ay ku kala gaynayaan beesha dhexdeeda, taasoo uu sheegay in aysan marnaba qaadan Karin, ayna ka soo hor jeedaan wax walba oo gacan ka hadal keeni kara.

Waxa uu sheegay Xasan Maxamuud Jimcaale in beeshu aysan wax shuqul ah ku lahayn Isbahaysiga la dagaalanka Argagixisada ayna doonayaan in ay nabad kula noolaadaan beelaha kale iyo dadka Muslimiinka ah ee ku nool Muqdisho, waxaana isla shirkii shalay lagu magacaabay Guddi ka kooban taban xubnood oo uu guddoomiye u yahay Axmed Cali Hilowle oo ka shaqeeya isku xirka beesha iyo ka hortaga wixii colaad ka abuuraya beesha gudaheeda.

Xus loo sameeyay maalinta caafimaadka Adduunka ee...

“Waa in aan wadajir ugu shaqeynaa Caafimaadka Bulshada” waa hal ku dhiga sanadkaan ee Hay’adaha ka shaqeeya Caafimaadka, haddaba xus ku aadan 7-da April Maalinta caafimaadka adduunka ayaa shalay agu qabtay xarunta Wasaaradda Caafimaadka ee Dowladda Federaalka, waxaana ka qaybgalay mas’uuliyiin ka socotay Ha’adaha samafalka iyo wasaaradda Caafimaadka iyo dhakhaatiirta.

Xubnihii ka hadlay halkaasi ayaa waxa ka mid ahaa Wasiirka ku xigeenka Caafimaadka Prol. Cumsaan Maxamuud Dufle, Guddoomiyaha Ururka Takhaatiirta Soomaaliyeed C/casiis Xaaji Gacal, Wakiilka Xaafiiska Muqdisho ee Magaalada Muqdisho Maxamed Maxamuuf Fuje, waxayna dhamaantood sheegeen in ay ka go’antahay in ay Soomaaliya kala tacaalaan cudurada kala duwan ee ku habsaday.   

Cumar Xaashi Aadan “Ciidamo shisheeye waan loo baahan yahay laakiin..

Ra’isul Wasaare Cali Max’ed Geeddi oo dhawaan saxaafadda u waramay ayaa sheegay in Xukumadda Federaalka ay muhiimadda koowaad u soo sheegay sidii dib loogu uruurin lahaa ciidanka Xoogga dalka Soomaaliyeed iyo kuwa maleeshiyaadka ah, haddiise ay dabooli waayaan ay Beesha caalamka ka codsanayaan ciidamo nabad ilaalineed ayaa Xildhibaanada Baarlamaanka ee ku sugan Baydhabo ka dhawaajiyeen in ay markasta muhiim tahay in la helo ciidan shisheey oo nabad ku soo dabalida qayb ka qaata.

Xildhibaan Cumar Xaashi Aadan ayaa isna sheegay in marka hore ciidamadii Xoogga dalka la uruuriyo lana howlgeliyo, iyadoo maleeshiyaadkana tababar la siinayo, waxa uuna sheegay in Ciidamo shisheeye haboon tahay in dalka la keeno, balse aan lagu darin kuwo wadamada xuduudda la leh Soomaaliya.

Xildhibaan Cumar Xaashi Aadan ayaa sheegay in muhiimadda kowaad ee ciidanka ay tahay in ay ilaaliyaan goobaha ay Dowladdu ku shaqeyneyso isla markaana muhiimka u ah Dowlada Federaalka, wuxuu kalloo sheegay mar uu u waramayay saxaafadda isagoo ku sugan Baydhabo in ay dhuuban yihiin ciidamadii Soomaaliyeed, balse ay u baahan yihiin in la howgeliyo.

Xildhibaanada Baarla-maanka ee ku sugan Magaalada Baydhabo ayaa iyagu si weyn u iskula dhex marayay hadalkaa ka soo yeeray Ra’isul Wasaare Cali Max’ed Geeddi, inkastoo Xildhibaanadu ay ku kala aragti  duwan yihiin, balse in loo baahan yahay in dood laga yeesho arrinkaa.

Madaxweyne Bush oo xukumaddiisu ay lacag ugu deeqdey Dowlado ay ka mid...

Iyadoo abaar xoog leh ay ku dhifatay sanadkaan Wadamada Geeska Afrika taasoo ay macluul ugu dhinteen dad fara badan isla markaana ay xoolo badani ku le’deen ayaa waxaa soo baxayay qaylo dhaano kala duwan oo beesha caalamka ay ka soo jeedisay wax u qabashada dadkaasi tabaaleysan, ayaa Madaxweynaha Wadanka Mareykanka George W. Bush uu sheegay in xukuumaddiisu ay ugu deeqday 92-Milyan oo Doolar  Dadka ay abaaruhu ku hayaan Wadamada Geeska Afrika si wax loogu qabto.

“Deeqdaan waxaa loogu talagalay in lagu caawiyo dadka ay abaaruhu waxyeeleen ee ku nool gobalka Geeska Afrika” ayuu yiri Scott McClellan oo ah afhayeen u hadley Aqalka Cad ee looga taliyo Mareykanka, isagoo ugu baaqay Dowladaha kale in ay qaadaan talaabo noocaas oo kale ah.

Deeqdaan waxaa qayb ka ah dhaqaale uu horey u qoondeeyay Golaha Congress-ka Mareykanka, iyadoo lagu wareejiyay US AID oo mareykanka ugu xil saaran dhanka isku dubaridka gargaarada.

Warbixin ku saabsan dagaalo dhex maray ONLF Ciidamada Xabashida...

            Jabhadda Wadaniga, Xoreynta Ogaadeeniya xafiikeeda Soomaaliya ayaa soo saartay warbixinadii ugu dambeeyay dagaal dhex maray iyaga iyo ciidamada Itoobiya , waxayna dagaaladaasi ka dhaceeen Jirka oo ka tirsan Gobalka Nogob, Qurac Meydka oo ka tirsan Gobalka Nogob, Qamuuda oo ka tirsan Gobalka Doolo, Dhagax Madow oo ka tirsan Gobalka Dhagax-Buur, Waji Waaji oo ka tirsan Gobalka Qoraxey, Jaleeco oo ka tirsan Gobalka Doolo, Toon Ceelay oo ka tirsan Gobalka Qoraxay, Fiiq, Qurac Meydle oo ka tirsan Gobalka Nogob, wardheer oo ka tirsan Gobalka Doolo, Jinoole oo ka tirsan Gobalka Doolo, Yucub oo ka tirsan gobalka Doolo, Jiilqda oo ka tirsan Gobalka Godey, Haar Cad oo ka tirsan Gobalka Qoraxey, Fool Jeex oo ka tirsan Gobalka Qoraxey, Garbo oo ka tirsan Gobalka Nogob iyo Baraajisle oo ka tirsan Gobalka Qoraxey, waxaana ciidamada xabashida dagaalkaas looga dilay marka la isku daro 155 askri, waxaana looga dhaawacay 171 askari, waxaana laga gubay Gawaari fara badan, waxaana laga furtay hub iyo saanad, waxaana qoraalkaan na soo gaarsiiyay Cilmi Muxumad oo ka mid ah Saraakiisha ONLF.    

 Amiin Yuusuf Khasaaro

E-Mail: amiinkhasaaro@hotmail.com

cabdi khadar Nuur
cabdiqadar84@hotmail.com

Faafin: SomaliTalk.com | April 8, 2006

---

---

“Walaashey si sharci darro ah saddex sano ugu xiran tahay xabsi dalka Yemen”
Sidaas waxaa tiri Sahro Xasan Axmed oo... Guji... Apr 7

Maanta iyo wararka Caalamka | Apr 7

Faysal Axmed Yuusuf oo Ka Hadlay Xaaladda Majayahan | Waraysi Idaacada Australia

---