Gabay layidhaahdo (Godlan)

1. Gabay waala tiriyaa cabdaw, kani se waa gaare’
2. Waa duco gudeysiyo amaan, geesi soo diraye
3. Waa gocasho raagtiyo ladh iyo, hibasho ii gaara
4. Waa geydha roobkiyo ufada, galuhu keenaaye
5. Waa raxan gadoodiyo libaax, beesha soo galaye
6. Waa faras gudoodiga bartiyo, gaade iyo weerar
7. Waa galacda waagiyo, habeen kala gayoonaaya
8. Waa gabadh xishootiyo barbaar, timaha geedeystey
9. Waa goray haldhaagoo aroor, gedefka taagaaya
10. Waa geedka laysukugu tagiyo, golaha waayeelka
11. Godlan weeye maansadu, ninkay faro lagaadhoowe
12. Afartaa galool ubax lihiyo, man iyo geed saar dheh
13. Afar kalana gudiyeey imaqal, waydin garan siine
14. Goortii aduunyada lasimay, gebi ahaanteedba
15. Ee Guulaheen qaybiyee, gobalba meel joojey
16. Dhulka uduga laga soo guriyo, xabagta geed saaqa
17. Soomaali geeskaalafuray, galaya xeebaaye
18. Geel iyo adhay dhaqan jireen, guunyo faro wayne
19. Gabdhahaa lakala guursan jiray, gob iyo caadkeede
20. Gacal iyo xigtey wada ahayd, beel is garab taale
21. Hadii uu dareen kale galoo, daano kala gaadho
22. Garta odayadaa qaadi jirey, guud.cadaadige
23. Gudoonkuna heshiisa buu ahaa, loo gudboon yahaye
24. Iyadooy gadaa wada tahoo, nabad ku goohaysa
25. Ayuunbaa waxa soo dhex galay, geed ismjaaris jaane
26. Waa geedi baabaw waxeer, saatan noogalaye
27. Guul-darrayste eel kuu dhigaan, cidina goyneyne
28. Markii uu sokeeyaha ku gudey, mariyey gaaleefta
29. Markii uu gadhweyntii jaree, haadku gabasleeyey
30. Markii uu haween gawdhiyuu, gawrac ugu jiiday
31. Geesaaska naagaha markii, giida laga waashay
32. Gees biciid markii uu tuntuu, gudari noo loogay
33. Daahyada markuu goostayuu, gelen gel noo saaray
34. Ayuun baanu ciil goohnayoo, goyney dabarkiiye
35. Gugii hore dareenkii nagalay, gibil madoobaaney
36. Gugii xigey gunaad baa jiraa, gawnaxyada buuray
37. Gugii xigey faqhoosiyo gujada, ubadka gaadhsiiney
38. Gugii xigey dhadhaab guranayoo, laamiyada goyney
39. Gugii xigey sidii goosan lumay, gees isugu boodney
40. Gugii xigey Hubkii Gaaranoo, gamaska dhiigeyney
41. Gugii xigeyan Gaadmiyo Badheedh, nacabkii googoyney
42. Gugii xigeyna geeda waaqlihii, garabka naafeyney
43. Gugii xigeyna dooyada galoo, guluf u heenseyney
44. Gugii xigeyna duhur soo galoo, hadalba soo gaabey
45. Kun gabraarta kuman leylka guda, kuman kaloo gaafan
46. Kun gaatamaya kuman ciil la goda, kuman godoodaaya
47. Kun geylamaya kuman goob dagaal, looga kala guulmey
48. Kuman marada gaabinahayoo, labada low geeya
49. Iyo kuman sidii Aarka guda, godabta raacdeeye
50. Baroon gaaban jiib galaxsan, oo gumaca tuuryeeya
51. Shilka guuxa suugoo gingiman, guda yaraw biiten
52. Sii kaawi geelgeel tamoo, cadawga googooya
53. Foodhiga gariirkii ka baxay, galawgu eedaamay
54. Garaanbiiga goobtuu ku dhaco, ciidu Gubaneyso
55. Beebeega orod gaariyeen, cidina Gaadheynin
56. Kaaraha gurguurtee khalqigu, baqe ka giigaayo
57. Galabtaan intaa soo tubnee, faqashtii guudkeeney
58. Sidii goroyo lagu soo baxay, gelelef yaaceena
59. Gaaleef markii lala dhacee, guduri loo loogey
60. Maydkoodu waa tuu gignaa, goonyahoo idile
61. Waligoodba goob layska heley, guul lamay hoyane
62. Gafuuro xun sidee eebahay, Gabo gabo u taagey
63. Afartaa golool ubax leh iyo, maniyo geed saar dheh
64. Afar kalana gudiyeey imaqal, weydin garansiine
65. Galadeynu joogniyo ragii, guusha wacan keenay
66. Nimankii gumaystaha diree, faqashta gaagaabshay
67. Nimankii sariir lagu gamiyo, guri ka dheeraaday
68. Nimankii gudoodiga habeen, guura bahaleeyey
69. Nimankii haween lala golyiyo, gaari wacan dhaafay
70. Sidii Aar gabood yaleh ragii, gooha damin waayey
71. Gaashaan dhigeeniyo ragii, gacanta xoogeeyey
72. Gaajiyo haraadiyo raguu, gawre kari waayey
73. Ragii gocondhadii aad ogeyd, calaha guud joogey
74. Guud kooda raamaha ragaad, geydhe baxay moodey
75. Sidii goray saraareed ragii, goroyo cawloobey
76. Jananada ragii gawracee, libin ku geeraaray
77. Gayigooda nimankow xishee, guri kale u dhoofin
78. Cod mujaahid eebaa galaday, gooruu joogaba’e
79. Gudiyeey wanaag lama gadee, guda abaal kooda
80. Calan kaa na guud jooga, iyo guri yagleelkeena
81. Gobanimada niman baa u go’ay gacalayaalowe
82. Inta geesi ciida u nafbaxay, waa gun iyo baare
83. Rabi waxaan galiimaday, inuu geeyo meel wacane
84. Gudiyeey wanaag lama gadee, galiya taariikhda
85. Shuhadadu gurboodkii ay dhaleen waa lagaasiraye
86. Gabanadu haddii ay cawdaan, waa gunimo wayne
87. Gaari weer ku raagaa ka badan, geedahaa baxaye
88. Guno iyo xasuus bay rabaan, gu iyo jiilaal
89. Gudiyeey abaal lama gadee, guda abaalkooda
90. Naafadan gacmaha ciirsatee, cadawgu googooyay
91. Ee wada gurguurtee, kurtood gabi dhaclaynaaya
92. Ee wada galiilyaysan, ee goroda laalaadshay
93. Laxaadkooda nimankaa gatee, gumaro noo siiyay
94. Hadii geesi jiro waa iyaga, garashadaydiiye
95. Guno iyo dhaqaalay rabaan, garasho waayeele
96. Gudiyeey wanaag lama gadee, guda abaal kooda
97. Haweenkii gambada xoorayee, ficil gadoodaayay
98. Ee giraamka noosoo huree, gacanta noo saaray
99. Ee aan galaan nagala hadhin, guri wixii yiilay
100. Iyagoon gasiin hayn, kuwii tamaradood gaystay
101. Gudiyeey wanaag lama gadee, guda abaalkooda
102. Dhaawacayga nimankii guree, geeda sare waabay
103. Eegoolka soo wada dabriyo, gaabanaw adhiga
104. Gurgurshaaga nimankii qaliyo, gibil madiidaanka
105. Dooyada ragii ila galee, gaade iga eegay
106. Reer miyeey garagaaroo, bulshada iiga gooniyaha
107. Gudiyeey wanaag lama goda, guda abaalkooda
108. Debadaha ragii geylamee, gooha damin waayey
109. Ee giniga lacagta ah baxshiyo, guufka iyo moodka
110. Ee aan goblooleyn marnaba, gamashi waa ceeba
111. Ninkii ganay iyo waa kala ogyahay, kii galaday Aare
112. Gudiyeey wanaag lama gadee, guda abaalkooda
113. Xilkaad guudka saarteen ka culus, buurihii golise
114. Kuwii horaba waxa loo genbiyey, garabku daqiiye
115. Idinkuna hadii aad geftaan, waa gedaan jabaye
116. Umadii godbaa lagu ridoo, guudka laga aasye
117. Goof bay dhex taalaa bulshadu, gabi ahaan teede
118. Waxa gododka naartaa ku guray, gacan ku dhiigliiye
119. Gacalkiyo xigaalkeer is diley, waa gaduu falaye
120. Intuu reerkan guuluu mid kale, garabka saaraaye
121. Gaaleysyaduu qeybiyiyo, gudintu soo feeyey
122. Isku go, ayuun bay ahayd, gacal cun xeeshiiye
123. Gacmaha isu saaroo bulshada, godobta daaweeye
124. Yaaney kala gadoomine ka jira, gawdhiskiyo hiifka
125. Gogol qudha isugu keena oo, samo ku gaalgaala
126. Geyigeenu wada leenihiyo, gumaro hoostaale
127. Nina yaan guhaad loola tegin, gocasho waa ceebe
128. Shir la gooyey, waayeel gabyidhi, garangar muunaysan
129. Gole xaadhan guurtidoo la wacay talo gorfayn teena
130. Masuul wuxuu gabtoolaa, markuu eexa guursade’e
131. Nin qabiil u guuraa ka dheer, guri barawaaqeede
132. Nin jeclaysi yuu soo dhexgelin, gacalayaal beesha
133. Qaramaadka danyar laga guree, laysu wada geeyey
134. Gabaan dhiiqda laga soo lisee, gaban u ooyaayo
135. Gacan-dhaaf ayaan loola tegin, waw gudboonahaye
136. Wuxuu geel ku dararaa markuu, guri san daaqaaye
137. Godolkeedii maandeeq la waa, gacal islaamoowe
138. Gorofkeedii wuu haawadaa Dhawr guyoo tegeye
139. Ganboor iyo Sunbay daajiyeen, geed xun iyo ciine
140. Gafanaa ku naaxiyo, kud-kude kaymaha u galaye
141. Geed sabool ayay yuururtaa, guri habaas weyne
142. Gu’ga oy hayaan taa u eeg, Geydho wey rimiye
143. Jiilaalka inay goojisaa, waa gedaan rabo’e
144. Goortuu sidkeedii go, ee, gabanta loo qaado
145. Gujo laguma maaliyo afkee, yare he gaalgaala
146. Qalax laguma giijee ka jire, dabar danbeed gooya
147. Geyigeenu waa hodan hadaan, gees walba udayaye
148. Dooxyadan ganaaneynayiyo, galalkan ceegaaga
149. Dudur aan go, ayniyo harada, galacleh ee Jiifta
150. Mar haddii abuur lagu guroo, gacamo loo jeexo
151. Gaajaba rugteeniyo ka dheer, guri sabooleede
152. Majada iyo gadhweyta u qabtoo daaba gudinteena
153. Uguntada Dadaal buu nafluhu, libin ku gaadhaaye
154. Diinteena oon garabsanaan, guul ku helaynaaye
155. Wax kaloo lib lagu gaadhayaa, waa gefiyo beene
156. Gudoonsada distoorkiyo sharciga, wow guboonayahay
157. Malaa hadalka waan guud maree, aan u galo hoose
158. Umadeeni way goomaan tahay, geliya laabtiina
159. Gaajiyo harraad baa jiree, galiya laabtiina
160. Gurboodkeeni way daalanayiin, geliya laabtiina
161. Gurgurshaagu waa isdinka ee, geliya laabtiina
162. Afar geedi baa lagu hodmaa, geliya laabtiina
163. Galxareeda baa muuqda ee, geliya laabtiina
164. Geyi doog lebaa soo hiree, geliya laabtiina
165. Goobaare dacalbaa hadhee, geliya laabtiina
166. Golibaa idaha laysa ee, geliya laabtiina
167. Gorgorbaa maroodiga cunee, geliya laabtiina
168. Garwaan luhu marbuu ii dusee, geliya laabtiina
169. In aan gaadh dib laysaariheyn, geliya laabtiina.

sallaamulahi  calaykum

Anigoo ah Cali Maxamuud Xiirane waxaan tiriyey tixdaan gabayga ah oo aan inta badan tiriyey 11/11/06, mar aan u jawaabayey nin dhallinyaro ah oo ii soo direy gabayga kor ku qoran, gabayga oo aan qaarkiis shakhsi ahaan ugu direy ninka e-mailka ii soo direy ayaan is la markiiba arkay waxyaabihii aan ka digayey oo waddankiiyoo dhan ku faafay (Gumeysi Tigree), markaasaan jecleystay inaan gabayga awal waan iska sahalsanayee aan dhammeystiro oo aan saxaafadda u gudbiyo. Waxay ila tahay dadka Soomaaliyeed inay arkaan oo ay fahmaan nimanka Dictators ka ah ee mar walba kursi u hamuun qaba, diinta, dadka iyo dalkabana iibsanaya si ay maalmo u sii wataan magaca ama jagada ay wataan. Dadkaas ayaga ah waxay joogaan gobol walba waxayna leeyihiin qabiil walba. Haddaan haddaba meel looga soo wada jeesan, hadhoow waxay halleeyaan yaan la isku eedin oo yaan gobol gaar ah iyo qabiil gaar ah loo saarin wixii dhib ah oo ka yimaada, qofkii qaladkooda tilmaamana yaan la dhihin gobolkayga ama reerkaygaad u dan leedahay. Midda kale Soomaali weligeed walaahoow iyo tiih ka bixi mayso inta diinta la sheeganayo, haddana caddaaladdeeda laga cararayo oo shareecada ku dhaqankeeda dhinac la isaga riixayo. Waxaa ii muuqda iney nimanka kursi doonka ah ee badankood ay jagada ku heleen meel heblaan haystaa ay mar walba raali gelinta ilaahay iyo tan shacabkoodaba ay ka doorbidaan raalli-gelinta shisheeyaha danaha gaarka ah leh, oo waxay dhahaanba ay ka daba leeyihiin sida shimbirka Baq-baqaaga.

1. Waa gabay gu' weynoo abwaan soo gardaad baraye
2. Waa gun iyo baar waano aanay cidi giriifeeyne
3. Waa galalka taariikhda oo aan la gooyn karine
4. Waa gacal heshiisiin u yiri ruux garaad lihiye
5. Waa taladii ruux garasho dheer uu gorfeyn jiraye
6. Waa guubaabo uu soo gudbiyo ruuxa gaamuraye
7. Waa garyaqaan taladuu lahaa garashadiisiiye
8. Waa gaf iyo ciilkii dhacoo laga gadoodaaye
9. Waa waano loo guudmaroo gaar dad loo yiriye
10. Waa gabbasho wiilaan aqoon gole ka sheeggiise
11. Waa geesi hadilkiyoo nin ragihi uusan gaasirine
12. Waa loo garwaaxeedsadoo geedna loo galaye
13. Waa guurti odayaal gigiman talo ay gooyeene
14. Waa maanso gudihiyo u weyn goonyohoo idile
15. Waa murtida ay gaar maraan gooni daaqyaduye
16. Waa gartiye anba xaajadaas waan garawsadaye
17. Waa arrin go’aankii la xiray niman gadaayaane
18. Gudihii tigreegey gor-goro inagu geeyaane
19. Sidii gabar aroosey Adiis sii galbinayaane
20. Waa xaajo kaa geeddi dheer oodan garaneyne
21. Anse guusha waan kula jeclahay libin ad gaartaaye
22. Ha yeeshee raggii geela jirey wuu ka gaagaxaye
23. Gandaalkiyo waxay kuu sidaan gaawohoo marane
24. Diintuu an garabsanno lahaa waa la geesmaraye
25. Culumada raggaa gaadayaa guudka loo firaye
26. Gabdhihii xijaabtey haddeer gaba-gabeeyaane
27. Gantaallada kuwii kula dhacaa hoosta kuu galaye
28. Guclihii la galay bay kuwani gaabinahayaane
29. Geed is mariskuu ka digayana hadduu golaha jiifaaye
30. Gafanihii ku cunayaan arkaa gaadmadii weliye
31. Gardaduub wadaad loo xiroo gaalo laga raacay
32. Oo lagu guhaadshoo xabsiga lagu garaacaayo
33. Gindir iyo niman baa u wada guri amxaaraade
34. Aniguna markaasaan gammuun leebka geliyaaye
35. Gar waa loo islaam oo ninyahow beenna way guriye
36. Intaad gaarka iga hayso ood iguna goohayso
37. Bal garoowso girmaa kaa hantiyey gobolladaadiiye
38. Culumada waxaa loo gujeeyn waa wax gooniyehe
39. Waa gunnimo suldaankay xabsiga gaarka ka hayeene
40. Waxa jeelka loo geeynayaa waa go’aan diine
41. Nin gamaaray oo gubanayoon gurmadna soo gaarin
42. Oon gafkaas ruuxii ka galay jeelka lala gaarin
43. Godobtuu ka geeraaray iyo soo gocashadii maahan? 
     
44. Gar ilaahay baa loo hadlaa geedka xaajada e
45. Dad loo gafay ogaanteeyda waa loo garaabaaye
46. Geed waaban hoostiis ayaan talo gorfeeynaaye
47. Gogoshii ikhyaar loo dhigaa laga garsooraaye
48. Godob waa la daaweeyn karaa loo gudboonyahaye
49. Gar caddaa ayaa loo miraa goobta xaajada e
50. Geel baa diyada loo baxshaa geesiyaal tegaye
51. Godob reeb gabdhaa loo baxshaa labada geesoode
52. Gammaan baa la kala qaadan jiray gaar ahaan farase
53. Garta kii leh gondihiyo garkaan gacanta saarnaaye
54. Gobonimo waxaa laga fishaa ruux gar qaataahe
55. Gardarrada midkii laasimaan gawska jebinaaye
56. Gocorraha is guuf-guufa waan wada garaacnaaye
57. Is giriirixin waxaa laga fishaa kaan wax garaneyne
58. Golihii kacaankaa na baday kala gadoodkaane
59. Kulli waa na wada gaawin jirey goor iyo ayaane
60. Sargaalkii giriifkiis qaddimay guulwadaa dilaye
61. Cabdullaahi golongol buu ahaa taniyo goortiiye
62. Isaguna dad buu gubahayee guul ma dhalineyne
63. Waxaa gawda laga saari jirey gobolladiisiiye
64. Galgaduud bar baa loola tegey garab ku taagleyne
65. Culumaan wax galabsanin ayaa gawrac loo simaye
66. Garbasaar weyn gabdhihii xirtaa jeelka loo guraye
67. Canshuurtay naga gurahayeen gaar rag leexsade e
68. Diyaaraad garoonkey degaan dibu garaacaya
69. Oo shacabka goobanahayee kaga gariirsiiyey
70. Waa gurracan wallee xaajadaas aan la garaneyne
71. Ka gees iyo ka geesay jabhado soo gurmanayeene
72. Ummad bay galaafteen iyana galalaftoodiiye
73. Gumaadkii ayaa weli socdoon gaabin orodkiiye
74. Goobihii la wada daawan jirey gubato weeyaane
75. Halkii gacal ku haasaawi jirey waa gel-gelintaase
76. Gaashaandhiggii geedaa ka baxay golaha fiicnaaye
77. Gaboodfalkan inkastoon la arag maanka geli waayey
78. Niman baa garsoorkii horkacay diin ku gaamuraye
79. Gacaltooyo nooma kala dhammaan garashadeydiiye
80. Gafuur cawo ninkiisuu gubaa aan la garaneyne
81. Waxa adiga kuu gaar noqdeed gooni ugu boodday
82. Oon geedka laga sheegan karin yaa i garansiiya? 
     
83. Maansadu gar weeyiyo runtii aan gorfeeyn jiraye
84. Adna gaabis baad tahay midkii igu giriifoow e
85. Gacal waaya Soomaaliyeey waad is gurateene
86. Gobonimo qofkeennii rabiyo kii gunnimo doortay
87. Midka gobol ku faaniyo Tegree kii guryaha siiyey
88. Geyigeenna Soomaali waan kala gurmaynaaye
89. Gurmad iyo dadaal badan ninkii orodka geeyfnaada
90. Iyo Giiryaale fulaygii ordee goojo la abraara
91. Iyo gaajo ruuxii wax badan gubadka meereysta
92. Iyo geesigii waddaniyaa wax badan liiska noo geliye
93. Ninka guuxa gaariga Tigree guul ka filanaaya
94. Ama godob sokeeyoo la galo geni ku doonaaya
95. Waxba yuu is giijinin rag baan gaabineyn orode
96. Gucle orodka ruuxii wax badan cadow guulaayey
97. Iyo kii u geeyee gabdhaha gogol macaan seexshay
98. Taariikhda guunkaa ayey kala gelaayaane
99. Gaalnimo midkii nala rabee diinta naga guula
100. Ama lagu gabraartee xornimo aanba garaneynin
101. Geyigeenna soomaali waan kala gurmaynaaye
102. U garaaca gurbaan beenahaad garasho mooddeene
103. Nimankii garoonkey dunsheen geedo ku tallaalay
104. Gurmadkiyo abaaraha raggii wada gucleeynaayey
105. Dadkii daadku soo galay raggii doonta ugu gooshay
106. Oo meelaan cidi gaari karin timirta geeynaayey
107. Oo gacalka naafoobi raba orod ku gaaraayey
108. In gumeysi loogu yeerta oo lagu gantaalleeyo
109. Iney gaalo faraxoodi tahay ama garaadlaawe
110. Nin gu’weyni waa garan karaa oo garaadsadaye
111. Allow guusha adigaa hayee garabgaloo caawi
112. Aakhiro midkoodii go’ana guri jannaa seexi. 

Waa ikhyaar Midowga maxkamadaha ee Jubbooyinka oo u gurmanaya dadka daadadku wax yeelleeyeen. 

Cali Maxamuud Xiirane 
xiirane2@hotmail.com 

Towbad soo celiya (Gabay) Tixda gabayga beryahaan ma tirin tuducyadiisiye... Akhri