Wareegto uu April 17, 2008 soo saaray Guddoomiyaha Golaha Wakiillada DGPL, Axmed Cali Xaashi, ayuu ku muujiyey sida uu uga soo horjeedo waxa uu ugu yeeray "talo bixintii ka soo baxday Xafiiska Guddoomiyaha Golaha Wakiillada ee DFKMG", Sh. Aaden Maxamed Nuur (Sh. Aaden Madoobe), "kuna saabsanayd sharciga Batroolka".

Guddoomiyaha Baarlamaanka DGPL in kasta oo uusan caddayn qodobada qaanuunka Dastuuriga ah ee lagu xadgudbey, haddana waxa uu sheegay in 'talo bixinta' Guddoomiyaha Baarlamaanka DFKMG ay tahay "mid aan waafaqsanayn qaanuunka Dawladaha Federaaliga ah ee Caalamka, sida Itoobiya (iyo dalal kale)".

Wareegtada Axmed Cali Xaashi oo cinwaankeedu ahaa "Warcelin la xiriirta Talo-bixinta Guddoomiyaha Baarlamaanka DFKM ee Soomaaliya" (oo u jawaabeysey Sh. Aaden Madoobe) ayaa waxaa ka mid ahaa erayo uu Axmed Xaashi kula hadlayey "qofwalba oo Soomaaliya dan u haya iyo shirkadaha la galay heshiiska" ayaa waxa uu u sheegay in aysan "dhegaysan dacaayadaha aan salka iyo raadka toona lahayn oo ay faafiyaan dadka ka soo horjeedaa nabada iyo nolosha dadweynaha reer Puntland iyo tan Federaalka ee Soomaaliya."

Taas waa eedayn aad u weyn maadaama qoraalku ku socdey Guddoomiyaha Baarlamaanka DFKMG.

Durbadiiba eedayntaas Guddoomiyaha Golaha Wakiillada Puntland u jeedisey Guddoomiyaha Baarlamaanka DFKMG waxaa lagu faafiyey shabakadaha ay xogta isku dhaafsadaan saamileyda Suuqa ganacsiga Australia, iyadoo si gaar ah farta loogu fiiqayo sida loo canaantay DFKMG iyo taageerada Puntland ee shirkadaha heshiiska la galay, sida ku cad qormada Xaashi "shirkadaha la galay heshiiska in Puntland u furan tahay oo ay ku soo dhowaadaan gacmo Furan".

9-kii April 2008 ayey ahayd markii Baarlamaanka DFKMG ee Baydhabo ansixiyeen in Soomaaliya loo sameeyo sharci batrool. Fadhigii shaarcigaas Batroolka DFKMG codka loogu qaaday waxaa ka soo qayb galay ilaa 143 xildhibaan: Waxaana codkii noqday 119 ogolaansho, 22 diidmo iyo 2 aamusnaan.

Markii baarlamaanka Baydhabo arrintaas u codeeyey waxaa Sheekh Aadan Madoobe laga soo xigtey in uu sheegay sababta keentay in la sameeyo sharciga Batroolka DFKMG in ay tahay sidii wax looga qaban lahaa heshiisyo uu ku sheegay in lala galay shirkado yar yar oo aan wax qaban karin.

Sharcigaas cusub ee batroolka ee loo sameeynayo DFKMG, ayey u muuqataa in Puntland ka jawaabeysey. Welina Sh. Aadan Madoobe jawaab kama bixin qoraalka Xaashi.

Wareegtadii Guddoomiyaha Golaha Wakiilada Puntland oo dhamaystiran oo uu faafiyey Xafiiska madaxweynaha DGPL waa kan:

DAWLAD G. PUNTLAND EE SOMAALIYA
Golaha Wakiillada
Xafiiska Guddoomiyaha

Tixraac: XGGWDGPL124/2008 Taariikh: 17/04/2008

Ujeedo:- Warcelin la xiriirta Talo-bixinta Guddoomiyaha Baarlamaanka DFKM ee Soomaaliya

"Talo bixin Sharci ma aha"

Waxaa wax aad looga xumaado ah talo bixintii ka soo baxday Xafiiska Guddoomiyaha Golaha Wakiillada ee DFKMS kuna saabsanayd sharciga Batroolka, taas oo ah mid aan waafaqsanayn qaanuunka Dawladaha Federaaliga ah ee Caalamka (sida, USA, German, Ethiopia, UAE, & Australia) iyo sharciyadii ka jiray ama la galay intii ay jirtay Dawladda Federaalka ah ee Soomaaliya, isla markaa waxaan ku wargelinaynaa ummadda Soomaaliyeed, Beesha Caalamka, Hay'adaha Caalamiga iyo dalalka deriska ahba in Dawladda Puntland ay xor u tahay fulinta iyo rabitaanka baahida Shacabkeeda iyadoo tixgelinaysa midnimada iyo danaha guud ee ummadda Soomaaliyeed meel walba oo ay joogaan iyo daah-ka rogga ilaha dhaqaale ee Puntland taas oo wax-tar u ah cid kasta oo inaga mid ah.

Haddaba, Puntland marna u dulqaadan mayso in lagu dirqiyo dano gaar ah oo ujeeddadoodu tahay marin habaabinta dhismaha guud ee dalku maanta ku jiro iyo ra'yiga caalamka waxaana ka go'an fulinta wada noolaanshaha guud ee geeska Afrika.

Sidaa darteed Waxaan ugu baaqaybaa, qofwalba oo maanta Soomaaliya dan u haya iyo shirkadaha la galay heshiiska in Puntland u furan tahay oo ay ku soo dhowaadaan gacmo Furan oo ayan dhegaysan dacaayadaha aan salka iyo raadka toona lahayn oo ay faafiyaan dadka ka soo horjeedaa nabada iyo nolosha dadweynaha reer Puntland iyo tan Federaalka ee Soomaaliya.

Wabillaahi Towfiiq

Axmed Cali Xaashi
Guddoomiyaha Golaha Wakiillada DGPL.

Guddoomiyaha Golaha Wakiillada Puntland oo Eedayn Kulul u Jeediyey Guddomiyaha Baarlamaanka DFKMG

Ujeedo:- Warcelin la xiriirta Talo-bixinta Guddoomiyaha Baarlamaanka DFKM ee Soomaaliya