Taliyihii Ciidanka Booliska Puntland oo is Casiley
Gen. Cadde Muuse oo Xilkii Ka Qaaday Taliyihii Ciidanka Booliska Puntland
Idaacada 3CR ee Australia oo Waraysi la Yeelatay Wasiirka Macdanta &
Tamarta DGPL
- "Waxaan qabaa wasaaradda Amniga in ay tahay Wasaaradda dhibta
keentay, sababtoo ah ninka loo magacaabay Cadullaahi Siciid nina shaqadiisa
uma ogola, waxyaalaha aan isu casiley ayey ka mid tahay... anigu waxaan
aamin sanahay dhib kale oo wadanka ka jirta in aysan jirin." C/Casiis Siciid
gacamay...
SomaliTalk.com | Boosaaso | May 27, 2008
Taliyihii Ciidanka Booliska maamul Goboleedka Puntland, Sareeye-guuto
Cabdicasiis Siciid Maxamuud (Gacamay),ayaa shir saxaafadeed uu kuqabtay
magaalada Garoowe waxa uu ku sheegay in uu is casiley. Arrintaas ayaa ku
soo beegantay xilli uu magaalada Boosaaso wareegto ka soo saaray
madaxweynaha DGPL, Gen. Cadde Muuse uu xilka kaga qaaday Taliyaha Ciidanka
Booliska, waxana uu ku eedeeyey in "uu gudan waayey waajidaadkii Qaran ee loo
idmaday". Isla wareegtadaas waxaa lagu magacaabay taliye cusub ee Booliska oo ah
S/Guuto Gaani Maxamed Xaaji Cabdi.
Wasiirka Warfaafinta DGPL, C/raxmaan Maxamed Saalax (Bankax) oo
u waramay idaacad maxalli ah ayaa sheegay in Taliyaha Ciidanka lagu casiley
wareegto uu soo saaray Gen. Cadde Muuse iyo in taliyaha cusub uu isla (May
27, 2008) xilkii la wareegey. Bankax markii la weydiiyey in Taliyuhii hore
uu shir jaraa'id qabtay oo is casiley, waxa uu C/Raxmaan bankax ku jawaabey:
"Anaga meel uu isku casiley nama soo gaarin. Laga yaabee markii uu ogaadey in uu
yiraahdo waa is casiley".
 Laakiin Cabdicasiis Siciid Gacamay
oo ayaa shirka Jaraa'id ee Garoowe isagoo ka hadlayey waxa uu yiri: "Waxaan
rabaa in aan ummada oo dhan u sheego maanta oo Taariikhdu tahay 27-kii bishii
5aad (May 27, 2008), aniga oo ah sareeye-Guuto Cabdicasiis Saciid Gacamay
in aan tanaasul ka dhiibey shaqadii aan u hayey booliska iyo ummadda reer
Puntland oo ahayd Taliyaha Ciidanka Booliska, waxaana rajaynayaa madaxda dawladu
in ay istiqaaladaas iga aqbasho haddii Allah idmo."
Sababta is casilaadda waxa uu ku sheegay inay la xiriirto mushahar la'aan
ciidamada Booliska muddo 9-bilood ah. Arrintaas isaga oo ka hadlayey S/Guuto
C/Casiis waxa uu yiri: "Sababta kalliftay (is casilaada) haddaan idiin raaciyo
waxay tahay dhibaato soo food saartay xagga ciidanka booliska oo ah ciidanka
Boolisku muddo sagaal bilood dhan in aanay wax mushaharo ah qaadan, waxaa igu
adkaatay ciidan aan 9-bilood mushahar qaadan sababtii aan taliye ugu noqon lahaa
oo aan u hoggaamin lahaa, anigoo muddo ciidanka ku hayey dhibtaas oo had iyo
jeer u caqli celinayey oo maslaxayey oo lahaa insha Allahu waa imaaneysaa ee
iska suga ayey arrintii waxba isa soo tari weydey, oo mushaharooyinkii la heli
waayey."
Waxana uu intaas ku daray in arrinta mushahar la'aanta keentay aysan ahayn
dhaqaale la'aan, balse ay ku timi mas'uuliyad darro, isagoo arrintaas
faaffaahinayeyna S/Guuto C/Casiis Saciid Gacamay waxa uu yiri: "Waxaan rabaa
saxaafadda inaan ka sheego sababta keentay mushaharo la'aanta in aanan
garawsanayn anigu, waayo dhaqaalaha ciidanka Booliska ayaa soo saara dakhliga
soo gala iyo inta uu dhan yahayna waa ogahay oo subax kasta war-subaxeedka la ii
keenu ayuu ka mid yahay maalin kasta dakhliga soo gasha, waxaan aaminsanahay
mushaharkaas la'aantiisa in ay ku timid masuuliyad darro awgeed ee aysan ku iman
dhaqaale la waayey."
Wasiirka Warfaafinta DGPL, C/raxmaan Bankax, ayaa la weydiiyey Xukuumadu ma
waxay bixin weydyey ciidama mushahar kooda, waayo Taliyhu Boolisku sababta uu
isku casiley waxa uu ku sheegay in ciidanka Booliska oo aan mushahar lasiin.
Waxa uu markaas Bankax qiray in mushahar la'aanta baahsan, waxan uu yiri:
"Ciidanka keliya ma aha ee Musharaku waxa uu ka maqan yahay Dawladda oo dhan,
wasaarado badan, dawladuna waxay u fadhidaa sidii arrintaas loo xallin lahaa,
haddii dhaqaale loo hayo baaritaan ayaa socda, baaritaankaasi marka uu
dhammaadona gadaal ayaan ka soo sheegi doonaa. Laakiin arrin booliska u gaar
ahma aha lacag la'aantu, waa arrin guud, wax kastana ha anoqotee waa arrin la
saxaayo"
Taliyaha is casiley (ama sida Gen. Cadde iyo Bankax sheegeen xilka laga
qaaday) waxa intaas raaciyey: "Nin askari ah oo aadan mushaharkiisii u heli
karin sabab aan anigu ku xakumi karaa ma jirto. Nidaam ayaa jira sharciga
Booliska ka yaal oo ah 'Qofku marka uu waxa uu xaq u leeyahay helo ayaa waxa
xaq loogu leeyahay laga gutaa'. Haddii askari aan doonayo in aan amar siiyo
oo shaqo u diro haddii uu subaxdii yiraahdo anigu reerkayga ayaan dhagax u soo
jabsanayaa anigu ma oran karo maxaad u soo jabsaneysaa waayo sagaal bilood ayaan
mushahar la siin. Sababta is casilaadayda keentay waa intaa."
Hadalkii S/Guuto C/casiis Saciid Gacamay
Si aad wax badan uga ogaatid waxa uu ku salaysan yahay
khilaafka Taliyahii Hore ee Booliska iyo Wasiirka Amiga DGPL...
Akhri Qormadii Jan 26, 2008 |
"Dhibka Waddanka ka jiraa waa wasaaradda Aminiga" Taliyhii Hore ee
Booliska PL
S/Guuto C/casiis Saciid Gacamay waraysi uu May 27, 2008 siiyey Idaacada
British Broadcasting Corporation waxa uu ku sheegay in dhibaatada ka jirta dalka
ay tahay Wasaarada Amig DGPL oo ee wasiirka ka yahay
S/Guuto Cabdullaahi Saciid.
Isagoo arrintaas ka hadlayey Taliyha iscasiley waxa uu yiri: "Waxaan qabaa
wasaaradda Amniga in ay tahay Wasaaradda dhibta keentay, sababtoo ah ninka loo
magacaabay Cadullaahi Siciid nina shaqadiisa uma ogola, waxyaalaha aan isu
casiley ayey ka mid tahay, haddii C/laahi Siciid uu wax wanaagsan samaynayo
haddee maanta isagaa wasiir ah, laakiin anigu waxaan aamin sanahay dhib kale oo
wadanka ka jirta in aysan jirin."
Axmed Kismaayo ayaa markaas weydiiyey "C/laahi Saciid iyo adigu maxaad isku
qabateen intii aad wada shaqayneyseen". Waxa uu markaas S/Guuto C/casiis Gacamay
ku jawaabey: "Waxaan isku qabanay dhawaan in magaalada Boosaaso xabbado laga
ridey waa ogeyd, shacbi meel iska maraya in la xabadeeyey waa ogeyd, dad
madaxweynuhu cafiyey ayuu qabsaday oo yiri lama cafin karo, waddanka sidaas
laguma dhawo ee sidaas ha hay markaan irina waa isku af garan weyney."
Waraysigii Axmed Kismaayo oo ka tirsan Idaacada British Broadcasting
Corporation uu la yeeshay S/Guuto C/casiis Gacamay:
Carmo Police Academy....
Taliyaha cusub ee Ciidanka Booliska DGPL ee uu magacaabay Gen. Cadde Muuse
waxa ahaa Madaxii Akadeemiyada Carmo [Police Academy] oo ah xarun
lagu tababaro ciidanka Booliska oo 100km Koonfur ka xigta Boosaaso, halkaas oo
dufcadii ugu horeysey ee ciidan ah tababar loogu xiray December 2005.
Xarunta tababarka Booliska ee Carmo waxay taageero ka heshaa Hay'adda
Qaramada Midoobey ee UNDP, sida ku cad
shabakada hay'adda UNDP.
Xilligii ay socotey sidii ciidan khaas ah loogu samayn lahaa shidkadaha
sahaminta ee heshiiska la galay Puntland, waxaa xaruntaas Booliska [Carmo]
booqday xubno ka tirsan shirkadahaas oo ay ka mid ahaayeen labada nin ee
asalkoodu ka soo jeedo Lubnaan ee Leo Khouri iyo Joseph Obeid.
(bidix) Leo Khouri , (midig)
Joseph Obeid | Sawirka: janola_crest
Gen. Cadde Muuse oo Xilkii Ka Qaaday Taliyihii Ciidanka Booliska Puntland
Waxana uu Taliye Cusub u Magacaabay S/Guuto Gaani Maxamed Xaaji Cabdi.
SomaliTalk.com | Boosaaso | May 27, 2008
Gacamay |
Madaxweynaha DGPL, Gen. Cadde Muuse ayaa wareegto uu Boosaaso ka saaray May 27, 2008 waxa
uu xilkii kaga qaaday Taliyihii Ciidanka Booliska Puntland Sareeye-guuto
Cabdicasiis Siciid Maxamuud (Gacamay). Sababta xilka uu uga qaadayna waxa
uu ku sheegay in ay tahay "ka dib markii uu gudan waayey waajidaadkii Qaran ee
loo idmaday". Waxaana uu isla wareegtadaas ku magacaabay taliye cusub ee
Booliska oo ah S/Guuto Gaani Maxamed Xaaji Cabdi.
Xeerka madaxweyne ee Gen. Cadde Muuse uu xilka kaga qaaday taliyaha Booliska
Puntland, kuna magacaabay taliye cusub, waxa uu qornaa sidan:
________*
Xeer Madaxweyne Lr:64,May 27, 2008, ku saabsan magaabid Taliyaha Ciidanka
Booliska pl iyo xil ka qaadid Taliyihii hore ee Ciidanka Booliska PL
Madaxweynaha Dowladda Puntland
Markuu arkay: Dastuurka DGPL qodobkiisa 54aad faqradiisa 19aad
Markuu arkay: Talo soo jeedinta Wasiirka Wasaarada Amniga iyo DDR.
Markuu tixgeliyey: Sugida Amniga iyo baahida Madax waayo aragnimo
sare u leh hawlaha Nabadgelyada.
Wuxuu Xeeriyey:
1-Waxaa S/Guuto Gaani Maxamed Xaaji Cabdi loo Magacaabay Taliyaha Ciidanka
Booliska Puntland.
2- waxaa xilkii Taliyaha Ciidanka Booliska laga qaaday S/guuto C/casiis Siciid
Gacamay, ka dib markii uu gudan waayey waajidaadkii Qaran ee loo idmaday
3-Xeerkan ayaa waxaa ku saxeexnaa
Maxamuud Muuse Xirsi
Madaxweynaha Dowladda Puntland
* Sidaas waxaa faafiyey xafiiska Gen. Cadde Muuse.
________
Idaacada 3CR ee Australia oo Waraysi la Yeelatay Xasan Aloore
Idaacadda jaaliyadaha ee Australia ee 3CR ayaa waraysi Jimce May
23, 2008 waxay la yeelatay Wasiirka Macdanta iyo Tamarta DGPL, Xasan Cusmaan
Maxamuud (Aloore) oo joogey Boosaaso. Waxaana dadweyne soo wacay ay wax ka
weydiiyeen arrimo la xiriira ammaanka Puntland, sababta ay marka hore u bilaabi
waayeen ceelka Dooxada Nugaal oo xog hore laga hayo oo ay ugu leexdeen sahaminta
dooxada Dharoor iyo inay ka fekereen raadka ay degaanka ku reebi karaan
shirkadaha sahamintu.
Waraysigaas oo uu Qaaday CabdiCasiis Saciid Xirsi [Abdi Aziz Hersi]:
http://www.3cr.org.au/ | Booqo Shabakada Jaaliyadaha
Australia
Faafin: SomaliTalk.com | May 27, 2008
 Boosaaso: Weerar Lagu Qaaday Gaari ay
Leedahay Shirkadda Sahaminta...
.Guddoomiyaha G/Bari oo qiray weerarka gaari Booyad ah
.Qarax kale oo ka dhacay Bosaso Habeenkii Talaadada
.Su'aalo la weydiiyey Wasiirka Macdanta iyo tamarta DGPL
.Boosaaso: Basaska oo Shaqo
Joojin ay Sameeyeen....
Akhri Wararka sahaminta Shidaalka iyo Puntland
Isha/Sawirada:
janola_crest, 3cr.org.au ,
google images, yahoo news
| 
Daabaco
Boggan | Print
C/Laahi Yuusuf oo Saxiixiisa ku biiriyey Shirkadaha
Gen. Cadde ugu Yeero Jirrida
Qoditaankii
Shidaalka Puntland oo dib loo dhigay (Muddo aan la cayimin)