Maxamed-Qadar Cabdi Maxamed Siyaad (Afgooye).
Faculty of Agricultural Sciences.
University of Gezira. Sudan.
e-mail address: siyaad93@hotmail.com

Run ahaantii erayga"Qabyaalad" oo ah waxa kala dilay ummadda walaalaha ah ee Soomaaliyeed ayaa saameynteeda sii xumaaneysaa haddii ay ku dhex fiddo ardayda dhexdooda amaba ardayda wacdigooda hadda uusan waxba iska beddelin, arrinta murugsan ee waddankana faraha ayey kasii baxeysaa haddii lagu eegto sidaan oo aan loo istaagin wax ka qabashada arrinta murugsan ee waddanka ka taagan oo aan filayo ineyan cidaan aqoonyahaniinta aheyn sugeyso.

Run ahaantii aqoonyahanka Soomaaliyeed ayaa gabay dowrkii ay ummadda uga baahneyd iney cayaaraan oo ah wax ka qabashada arrimaha murugsan,toosinta qaladaadka dhaca maalin walba ama saacad walba iyo jiheynta ummadda oo lagu jiheeyo fikradda qeexeysa dareenka Soomaalinnimo, iskaashiga lagu tiigsanayo meelaha sare iyo waliba iney ummadda Soomaaliyeed soo ceshato sharaftii ay ku dhex laheyd bulshada caalamka oo haatan aan ognahay halka ay taallo.

Dhaqankii awoowayaasheen ayaa waxa uu ku dhisnaa in shakhsiga Soomaaliga ah uu yahay qof isla qab weyn isla markaana aaminsan fikradda ah rag wax la qeybsi taasoo hadda annaga aanan gacanta ku heynin maadaama iskaashiga,wadatashiga,isu tanaasulidda,wax isu quuridda iyo dareenka ah Soomaali asaageed wax ha la qeybsato ay intuba naga wada maqan yihiin.

Ummadda Soomaaliyeed waxaa goob kasta matala rag ayagu aan marnaba u qalmin iney hogaamiyaan ummad oo ayagu laf ahaantood u baahan in la hago oo la tusiyo waddada saxda ah.

Waxaa in la is weydiiyo mudan maadaama ay raggaan hogaamiyeyaasha isku sheegaya ay ku guuleysteen iney shacabka duufsadaan kuna beer laxawsadaan qabyaaladda ayadoo shacabku natiijadeeda u soo joogay muddo dheer, haddaba su'aashu waxa ay tahay maxaa loo waayey inay aqoonyahannadu ayaguna kasbadaan ummadda oo ay ka badbaadiyaan dhibaatada loo horseedayo, ayadoo aan wada ognahay in shacabku yihiin awoodda ay isticmaalaan koox walba oo rabta iney wax jiheyso, marka maxaa qasbay inaan shacabka awooddooda wax loogu qaban oo aan la jiheynin, taasi waxa ay caddeyneysaa mas'uuliyad darro ay muujiyeen aqoonyahanka ama waxgaradka Soomaaliyeed oo aan kasoo bixin halkii looga baahnaa, ummaddana ku eegtay dayac iyo dandarro.

Intaasoo dhan waxaa kasii murugo badan markaad aragto aqoonyahannada badankood oo ku fikrad ah amaba u fekeraya sida hogaamiye kooxeedyada ama aad aragto ardayda oo ah awoodda maskaxeed ee soo koreysa ee shacabka oo ayaguna isku baheysanaya qabiil una kala qoqoban qeybo isku mucaarad ah taasoo kuu sawireysa-ka muwaadin ahaan-saadaal aan qumaneyn oo complex kasii dhigi karta murugada, musiibadana sii badin karta.
Aqoonyahanka ama ardayga maskiinka ee Soomaaliga ah waa  is soo hordhigi karaa oo suureysan karaa halka uu waxqabadkiisa ku ekaan karo marka laga hadlayo wax ka bedelidda xaaladda waddanka, laakiin waxaa iyana in la is weydiiyo mudan ilaa iyo halkee ayey gaari kartaa saameynta ay aqoonyahanku ku dhex yeelanayaan ummadda dhexdeeda ayagoo isku duuban hal mabda'na ku mideysan oo ay u wehliso daacadnimo iyo shucuur waajib gudasho.

Ok. haddii aqoonyahan kasta amaba arday kastaahi u fekero kaligaa maxaad qaban kartaa oo waajibka ku saarani maxuu yahay kaligaa waa inuu sidoo is weydiiyaa hogaamiye kooxeedkaba yaa kaligii u xilsaaray inuu ummadda gacmaheeda ku baabi'iyo,marka fikirkaasu hadduu asal u noqon waayo aqoonyahanka u maleyn maayo in wadcigu wax iska beddelayo.

Waxaan baaq guud u soo jeedinayaa anigoo ku hadlaya magaca ardayda Soomaaliyeed ee University of Gezira ee Sudan oo aan wax badan ka doodnay arrintaan isla markaana isla meel dhignay inaan iskaashi wada sameyno dhammaan walaalaha Soomaaliyeed meel walba oo ay joogaan gudaha dalka ama dibaddiisa si aan u muujinno wax qabad una gudanno waajibka dusha naga saaran oo ay aqoonyahanku uga gaabsadeen inay uga faalloodaan oo kaliya website-yada.

Waan ogahay inay jiraan rag badan oo ay fikraddu ku beeran tahay laakiin arrintu ay la'dahay oo kaliya sideen wax yeelnaa oo ayaduna ku imaan karta wada xiriirid, marka sidaa darteed waxaan rajeynayaa in qof walba oo arrinta sidaan u aragno inoola arka inaan wada xiriino.

                                                                                    ALLAAH towfiiqda hana waafajiyo.

Maxamed-Qadar Cabdi Maxamed Siyaad (Afgooye).
Faculty of Agricultural Sciences.
University of Gezira. Sudan.
e-mail address: siyaad93@hotmail.com