Golaha Midowga Dadka Reer Gedo ayaa waxaa uu Madaxweynaha cusub ee Jamhuuriyada Federalka Soomaliya u dirayaa baaq isugu jira taageero, bogaadin iyo talo soo jeedin.
Ali Malaaq
Ahmed, chairman |
Aadan
A. Colujoog, vice-chairman
|
Ugu horeyntii
waxaana kugu hambalyayneynaa howsha culus oo loguu doortay,
waxaana Ilaahay weydiisanaynaa inay dawladaadu noqodo mid dadka
wada deeqda oo la mahadiyo isla markaana salka u dhigta hanaan
iyo waa cusub oo ku fadhiya sinnaan, cadaalad, wadatashi iyo
awood qeybsi.
Dadka iyo
dalka Soomaaliyeed waxaa soo maray afar iyo tobon sano oo
dagaal sokeeyo iyo doonis dowladnimo. Waxaa kale oo soo maray
kala qeybsanaan, qoqob siyaasadeed iyo naceyb qabiil.
haseyeeshee rajada ay shacbiga Soomaaliya ka qabaan inay taas
soo gaba gabowda ayaa waxay ku xiran tahay sida aad u wajahdid
howlaha ad-adag ee ku horyaala. Si loo abuuro Soomali fiyow,
mideysan, xoog iyo caafimaad leh, loona gaarsiiiyo Soomaaliya
mustaqbal nuur leh, kobac dhaqaale, aqoon, iyo nabad raagta, waa
in dowladaadu aamintaa kuna dhaqantaa naddaamka furfurnaanta,
qarsooni la’aanta iyo, la xisaabtanka dowladda.
Waxaanu si
cad oo buuxda kaaga digeynaa inaad ka fogaatid waxyaabihii
burburiyay xukuumadihii hore Soomaaliya kuwaas oo ay ugu
horeeyeen:
1. Ku
dhaqan la'aanta shuruucda dalka iyo sareynta sharciga
2.
Qeexitaanka iyo
isu-dheellitirla’aanta awoodda hay’addaha sare ee qaranka sida
hay’adda sharci-dejinta, hay’adda fulinta iyo hay’adda garsoorka.
3.
Tixgelin la'aanta xoriyadu qowlka iyo koryeelid la'aanta
karaamada muwaadiniinta Soomaaliyeed
iyo saxaafada xort ah.
4. Tixgelin
la'aanta aqoonta iyo khibraada muwaadinka
5. Ka
faa'iidaysi la'aanta kheyraadaka dalka iyo horumarin la'aanta
culuunta casriga ah
6. ku
tagrifalka, boobka iyo dhaca hantida guud iyo midda gaar
ahaaneed
7. Damaanad
qaadis la’aanta lahaanshaha gaar ahaaneed iyo xaq dowrka
la’aanta ganacsiga ku dhisan suuqa xorta ah.
8.
Sugidda iyo taaba
gelinta la’aanta xuquuqda asaasiga ah ee qofka sida hoy, cunto,
waxbarasho, iyo caafimaad.
9. Xafidid la’aanta diinta
islaamka iyo dhaqanka suuban ee Soomaaliyeed
Waxaan
ognahay in habka dowlad dhexe oo awood badan la tijaabiyay isla
markaana habkaas uu guuldareysaytay. Waxaa kale oo aan ognahay
in habkani uu abuuray kala shake balaaran, kaasoo sababay in
gobolada qaarqood gooni isu taagaan, iyadoo kuwa kalena laga
yaabo inay sidaas oo kale yeelaan. Waxaan aaminsanahay in sida
kaliya oo lagu soo celin karo kalsoonida shacbiga soomaaliyeed,
laguna daaweyn karo dhaawaca uu abuuray nidaamka awoodda kooban
uu yahay inaad ku shaqeysaa habka xukunka baahsan ama federalka
oo aad gobolada u madax banaaneysaa inay amuurahooda iyagu
maareeyaan maxaa yeelay waxaanu aaminsanahay in midnimada
ummadda Soomaaliyeed lagu hanan karo habka noocaan oo kale ah oo
aan wali la tijaabin.
Waxaanu
fileynaa inaadan shacbiga Soomaaliyeed niyad jibin. Waxaanu kaa
rejeynaynaa inaad si buuxda oo dhaqsiyo leh ugu hortagtid ku
talaxtaga iyo xaalufinta deegaanka. Waxaanu kaa rejeynaynaa
go’aan qaadasho bartilmaameedkiisu yahay wadatashi iyo talo
wadaag
1. Ali Malaaq
Ahmed, chairman
2. Aadan
Ahmed Colujoog, vice-chairman
Qoraalakan kala xiriir
<raamoraaxo@hotmail.com>
Afeef: Aragtida
qoraalkan waxaa leh qoraaga ku
saxiixan
Faafin: SomaliTalk.com | Oct 11, 2004
Culimada Boosaaso oo Lagu Been Abuurtay
» Weriye Cawaale oo Sheegay in aan
warkaa laga soo xigan
» Cali-Koor oo si kulul ugu Jawaabey
Websitekii warka qoray
» Axmed Sahid oo faahfaahiyey meeesha
lagacta lagu bixiyey
Dhammaan ka akhri halkan
Kulaabo bogga www.SomaliTalk.com
|