Booliska Britain oo ka digaya Khatarta Gudniinka Gabdhaha
Soomaaliyeed.
Ridwaan Xaaji C/wali
Waxaa laga soo saaray dalkan
Britain sharci cusub oo la xiriira gudniinka gabdhaha
FEMALE GENTAL MUTILATION
(CIRCUMCISION) oo kuseeya dhamaan dadyawga kala
kala gadisan ee ku dhaqan dalkan britain, taasi oo ah in aan la
ogolayn in gabdhaha ku nool dalkan Britain aan lagu gudi karin
dalka gudihiisa iyo dibadiisa sida lagu soo bandhigay shir wayn
oo shalay ka dhacay Magaalada london oo ay ka soo qayb galeen
Madax ka tirsan Booliska dalkan Britain gaar ahaan kuwa
qaabilsan ka hortagga xad gudubyada Caruurta.
Shirkaasi oo ay soo qaban
qaabiyeen Ururo Soomaaliyeed oo ka hawlgala dalkan waxaa looga
danlahaa in lagu baraarujiyo Soomaalida ku dhaqan dalkan
sharcigan cusub oo dhigaya in cidii jabisa sharcigan uu
mutaysanayo 14 sano oo xarig ah (14 years of
imprisonment) , waxaana Caroline Hamilton oo kamid ah
Booliska ka hortaga Xadgubyada Caruurta Waraysi aan la yeeshay
ay ku sheegtay in ay uga digayso waalidiinta gudniinka Gabdhaha.
Mar aan waydiiyay in ay jiraan
dhibaatooyin kale oo ay Boolisku ka tabanayaan Soomaalida waxaa
ay tiri''' Waxaa kaliya oo aan ka warhaynaa in Waalidiinta
Soomaalidu ay dilaan ama Gacan qaad u gaystaan Caruurtooda oo
sidaasi daraadeed waxaan leenahay arintaasi haka feejignaadaan
inkasta oo ay jecelyihiin Caruurtooda oo aan ka war hayno'''
Waxaana intaasi ay ku dartay in ay
jiraan Mas'uuliyiin lala kaashanayo sidii loo heli lahaa dadka
ku xadgudba sharcigan cusub iyadoo lala kaashanayo Dhakhaatiirta,
Macalimiinta iyo Soomaali kala shaqayn doonta Booliska arintan.
Sharcigan waxaa lagu fulinayaa qof
kasta oo isku daya in uu Gudniin ku sameeyo Gabdhaha noocuu
doono ha ahaadee (Sunni ama Fircooni) oo
sharcigu uu si siman ugu xukumayo 14 sano oo xarig ah, waxaana
arintaasi ay Britain u aragtaa Xadgudub Xuquuqda Bani'aadmka iyo
Caafimaad daro.
Dr. Faadumo Xuseen oo ah Haweenay
Caafimaadka ka shaqaysa waxaa ay sheegtay in dhibaatooyin
Gudniinka Fircooniga ah uusan dhamaad lahayn oo Caafimaad daro
ay la kulmaan Gabdha inta aan la guursan ilaa xiliga guurka,
waxaana ay ugu baaqday Soomaalida in laga tago caadadan oo aan
ku salaysayn.
Qaar kamid ah Madhabta Islaamka
waxaa ay qabaan in laga maarmi karo Gudniinka noocyadiisa kala
duwan oo aysan wax dhibaata ah lahayn, waxaana inta badan ay ku
talinayaan Culimadu in mar hadii sharciga dalkan uusan ogolayn
oo diintuna aysan ku qasbayn qofka in uu Gabadhiisa Gudniin
Fircooni ah ku sameeyo uu ka maarmi karo.
Saciid Cabdi Waaxid oo kamid ah
Mas'uuliyiinta soo qaban qaabiyay kulankaasi ayaa isna sheegay
in Soomaalida Dalkan ay la gudboon tahay in ay dhowraan
sharcigaasi oo ah ayuu yiri mid dhibaato u keeni kara qofka mar
hadii uu ku mutaysanayo 14 sano oo xarig ah, waxaa kaloo uu
intaasi ku daray in ay ka shaqayndoonaan sidii Soomaalida dalkan
loogu wargalin lahaa waxyaabaha khuseeya.
Maryan Mursal oo kamid ah
Fanaaniinta Soomaaliyeed oo iyaduna ka soo qaybgashay shirkaasi
ayaa waxaa ay ku tilmaantay Gudniinka Fircooniga ah in uu yahay
dhibaato loo gaystay inta badan dumarka Soomaaliyeed oo ay
mudantahay in laga tago wixii hadda ka danbeeya. waxaa kaloo ay
si wayn u muujisay wal walkeeda ku aadan dhibaatada guud ahaan
haysata Dalka Soomaaliya.
ridwanhaji@yahoo.com
Faafin: SomaliTalk.com |
April 3, 2005
Daabaco
Boggan | Print
