WARAR MAY 3, 2006

• Shariif Xasan “Ra’isul Wasaare Geeddi wax lagu qanci karo ayuu soo hor dhigay Baarlamaanka”..

• Shiikh Xasan Daahir “Ciidamo laga keenay gobol gaar ah ma noqon karaan ciidamo qaran, waxayna fashilinayaan..”..

• Xuseen Caydiid oo la filayo in maalinta beri ah uu soo gaaro Magaalada Baydhabo..

• C/llaahi Macallin “Hay’adaha Caalamiga ah waxaan ugu baaqayaa in ay gargaar la soo gaaraan”

• Iska hor imaad shalay ka dhacay Magaalada Baydhabo…

• Nin dilay Macallin Dugsi Qur’aan oo lagu qisaasay Muqdisho

• Shir ay magaalada London ku yeesheen Jaaliyadda Digil & Mirifle

• Dagaallo dhex-maray ciidammada xoreynta iyo kuwa cadowga.

Nin dilay Macallin Dugsi Qur’aan oo lagu qisaasay Muqdisho

Maxkamadda Islaamiga ah ee Maka Al-Mukarama ee Deegaanka Barmuuda ee Magaalada Muqdisho ayaa waxay shalay dil toogasho ah ku xukuntay gacan ku dhiigle lagu magacaabo Shiikh Cumar Macallin kaddib markii bishii Feebaraayo uu dilay Macallin Dugsi Qur’aan oo la oran jiray Macallin Cusmaan.

Markii ay xukmisay dilka gacan ku dhiiglahaasi ayaa waxaa lagu toogtay meel fagaare ah oo ku taalay fagaaraha Baramuudo waxaana ka soo qaybgalay dadweyne aad u fara badan oo doonayay in ay arkaan sida loo Qisaasayo ninkaasi.

Nin ay walaalo yihiin marxuumkii horey loo dilay ayaa isaga loo dhiibay Toorey kaddibna waxaa loo fasaxay in uu Toorey ku dilo ninkaasi, maadaama uu horey ugu dilay marxuumkii hore, markiibana waxaa gacan ku dhiiglaha lagu dhiftay dhowr nabar ilaa ay naftu ka baxdo, waxaana qisaastaan soo dhaweeyay dadweynaha deegaanka oo sheegay inay wax badan ka tareyso dhinaca nabadgelyada.

Shariif Xasan “Ra’isul Wasaare Geeddi wax lagu qanci karo ayuu soo hor dhigay Baarlamaanka”..

Shariif Xasan Shiikh Aadan oo ah Guddoomiyaha Baarlamaanka ayaa mar wax laga weydiiyay in qaar ka mid ah xubnha Baarlamaanka aysan ku qancin hadalkii Ra’isul Wasaare Geeddi ee ku aadanaa xafiiska ay Itoobiya ka furatay Magaalada Hargeysa ee Maamulka isku magacaabay Soomaaliland ayaa waxa uu Guddoomiyuhu yiri “Ra’isul Wasaare Geeddi waxa lagu qanci karo ayuu soo hor dhigay Baarlamaanka”, waxa uu intaa sii raaciyay “Ra’isu Wasaaruhu waxa uu ka soo hor jeedaa in midnimada Soomaaliya tafaraaruq la geliyo”, sidoo kale waxa uu Guddoomiyuhu xusay in Itoobiya aysan keligeed aqoonsi siin karin maamulka isku magacaabay Soomaalinland, “Itoobiya ma bixiso aqoonsi ee waxaa aqoonsiga bixiya beesha Caalamka oo ay hormuud u tahay Qaramada Midoobey”. Guddoomiye Shariif Xasan waxa uu u soo jeediyay Xildhibaanada aan ku qancin hadalka Ra’isul Wasaare Geeddi in ay baaritaan dheer sameeyaan si ay u ogaadaan xaqiiqda. Wareysi uu horey u siiyay Idaacadda BBC-da Ra’isul Wasaare Geedi ayaa waxa uu ku sheegay in haddii Beesha Caalamka ay aqoonsato maamulka Soomaaliland ay dowladdiisu aqoonsan doonto, waxaana hadalkaasi si weyn uga carooday Shacabka Soomaaliyeed meel kasta oo ay joogaan iyo waliba Xildhibaanada iyo Wasiirada ka soo jeeda Gobalada Waqooyi oo sheegay in Ra’isul Wasaaraha uu wax yeelo gaarsiiyay midnimada Soomaaliyeed. Safaarada Itoobiya ay ka furatay Magaalada Hargeysa ayaa waxay ku tilmaantay in uu yahay Xafiis xoojinaya Xiriirka Itoobiya iyo Soomaaliland, hase yeeshee Madaxweyne C/llaahi Yuusuf Axmed ayaa isagu si weyn uga carooday xafiiskaasi kuna tilmaamay mid wiiqeysa dadnimada iyo isku keenidda Shacabka Soomaaliyeed

Shiikh Xasan Daahir “Ciidamo laga keenay gobol gaar ah ma noqon karaan ciidamo qaran, waxayna fashilinayaan..”..

Shiikh Xasan Daahir Aweys oo ka mid ah Culuma’udiinka Soomaaliyeed ahna aasaasayaashii Maxkama-daha Islaamiga ah ee Magaalada Muqdisho ayaa waxa uu ka hadlay Xafiiska ay Dowladda Itoobiya ka furtay Magaalada Hargeysa, waxa uuna sheegay in xafiiskaasi uu yahay mid la doonayo in lagu baabi’iyo qarannimada Soomaaliyeed iyo jiritaanka Ummadda Soomaaliyeed.

“Itoobiya weligeedba waxay ka soo horjeeday Qaran Soomaaliyeed in uu dhismo, waxaase ayaan daro in aysan weli dareemin dadka maanta Ummadda Soomaaliyeed u haya mas’uuliyadda” ayuu yiri Shiikh Xasan oo sheegay Itoobiya in ay tahay caddowga Umadda Soomaaliyeed.

“Ciidamada laga soo uruurinayo Gobalo gaar ah, waxay keeneysaa in uu fashil iyo burbur ku yimaado Dowladda Federaalka” ayuu yiri Shiikh Xasan oo sheegay in loo baahan in dib loo uruuriyo ciidamadii Xoogga Dalka Soomaaliyeed si ay tababar u siiyaan kooxaha maleeshiyooyinka ah ee aan garaneyn wax la yiraahdo Dowladnimo.

Xuseen Caydiid oo la filayo in maalinta beri ah uu soo gaaro Magaalada Baydhabo..

Warar aanu ka helnay rag ku dhow Xuseen Caydiid kuna sugan Magaalada Baydhabo ayaa waxay sheegeen in Ra’isul Wasaare ku xigeenka ahna Wasiirka Arrimaha Gudaha Xuseen Caydiid la filayo in maalinta beri ah la filayo in uu soo gaaro Magaalada Baydhabo.

Xuseen Caydiid oo mudo dhowr bilood ah ka maqnaa dalka ayaa waxaa la sheegay in uu inta badan uu ku sugnaa Magaalada Nairobi ee dalka Kenya waxaana Magaalada Muqdisho uu ka ambabaxay dhowr kaddib markii weerar qarax loo gaystay Ra’isul wasaare Cali Max’ed Geeddi xiligaas oo ka mid ahaa mas’uuliyinitii soo dhaweyneysa Ra’isul Wasaaraha.

Warar ayaa waxay sheegayaan in Xuseen Caydiid uu gaaray wadanka Sucuudi Carabiya kaddib markii uu martiqaad ka helay wadankaasi, waxayna soo laabashadiisu ku soo beegmeysaa xili uu Magaalada Baydhabo ka maqan yahay Ra’isul Wasaare Cali Max’ed Geeddi, iyadoo la filayo in uu shir-gudoomiyo shirka wasiirada.

C/llaahi Macallin “Hay’adaha Caalamiga ah waxaan ugu baaqayaa in ay gargaar la soo gaaraan”

C/llaahi Macallin Xuseen oo ah Gudoomiyaha Degmada Jilib ee Gobalka J/dhexe ayaa waxa uu sheegay in Tuulooyin ka tirsan degmadaasi dadka deganaa ay haatan la ildaran yihiin cudurka Malaariyada ama Duunyada, kaddib markii dhawaan halkaasi ka da’een roobabkii Gu’ga.

“Dadka oo markii hore la ildarnaa abaaro iyo biyo la’aan ayaa waxaa ugu darmay Duumo” ayuu yiri C/llaahi Macallin oo sheegay in Degmada Jilib ay hoos yimadaan ilaa iyo 97 Tuulo.

Waxa uu sheegay in dadku u baahan yihiin biyo nadiif ah iyo ceelal loo qodo, isagoo sheegay in maamulkiisa intii awooddiisa ah uu gacan siiyay dadkaasi, waxa uuna u soo jeediyay Hay’adaha Samafalka ee caalamiga ah in ay gargaar la soo gaaraan dadkaasi.

Dhinaca kale waxa uu sheegay in maamulka degmada uu dhigay gogol lagu dhameynayo dilkii C/qaadir Ciise Fara-Cadde oo ka mid ahaa Shaqaalaha Hay’adda DBG, isagoo sheegay in wada hadaladaasi ay haatan marayaan meel aad u wanaagsan waxa uuna sheegay in maamulka Degmada uu aad uga xumaaday dilka ninkaasi.

Iska hor imaad shalay ka dhacay Magaalada Baydhabo…

Wararka naga soo gaaraya Magaalada Baydhabo waxay sheegayaan in maalintii shalay ahayd bartamaha magaalada Baydhabo uu iska hor imaad ku dhex maray maleeshiyo ka tirsan ilaalada Madaxweyne C/llaahi Yuusuf Axmed iyo maaleeshiyo iyana deegaanka ka tirsan, waxaana iska hor imaadkaasi la xaqiijiyay in ay ku dhaawacmeen afar ruux oo uu ku jiro wiil yar .

Iska hor imaadkaas ilaa iyo hadda lama oga sababihii uu ku bilowday, balse warar ayaa waxay sheegayaan in Maleeshiyada Madaxweyne C/llaahi Yuusuf Axmed gaari ay wateen uu biyo wasaq ah ku sareyriyay kooxo maleeshiyo ah oo fadhiyay meel biibito ah, taasoo ay is aad ah uga caroodeen kaddibna ay rasaas is weydaarsadeen, warar kale ayaa waxay sheegayaan in kooxda gaariga wadatay ay ka shikiyeen kooxda maleeshiyada ah ee meesha fadhiyay in ay gaariga ka dhacaaan, waxaana markii dambe soo kala dhex galay guddiga Nabadgelyada ee Magaalada Baydhabo oo uu hogaaminayo Aadan Saransoor.

Ma ahan markii ugu horeysay oo uu Magaalada Baydhabo iska hor imaad ku dhex maro maleeshiyooyinka deegaanka iyo kuwa Madaxweyne C/llaahi Yuusuf Axmed, iyadoo lagu waramay in haddii aan xal loo helin iska hor imaadyada noocaan oo kale ah ay keeni karto in ay faraha ka baxdo nabadgelyada Magaalada Baydhabo.

W/.D: Amiin Yuusuf Khasaaro
E-Mail: amiinkhasaaro@hotmail.com