Canmex waxay bishii September 2006 haysatey $C3.5 million oo lacag caddaan ah iyo $C3.3 million oo ah kayd ahaan, ayey tiri Herald oo intaas ku dartay: Mr Schmitt waxa uu sheegay in uu ku qanacsan yahay in uu heli doono lacagta $US50 million ee loo baahan yahay in lagu kharashgareeyo barnaamijka (lagu baarayo khayraadka Puntland muddo lix sano ah). Waxana uu sheegay in uu taageero ka haysto in Canmex saamiyadeeda boqolkiiba 13.6% ay leedahay shirkadda Abalone Capital, taas oo kusii xiriirsan shirkadda kale ee reer Sweden ee Lundin Petroleum. Shirkadda Lundin oo qiime ahaan suuqa saami ahaan ka joogta $4.2 billon, kuna jirta liiska shirkadaha ka diiwaan-gashan suuqa ganacsiga ee Stockholm.

Xilligii midab takoorkii Koonfur Afrika (Apartheid), dalka Soomaaliya waxa uu ka mid aha dalalkii dhaqaale ahaan cunqabataynta u saaray xukuumadii midab takoorka, sida uu 1962 ka mahad celiyey Mandela oo ka hadlayey shir weyne lagu qabtay Addis Ababa, waxana uu yiri: "Waxaan si khaas ah oo niyad wanaag ah u xusayaa afarta dal ee xorta ah ee Afrika ee  qaybta ka ah shirweynahan, kuwaas oo ah Soomaaliya, Ethiopia, Sudan iyo Tanganyika, oo xoogga saaraya cunaqabataynta siyaasdeed iyo dhaqaale ee saaran Koonfur Afrika." Nelson Rolihlahla MANDELA, January 1962.

Mr. Landau waxa uu xusay muhiimada ay leedahay khibradda shirkadda Lundin oo baaritaan ka samaysa "Dalalka qallafsan" sida Ciraaq, Suudaan, Jamhuuriyadda Dimoqraadiga ee Congo iyo Koonfur Afrika xilligii xukunkii gumesigii midabtakoorka ahaa (Apartheid) ayaa fure u ah la dhaqanka Canmex, waa sida warku u dhigay'e.

Laakiin, ayey tiri jariidada Herald, shirkadda Range ma aysan xusin xiriirka u dhexeeya Canmex iyo Lundin. Xiriirkaas marna shirkadda Range kuma xusin warsaxaafadeedyadii ay u direysey suuqa ganacsiga ee Australia. Arrintaas agaasimaha Range, Mr Landau, waxa uu ka yiri "u malayn meyno in aarrintaasi ay tahay mid wax khusayn ah leh," waxana uu intaas raaciyey "Annaga waxaa muhiimad noo ah xiriirka aan la leenahay Canmex."

• [Shirkadda "Lundin Petroleum" ee reer Sweden, laakiin xarunteedu tahay dalka Holland, waxay 7^dii November 2006 xukuumadda Ethiopia heshiis kula gashay in ay shidaal ka baarto qaybo ka mid ah dhulka ay Ethiopia gumeysiga kaga haysato Soomaalida, gaar ahaan labada aag ee loo yaqaan 'Blocks 2 & 6'. Waa dhulka loo yaqaan Calub iyo Hilala oo 1,200 km koonfur-bari ka xiga magaalada Addis-ababa. Waxaa markaas shirkaddaas digniin u jeedisey jabhadda ONLF, ugana digtey in ay dhulkaas shidaal ka baarto.]

Agaasimaha Range Resources waxa uu yiri qaar ka mid ah maalgashadayaasha waxaa dhici karta in xiriirka u dhexeeya Lundin-Canmex ay ka war heleen ka dib markii sannadkii hore qoraal lagu qoray website-ka lacagata lagu akhristo ee  Africa Intelligence.

Range waxay qorsheyneysaa in labada ama saddexda bilood ee soo socda gudahood ay iska diiwaan geliso suuqa maalgashiga ee London, UK (AIM = Alternative Investment Market). Halkaas oo la qorshaynayo in laga helo lacag dhan $US20 million, taas oo Mr Landau uu sheegay in lagu bixinayo lacagtii lagu iibsadey shirkaddii hore jaalka ula ahayd ee Consort Private iyo weliba in mustqabalka baaritaan lagu sameeyo macdanta iyo batroolka badda Puntland.

• [Halkaas weeye meesha ay reer Puntland su'aalaha iska weydiinayaan in shirkadda CONSORT LTD ay saami ku leeyihiin madaxda sare ee DGPL, sidaas daraadeed haddii lacagtaas la siiyo shirkadda Consort , lacagtaas ma shacabka reer Puntland, mase dadka saamiyada ku leh oo la sheegay in ay yihiin madaxda sare ee dawladda.]

Jariidada Herald oo warkeeda sii wadata waxay qortay: Gobolka (Puntland) waxaa lagu xaqiijiyey macdanaha loo yaqaan Lead iyo Zinc, laakiin Mr Landau waxa uu yiri Range waxa kale oo ay radineysaa macdanta loo yaqaan Yuraaniyamka (uranium), taas oo, ayey tiri Herald, ilaa hadda laga helay Koonfurta Soomaaliya ee dagaalku halakeeyey.

• [Uranium waa macdan dunida aad qaali ugu ah, waxaana loo istcimaalaa aalada lagu qarxiyo qumbulatu-duriyada ama hubka Nukliyeerka.]

Jariidada Sydney Morning Herald waxay warkeeda ku soo xirtay: In kasta oo la saxiixay heshiis wax soosaar wadaag aad u ballaaran, hadana saamiyada shirkada Range Resources markii heshiiskaas lagu dhawaaqay waxay hoos u dheceen 0.1c (centi), taas oo ka dhigtay saamiyadeeda suuqa ganacsiga Australia in ay maalintii Khamiistii noqdeen 3.2c (3.2 centi), waxana markii suuqa la xiray ay noqdeen 3.4c waxaana mugga saamiyadeeda suuqu ahaa 26 million oo saami.

Waxaa halkaas ka soo baxay:

• In shirkaddii uu Terry asaasay ee CONSORT LTD ee ka diiwaan gashan Maldives, ee la sheegay in ay saami ku leeyihiin madax sare oo ka tirsan DGPL, ee heshay saxiixa madaxweynaha DGPL ee ah in ay shirkaddaasi xuquuq u leedahay gebi ahaan baaritaanka khayraadka dabiiciga ah ee Dhulka Puntland. Shirkaddaasi maadaama aysan wax miisaaniya ah lahayn waxay saxiixii uu suuq geysey Australia oo uu Terry asal ahaan ka yimid intii uusan Puntland u iman hay'adda carruurta xanaanaysa ee KIDS IN NEED. Waxaa markaas saamiyadii laga iibiyey shirkadda Range Resources, taas oo qudheedu aan awood u lahayn in ay shidaal ka barto dhul aad u ballaaran ee Puntland. Waxayna shirkaddaasi isku dayday in ay saxiixaas kusoo wareegey sii suuq geyso. Dhawr shirkadood ayaa daneeyey heshiiskaas. Ugu dambayntii waxay heshay shirkadda CANMEX ee reer Sweden, balse ka diiwaan gashan Canada, laakiin loo asaasay in ay ka hawl gasho Mexico. Shirkadda Canmex waxaa lagula heshiiyey in 80% saamiga baaritaanka dhulka Puntland ay yeelato, 20% uu u soo haro Range Resources. Waxaa hadda cad in CANMEX oo bixineysa lacagta baqshiishka ah ay kusii lifaaqan tahay shirkadda Abalone Capital ltd, taas oo ayadana ay kusii lifaaqan tahay shirkadda Lundin.
• Waxa kale oo qoraalka Herald laga dhadhansanayaa in shirkadda Range waxa ay danayneysaa ay yihiin macdanta, gaar ahaan macdanta Yuraaniyamka ee Nukliyeerka loo adeegsado.
• Waxa kale oo soo shaac baxay in shirkaddaasi ay danayneyso badda Puntland, taas oo aan hore loo shaacin.

Gabagabo:

Puntland ma laha barlaman madax bannaan oo dawlada su'aalo weydiin kara, sidoo kale Puntland ma laha hay'ad garsoor oo ka madax bannaan xukuumada iyo baarlamaanka, sidaas daraadeed ayaan Puntland u lahayn cid la xisaabtanta Dawladda.

Qoraalkii: Herlad: EEG HALKAN....