Maqsuud:
Maashaa-Allee Sow Muqdisho Lama Mushaaxaayo!
Inj.
Maxamed Cali Cibaar
Delft, The
Netherlands
Mohamed_ebar@hotmail.com
Gabayga Maqsuud oo
ka warramaya isbeddelladii dhowaan ka dhacay magaalada Muqdisho iyo
gobollo kale, wuxuu soo baxay 28kii Ogoosto 2006da. Maqsuud, wuxuu daba
socdaa gabaygii
Murugo oo isna soo baxay saddex bilood ka hor kaasoo qayb ka ahaa
warqad furan oo aan u diray shacabka ku dhaqan magaalada Muqdisho 28kii
May, 2006da, cinwaankeedu ahaa
Inta Tabar La Hayo, Talo Ha La Yeesho .
Sagaashan maalmood
ka hor, waxay ahayd xilli muslimiin iyo gaalaba ay dadku la
amakaagsanaayeen ficilladii gurracnaa ee dagaal-oogeyaashii laga eryay
Muqdisho iyo agagaarkeeda. Dilkii iyo dumintii waxaa ka sii xanuun batay
ku digashada iyo ku daacdaacsiga danyartii ay Qabqableyaashu
dabargoyntooda doollarka ku soo qaateen.
- Maqaraaruf
ceebeedka iyo mahadhadaan taagan
- Macangagnimo
lagu faano iyo maati baan laynay
- Muqdishaba
qofkii minid maqlaa waa matagayaaye
- Waxa dambi
makaankeenna yaal Mushrik ka qiirooye
- Majuustiina
nala yaabtay iyo Mulxidkii gaalaade
- Xoolaha
macaac lihi gar u leh iney mahmaahaane
- Geedaha la
maagana maxkamad muddac u aadaane
- Haddaan
Mowlahey noo naxeyn midi ma joogeene
- “Yaa
ii muslim ahey”
haddey maanta maad noqotay
- Oon
qabyaalad moodeyno weli iney macaash keento
- Quluubtiina
ay mirirsantahay waa mashaqo weyne !
Murugo muddo kooban
ah, waa wax uu inta badan bani’aadmigu soo maro, laakiin arrinka
mashaqada ahi waa in quluubta oo mirirsan weligeed mashaakil iyo
musiibo u joog la ahaado, Mowle ayaan ka magan galnaye.
Sida uu Quraankeenna
Kariimka ahi noo sheeegay; Alle ma dooriyo qoom aan isagu is doorinnin.
Waa in xalka badbaadada laga doono halka ay Rabbi (swt) iyo Rasuulkiisu
(scw) noogu tilmaameen iyadoo lala imaanayo dadaal iyo dulqaad badan.
- Nabad baa
macaan lehe haddaan odayo muuneynin
- Haddaan wiilal
marrasta u naxaa carriga maansheynin
- Maryamiyo
haddii aaney kicin Muxibbo qiireysan
- Maqrib iyo
haddaan mashriq gilgilan meel kastoon joogno
- Yaa maali
jirayey haddey muranka noo doorin
- Oon mici ku
dhiigliyo la didin inta mariid halaq leh
- Miciinsiga
afmiishaar haddaan saaka laga maarmin
- Haddaan midigtu
bidix muujinnoon talo la maareynin
- Shacabkuna
dhammaantii mintidin midnimo waa guule
- Macbuudkow
haddii aan la dhihin magani waa taada
- Oon
dardaarankii Muxamed(SCW) iyo muuqan taladiisu
- Nala muudsayoo
marannayoo nala madoobeeye
- Waa murugee
wahe yaa u maqan magaci Soomaali ?!
Gabaygii
Murugo
Alle Weyne ayaa mahad
leh, waxaa maanta isbadalay wax la yaab leh ! Muqdisho oo ahayd meeshii
ay ka jirtay musiibadii Soomaaliya ugu ba’neyd ayuu maalmo gudahood ka
dhacay isbedel wanaag doon ah oo nacab iyo nasteexba ay wada qireen.
Mucjiso!
Inkastoo aan si aad ah
uga xumahay in weli dad badan oo Soomaliyeed ay ku dulmayihiin dalkii
gudihiisa iyo dunida daafaheeda kala duwan, haddana farxad weyn ayay ii
tahay inaan shacabka Soomaaliyeed kala qaybqaato raynraynta ay ku jiraan
iyo sida maqsuudka leh ee ay u soo dhoweeyeen isbeddelkii ka dhacay
magaalo madaxdii waddanka ee Muqdisho. Dareenkeyga ku aaddan
isbedelladii ka dhacay magaalada Muqdisho iyo waliba gobollo kale ayaan
jeclahay in aan ku soo koobo gabayga Maqsuud oo soo baxay taariikhda kor
ku xusan.
- Magacaada
Mowlow haddaan maanso ku billaabo
- Mu’min kuu
cibaadeysta iyo Mulxidka gaaloobay
- Majuus iyo
Masiixiyo Yuhuud maaro loo waayay
- Iyo kii
Munaafaqa intuba kaama maarmaane
Inuu Musdafe Nabigaadi yahay aaminkii Muxamed (SCW)
- Adiguna
Macbuudkeenni tahay waa midaan qiraye
- Mulkigaadu
weynaa Rabbiyow doqon uun baa mooge.
-
- Midabkoodu
waayaha adduun gelinba waa muuqe
- Waa murugo
mar ay kuu tihiyo maalin faraxeede
- Dhaaxaan
ayaan maahsanaa sida majnuunkiiye
- Dhaaxaan
manfacii quudka iyo muufadii nacaye
- Dhaaxaan
maskaxda shiilayoon mariyay suugaane
- Dhaaxaan
digniin meela iyo miisay waanadaye
- Mas’alooyin
dhaaxaan rogrogay mustaqbalkeenna ahe
-
- Maalik weynow
dhaaxaan ducada Yaa Mannaan iriye
- Muuqaalkii aan
filanayoon muddada dhowraayay
- Ma la gaaray
meeshaan rabiyo waxan maleynaayay?
- Ma
gilgilatay magaaladii ba’daye nacabku miineeyay?
- Inuu
shacabku wax maquunin karo maanta ma caddaatay?
- Nimankii
musiibada ahaa sow ma liqin moolku?
- Mowjado
rogmada sow ma helin maanyo hirarkeedu?
-
- Nabsigii
mijaha sow ma qaban miigna uma taagin?
- Sow maro-daf
lama eedin iyo mudullo baarbaarad?
- Sow lama
matagin doollarkii marrasta loo laayay?
- Sow ma
mirqin mid kireysan iyo macangag yaahuu ah?
- Mooryaantii
sow lama qabqaban macashu dheeraatay?
-
Maandooriyiyo sow ma bi’in munkarkii faafaayay?
- Meles
meeshuu soo muudi jiray sow iskama moosin?
-
- Malqabadda
kuwii dafi jiriyo macawis duugowday
- Markii jirri
marqaan waalay iyo Murux la raacdeeyay
- Marinadii ay
tuugadu xirtee looga kala maagay
- Sow
dariiqyadii lama marmaro mirir bir loon oollin?
- Sow
jidgooyadii lama masixin meherad qaar mooday?
- Sidii maalin
ciideed dadkoo farxad la muusooday
- Maashaa-
Allee sow Muqdisho lama mushaaxaayo?
-
- Maangaabkii
la hubeynayee mindiyo loo dhiibay
- Ee maxastay
dabargoynayeen lagu masruufaayay
- Waa mahade
Mukulaal madow sow macaluulin?
- Madaarkii
diyaaradaha iyo meeshii laga quustay
- Dekeddii
maraakiibtu sow maal ka rogi meyso?
- Maatidii la
dhibay sow Cabdow leyri mari mayso?
- Dhagaheennu
waxa ay maqlaan sow mashxarad ma aha?
-
- Middii uu
Ilaahey na faray meel u wada jeesad
- Muwaafaqadu
iney guul tahaan dhaar ku marayaaye
- Miraheedi
waa taa la guran maalmo gudahoode
-
Mashaa’ikhdiyo sow culimadii la marxabbeyn maayo?
- Sow
masaajiddii lama cammirin mowlacyadii diinta?
- Cadowgii na
maagmaagi jiray sow madluun ma aha?
- Annaguna
Maqsuud sow ma ahin muranku waa ceebe?!
-
- Bulshayahay
miskiin baad ahayd marag Ilaaheeye
- Mashaqadu
markeey kugu dhacdayeed meehannaabaysay
- Colaad waa
musiibee markey xaajo kaa murugtay
- Waa lagugu
maadsaday adoo meyd ku hoos yaalle
- Mucaawino
ifkaan laguma arag madfac la tuura ahe
- Mallaariyada
waa yaab la yiri Mootarkow roone
- Micnihiisa
garo Miin dhibco leh waan maldahayaaye ?!
-
- Mabda’ beena
iyo maal adduun malafsi aan raagin
- Adigoo
mashquul ku ah murdinta malas ku hoos taalla
- Yaa lagu
muraaddeyn lahaa waadse moogtahaye
- Dhulkey maqashu
kuu daaqdo iyo beerihii mooska
- Milkigiisa
waxa loo tartamay meeshad huruddaaye
- Haddaan maya
Ilaahey dhaheen mandaqaddoo iibsan
- Marti inaad ku
noqon layd adaa ii marqaati ahe !!!
-
- Maantana
halkaad gaartayee laga maseyraayo
- Muruq laguma
keenine Allaan mahadineynaaye
- Muluqmuluq
iyadoo aan la galin talo ma-dhaafaan ah
- Waxba yaan
maqaarsaar la shirin maahsaniyo tuuge
- Waxba yaan
mariid nalagu dhihin waa macaanyahaye
- Waxba yaanan
marinkii la dedin guusha loo maraye
- Rabbi magane
aan malabsannee Musxafka taageera.
-
- Mooskiyo
Mareykan ma rabaan Yurub ma yeeleyso
- Waa mataatac
hadalkiisa iyo sheeko maraxeede
- Waan
madaxbannaannoo maxmiyad ma ahin tooda ahe
- Iyaguba
waxay maagganyihiin waw muhiim sir ahe
- Munaaqishana
kama yeelannoo waa mamnuuc abide
- Waxba yaan
Malyuun deeq ah iyo layna siin maale
- Ninba waa
middiisee war aan teenna meel marinno
-
-
Mu’aamaraddii ay nala rabeen iyo muraadkoodii
- Marxabbiyo
markii aan ku niri maafiyoy yeelnay
- Mujrimiinta
kuwii noo xulee mirayay hoygeenna
- Midkii naga
dhaqaaqaba qolyihii gooyay madixiisa
- Marwooyinka
kuwii laayayee mudaneyaal dooxay
- Miimii
qofkii wali u lihi weyska maac yiriye
- Muslinnimadu
waa xaqe mintida Macmalka yeelkiise.
-
- Masaaliix in
la is dhaafsadaa waa mubaax duniye
- Ha yeeshee nin
qaan kaala maqan oo mag kuu diiddan
- Oo wali
magliyo soo watoo ku leh mar ii seexo
- Miyir ruux
leh waa waxanan qaban sidan maleeyaaye
- Dad maquuno
lagu maalo oo dhaqankii maarreey leh
- Maxbuusiin
inaannaan ahayn mooro ugu owdan
- Haddey nimanku
maan leeyihiin saaka yow meersha.
-
- Inkastoon
mas’uul nahay isagaa kownkan maamulaye
- Qaaddirka
haddaan magan galloon maqalno qowlkiisa
- Haddaan noqonno
Muslimiin dhaboo sunnaha maamuusa
- Waa mugdi
qabyaalade haddaan meel isaga tuurno
- Midnimaa wanaag
lehe haddii aan la kala miirmin
- Haddii masaska
aan didinno iyo mici ku dhiigloo dhan
- Hadduu maanku
taliyoo la naco muhallig qowsaar ah.
-
- Midkanaa i xiga
iyo haddaan mudmudka reer dayno
- Haddii kii
maslaxaddeena wada aan mudnaan siinno
- Haddaan xilku
wax nacas muudsadiyo noqonnin maaweelo
- Oon sida
macaashkii la dhuran hanti malaayiin ah
- Caddaaladdu
haddey muuqatoo xaakin miisaamo
- Muxibbiyo
kalgacal inuu imaan waa mid aan hubeye
- Inuu muuqan
magaceenni dhumay waa midaan hubaye
-
- Ma hubeysnid
inaan la is lahayn waa mid aan hubaye
- Macaluul in
lagu diimayaa waa mid aan hubaye
- Iney gurmad
masaakiintu heli waa mid aan hubaye
- Madaariistu
iney badanayaan waa mid aan hubaye
- Maatidu iney
wada duceyn waa midaan hubaye
- In shisheeye
laga maarmayaa waa mid aan hubaye
- Mowlana inaan
hiil ka heli waa mid aan hubaye.
-
- Muslinnimadu
waa xaqe mintida Macmalka yeelkiise
- Muslinnimadu
waa xaqe mintida Macmalka yeelkiise
- Muslinnimadu
waa xaqe mintida Macmalka yeelkiise.
--- Dhammaad -----
Inj.
Maxamed Cali Cibaar
Delft, The
Netherlands
Mohamed_ebar@hotmail.com