SOMAALIYEY,
MIDGAAN MAGTIISU WAA MEEQA?
Boqorka Gobolada Waqooyi Galbeed ee Gabooyaha ayaa dhiigii ku karay.
Boqor Ahmed Warsame wuxuu arkay wuxuu qaadan waayey, wuxuu la ooyey
Kahadar Dhabar oo dunida hiila ku waayey, waxaa uga sii daran Khadar oo
iilkana hiila ku waayey, dadow sow qofkii qof dila in la dilo ama diyo la
qaato maaha, sow arrinku uma taalo dhibanaha qoyskiisii, sow sharcigan
baasi Ajigu ma sameysan, sow dhanka Midgaanka la jiifiyaa banaan kama aha,
sow Ceerigaabo iyo Booramaba Ajigii lagu dilay looma aarin, sow hadh cad
tiirka lama taagin, sow lama diidin diyo iyo maslaxo, sow sharciga
Somaliland baa sidaa dhigaya maaha, sow maantana lama xukmin si kale, sow
Ajiga dhiigiisu 2 goor kama qaalisana kan Midgaanka, sow magtii Khadar ma
noqon 5 sano, sow dharbaaxo quudheed wajhada noogama dhicin, sow kuwii
qaylin jiriey ashuunka kuma adimaan, sow Caabigii Ingiiska dantiisa ma
raacin, sow kuwii wax qori jirey qalinkoodu ma engegin, sow kaa cudu weyni
iyo kaa hub weyni xaalku maaha, sow nin Eebahay tala saartay iyo nin
Sheydaan tala saartay ma kala sad roona!
Xaakimkii diraca
gashanaa baa af labadii yeedhay:
Waar heedhe heedhe Gabooyow, waar heedhe aniga may garan? War heedhe
goormaad hadalna baratay? Waar heedhe goormaad igu dhiiratay? Waar heedhe
goormaad wax isbiday? Waar heedhe goormaad kor iisoo eegtay? Waar heedhe
goormaad ila sinji noqotay? Waar heedhe goormaad dunida baratay? Waar heedhe
goormaad xorowday? Waar heedhe goormaad gooni isu taagtay? Waar heedhe
goormaad Bini Haashim ka xorowday? Waar heedhe goormaad nin raga noqotay?
Waar heedhe goormaad abaanimo ka baxaday? Waar heedhe goormaad kabahii ka
tagaya? Waar heedhe goormaad gamuunkii iska daysay? Waar heedhe ba’naye
goormay dunidu sidan isu bedeshay!
Qareenkii Askariga
ayaa u baxay:
Xaakimow, Mudanow I dhegeyso, miyaadan maqal murtida, miyaadan ogeyn cimri
dheeri inaan ka baqo, miyaadan ogeyn inay waxwalba kusoo marayaan, miyaag la
yaaban tahay inay tanina noo danbeysay, miyaadan ogeyn in qiyaama la joogo,
miyaadan xusuusan xadiiskii Suubanaha, miyaadan garaneyn calaamaha qiyaamaha,
miyuusan kabooluhu wax xukumi doonin, miyuusan jaahilku wax xukumi doonin,
miyuusan kii hooseeyey sare soo mari doonin, maxaad mudanow ula yaabi
Midgaanka, maxaad ula yaabi inuu xuquuq raadiyo, maxaad ula yaabi inuu isku
kaaya dhereriyo, maxaad ula yaabi inuu sharciga quudhsado, maxaad ula yaabi
inuu xukunka 5-ta sano ka qayliyo, maxaadse adigu nin Duriyadii ah 5 sano
ugu xukuntay, miyaadan diinta iyo axkaamta garaneyn, miyaadan aayada Midgaha
ka sheekeysa garaneyn, miyaadan ogeyn in ay yihiin kuwa aanu leenahay,
miyaadan garaneyn “wa maa malakat eymaanukum”, sow duulku xoolaheenoo
kale maaha, sow waxaanu milki u leenahay maaha, sow in la xoreeyo mooyee
sidii la rabo looma geli karo, sow inaad Askariga dalacsiisid maaheyn, sow
inaad argagixisada jeelka dhigtid maaheyn, sow inaad qabaanimadoodii iyo
Reerahay ku lamaansanaayeen tusaaleysid maaheyn, sow adigu wixii aanu dhaqan
u lahayn maadan garab marin, sow dhaladkii 5 sano kuma xukumin, sow jinni
ninkii keenaa bixiyee, Xaakimow yeelkadaa arrinku maaha!
Qoraalan oo cod laga soo qabtay British Broadcasting Corporation ah ka
dhegeyso Shabakada Dulmane
Ka Dhegeyso Halkan.....
Beesha
Gabooye Ee Somaliland Oo Cadaalad Darro Ka Tirsatay Maxkamadda Rafcaanka
Somaliland
Somaliland.Org — Hargeisa, Somaliland — 27
April, 2006
Hargeysa (Somaliland.Org)--
odayaasha iyo cuqaasha beesha gabooye ee Somaliland ayaa maanta shir
jaraa'id oo ay ku qabteen magaalada Hargeysa waxay ku eedeeyeen xukuumadda
iyo garsoorka Somaliland inuu ku sameeyey cadaaladd darro iyo yasitaan ka
dib markii marxuum ku abtirsada beesha gabooye oo sannadkii hore nin ka
tirsan ciidanka booliisku uu xabad ku dhooftay goob ka mid magaalada
Hargeysa, iyadoo maanta maxkamadda racfaanka ee Somaliland ay ku xukuntay
ninkaasi dilka u gaystay marxuumka mag 100 halaad ah iyo shan sanno oo
xadhig ah, balse beesha marxuumka ayaa ku tilmaantay xukunkaasi mid aanay
raali ka ahayn maxkamaduna ay iyadu maroorsatay iyadoo og in beesha gabooye
looga tiro badanyahay Somaliland.
Garaad
warsame oo ah garaadka beesha gabooye ee Somaliland ayaa saxaafadda isagoo
maanta la hadlaaya wuxuu ku sheegay in xukunka maxkamaddu uu yahay mid
cadaalad darro ah iyadoo ninkii marxuumka dilay toos loogu hiiliyey, garaad
warsame wuxuu sheegay in magtu ay iman karto marka labada dhinac ay iskaga
raali yahiin, balse iyagu ay dalbadeen in maadama uu yahay gacan ku dhiigle
isagana loo dilo, taasina ayuu yidhi garaadku ay maxkamaddu xaqsoor ku
samaysay iyadoo dirsooc iyo faquuqid ku samaysay baaqa beesha gabooye,
wuxuuna sheegay inaanay beeshiisu aqbali doonin.
horaantii
sannadkii 2005 ayaa gacan ku dhiiglaha dilay marxuumku wuxuu goor fiid ah
qudha kaga jiray xaafad ka mid ah magaalada Hargeysa, isagoo gacan ku
dhiiglahu wakhtigaasi ku jiray hawl ilaalaynta guud ee loo yaqaano roondada
lana socday ciidamo iyagu kormeera magaalada Hargeysa habeenada qaar,
maxkamadda racfaanka ayaa saaka ku xukuntay gacan ku dhiiglaha 100 halaad oo
mag ah iyo shan sanno oo xadhig ah, balse waxay u furtay qoyska marxuumku
inay racfaan ka qaadan karaan maxkamadda.
MOHAMED ABDI HASSAN (DIRIDHABA)
Somaliland.org,
Hargeisa
diridhaba@gmail.com
C/Rahman
Eelay
eediran@yahoo.com
Faafin: SomaliTalk.com |
May 2, 2006
Afeef: Aragtida qoraalkan waxaa leh qoraaga
ku saxiixan
MACALLINKEEN ALLOW KAAL, MACALLINKIIS ALLOW KAAL!
-
Maccallin Mohamed Yaxye -
WQ: Eelay...
Guji...
Daabaco
Boggan | Print
