Warar Qubane Ah::: Jan 14, 2005
- NORWAY:
NIN SOOMAALIEED OO DILEY XAASKIISII OO SAGAAL BILOOD AH
- Wafdi loo dirayo Magaalada Mogadisho ka hor inta aysan dowladda tagin.
- Shineemo lagu qarxiyay xamar.
- Wiilka
uu dhalay Amiirka Ingiriiska oo fadeexo midabtakoor ah hareysay
- Khartoum iyo Maanta | Warbixin
- Maradona Iyo Muuqaalkiisa Maanta
NORWAY: NIN SOOMAALIEED OO DILEY XAASKIISII OO
SAGAAL BILOOD AH
 Dadka
soomaaliyeed ee ku nool dalka Norway ayay la yaab iyo argagax ku noqotay
markii shalay 13/01/05 la sheegay in nin soomaaliyeed uu toorrey ku diley
afadiisii oo uur 9 bilood ah lahayd. Booliska magaalada Stavanger (galbeed)
Norway, ayaa saxaafadda u sheegay in gabadhu ay noolayd markii isbitaalka
magaaladaas ku yaalla lasoo gaarsiiyey, hase yeeshee ay 2 saacadood ka bacdi
dhimatay. Dhakhaatiirta ayaa waxay isku dayeen inay ilmaha caloosheeda ku
jira oo markaas noolaa bad-baadiyaan, iyagoo isku dayey inay qalliin ku
sameeyaan meydkii hooyada, nasiib darrose kuma aanay guulaysan.
“ in muddo ah waxaanu islahayn way ku
guulaysanayaan, oo ilmaha waa la badbaadinayaa, laakiin markay saacaddu
ahayd 14:25 ayaa naloo xaqiijiyey in ilmihiina uu dhintay” Joornaalaka
Aftenposten ayaa booliska kasoo xigtey.
Boolisku waxay sheegeen in gabadha dhimatay (hooyada,
21 jir) ay dhabarkeeda ku yaalleen dhaawacyo badan oo middi ah, tooreydii
gabadha lagu dileyna waa la helay.
Ninkii gabadha qabey (30 jir) oo isla markiiba
meeshii lagu qabtay, ayaa isna waxaa ku yaalla dhaawacyo fudud, isbitaalka
ayaana la dhigay.
Booliska ayaana ka gaabsaday inay faahfaahin
ka bixiyaan sida dhaawacyadani ninka u gaareen.
Arrinta layaabka leh ayaa ah in ninku uu isagu
booliska wacay, arrinta meesha ka dhadayna u sheegay.
Ilaa hadda boolisku ma aanay waraysan ninka,
lamana hubo sida wax u dheceen. Maanta 14/01/05 ayaa la filayaa in la
warysto, waxayse boolisku caddaynayaan in aanay wax hubaal ah ilaa hadda
jirin.
Booliska ayaase waxay is weydiinayaan: ninka
ma laba qof inuu diley baa lagu eedaynayaa mise hal qof?
“Ilaa hadda waxaanu ku eedaynaynaa halqof inuu
diley” booliska ayaa sidaas laga soo xigtey.
Gabadha ayaa lahayd uur sadkiisii go’ay,
waxaana u dhimmanaa maalmo yar, sida la filayey.
Gabadha dhimatay, Allah ha u naxariistee, ayaa
waddanka ku timid qaxootinimo laba sano ka hor, iyadoo dhawr bilood ka bacdi
ninkeeda dacwad kusoo gelisey, iyagoo labaduba hadda haysta dhalasho
soomaali ah.
Soomaalida Norway iyo falalka dilka!
Dadka soomalaiyeed ee ku dhaqan dalka Norway
ayaa waxay ka welwel qabaan falalka dilka ah oo kusoo badanaya dhexdooda.
Norway waa dal yar oo kooban, nolosha lagaga noolyahayna lagu tilmaamo inay
tahay tan adduunka oo idil ugu sarraysa. Sida la xusuusto saddexdii
sannadood ee danbe waxay Norway noqotay lanbar 1, xagga nolol wanaagga.
Haddana sidaas oo ay tahay dadka ku dhaqan ee
soomaaliyeed waxaa waayadan danbe kusoo badanayey falalka dilka ah.
 Bishii
Oktoobar, ayay ahayd
markii gabadh norwiiji ah meydkeeda laga helay qolkii ay ka deggeneyd
kolleejkii ay dhiganaysey.
Ninkan (Hashin) oo la raadinayey muddo laba
bilood ah, lagana soo qabtay tuulo ku taalla dalka Nederland, waxyar
krismaskii ka hor, ayaa sida la sheegay farihiisa laga helay gabadha
dhimatay Hedda Karterudseter (19) jirkeeda. Joornaalada kasoo baxa magaalada
Oslo ayaa maanta soo sawiray Hashim, kana soo xigtey inuu qirtay inuu
gabadha surkeeda farihiisa ku qabtay habeenkii la diley. Maanta ayaa waraysi
dheer boolisku ka qaadayaan.
Bishii Ogos
ee isla sannadkii dhammaaday ayay ahayd markii nin soomaaliyeed si argagax
leh toorrey ula dhex galay dad saarnaa tram (bas sida tareenka biraha raaca)
ka dhex shaqaynayey Oslo. Halkaas nin ayaa ku dhintay qaar kalana way ku
dhaawacmeen. Arrintaas ayaa dareenka dadka reer Norway aad u kicisay.
Falal badan oo dil ah ayaa kuwaas kasii
horreeyey.
Qaarkood waxaaba lagu diley dad soomaaliyeed,
waxaase ugu naxdin iyo murugo badnaa ninkii soomaaliyeed ee halmar wada
gawracay 2 ilmood oo uu isagu dhalay oo saqiir ah iyo xaaskiisii, nin
soomaaliyeedna uu dhaawacay.
Arrintan falalka dilka ah ee ay dadka
soomaalida ahi geysanayaan ayaa u baahan in asbaabteeda la raadiyo, dawladda
Norway iyo jaaliyadda soomalaiyeedna ay wax ka qabtaan.
Cabdisamad Xoday
hoday30@hotmail.com
Norway:
Nin Somaliyeed oo
lagu soo eedeeyay in uu dilay Xaaskiisii iyada oo uur leh
USA: 8,000 oo
Soomaali ah oo ay Dhici Karto in Loo Tarxiilo Soomaaliya
Wafdi loo dirayo Magaalada Mogadisho ka hor inta aysan dowladda tagin.
Xubno ay ka mid yihiin Wasiirka Arrimaha gudaha iyo kan amniga qaranka ayaa lagu
wadaa in ay ka mid noqdaan wafdigaas tagaya magaalada Mogadisho ka hor inta aysan
dowlada si rasmi ah u caga dhiganin.
Wafdigan ayaa la tashi la sii samayn doona qaybaha kala duwan ee bulshada ku nool
xamar si ay ugu sii diyaar garoobaan soo dhawaynta dowlada iyo meelihii ay ku dagi
lahaydba.
Hogaamiyaasha ka soo jeeda caasimada kuna jira dowaladda iyo baarlamaanka ayaa horay
u balan qaaday in hubkooda ku wareejinayaan gacanta dowladda si uu u noqdo hubkaasi
mid sharciyaysan oo Qaranka uu yeelanayo,waxaa kale oo ay balan qaadeen in ay ku
wareejinayaan dowaldda meelaha muhiimka ah ee dowladda ay leedahay sida Radio
Mogadisho.Madaxtooyada.Dakada,Garoonka,Warshadaha iyo meelo kale oo badan,waxaaana
wafdigan la dirayo laga sugayaa in ay meelahaas oo dhan ku soo wareejiyaan gacanta
dowladda.
Dhinaca Kale waxaa la diyaarinayaa ciidamadii la gayn lahaa dalka soomaaliya,kuwaas
oo sida la sheegay ilaalin doona amniga dowladda inta laga helayo ciidan midaysan oo
ay dowladda leedahay,ciidamadan oo kala imaanaya wadamada ku jira ururka midnimada
Afrika waxaa dhaqalahooda bixin doona Qaramada Midobay iyadoo ay horjoogayaal u
noqon doonaan qaar ka mid ah Saraakiisha soomaaliyeed.
Wali ciidamadan la iskuma afgaranin oo waxaa jira qaar ka mid siyaasiyiinta oo
diidan,halka culumada iyo shacabkaba ay diidan yihiin,laakiin dowladda ayaa horay
dalabaadyo badan gaarsiisay midawga afrika sidii loo siin lahaa ciidamo ay ku
socodsiiso amaanka gudaha iyo howlaha dowladaba.
Shineemo lagu qarxiyay xamar.
Qaraxan oo ay ku dhinteen dad gaaraya sadex qofood ayna ku dhaawacmeen afar kale
ayaa ka dambayay ka dib markii bam lala beegsaday shineemadaas xili habeen ah oo ay
socotay ciyaal u dhaxaysay kooxaha ka jira dalka Britain oo ay dhalinyarada si aad
ah u xiiseeyaan teamamka ka jira dalkaasi sida Liverpol.
Qaraxan lama oga cida gaysatay iyo sababtaba,ma jirto cid sheegatay inta la ogyahay
qarxintaas balse waxaa jiray in waayadan dambe si aad ah looga cabto shineemoyinka
marmar badana ay isku dhacaan dadka deegaanka iyo milkiilayaasha shineemooyinkaas
kuna eedeeya in saq dhexe ay filimaan keenaan.
Canab Mumtaz
canabmumtaz@yahoo.com
Nairobi, Kenya
Dowladda FKMG ah
oo Heshay Kalsoonida Baarlamaanka
Wiilka
uu dhalay Amiirka Ingiriiska oo fadeexo midabtakoor ah hareysay
[Wargeyska The Sun: "Hitler youth”]
 Midabtakoor
iyo faquuqa loo geysto qowmiyado ku nool dunidan daafaheeda ma ahan wax hada
ku cusub ee waxey aheyd mid waligeed soo taagneyd tan iyo seman aad u fog.
Waxaase intaas u dheer dagaal diimeed iyo mid xadaaradeed oo ilaa imankadan
dhibteeda lala ciirayo. Sida aanu ogsoonahayna mustamacradii Ingiriiska
waxey maalin maalmaha kamid ah aheyd awoodihii ugu waa weynaa
gumeystayaalkii boobka iyo kala qeybinta darran u geystay caalamka
aakhirkiina keenay iney maanta weyso qeyb kamid ah awoodii ay laheyd.
Hadaanba iyada loo talin.
Hadaba wiilka uu dhalay amiirka dhaxalka leh ee dalkaasi Ingiriiska Amiir
Harry iyo guud ahaan qoyskaasi reer Boqor ayaa hareeysay fadeexo la
xirriirta midab faquuq ah, kadib markii Amiirkaasi Harry la yiraadho uu soo
xirtay dhar Unifoom ah oo gacanta bidix kaga sawiran tahay astaantii lugu
yaqiinay Naasiyiinta Jarmalka ee gumaadka weyn ugeystay dadkii Yahuuda ahaa
ku noolaa Yurubta bari waqtiyadii u dhaxeysay dagaaladii koowaad iyo labaad
ee dunida.
Amiirkan oo ka qeybgalay xaflad ay koox ugu maamuusayey mustacmirada
dalkaasi waa sida wargeyska qoraye ayaa Amiirkan yari oo gacanta koob qamri
ah ku heysto soo xirtay calaamadii astaanka u aheyd kooxihii faquuqa caanka
ku ahaa ee Hitler. Dhacdadan ayaa waxa ay durba luxay dareenka Yahuuda ah ee
dalkaasi ku nool. Waxaana ay sheegen in falkani yahay mid dib u xasuusinaya
dhaawacii loo geystay yahuudii ka badbaaday gumaadkii Hitler.
"Ma ahan mid dha dhan leh" ayuu yiri ninka la yiraahdo Lord Janner oo ah
siyaasi katirsan xisbiga Labour isagoo u waramayey isla wargeyska dhacdadan
soo bandhigay. Ninka kale oo isna kamid ah jaaliyada yahuuda dalkaasi oo
dareenkiisa ku aadan arritan ayaa sheegay ineysan aheyn wax talaabo noocaas
ah oo kaftan geli kara, waxaana uu yiri " Auschwitz" oo keliya ayaa ku
dhimatay halmalyan oo Yahuud ah.
Dhowrka toddobaad ee fooda nugu soo haya waxaa lugu wadaa iney dunidu xusto
60 sanno guuradii kasoo wareegtay markii Naasigii Hitler iyo askartiisi laga
xoreeyey Auschwitz.
Khabiiryahan la yiraahdo Dick Arbiter
oo isagu ku xeel dheer arimaha qoyska reer Boqor ayaa sawiradii wargeyska
The Sun ku tilmaamay "Musiibo" . Dhinaca kale siyaasin badan oo dalkaasi
ayaa waxey qabaan in si deg deg ah loo joojiyo howlaha meleteri ee wiilkan
wado.. "Askartii kasoo qeyb qaadatay dagaalkii 2aad ee dunnida si qalbi jab
ah ayey ugu xumaadeen filkii Amiir Harry. Waayo askartaasi dalkooda ayey u
dagaalameen qaar badan oo iyaga kamid ah ayaa saaxiibayaalkood ku waayey
sida ay qaar kale oo tobanaan kun ah ay u waayeen ehelkooda iyagoo la
dagaalamayey Naasiyiintii Jarmalka" ayuu yiri Mr Arbiter oo u warameyey
telefeyshinka SKY News.
Goor dambe ayaa Amiir Harry waxaa
bixiyey raaligeyn isagoo sheegay iney aheyd dhar qaladan uu qaatay waa sida
uu hadalka u dhigaye. Dhanka kale ma ahan markii ugu horeysay ee Amiirkani
uu cinwaanada waaweyn ee wargeysyada kamuuqto mar sii horeysay ayuu waxyeelo
u geystay sawir qaade wargeys kaasoo uu kula kulmay goob lugu caweeyo.
Wargeyska The Sun oo arrintan soo shaac
bixiyey ayaa maanta cadadkiisi soo baxay waxa uu xusay in Amiir Harry keliya
uu soo xiran astaantii Naasiga balse walaalkiis kale ee William uu isna
qarsaday madaxa isagoo xirnaa dharkii Naasiga.
Isku sooo wada duuboo ma ahan markii ugu horeysay ee fadeexooyin nooca ay
tahay hareyso qoyska reer Boqor ee dalkaasi, balse tani waa midii ugu yaabka
badneyd ee soo wajahda taariikhdana baal dahab ah ka gashay.
Waxaa isku soo duwday; Ikraam Cali-kaar
ikraam@journalist.com
MASHRUUCA:-
TARTANKA 2aad EE QUR’AANKA
Khartoum iyo Maanta
Kaddib markii sagaalkii bishan qalinka lagu duugay heshiis kamadambeys ah oo lagu
soo afjarayay colaadda-sokeeye ee dalka Suudaan ka aloosneyd mudda cagacageyneysa
rubuc-qarni, ayaa waxaa caasimadda dalka ka socda dammaashaadyo iyo dibadbaxyo loogu
riyaaqayo guusha la gaaray.
Dhammaanba warbaahinta dalka ayaa ku mashquulsan faaqidaadda iyo falanqeynta wajiga
cusub ee siyaasadeed ee dalka iyo maanta, taasoo ah mid meela badan laga eegi
karayo, waa marka la maandhugta bogga cusub ee furmay iyo hannaansocodka iyo
heykalka diblamaasiyadeed ee dalka Suudaan; oo ay isagu harqiyeen dagaalla sokeeye
oo ay dad badani ku nafwaayeen.
Suudaan oo ah dalka qaaradda Afrika ugu baaxadda weyn ayna ku taalla caasimadda ugu
ballaaran, ayaa tan iyo markii uu gobanimadiisa ka qaatay gummeysigii Britain,
sannaddii 1956-kii, ayaa la oran karayaa waxaa ka jiray ismaandhaafyo tira badan,
maxaayeelay dalweynahan Suudaan waxaa ku dhaqan oo daga qiyaastii 500 oo qabaa'il,
waxaana looga hadlaa luuqada iyo lahjado kala jaad ah.
Laakiin luuqadda wax lagu barta waa luuqadda Carabiga, waloow hadda la hadal-hayo in
tacliinta sare ay noqon doonta mid luuqadda Ingiriiska wax lagu barta mustaqbalka
dhaw waa sida la tibaaxaye. Siyaasinyiinta dalka ayaa carrabbaabay in marka dib loo
budul-raaca taariikhda dalka tan iyo dawladdii Ismaaciil Al-Azhari,
ra'iisulwasaarihii ugu horreeyay, ee hannaanka dawladnimo kala wareegay
gummeystayaashii dalka u arriminayay kahor dhalashadii madaxbannaanidiisa, in
Suudaan ay maanta un qaadatay xornimo buuxda oo dhab ah waxaana sidaas sheegay
madaxweynaha dalka mudane maarshaal Albashiir maruu warfidiyeenka iyo shacabka
madasha shirka kala hadlayay.
Dhanka kale Khartoum, ayaa sannadkan 2005, nasiib u yeelatay in ay majaraha u qabata
dhaqanka Carabta, waxaa loo caleemasaaray in ay tahay caasimadda dhaqanka shacuubta
Carbeed.
Taasi waxyaalaha ay ku muteysatay waxaa ka mid ah in ay noqotay caasimadda ay dadka
aan u dhalan luuqadda carabiga ay wax ku bartaan luuqadda Carabiga, maxaayeelay
jaamacadda caalamiga ah ee Afrika oo kaliya ayaa waxaa machadkeeda barashada
luuqadda waxaa ka faaiideysta oo barta luuqadda Carabiya dhammaanba dhallinyaro ka
kala timid shanta qaaradood, kuwaasoo marka dambe luuqaddaasi qalaad ee ay u dhalan
waxbarashadood heerka jaamacadeed ku dhiraandhiriya siyaaba door ahna uga macaasha
diiniyan iyo maaddiyanba.
Isku soo duuboo, waxaa Khartoum sannadkan soo salaamay shan ciidood oo wada socda:
Ciidda sannadka cusub, tan masiixiyiinta [Chrismax], midda loogu dabbaaldagayo
heshiiska la gaaray, tan kale loogu dammaashaadayo noqoshada caasimadda Carbeed iyo
ciidda sannad-guuradii sagaal iyo afartanaad ee dalka markuu meel iska dhigay
heeryadii gummeysiga.
Laga soo billaaba maalintii is-afgaradka nabadeed laisla meeldhigay ilaa iyo maanta
waxaa taleefishinada iyo warbaahinta qaranka laga baahinayaa heeso nabadeed oo ay
abwaannada qaranka ku farayareysteen ayna ku luuqeynayaan fannaaniinta dalka laga
tixgaliyo.
Waxaa la oran karaa magicii magaalada ee ahaa Khartoomtii nabadda maanta ayunbuu
gardhalad yahay ee geeddisocodkiisii iyo gundhiggiisii laisla gunbaaray.
By: Stanza.
ayaandhalad5@hotmail.com
Yemen: Filan waa iyo Rajo Xumo
Maradona Iyo Muuqaalkiisa Maanta
 Xiddigii
kubada cagta ee Diego Maradona, waxa uu kamid ahaa raggii ugu magacaga dheer
ee soo mara taariikhda ciyaaraha kubada cagta inta la xasuusan yahay. Lama
soo koobi karro muuqaalkiisi guud waqtiga uu ahaa nin lugtiisa laga dambeeyo.
Waayaha iyo waqtiga sida aad doonta marna kuuma soo maraane ee waxaad kala
kulantaa wareer iyo wanaag midba sida ay kuu soo wajahdo.Maantase muxuu ku
sugan yahay ciyaaryahankaasi beri qiimo lahaa?
 Diego
Maradona oo waqtiyadii dambe u batay dhinaca balwada iyo isticmaalka
maandooriyaha ayaa la ildaran cuduro muddadii 17-ka sanno aheyd uu hoy u
ahaa maandooriyaha Kookaayiinta. Maradona oo mar ahaan jiray wadnihii
Argentin ayaa maanta si kedis waxaa soo qabatay indhaha kaamiradaha caalamka.
Wakaalada wararka ee AP oo arrintan qortay mid lugu tilmaami karro filanwaa
ayaa sawirkii ugu ee ay soo gudbiso wuxuu ahaa mid muujinaya sida uu
miisaanka jirka u kordhay kadib markii uu gaaray 120 kilo, taasoo ah mid
dadkii lasoo shaqeeyey iyo guud ahaan bulshada ciyaaraha ku abuurtay
mutacajab.
Sidoo kale guud ahaan xaaladiisa caafimaad oo aad u liidata ayaa waxaa la
sheegay in 38% oo kiliya uu jirkiisa xamili karro cudur kasta oo soo wajaha
noloshiisana qatar ku ah kusugan yahay.
Maradona ayaa markii ugu dambeysay waxaa ka qeybgalay ciyaar lugu qabtay
magaalada Munche ee dalka Jarmalka, wixii ka dambeeyey waqtigaasina hadba
waxaa lugu daweynayey xarumo caafimaad oo kala duwan oo ay kamid tahay
cisbital ku yaala dalka Kuba. Muuqaalkiisi ugu dambeeyeyna waxa uu
tilmaamaya inaanu guud ahaan caafimaadsu caadi aheyn isagoo gaaray gacmaha
laga qabto.
Waxaa isku soo duwday;
Ikraam Cali-kaar
ikraam@journalist.com
Faafin:
SomaliTalk.com | Jan 14, 2005
Dowlada iyo Mucaaradka
Suudaan oo Nairobi ku gaaray heshiis buuxa
Heshiiskan ay labada dhinac ku
gaareen Nairobi waxa uu ka dambeeyay shir mud laba sano ka badan uga socday
Guji... jan 11
 Ciribtirka
Cunitaanka iyo Ka Ganacsiga Qaadka
Soomaalida Minnesota oo isku ballansaday In ay Cunitaanka
Qaadka ka Cirib Tiraan Gebi Ahaanba Meel ay Soomaali Kaga Nooshahay Dunida
Guud Keeda...
Guji...
Kulaabo bogga www.SomaliTalk.com
| 
Daabaco
Boggan | Print