WARARKII MAY 22, 2006
-
Avv. C/llaahi Daahir
Barre “Sharciyan Ra’isul Wasaaraha ayaa xaq u leh...”
-
Xiisaddii u dhexeysay Ra’isul Wasaare
Geeddi iyo Maamul Gobaleedka Puntland oo..
-
Odoyaal ka soo jeeda Deegaana
Toor-Toorow oo ka cosaday Hay’adaha...
-
Dagaalo goos goos oo weli ka socda
Magaalada Muqdisho..
-
Guddiga dhex- dhexaadinta oo soo
dhaweeyay Tiknikadii loo celiyay Max’ed Dheere..
-
Qaar ka mid ah Xildhibaanada
Baarlamaanka oo sheegay inay ka hor-imaan doonaan..
- Tartankii Kubadda Cagta ee xagaaga
oo si rasmi ah uga bilowday Helsinki, Finland
Avv. C/llaahi Daahir Barre
“Sharciyan Ra’isul Wasaaraha ayaa xaq u leh...”
Waxaa noo
suurtagashay in aan wareysi la yeelanayo xeer ilaaliyaha guud ee Qaranka
C/llaahi Daahir Barre, waxaana wax ka weydiinay cidda xaqa u leh in ay xilka
ka qaado Wasiirada Hubeysan ee maalmahan dagaalka ka wada Magaalada
Muqdisho, isagoo arrintaasi ka hadlayana waxa uu yiri “waxaa xaq u leh in uu
xilalka ka qaado Ra’isul Wasaare Cali Max’ed Geeddi, waayo Dowladdiisa ayay
ka mid yihiini, xildhibaannimadana waxaa ka qaadi kara Golaha
Baarla-maanka”.
“Waa arrin
qalad ah in Wasiiro ka tirsan Dowladda ay galaan dagaal aysan ogeyn dowladda
federaalka” ayuu yiri Avv C/llaahi Daahir Barre oo sheegay in loo baahan
yahay in arrimaha noocaana iyana la ogeysiiyo Maxakamadda sare.
Ra’isul
Wasaare Cali Max’ed Geeddi ayaa todobo maalmood u qabtay wasiirada hubeysan
ee dagaalada ka wada Magaalada Muqdisho inay ku soo xaroodaan Magaalada
Baydhabo, ilaa iyo haatanna ma jirto wasiir ka hadlay go’aanka Ra’isul
Wasaaraha marka laga reebo Muuse Suudi Yalxow oo sheeegay in uusan wax xil
ah u hayn dowladda.
Xiisaddii u dhexeysay Ra’isul
Wasaare Geeddi iyo Maamul Gobaleedka Puntland oo..
Waxaa maalinba maalinta ka
dameysa sii xoogeysanaya xiisaadii u dhexeysay Dowladda
Federaalka ee uu Ra’isul Wasaaraha ka yahay Cali Max’ed
Geeddi iyo Maamul Gobaleedka Puntland taasoo la xiriirta
shidaal la doonayo in laga baaro maamulada Puntland.
Shir ay yeesheen Golaha
Wasiirada Maamul Gobaleedka Puntland ayaa waxaa looga hadlay
hadalkii ka soo yeeray Ra’isul Wasaare Geeddi ee ahaa in aan
wax shidaal ah laga qodi karin gobaladaasi, waxyana
Wasiiradu gebagabadii shirkooda ku sheegeen in ay
kalsoonidii kala laabteen Dowladda Federaalka.
“Inta uu Dowladda Ra’isul
Wasaaraha ka yahay Cali Max’ed Geeddi marnaba lama
shaqeyneyo xitaa dowladdiisu kama howlgali doonto maamulka
Puntland” ayaa lagu yiri war ka soo baxay Golaha Wasiirada
ee maamul Gobaleedka Puntland.
Maamul Gobaleedku waxa uu
sheegay in howsha shidaal qodida ay sii wadi doonaan isla
markaana aysan dheg jalaq u siin doonin hadaladii ka soo
yeeray Ra’isul Wasaare Cali Max’ed Geedi, iyagoo ku
tilmaamay Ra’isul Wasaaraha nin aan dooneyn in dalka horumar
uu gaaro.
Warqad uu soo saaray Gen. Cadde Muuse ka akhri halkan....
Odoyaal ka soo jeeda
Deegaana Toor-Toorow oo ka cosaday Hay’adaha...
Odoyaasha, Culama’udiinka
iyo Waxgaradka ka soo jeeda Deegaanka Toor-Toorow ee Gobalka Sh/hoose ayaa
qoraal ay soo gaarsiiyeen Wargeyska waxay ku sheegeen in Deegaano fara badan
oo hoos taga Toor-Toorow ka jiraan xaalado adag oo nololeed, taasaoo soo
food saartay dadka iyo duunyada ku dhaqan Deegaanadaasi.
Waxgaradku waxay
qoraalkooda ku sheegeen in Tuulooyinka kala ah Toor-Toorow, Baadle,
Macallimu, Cabdulle Gaabane, Cali Guble, Buulo Kutub, Cambarow, Mooyanow,
Bolo Idow, Garas Tolob, Garas Shaare, Fool Gaab, Mareerey, Bangaduud, Dhobey
Golol Dheere, Falayley, Iraley, Gaaldhere, Galdhere Yarey, Kowlow iyo Mooro
Kuwaar ay ka jiraan biyo la’aan, baad la’aan iyo Dawo la’aan, waxayna
waxgaradku ka cosadeen Hay’adaha Deeqda bixiya iyo kuwa samafalka in ay
gargaar la soo gaaraan dhamaan tuulooyinkaasi oo ay sheegeen in ay halis ku
jiraan sida ICRC oo ay sheegeen in iyadu horey uga qoday deegaanadaasi Waro
Biyood. waxaana ka mid ahaa Odoyaasha iyo Culimada ku saxiixnaa qoraalkaan
Sh. Cabdi Xaaji Xasan Mad Kadil, Gaabow Bulle Xasan, Aadan Guure Barrow,
Xaaji Cadde Xaaji Xaan, Sheekh Ibraahim Cabudle iyo kuwo kale.
Dagaalo goos goos oo weli ka socda
Magaalada Muqdisho..
Waxaa deegaanka Sii-Sii
weli ka socda dagaalo goos goos ah oo u dhexeeyay Midowga Maxaakiimta
islaamiga ah iyo Isbahaysiga la dagaalanka Argagixisada, waxaana dagaalkaasi
la sheegay in ay ku dhinteen dhowr ruux dhowr kalana ay ku dhaawacmeen
kuwaasoo ay u badnaayeen dad rayid ah oo ay rasaastu ugu tagtay guryahooda.
Inkastoo Xabad joojin dhex
martay haddana weli sidii ay labada dhinac rasaasta isu weydaarsanayaan hase
yeeshee guddiga dhex dhaaxinta labada dhinac ayaa waxay sheegeen in
dagaaladaasi gooska gooska ah aysan waxba u dhimeyn heshiiskii xbaad
joojinta, waxay kalloo sheegeen in maalmaha soo socda si rasmi ah loo kala
qaadi doono ciidamada, hase yeeshee Max’ed Cumar Xabeeb (Max’ed Dheere) oo
ka mid ah Isbahaysiga ayaa waxa uu sheegay inuusan marnaba xabad joojin la
geli doonin waxa uu ugu yeeray kooxaha Argagixisada ah.
Guddiga dhex- dhexaadinta oo soo
dhaweeyay Tiknikadii loo celiyay Max’ed Dheere..
Guddiga dhex dhexaadinta
dhinacyada isku haya Magaalada Muqdisho ayaa si weyn u soo dhaweeyay
Tiknikadii iyo hubkii kale ee dib loogu celiyay Max’ed Cumar Xabeeb (Max’ed
Dheere).
Shirkadda Banaadir ciidamo
ka socday ayaa dhawaan waxay weerar ku qaadeen bar koontarool oo ku taala
deegaanka Maxaay ee Degmada Warsheekh ee Gobalka Sh/dhexe kaddib markii
halkaasi dagaalo ku dhex mareen maleeshiyo daacad u ah Max’ed Dheere iyo
kuwo ka socday Abuukar Cumar Caddaani kuwasoo Max’ed Dheere kala wareegay
gaari Tikniko ah iyo hub fudud, waxayna guddiga dib u celinta hubkaasi ku
tilmaameen mid wax ka tareysa isku soo dhawaanshaha dhinacyda ku dagaashan
Muqdisho.
Qaar ka mid ah Xildhibaanada
Baarlamaanka oo sheegay inay ka hor-imaan doonaan..
Iyadoo
Maalintii shalay ahayd Golaha Wasiirada ay isku raaceen in dalka la keeno
ciidamo Shisheeye oo ka socda qaar ka mid ah Wadamada IGAD iyo Midowga
Afrika ayaa haddana mar aan arrintaani wax ka weydiinay qaar ka mid ah
Xildhibaanada Baarlamaanka sida ay u arkaan go’aankaasi ayaa waxay sheegeen
in aysan marnaba aqbali doonin, waayo ayay yiraahdeen waa mid Soomaali u
horseedaya dhibaato iyo dagaalo hor leh.
Caasha Axmed
Cabdala oo ka mid ah Xildhibaanada Baarlamaanka kana soo horjeeda in dalka
la keeno ciidamo shisheeye ayaa waxa sheegtayin Dowladda Federaalka looga
baahan in ay dib u uruuriso ciidankii Xoogga dalka Soomaaliyeed, kuwaas oo
ay sheegtay in ay ku filan yihiin nabadgelyada dalka. Qarashka ku baxaya
ciidamada Shisheyee, “waxaa haboon in loo weeciyo ciidamada xoogga Dalka
Soomaaliyeed” ayay tiri Caasha Axmed Cabdala oo sheegtay in ciidamo dalka ay
ka horeyso in dalka laga qaado cunaqabateynta hubka.
Madaxweyne
C/llaahi Yuusuf Axmed ayaa dhawaan mar uu kulamo la yeeshay qaar ka mid ah
wadamada IGAD waxa uu ka codsaday in ay u howlgalaan sidii Soomaaliya looga
qaadi lahaa cunaqabteynta hubka waayo waxa uu sheegay in Soomaaliya ay u
baahan tahay ciidamo shisheeye oo hub ka dhigis ku sameeya kooxaha
Soomaaliyeed. Haddaba Dowladda Federaalka waxaa looga fadhiyaa sidii
go’aanka ay qaateen u marsiin lahaayeen golaha Baarlamaanka oo ah hay’adda
ugu sareysa ee ogolaan karta in soomaaliya la keeno ciidamo shisheeye.
W/D: Amiin Yuusuf Khasaaro
E-Mail:
amiinkhasaaro@hotmail.com
WAR CAYAARAHA
SOOMAALIDA EE HELSINIKI
Tartankii Kubadda
Cagta ee xagaaga oo si rasmi ah uga bilowday
Helsinki, Finland
21-May 06 Waxaa Maanta
si rasmi ah albaabada loogu furay tartankii kubadda
cagta ee xagaaga oo sanadkiiba mar la qabto, aynaa
soo qaban qaabiyaan Ururada Cayaaraha dhalinyarada
Soomaliyeed ee waddankan Finland.
Tartankaani waxaa
sanadkan si wada jira u soo qabanqaabiyay Ururada
kala ah :Ururka Dhaqamada iyo Cayaaraha ee FC-Soomaaliya
Iyo Ururka Dhalinyarada Soomaaliyeed ee Kanava.
Waxaa ka soo qaybgalay xafladdii furitaanka marti
sharaf iyo Dadwayne aad u fara badan oo ka kala
yimid Gobolada dalkan Finland , sidoo kale waxaan
iyana goobta ka muuqday rag ka mid ahaa
ruugcadaagii ciyaaraha Soomaaliya kuwaasoo jagooyin
muhiim ah ka soo qabtay arimaha isboortiga
Soomaaliyeed sida macalin tababare ah ama
Xiriiradii kala duwanaa ee Wasaaradii Sportiga iyo
dhalinyarada ee Soomaliya .
Ugu horayntii waxaa
halkaa ka hadlay gudoomiyaha ururka Spoortiga Axmed
Imad oo ka hadlay ujeedada kulankan waxaana uu ku
wareejiyay makrafoonka Tababare Ibraahim Jumcaale (Buruko)
oo sheegay in ay muhiim tahay in laga faa’iidaysto
ciyaarahan iyo in la ogaado Sportigu macnaha uu
xanbaarsan yahay ee uu bulshada ugu fadhiyo gaar
ahaan dhalinyarada oo uu gudoomiyuhu carabka ku
dhuftay in ay haystaanfursad fiican oo wax walba
oo isboorti la xiriira ay u dhan yihiin sida:
Garoomada arimaha caafimaadka , qalabkii spoortiga
iyo dhaqaalihii iyo waliba waxwalba oo qofka
cayaartooyga looga baahnaa, waxaana loo baahan yahay
ayuu yiri Tababare Buruko in laga faaiidaysto oo
wax la taro dalkan aanu ku nool nahay iyo dal keeni
Hooyo ee lama huraanka ah. Wuxuuna Ku baraarujiyay
in lala yimaado cayaar nadiif ah oo ka farxisa
macalimiintooda iyo bulshoweynta daawanaysaba. waana
inaad ogaataan buu yiri in macnaha cayaaruhu yihiin
jir caafimaad qaba oo aan cadwtinimo Lahayn.
Maxamed Diiriye oo isna ka socday (Ururka Soomaali
Liito) Ayaa halkaasi Ka hadalay sheegayna In loo
baahan yahay in Umaddu isku duubnaato oo wax wada
qabsato . Maxamed Diirye oo hadalkiisa sii wata
waxaa uu yiri :waxaanu joognaa Dal shisheeye waana
loo baahan yahay in laysu yimaado oo howalahan oo
kale loo horseedo bulshada, lana badiyo kulamada
Cayaaraha si ay dhalinyaradu isu bartaan halkii ay
ka aadi lahaayeen meelaha xun xun.
Sidoo kale waxaa
isaguna halkaas ka hadlay Abdulqaadir M.Elm
i(Garsoore) oo isaguna ka waramay muhiimada
Garsoorku leeyahay,waanan ku dadaalaynaa kaalinteena
xaga Garsoorida in kastoo Mas’uulku uu la kulmayo
eedo haduu saxan yahay iyo hadii uu khaldan yahayba,
ilaahayna waxaan ka baryaynaa ayuu yiri in uu noo
fududeeyo.
Waxaa iyaguna goobtaasi ka hadlay Macallimiinta kala
ah Macallin Bashiir iyo Macallin Maxa’ed Cali (Yaanyo)
oo ka warbixyay spoortiga iyo faa’iidadiisa.
Intaa Kadib waxaa la guda galay Cayaarihii ugu
horeeyay ee tartankaWaxaa wada cayaaray Maanta oo
Sabtiya Afar kooxood oo kala ahaa :-
FC-Golis Iyo FC-Espoo Iyo Waliba FC-Soomalia Iyo
FC-Salama
Ugu Horayntii waxaa Fooda isdaray FC-Golis iyo FC-Espoo
Waxaana ay guushii raacday kooxdii FC-Espoo oo ku
adkaaday 2-0 kadib markii ay u saxiixeen Saciid iyo
Saabid oo labaduba ka cayaarayay Qadka Dhexe.
Sidoo kale waxaa wada cayaaray FC-Somalia Iyo FC-Salama
waxaana ay Guushii raacday kooxdii FC-Somalia oo ku
adkaatay 4-0 markii loogu Awood sheegtay kooxdii ku
cayaaraysay magaca FC-Salama . Kooxda FC-Soomalia
Waxaa goolasha u dhaliyay C/salaan Dhuubow oo u
saxiixay Sedex Gool halka Goolka Afaraad uu saxiixay
Maxamed Yare Cayaarihii shalay Sidaas ayaa lagu soo
gabagabeeyay .
Waxaa maanta oo Axada Wada Cayaaray kooxaha
FC-Safari Iyo FC-Sompel Kuwaasi oo Cayaar aad u
wanaagsan u muujiyay dadwaynihii u soo daawasha
tagay , iyadoo ayna aad uga heleen, jawiguna sidii
shalay waa uu kawanaagsanaa oo shalay hawada ayaa
yara qaboobayd , roobna waa uu da’ayay. Ciyaarta
qaybteedi danbe ayaa waxaa u suurta gashay kooxdii
FC-Sompel ay guushii ku raacday 2 iyo 0 halka kooxda
FC-Safri aysan waxba keensan Waxaana goolasha FC-Sompel
u saxiixay cayaar yahn Abshir yare oo qadka dhexe ka
cayaara . Runtiina waxa ay ku soo gabagaboowday
jawi aad u qurux badan oo degan oo xaga garsoorkuna
aad uu u wanaagsanaa .
Isku aadka Cayaaraha
20.05.06 FC.-Golis VS FC-Espoo
20.05.06 FC-Somalia VS FC-Salama
21.05.06 FC-Pikku Huopalah VS FC-Turku
21.05.06 FC-Safari VS FC-Sompel
27.05.06 FC-Salama VS FC-Tampe
27.05.06 FC-Turku VS FC-Vaanta
28.05.06 FC-Kanus VS FC-Golis
28.05.06 FC-Shabaab VS
FC-Safari
03.06.06 FC-Tampera VS
FC-Somalia
03.06.06 FC-Vantaa VS FC-Piku
hu
04.06.06 FC-Espoo VS FC-Kanus
04.06.06 FC-Sompel VS FC-Shabaab
17.06------------------------ 18.06.06 Waa is reeb
reebkii 8 kooxood ee soo baxda.
Semifaanalka ayaa wuxuu noqon doonaa 24.06.06 .
Finaalkuna waxa uu noqonayaa 01.07.06 oo ku aadan
isku darkii goboladii Soomaaliya ee Waqooyiga Iyo
Koonfurta iyo calansaarkii Jamhuriyada Dimuqraadiga
Soomaaliya
mseraar dahir |
musseseraar77@hotmail.com | Radio Warsan
Faafin: SomaliTalk.com | May
22, 2006
Shirkadda Terry oo
ku Guulaysatey Iska Horkeenidda Geeddi iyo Cadde Muuse
Madaxweynaha DGPL ayaa shaaca ka qaaday in uu kalsoonidii kala laabtay
Ra'iisul wasaaraha DFKMG kaddib markii..
Guji....
Ciidammada Gumaysiga oo haweenay ku toogtay magaalada Sagag.
»Jaaliyadda Ogaadeenya
ee Australia oo shiraray....
»Amnesty International oo Itoobiya ugu baaqay inay..
»Qaramada Midoobey oo ku baaqday in la joojiyo dagaalka..
Wararka oo dhan ka akhri halkan... Guji...