Maxaa loo Dagaallamayaa, Maxaase la dib dhigan
karaa?
Dagaalka ka socda dalkii hooyo, gaar ahaanna koonfurta Soomaaliya
waa mid lagu riiqday kooxo badan oo kala duwanna ay iska
dhinac dagaallamayaan. Qoraalkan waxaan ku eegi doonnaa
cidda dagaallamaysa iyo waxa loo dagaallamayo, waxa aan
la dib dhigan karin iyo waxa la dib dhigan karo.
Dagaalka wuxuu leeyahay sida muuqata laba dhinac oo
asaasi ah. Dhinac waa DFKMG ah oo ku taagan taangiga
Itoobiya iyo garabsiinta reer Galbeedka. Waxaa dhulka
uga dagaallamaya maleeshiyo Soomaaliyeed iyo ciidamada
Itoobiya ee gumaystaha ah oo lafdhabar u ah dhankaa
koowaad ee dagaallamaya.
Dhanka labaad waa kooxo fara badan oo haysto taageero
badan oo xagga shacabka ah kuwaasoo badankood ku
abtirsada kooxihii ku midoobay Maxkamadaha Islaamiga iyo
xoogag kale oo dib kaga soo biiray oo ka biyo diidsan
gumaysiga iyo faragelinta shisheeye.
Waxa lagu kor dagaallamayo waa dhulkii iyo shacabkii
Soomaaliyeed oo dhimasho, dhaawac, qax, gaajo, rafaad
iyo cabsiba ku habsatay.
Dhanka Huwanta
Waxaa loo dagaallamayo waa ujeedo badan iyo isku
raran. Hogaanka DFKMG ah laf dhabarka u ah waxaa ay
sheegayaan inay u dagaallamayaan in dalku dawlad helo
cid kastana ay taas u kaashanayaan, waxaase in badan
dareensan tahay in sababta ugu muhiimsan ama ka dhax
guuxaysa kuwa ugu muhiimsan horbodayaasha dawladda ay
tahay kursi jacayl arxan iyo damir ka maran oo baqti
kasta loo cunayo iyadoo qabyaalad iyo aargoosina lagu
dagaal galayo.
Dhanka Itoobiya waxaa iyana ujeedku yahay inaan
Soomaaliya ka dhalan dawlad Qaran oo ka madax bannaan
Taliska Itoobiya ha ahaato dawladdaasi mid cilmaani ah
ama mid Islaami ah tay doonta’e. Waxayna ka iibisay
qorshayaasheed reer Galbeedka iyadoo ku dhex dhuumanaysa
mashruuca waxa loogu yeero argagaxisl la dagaallanka.
Dhanka Maraykanka iyo guud ahaan reer Galbeedka waxay
iyana ka dagaallamayaan in Soomaliya uu ka dhasho dawlad
Islaami ah oo mayal adag xiriirna la leh ama ku dhaqan
ah nidaamka Taalibaan iyo Alqaacida iyadoo intii
karaankooda isku dayaya inay hor istaagaan nidaam kasta
oo Islaami ah oo si cad iyaga uga hor imaanaya sidiiba
ay kula kaceen doorashooyinkii Aljeeriya ee Afganbiga
lagala hor tagay kadibna sababay dagaal fitno ah oo
gawrac iyo gummaad loogu gaystay kummanaan reer
Aljeeriya ah. Waxaa taa ka fogayn dagaalka lagu hayo
Xamaas, Xisbullaah iyo Iraan oo kala heer uu yahay
dagaalku.
Dhanka Iskacaabinta
Waxaa iyana dhankan ka dagaallamaya kooxo kala aragti
duwan balse wadaaga in la iska celiyo oo lala dagaallamo
colaadda dhanka kala kaga imaanaysa. Dhankan waxaa ay
isugu jiraan kuwo dagaalkooda sal u yahay dareen qabiil,
kuwo mid qaran wado, kuwa dareen Islaami ah wado iyo
kuwo laba ama sedexda dareenba iskugu laban yihiin.
Qaar waxay u dagaallamayaan dareen Qabiil iyagoo ka
dhiidhiyaya in rag sarbeebaya ama cadaysanaya caadifad
beel ay magac dawlad u huwadaan ka dibna ay aargoosi
kula kacaan ama jajuub iyadoon is qancin iyo tala wadaag
dhab ah jirin, waxaana tan sii saacidaya habdhaqanka
qabqablayaasha DFKMG ah qaarkood oo in badan ka
tarjumaya dareenka qabyaaladeed. Waxaa iyana kuwa
dareenka qabiil dagaalkoodu ku jiro leeyihiin hab
dhaqan ay kuwa kale kaga jawaabaan inaysan wadaniyad iyo
diin jirin ee dagaalku yahay mid beeleed ay cid kastaahi
ku kici lahayd waxay faleen.
Qaar kale waxay iyana u dagaallamayaan wadaninimo
iyo nacayb ay Itoobiya u qabaan waxayna qaadan la’
yihiin in cadawgii Soomaaliya ee horey dhulka Soomaalida
qaar gumaystihii caddaa u siisay ay maantana
Jamhuuriyaddii badankeed iyo caasimaddii qabsadaan
halka ay qaybaha kale ee dalkana si dadban u
saameeyaan.
Qaar kale waxaa wada dareen Islaamnimo iyo in dalka
diinta lagu xukumo cadawga ilaahayna lala jihaado.
Inta badan sedexdan dareen waxaa laga yaabaa inaysan
kala soocnayn oo labo ka mid ah ama sedexdaba ay qof
isugu tagaan ama koox iyadoo laakiin ku kala duwan sida
ay qof kastaahi ugu kala muhiimsan yihiin ama uu ugu
kala xag jirsan yahay dareennadan.
Maxaa Dib loo dhigan karin?
Dagaalka haatan Soomaaliya ka socdaahi sida muuqata
waa ujeedo badan iyo lakabyo badan oo isa saaran, una
baahan xikmad, dulqaad iyo in qallafsanaanta laga
fogaado.
Hadaba maxaa ay tahay in hadda la helo ama la
joojiyo marka laga eego dhanka iska caabinta ama guud
ahaan Soomaalida, maxaase dib loo dhigan karaa?
- Waa in la dhimaa hadiiba aan la tirtiri karin
dareenka iyo habdhaqanka qabyaaladeed ee na
dhaxalsiisay meesha aan taagan nahay, si cadna loola
dagaallamaa kiisa gaaray heerka kansarka oo kale ee
burbubriyey khadadkii casaa ama guduudnaa ee ummaddu
lahayd. Kan gaarsiisan intii nin reer hebel ahaa
shareeco igu xukumi lahaa shareeco la’aan baan ka
xigaa ama inti nin reer qurac ii talin lahaa dawlad
la’aan baan ka xigaa. Qabyaaladda nooceeda daacuunka
dilaaga la mid ah ee xataa na hilmaansiinaysa inaan
Soomali muslim iyo qaran isla nahay oo wax kastoo na
dhex maraa aan iska xigno cadawga iyo gumaystaha,
taa keentay in khadadkii casaa laga gudbo, in taasi
lala dagaallamo oo la iska daweeyo waa waajib diini
ah iyo mid wadani ahba waana daruuro aan la’aanteed
qaran iyo dal madax bannaan la ahaan doonin.
- Waa in ciidamada gumaystaha Itoobiya oo burbur
mooye wax kale noo horseedi doonin meesha looga
saaro xoog iyo xeelad wixii ay Soomaali heli karto
dib u dhigashana ma leh.
- Si iska xoraynta Itoobiya usoo dhawaato ama loo
gaaro waxaa laga maarmaan ah in danaha cadawga la
kala qaado oo tan Itoobiya iyo galbeedka la kala
furfuro haddii aan taas lagu guulaysanna looma
fadhiyo in la helo Qaran Soomaaliyeed oo saldhigta,
waxaase la luudin karaa in cadawga laga ciidayo
damaciisa oo uusan helin nidaam saldhigta oo
danahisa ka shaqeeya . Sidoo kale waa in
qallafsanaanta iyo kursi u dhimashada ama ku
toxobkana meesha laga saaraa.
Marka ay timaaddo maxaa dib loo dhigan karaa waa
su’aasha ugu adag in aragtiyo midaysan laga yeesho
ama u baahan qodnaan aqooneed iyo qoti dheeri. Kama
eegayo su’aashan dhinaca huwanta iyo waxa Itoobiya
iyo Maraykanka dib u dhigan karaan, waxaanse haatan
ka eegaya oo qura dhinaca iska caabinta . Su’aashani
waa midda keeni karta inay kala soocmaan kooxaha
dagaalka iskacaabinta ku midaysan. Dano qabiil, kuwa
qaran iyo kuwa Islaam iyo kuwa shaqsi oo wada jira
oo aan la shaandhayn ama ninba siduu u fahamsan
yahay haddii loo wada dagaallamo muddo waa lasii
wada joogi karaa, lamase xaqiijin doono ahdaaftaas
oo wada jirta iyo sida koox walbaahi u fahamsan
tahay.
Qofkii ama kooxdii qabyaaladda nooceeda kansarka
ah qabaahi haddii uusan ka tanaasulin ama laga badan
oon la caburin looma fadhiyo in Qarannimo la helo
iska daa dawlad Islaami ahe.
Dareenka Islaamnimada ee aqoonyari iyo fawdo ku
salaysan iyo kooxo aan kala amar qaadan oo qaarkood
dibadda xiriir la leeyihiin oo loo soo sheegayo waxa
ay u dagaallamayaan iyo dareen xukun jacayl oo
qabqablanino, haddii kuwani xoog badiyaanna looma
fadhiyo in dawladnimo saldhigata la helo ama danaha
cadawga isbahaystay la kala furfuro, waxaanan laga
bixi doonin dagaal joogta ah iyo qas, iyo in lagu
kala tago amaba la iska hor yimaado, lamana heli
doono wax dawladnimo ah noocay doontoba ha ahaatee.
Haddiise dareenka Wadaninimada iyo Islaamnimada
aqoonta iyo miirka ku salaysan ay xoog bataan waxaa
suurto gal ah in sida oodo dhacameed u kala
sarreeyaan loo kala guro ama siday arrimuhu u kala
horreeyaan loo kala qaado ama qabto, iyadoo
laablakaca, kursi jacaylka iyo wixii waqti dheer u
baahan dib loo dhigayo, waxaa suurta gal ah in
markaa danaha huwanta la kala furfuro oo ugu yaraan
danaha Itoobiya iyo Maraykanka la kala qaado si
guusha usoo dhawaato iyo in Qaranimo Soomaaliyeed
marka hore la helo, ka dibna ku dhaqanka shareecada
la raadiyo hadba intii suurta gal ah ama la xaqiijin
karo. Iyadoo dhanka kalana ay noo yaallaan hadiiba
xitaa Qaran la helo hawlo baaxad ballaaran oo ay ka
mid yihiin cadaalad, nidaam, sharci, kala danbayn,
aqoon, dhaqaale iyo horumar ka shidaal qaadanaya
danaheena qaran iyo Islaamnimo iyadoo dhanka kalana
la dhimayo oo la cirib tirayo qabyaaladda, jahliga,
fawdada, faqriga iyo fisqigaba.
Abdulkadir Warsame
London UK
Gureey2001@yahoo.co.uk