Jan 15, 2007
-
Dowlada KMG
Soomaaliya oo Albaabada u laabtay idaacado ka
howl gala magaalada muqdisho iyo xafiis TV ga
caan ah ee Aljazeera...
-
WEERAR LALA
BEEGSADAy SALDHIGA HURIWAA OO LAGU EEDEEYEY K/XIGEENKA
DUQA MAGAALADA.
-
Cali Daacuun: Ma
sii socon doonto dowlad dowlad dul saaran .
-
WIIL DHALINYARO AH
OO CEEJIN LAGU DILAY.
-
Weerar xalay lagu
qaaday kolonyo ciidammo Ethiopia ah oo marayay
waddada warshadaha
-
Madaxweynaha
DFKMG oo xalay wareegto ku magacaabay Maamulka cusub
ee Magaalada Muqdisho
-
Waraaqo lagu
daadshay Magaalada Muqdisho..
-
Mareykanka iyo
Midowga Yurub oo ka wada hadlaya Arrimaha
soomaaliya..
-
Ururka Midowga
Afrika oo dadaal ugu jira sidii ciidamo lookeeni
lahaa..
-
Somaliland oo ka
walwalsan xaaladda deg deg ah ee lagu soo rogey...
Dowlada KMG Soomaaliya
oo Albaabada u laabtay idaacado ka howl gala
magaalada muqdisho iyo xafiis TV ga caan ah ee
Aljazeera...
Wareegto kasoo baxaday xafiiska waaxda amniga ee
gobolka Banaadir ee hoos taga dowalda kmg soomaaliya
ayaa lagu amray in albaabada laysugu laabo qaar
kamida idaacadaha ka howl gala magaalada muqdisho
iyo xafiis tv ga caalamiga ah ee al-jaziira .
Wareegtada ayaa waxaa lagu xusay in idaacahada ay
kamid yihiin ,idaacada shebeele ,idaacada horn afrik
,idaacada quraanka kariimka ,iyo weliba xafiiska tv
-ga caalamiga ah ee al-jasiira uu ku leeyahay
soomaaliya .
Wareegtadan ayaa waxay amraysaa in dhamaan
milkiilayaasha xarumaha warbaahineed ee aan kor
kusoo xusnay ay yimaadaan xarunta waaxda amniga ee
gobolka banaadir islamarkaana ay joojiyaan shaqada
ay wadaan isla maanta . [Warbixin dheeraad ah hoos
ka akhri]
yaasiin maxamed cali (faytin)
yaasiin2006@hotmail.com
Idaacadaha
Qur’aanka Kariimka, Shabeelle iyo Honafrik oo
albaabbada la isugu dhuftay maanta
Xarunta dambi baarista Dowladda Federaalka
Soomaaliya [NNS] ayaa amar ku siisay inay howlahooda
joojiyaan Idaacadaha Shabeelle, Hornafrik, Idaacadda
Qur'aanka Kariimka iyo weliba xafiiska telefishinka
ku hadla Afka Carabiga ee Al-Jazeera ee Muqdisho.
Laguma faahfaahin qoraalka la soo gaarsiiyay
xarumahaas warbaahineed sababta dhabta ah ee
howlahooda ay u joojinayaan, waxaase warar ku
dhowdhow dowladda Federaalka Soomaaliya ay
sheegayaan in lagu haysto arrimo qarsoon oo aan
hadda la badhigi karin.
Madaxda xarumaha howlahooda la joojiyay ayaa waxaa
lagu amray inay tagaan maalinta berri ah xarunta
NNS-ta Magaalada Muqdisho, waxaana lagu wadaa in loo
caddeeyo maalinta berri ah sababta loo hakiyay
howlahooda shaqo, inkastoo aysan sheegin madaxda
xarumahaas sababta dhabta ah ee lagu haysto
xarumahooda.
Waxay noqonaysaa markii ugu horreysay oo ay Dowladda
Federaalka Soomaaliya xirto xarumo idaacadeed oo ku
yaalla Magaalada Muqdisho tan iyo sidii ay dowladdu
u soo gaartay Muqdisho muddo saddex toddbaad ku
dhow.
Ururrada Saxaafadda ee ka jira gudaha Soomaaliya
ayaa sheegay durba inay ka walaacsan yihiin joojinta
howlaha xarumo warbaahineed oo ku yaalla Magaalada
Caasimadda ah ee Muqdisho, waxayna ka codsanayaan
dowladda Federaalka inay si dhaqso badan dib ugu
ogolaato howlahooda inay sii wadaan xarumaha
warbaahineed ee la xiray.
Maxamuud Axmed Xasan ( Xuurshe)
xuurshe114@hotmail.com
Cali
Daacuun: Ma sii socon doonto dowlad dowlad dul
saaran .
Siyaasiga
Soomaaliyeed Cali maxamed axmed cali dhuux (cali
daacuun ) Ayaa Dhaliilay Ololaynta la doonayo in
xilka lagaga qaado Gudoomiyaha baarlamaanka shariif
xasan sheikh aadan islamrkaana ka hadlay fikirka
siyaadadeed iyo Mowqifka uu ka taagan yahay xiligan
dowlada iyo siyaadeeda .
''Ololaynta ladoonayo in xilka lagaga qaado
gudoomiyaha baarlamaanka shariif xasan sheikh aadan
ayaa u muuqata mid horseedi doonta Bur bur ku
yimaada dowlada lagu soo dhisay Embaghati '' ayuu
yiri cali daacuun
Cali maxamed axmed ayaa intaas ku daray '' waxaa ii
muuqata in si xoog leh loo urursanayo Mudanayaasha
baarlamaanka si ay u ridaan Gudoomiyaha
baaralamaanka ,kadibna loo bedelo xubnaha had iyo
jeer ku dhegan sharciga ,arintaasina waxay horseedi
doontaa dowlada oo labo garab noqota ,kadibna ku yuu
yuutanta sharciga iyo dastuurka ,dowlada
soomaaliyeed ee qaarkeed ku sugan yahay muqdisho''.
Sidoo kale cali daacuun ayaa ka hadlay sida dowladu
ku timid magaalada muqdisho waxuuna yiri ''dowladu
caasimada kuma imaan rabitaanka shacabka balse waxay
ku timid Taangi ay leedahay Ethiopiya mana qabo inay
sii socon doonto dowlad dowlad dul saaran , waxaana
ka rajeyanayaa madaxda soomaaliyeed inay gartaan
cida ay madaxda u yihiin iyo dalka ay masuulka u
yihiin ''.
Si kastaba ha ahaatee Cali daacuun ayaa welwel ka
muujiyey xaalada siyaasadeed ee dalku Haatan ku
sugan yahay.
yaasiin maxamed cali (faytin)
yaasiin2006@hotmail.com
Banaanbixii
Jaaliyadda Soomaaliyeed ee Switzerland :
xarunta qaramada midoobay ee Geneva horteeda
ayey ku dhigeen.
Akhri..
WEERAR LALA BEEGSADAy
SALDHIGA HURIWAA OO LAGU EEDEEYEY K/XIGEENKA DUQA
MAGAALADA.
Weerar lagu diley hal qof , ayaa lala beegsaday
saldhiga ciidamada Booliska ee Degmada Huriwaa ee
Magaalada Muqdisho.
Isagoo warfidiyeenada la hadlayey ayaa taliyaha
Saldhiga Booliska Degmada Huriwaa, oo qiray inuu
weerar ka dhacay Saldhiga, waxa uu xaqiijiyey in
halkaasi lagu dilay mid ka mid ah ilaalada Booliska
ee Saldhiga.
"Waxaanu hubnaa in weerarka ay geysteen kooxo
dharcad ah oo Boolis ah, islamarkaana taabacsan
Gudoomiye ku-xigeenka Cadde Gaabow, xagga nabad
galyada u qaabilsan ee la yiraaho Dhagartuur"
sidaana waxaa yiri Taliyaha, oo sheegay inuu jiray
khilaaf iyaga iyo Dhagartuur soo dhexgalay.
Waxa ku eedeeyey Dhagaxtuur, inuu yahay nin mas'uul
ah oo hadana doonaya inuu awood ku maquuniyo wax
walba, sida uu yiri.
Yaasiin maxamed cali (faytin)
Yaasiin2006@hotmail.com
WIIL DHALINYARO
AH OO CEEJIN LAGU DILAY.
Wiil dhalinyaro ah, oo aan wali la aqoonsan, ayaa
saaka maydkiisa laga helay wadada isku xirta
isgoyska Dabka ilaa Bakaaraha ee Magaalada Muqdisho.
Wiilkan dhalinyarada ah, ayaa sida ay dadka
deegaanku indhahooda kusoo arkeen, waxaa ku yaala
nabar cidiyaysan xagga sare ee Qoorta ee cunaha ,islamarkaana
waxay dadku macaneeyeen in ceejin lagu dilay.
Dhacdadan, oo noqotay mid ay dadka deegaanadaasi si
aad ah uga argagaxeen, ayaa ilaa iyo haatan aan la
gareyn cidda sidan araxan darada ah falkan ugu
gaysatay wiilkan dhalin yarada ah oo lagu qiyaasay
inay da,diisu tahay ilaa 14sano jir.
Magaalada Muqdisho, ayaa dib u milicsaneysa dilalka
macna darada ah ee ay 16-kii sano ee aynu soo
dhaafnay , caadada u ahaan jirtay, inkastoo
falalkani dilka ah laga yara nastay mudadii 6-da
bilood aheyd ee ay caasimadda ka arimin jireen
Golihii Maxkamadaha Islaamiga, oo ay dadku si aad ah
ugu diirsadeen xasiloonidii iyo nidaamkii Islaamiga
ee ay soo hoyeen.
Yaasiin maxamed cali (faytin)
Yaasiin2006@hotmail.com
Dagaalo
Laysu Adeegsaday Hubka Noocyadiisa Kala Duwan Oo
Xalay Goor Dambe Ka Dhacay Magaalada Muqdisho.
Jan 15, 2007: Dagaalo faraha lagaga Gubtay oo
Diryanka Rasaasta Ka Dhacaysa Qoryaha Lidka
diyaradaha ay saamayn weyn ku yeelatay badanaaba
magaalada muqdisho ayaa xalay ka dhacay deegaanada
ifka xalane ,miisaanka dhuxusha ,carafaat, iyo ilaa
ex-kantarool huriwaa oo dhaamaantood ku yaala wadada
dheer ee wershadaha dagaalkan oo u dhexeeyey
ciidamadaDFKMG & kuwa Ethiopia iyo Kooxo Caraysan oo
ku hubaysnaa Qoryaha baasuukayaasha ,Hal baabuur oo
nooca loo yaqaano cabdi bileha oo sida wararku
sheegayaan uu ku xirnaa qoriga dhishiikaha iyo
qorayaha yar yar .
Dagaalkan ayaa waxaa ka dhashay khasaare baaxad leh
waloow aysan jirin wax warar madax banaan ah oo
xaqiijinaya dhimshada iyo dhaawaca inta ay tiro
ahaan ay le,eg yihiin iyadoo dadka degan
deegaankaasi ay sheegayaan in meelaha qaarkood uu
saaka lagu arkaayey meydka Hal nin iyadoo sidoo kale
Hal Baabuur oo ay noo xaqiijiyteen Goobjoogayal ku
sugnaa meesha dagaalku ka socdo in laga Gubay
Ciidamada Ethiopiyanka Baabuurkan oo ahaa nooca loo
yaqaano Uraalka ee qaada ciidamada.
Boqolaal dad ah ayaa saakay isugu soo baxay goobihii
dagaalku ka dhacay xalay oo lagu arkayay ciidamo ku
Hubaysan Tiknikda u badan Taangiyada oo isku
gadaamay deegaankaas oo ay Hada si toos ah ula
wareegeen ciidamada Ethiopiya iyo kuwa dowlada oo
isgarabsanaya.
Dhanka kale isbitaalada Magaalada Muqdisho ayaa
wararka aanu ka helano sheegayaan inay qaarkood la
ciirciirayaan dhaawacyo ,Max'ed Xasan oo ka mid ah
Howl-wadeenada Isbitalka Shiffo oo aan khadka
telefonka kula xiriirnay ayaa waxa uu sheegay in
Isbitalkaasi la keenay labo ruux oo ku dhaawacmay
rasaastii la is weydaarsaday.
Waxaa gabi ahaanba istaagay isu socodka gaadiidkii
dadweynaha isaga kala gooshi Jirey Suuqa Xoolaha iyo
Bakaaraha ee mari jirey wadada warshadaha, ee
dagaalaku ka dhacay ka dib markii ciidamada Ethiopia
ay ku soo rogeen xanibaado ay ku diidan yihiin isu
socodka Gaadiidka.
yaasiin maxamed cali (faytin)
yaasiin2006@hotmail.com
Weerar xalay lagu
qaaday kolonyo ciidammo Ethiopia ah oo marayay
waddada warshadaha
Maxamuud Axmed Xasan (
Xuurshe)
xuurshe114@hotmail.com
Jan 15, 2007: Qarax weyn oo gilgilay magaaada
Muqdisho inteeda badan ayaa xalay lala beegsaday
gawaari socoto ah oo ay wateen ciidammada dowladda
Federaalka Soomaaliya iyo kuwa Ethiopia oo xilligaas
marayay waddada warshadaha.
Bamkaan ayaa wararka soo baxaya waxay isku
khilaafsan yihiin nooca qoriga qaraxa sameeyay uu
ahaa, qaar ka mid ah dadka deegaanka uu qarax ka
dhacay ayaa sheegay in gawaarida lala beegsaday
qoriga ka dhaca baasuukaha, halka kuwo kale oo
deegaanka ka tirsanna ay sheegeen inuu ahaa bam
dhulka la geliyay.
Bamkaas ayaa la sheegay inuu gubashada mid ka mid ah
gawaarida ciidammada ay isticmaalaan ee Ethiopia oo
loo yaqaan URAL, waxaana sidoo kale la sheegay inay
ku dhaawacmeen qaar ka mid ah askartii saarnayd,
inkastoo wararka qaarkood ay sheegayaan inay ku
dhinteen qaar ka mid ah askartii saarnayd mase
jiraan wax caddeynaya hadalkaan.
Rasaas xoog badan ayaa la is dhaaf-dhaafsaday kaddib
markii uu qaraxa dhacay xalay, waxaana la sheegay in
rasaastaas ay waxyeello u geystay dad rayid ay iyo
kooxihii geystay falkaas lagu qarxiyay gaariga ay
wateen ciidammada Ethiopia.
Isbitaal kuwa gaarka loo leeyahay ah oo ku yaalla
xaaafadda uu ka dhacay qaraxaan oo ah Deegaanka
Caymiska ayaa dhaqaatiirtiisu sheegeen in la soo
gaarsiiyay dhaawaca 3-ruux oo waxyeello ay ka soo
gaartay qaraxii xalay.
Ciidamadda Dowladda FKMG iyo kuwa Ethiopia oo wata
gawaarida dagaalka oo uu ka mid yahay kaaraha ayaa
haatan gacanta ku haya xaafadda uu qaraxa ka dhacay
iyo xaafado ku dhow oo laga shakisan yahay inay ku
jiraan kooxihii xalay weerarkaas gaadmada ah geystay.
Madaxweynaha
DFKMG oo xalay wareegto ku magacaabay Maamulka cusub
ee Magaalada Muqdisho
Madaxweynaha DFKMG Soomaaliya C/llaahi Yuusuf Axmed ayaa
xalay soo saaray wareegto uu ku magacaabayo maamulka
Gobolka Banaadir oo loo baddalay maamulka Magaalada
Muqdisho.
Wareegtada lagu magacaabay Maamulka cusub ee
Magaalada Muqdisho ayaa waxay si toos ah uga soo
baxday xafiiska Madaxweynaha Soomaaliya, waxaana
lambarkeedu uu ahaa: RSTS/OP/23/07, oo soo baxday
14/01/2007, waxaana wareegtadaan lagu sheegay in
lagu ogolaaday soo jeedin ka timid Ra’iisul
wasaaraha Soomaaliya oo soo jeediyay magacaabidda
maamulkaan cusub.
Maamulka Magaalada Muqdisho ee cusub ayaa ka kooban
guddoomiye ku saddex ku xigeen ayaa waxay kala
yihiin sidan soo socota:
1- Guddoomiyaha Maamulka Magaalada Muqdisho,
Maxamuud Xasan Cali (Cadde Gaaboow).
2- Ku xigeenka dhinaca siyaasadda iyo nabadgalyada
Ibraahim Cumar Sabriye (Shaaweeye).
3- Ku xigeenka dhinaca dhaqaalaha iyo maaliyadda
Xasan Maxamed Nuur (Qalaad)
4- Ku xigeenka dhinaca Howlaha guud iyo arrimaha
Bulshada C/qaadir Suufi Muriiddi (Golf).
Sidoo kale wareegtada ayaa waxaa looga codsaday
wasiirka arrimaha gudaha Soomaaliya Eng. Xuseen
Caydiid inuu soo magacaabo maamullada kala ah:
Qareenka guud ee Maamulka Magaalada Muqdisho, Xeer
Ilaaliyaha Guud ee Maamulka Magaalada Muqdisho,
Madaxa Xafiiska Qorsheynta ee Maamulka Magaalada
Muqdisho, Guddoomiyeyaasha 16-k degmo ee Maamulka
Magaalada Muqdisho iyo ku xigeennadooda,
Agaasimayaasha waaxaha, Dib u heshiisiinta,
Caafimaadka, Nabadgalyada, waxbarashada, ururrada
bulshada, Nadaafadda, dib u dhiska, shatiyada,
suuqyada, dakhliga kala duwan, xisaabaadka, dhulka,
gadiidka, tirada dadka iyo dhirta.
Eng. Xuseen Caydiid ayaa sidoo kale loogu sheegay
warqadda inuu la tashiyo la sameeyo qaybaha kala
duwan ee bulshada Magaalada Muqdisho, ka hor inta
uusan maamulladaan ku dhawaaqin.
Maxamuud Axmed Xasan (
Xuurshe)
Warshaddii hore
ee Baastada oo ay gaar ka hayaan ciidamamda Dowladda
iyo kuwa Dalka Ethiopia
Saakay aroortii hore ayaa ciidammo aad u xoog badan
oo ka tirsan kuwa Dowladda iyo Ethiopia waxay isku
gadaameen dhismaha Warshaddii hore ee Burka iyo
Baasatada.
Goobtaan ayay sheegeen ciidammada Dowladda iyo kuwa
Ethiopia ee isbahaysanaya inay ku jiraan kooxo ay
raacdeynayeen oo ay ku sheegeen inay ahaayeen kuwii
geystay falkii lagu weeraray ciidammo ka tirsan kuwa
Dowladda iyo kuwa Ethiopia oo ku socday saldhigyo ay
daggan yihiin.
Wararka ayaa waxay sheegayaan in aan la ogoleyn inay
cid ka baxdo isla markaana ay cid kale gasho
dhismaha weyn ee Warshaddii baastada oo ahaan jiray
goobtii ay dagganaayeen Madaxdii Maxakamdaha isla
markanaa u ahayd goobta ay ku haystaan gawaarida
dagaalka.
Ilo wareedyo ku dhowdhow Dowladda Federaalka
Soomaaliya ayaa waxay sheegayaan in lagu wado inay
baaritaanno ka sameeyaan warshadda gudaheeda
ciidammada isbahaystay, waxaan ay sheegayaan wararka
qaarkood in lagu wado inay iyagu saldhig ka dhigtaan
goobtaas oo ay sheegeen inay tahay goob inta badan
laga soo abaabulo dagaallada abaabulan ee lagu soo
qaado.
Dadka Deegaanka ayaa waxay cabsi weyn ka muujinayaan
ciidammado aad u xoog badan oo xaafadaha u dhexeeya
Dhismihii Caymiska Qaranka Soomaaliyeed illaa Ex-koontarool
Balcad ka dhigtay saldhigyo, isla markaana
baaritaanno ka wada deegaannadaas oo ay sheegeen
inay rumeysan yihiin inay ku jiraan kooxihii xalay
weerarka u geystay ciidammadooda.
Maxamuud Axmed Xasan (
Xuurshe)
xuurshe114@hotmail.com
Waa sidee xaalada
goobihii xalay ay dagaladu ka dheceen ee magaalada
muqdisho .
Ifka xalane ,miisaanka dhuxusha ,caraafaat ilaa ex-kantarool
huriwaa oo xalay ahaa goobohii inta badan laysaga
hor yimid ayaa manta degan kadib markii ay isku
gadaameen ciidamada huwanta ee dowalada iyo kuwa
Ethiopiyanka .
Gawaarida gaashaaman iyo taangiyo ayaa lagu arkaayey
goobahaasi iyadoo ciidamada dowlada iyo kuwa
Ethiopya ay xafadahaas ka bilaabeen baaritaano ku
aadan hub uruurrin islamarkaana ay xoog ku gelayaan
gurayaha xaafadahaas oo ay ku tuhumayaan inay ku
jiraan kooxihii xalay weerarada la beegsaday .
Xaafadahaas ayaa guud aysan jirin wax gelaya iyo wax
kazoo baxaya iyadoo uu ganacsiga iyo isu socodkuba
uu ka xiran yahay.
Ilaa hada ma jiraan masuuliyiin dowlada ah oo ka
hadlay howl galada ay xaafadahaas ka dhex
samaynayaan waxay kala kulmeen ciidamada isku dhafka
ah ee Ethiopiya iyo kuwa dowlada soomaaliya .
Baaritaanadan ayaa ka dambeeyey isku dhacyo
habeenkii xalay ahaa ka dhacay degaanadaas kuwaasoo
lala beegsaday weeraro aan la filayn.
yaasiin maxamed cali (faytin)
yaasiin2006@hotmail.com
Waraaqo
lagu daadshay Magaalada Muqdisho..
Waxaa isku soo
dubaridey
W/D
Amiin Yuusuf Khasaaro
E-Mail
amiinkhasaaro@hotmail.com