Xus ballaaran oo loo sameeyay halyeygii Elman Cali Axmed..

• amiin yuusuf khasaaro | amiinkhasaaro@hotmail.com | Muqdisho

  ---

            Waxaa maalintii shalay ahayd hotel Naasohablood lagu qabtay xaflad ballaaran oo lagu xusayay Halyeygii Nabdda Eng. Elman Cali Axmed, waxaana ka qaybgalay qaybaha kala duwan ee bulshada, waxaana ugu horreyn halkaas ka hadlay guddoomiyaha hay’adda nabadda iyo xuquuqda aadanaha ee Elman Eng. Suudaan Cali Axmed oo isagu si weyn ugu dheeraaday taariikhdii halyeygaas, wuxuuna sheegay in Elman uu bulshada Soomaaliyeed wax weyn u qabtay intii ay ku jireen xaaladda aadka u qallafsan ee dagaallada sokeeye.

            Waxaa kaloo halkaas ka hadlay guddoomiyaha hay’adda INXA C/naasir Axmed Cismaan oo isna sheegay in Elman ay weligeed bulshadu xusuusan doonto, isagoo sheegay in raadkiisii uu weli qoyan yahay, waxaa kaloo ka hadlay guddoomiyaha gobolka Banaadir C/llaahi Xasan Ganey (Firimbi), wuxuuna sheegay ina shacabka Soomaaliyeed aysan marnaba xusuustooda ka go’i doonin waxqabadkii Elman.       Mar uu ka hadlayay siyaasadda C/naasir wuxuu sheegay inay ka soo horjeedaan in ciidammo shisheeye la keeno Soomaaliya.

            Shaqsiyaad bulshada wax u qabay ayaa iyagana halkaas lagu guddoonsiiyay shahaadooyin iyadoo xafladdaan ay ku lammaansanayd sannadguuradii 15-aad ee ka soo wareegtay aasaaskii Hay’adda Nabadda iyo xuquuqda aadanaha ee Elman, waxaana halkaas lagu soo bandhigay ruwaayad ka hadlaysa waxqabadkii Elman.   

Taariikh nololeedkii iyo waxqabadkii ALLAHA u naxariistee Marxuum Elman Cali Axmed

• U ololeeyihii nabadda

• U doodihii xaquuqda dadka dolman

• Aabbihii masaakiinta

• U ruuriyhioi agoonta

• U kaalmeeyihii kuwa taagta daran

• Saaxiibki dhamaan kuwa nabadda jecel.

Allaha  u naxariistee marxuum Elman  Cali  Axmed wuxuu ku dhashay Magaalada Ceel Buur  sanadku markuu ahaa 1956-kii, wuxuuna dugsiga Quraanka ku bartay Magaallada Muqdisho, isagoo waxbarashada Dugsiga Sare ku soo qaatay aqoon darsi.

Wuxuu baran jiray farsamada Korontada isagoo  ku soo bartay markii ugu horeysay W.X.K.U. ee ENEE  Muqdisho, isagoo markii dambe loo qaatay in uu Koronto yaqaan ka noqdo Stadium  Cons.

Elman  wuxuu ku soo koray bahda isboortiga, isagoo ka mid ahaa ilmaha soo qabta kubadda marka ay dibadda u baxdo iyo in uu qoro dhibcaha Kubadda Kolayga ee Gaeroonka Ex-Luujino.

Maxamuud Cali  Axmed (Elman)  wuxuu jeclaa isboortiga isgaoo ciyaari jiray Kubadda Cagata, Koleyga, Laliska iyo Biingaha markii dambena ka mid noqday ciyaartoyda loogu jecel yahay.

Sanadkii 1976-kii ayuu dalka Jabuuti u dhoofay isagoo sii raacay ciyaartoydii Reer Jabuuti ee kaddibna Sucuudiga ka sii aaday, halkaasna muddo labo sano ah shirkad ugu shaqeynayey Koronto yaqaanimo.

Allaha  u naxariistee Marxuum Elman Cali Axmed wuxuu ka soo shaqeeyey waddammo badan sida Saudi Arabia, Kuwait, Liibaya, Urdun, Ciraaq, Turki, Malta, Talyaaniga, Romania, France, Magaalada  Nice iyo kuwo kale, 1983-kii Marxuumku wuxuu guurkiisii ugu horreeyey ka dhacay dalka Talyaaniga  gaar ahaan magaalada Roma.

1984-kii ayuu Elman waxbarashadiisa ka gaaray heer Injineernimo oo xagga korontada ah wuxuuna goostay in uu iskiis u shaqeysto kuna soo noqdo dalkiisa hooyo, isagoo dabayaaqadii 1984-kii ku soo laabatay dalka wuxuuna aasaasay  shirkaddii can baxday ee Elman Electronic Company 24hrs Service, taas oo markii dambe laamo ku lahayd dhammaan degmooyinka magaallada Muqdisho iyadoo shaqeyn jirtay 24-saacadood, shirkadda Elman oo muddo yar kaddib magac iyo sumcad wanaagsan yeelatay ayadoo ahayd qandaraaslay heshiis la gali jirtay iyo shacabka Soomaaliyeed ee u baahnaa xafladaha dhalashada Arooska I.W.M. Waqtigaas ayuu bilaabay Elman Cali Axmed in dhallinyaro badan shaqo u abuuro, iyagoo ka faa’iideysanaya  shirkadii  Elman iyo in dhaqan celin ku sameeyo dhalinyarada ku qaraabata Tooreeyadda, Bururka, Sakiimaha, iyo kuwa Koollada caba  isagoo bari jiray xirfado farsamo, oo ay ku shaqeystaan si ay u noqdaan dad sharaf  leh oo ka xishooda dhaqan nololeedkii hore.

Shirkaddii Elman Electronic Company oo ka qab gashay carwadii Caalamiga hayd ee Soomaalia sanadkii 1986-kii ee Muqdsiho lagu qabtay ayaa dadku aad iyo aad u jeclaysteen waxyaabihii ay soo bandhigatay sida gaari qaylinaya hadii tuug xadi tago,  shirkaddii Elman oo tiro iyo tayo ahaanba korortay ayaa inteedii badnayd lagu bililiqeystay dagaalkii lagu qaaday Maxamed Siyaad Barre 1991-kii.             ALLAHA u naxariistee Marxuum Elman Cali Axmed markii uu arkay dhibaatada ay dagaalladu geysteen iyo dhibaatadii heysatay Maatida Soomaailyeed oo aan helin hay’ado u soo gurmada, isla markaana aysan jirin dowlad dhexe oo arrintooda maareysa ayuu Elman shacabka Soomaaliyeed ugu deeqay haraaggii shirkaddiisii, isagoo aas-aasay Machadka Tababarka Farsamada (OTTI), kaasoo la furay sanadkii 1991-kii, iyadoo dhallinyarada lagala dagaallamayay arrimaa Qabyaaladda, gaar ahaan qalabka loo adeegsado dagaallada.    Elman waxa uu dhallinyarada ugu baaqi jirey (Qoriga dhig qallinka qaado), waxaana uu bari jirey xirfadaha ay ka idka yihiin: Makaanikada, Wadista Baabuurta, Dabka Guryaha, Alxanka, Barashada Najaarnimada, Barashada Fuundinimada, Barashada Type-ka, Gar-gaarka deg-degga ah, Isboortiga, Barashada Luqadaha iyo kuwo kale.

                  ALLAHA u naxariistee waxa uu Elman ummaddiisa ka kasbaday sharaf iyo sumcad dheeri ah, waayo wuxuu nolosha ku soo kordhiyey falsafad cusub, taasoo ah shaqo abuurista uu ku caawin jirey dhallaanka derbi jiifka ah ee aan lahayn cid daryeesha oo uu u sameyn jirey Qalabka caseeyaha oo loogu qori jirey “Shaqo haa, tuugsi maya!”, waxaa kale oo uu kaalmeyn jirey Haweenka Garoobbada ah ee ay nimankoodu ku dhinteen dagaallada sokeeye oo uu miiska u saari jirey badeecado ay noloshooda ku maareyn jirey, Gaari Gacmeedyo uu siin jirey nimanka Qaxootiga ah iyo kuwa soo bara kacay ee awoodda u leh in ay wax xamaalaan.

Elman maxaa loo dilay yaase dilay!? 

ALLAHA u naxariistee waddanigii, Geesigii da’da yaraa Elman Cali Axmed waxaa loo dilay dadweynaha Soomaaliyeed dartood, waayo wuxuu ahaa nin wax fahmay, kana danqanayay dagaalkii sokeeye ee dhibaatada baaxadda weyn leh u geystay Ummadda Soomaaliyeed, waana sababtii loo yiri “Aabihii Nabadda”, “Saaxiibkii Ummadda” iyo “Ururiyihii Masaakiinta iyo Dan yarta Soomaaliyeed”, waxaana dilay saddex nin oo calooshood u shaqeysteyaal ahaa oo la soo kireystay, kuwaasoo mid ka mid ah gacantiisu ay sababsatay dilkii Elman Cali Axmed 1996-kii, 9-kii Maarso, habeen Axad ah 7:30-fiidnimo, waxaana Ummadda Soomaaliyeed ay u aqoonsatay habeenkii Madoobaa.

amiin yuusuf khasaaro | amiinkhasaaro@hotmail.com | Muqdisho