WARARKAII MAY 4,
2006
-
C/llaahi Yuusuf
oo sheegay in Dowladdiisu goor ay ahaataba ay ka takhalusi ..
-
Wakiilka Ugaaska Beesha Cayr oo
gurigiisa lagu weeraraey Bam..
-
Ra’isul Wasaare Geeddi oo si dhaqsi
ah ugu soo laabtay Baydhabo.
-
Tartan lagu xusayo 15-ka May oo ka
furmay Muqdisho.
-
Gudoomiyaha
Baarlamaanka oo sii sagootiyay Odayaashii siminaarku u dhamaaday.
-
Guddoomiyaha
Gobalka Banaadir oo soo dhaweeyay heshiiskii Sacad iyo Suleybaan.
-
Siminaar maanta
loo furayo Xildhibaanada Baarlamaanka.
-
Faadumo Xasan Diirshe “Hay’adda Fatxa waxay u taagan
tahay sidii ay Bulshada uga suuli lahayd caadadda xun ee FGM-ka
-
Amar Ay Isbahaysiga Dooxada Jubba Ku
Mamnuucayaan Dekedaha Macmalka Ah Ee Jubbooyinka In Doomuhu Ku
Xirtaan
Ogeysiis ku jeeda
Soomaalida Minnesota (Midtown Exchange/ Global
Market)
Soomaalida Minnesota
waxaa la ogeysiinayaa in agagaarka Masaajidka cusub
ee la gaday ee Abubakar al sidiiq agtiisa laga
dhisay guryo la kireysto weliba dadka dan yarta ah
qayb loogu talo galay. Gurigaas oo aad u weyn
waxaa uu ku yaalaa 2929 Chicago Ave South
Minneapolis Gurigan waxaa uu ku yaalaa meel u
dhaxayso labo masaajid kuwaas oo kala ah Masji
Abubakar iyo Masjid al Iimaan. Waxaa kale oo
aan ka dheerayn masaajidyada Umatu Muxammad, Al-towxiid,
iyo masjid Cumar iyo labada suuq ee aadka u waaweyn
ee Soomaaliyeed Karmal Mall iyo Mallka 24ka.
Gurigan dib u habaynta
lagu sameeyay waxaa la yiraahdaa Midtown Exchange
Apartment. Ka dib markii la arkay horumarka
iyo soo noolaynta ay immigrants ku sameeyeen Lake
Street muhaajiriintaas oo u badan Latino iyo Somali
ayaa ganacsato kaashanaysa shirkadda weyn ee Allina
iyo madaxda magaalda Minneapolis iyo Congressmenka
Minnesota oo ay ka mid yihiin Senator Coleman,
Senator Dayton, Congressman Sabo waxaa suurtogal
noqotay in Midtown Echange dib loo dhiso weliba
Global Market uu noqon doona suuq caalami ah marka
la furo.
Global Market waxaa
talada lagu dhisay wax ka lahaa nin Soomaaliyeed oo
la yiraahdo Hussein Samatar oo ah madaxa hayada
African Development Center. Degaankan waa mid afka
Soomaaliga lagu qoray meelkasta maalinta furitaanka
Amiin Caamir ayaa ku soo bandhigi doonaa farshaxan
Soomaaliyeed. Waxaa kale oo ka soo qaybgeli doona
madaxda gobolka iyo dadweyne badan.
Xafladda furitaanka
Midtown Exchange
& Global Market.
June 3, 2006
saacada markay tahay 10:00 subaxnimo ilaa 4:00
galabnimo
Kala xiriir Guryaha
Midtown Echange 612-823-1104
Global Market business
African Development Center 612-333-4772
|
C/llaahi
Yuusuf oo sheegay in Dowladdiisu goor ay ahaataba ay ka takhalusi ..
C/llaahi
Yuusuf Axmed oo haatan ku sugan dalka Sweden ayaa mar uu la hadlayay
Jaaliyadda Soomaaliyeed ee ku dhaqan halkaasi ayaa waxa uu sheegay in
dowladdu ay u baahan tahay in gacan laga siiyo arrimaha ammaanka, dib u
dhiska, dib u soo nooleynta Ha’adihii Dowladda, isagoo sheegay in
Dowladda ay balanqaadyo fara badan ka ka haysato wadamada IGAD, isagoo
sheegay in wadamo ay ka mid yihiin Suudaan iyo Ugandaba ay diyaar u
yihiin ay u soo diraan Soomaaliya ciidamo nabad ilaalineed oo Dowladda
gacan ka siiya dhinaca amniga. “Waxaa ka horeeya imaanshaha ciidamadaasi
in marka hore Qaramada Midoobey ay ogolaato in ay Soomaaliya ka qaado
cunaqabateynta hubka taasna waxaan filayaa in ay dhawaan dhacdo” ayuu
yiri Madaxweyne C/llaahi Yuusuf Axmed oo wax laga weydiiyay siada uu u
arko Wasiirada hubeysan eek u sugan Magaalada Muqdisho, waxa uuna yiri
“waqti ay ahaataba Dowladdu way ka taqalusi doontaa, waayo ciddna loo
xayirnaan maayo”. Waxa uu ku eedeeyay Madaxweynuhu Dowladda Mareykanka
in ay gacan dhaaf ku sameysay Dowladiisa kaddib markii Wasiirada
hubeysan ay lacago ugu deeqday, kuwaasoo haatan dagaal ka wada Magaalada
Muqdisho. “waxay in Dowladda Mareykanku ay la soo xiriirto Dowladda
Federaalka si gacan loogu siiyo la dagaalanka Argagixisada” ayuu yiri C/llaahi
Yuusuf oo sheegay in Dowlada Mareykanka uu dhowr jeer u qoray qoraalo uu
kaga dalbanayo in ay taageeraan Dowladda Federaalka si nabadgelyo loogu
soo dabaalo Soomaaliy taasoo muhiim u ah Wadamada geeska Afrika. C/llaahi
Yuusuf waxa uu sheegay in Dowladda FEderaalka ay ku howlan tahay
ciidamadii xoogga dalka Soomaaliyeed iyo waliba tababarida kooxaha
Maleeshiyooyinka kuwasoo uu sheegay in xarumo looga furay qaar ka mid ah
Gobalada dalka.
Wakiilka Ugaaska Beesha
Cayr oo gurigiisa lagu weeraraey Bam..
Habeen
hore saqdii dhexe ayaa xaafadda Yaqshiid ee Magaalada Muqdisho ay
maqleen dadweynihii deegaankaasi qarax aad u weyn, waxaana qaraxaasi
lala beegsaday guriga Wakiilka Ugaaska Beesha Cayr Ugaas Cabdi Daahir
Ugaas Nuur, inkastoo qaraxaasi uu ahaa Bam gacmeed gacanta laga soo
tuuray ayaa haddana uusan gaysan wax dhimasho iyo dhaawac ah.
qaraxaasi
waxa uu burburiyay Gaari dhex yaalay guriga iyo waliba darbigii ka ag
dhawaa goobta uu qaraxu ka dhacay, waxaana goobta markiiba u soo
gurmaday dadka deganaa xaafadda.
Ilaa iyo
hadda lama garan cidda ka dambeysay qaraxaasi, inkastoo Ugaas Cabdi
Daahir uu maalmahan ku howlanaa sidii uu nabad loogu soo dabaali lahaa
Gobalka Banaadir gaar ahaan kooxaha isku haya Magaalada Muqdisho, waxaa
cambaareeyay falkaan qaraxa ah maamulka Gobalka Banaadir oo uu
Guddoomiyaha ka yahay Maxamuud Xasan Cali Cadde (Gaabow), kuna tilmaamay
fal fuleynimo ah.
Ugaas
Cabdi Daahir oo u waramayay saxaafadda ayaa waxa uu sheegay in uusan
garaneyn cidda ka dambeysay qaraxaasi isagoo sheegay in uusan ku
niyadjabi doonin sii wada nabadeynta Gobalka Banaadir.
Ra’isul Wasaare Geeddi oo
si dhaqsi ah ugu soo laabtay Baydhabo.
Ra’isul Wasaare Cali Max’ed Geeddi oo mudo labo maalmod
ah ku maqnaa Magaalada Nairobi ee dalka Kenya ayaa shalay galabnimadii
di ugu soo laabtay Magaalada Baydhabo.
Ra’isul Wasaaraha ayaa diiday in uu wax war ah siiyo
saxaafada, hase yeeshee warar aanu helnay ayaa waxay sheegayaan in
Ra’sul Wasaaruhu uu Magaalada Nairobi u tagay sidii uu kulamo ula yeelan
lahaa wadamada deeqda bixiya, waxaana la sheegay in Ra’isul Wasaaraha uu
u gudbiyay wadamada deeqda bixiya Buug ay diyaarisay Wasaaradda
Qorsheynta oo la xiriira sida ay Dowladdu ugu baahan tahay dhaqaale lagu
socodsiiyo howlaha Dowladda oo la xiriira dhinaca dib u dhiska, dib u
soo nooleynta Hay’adihii dowladda iyo dib u habeynta ciidamadii xoogga
dalka Soomaaliyeed, Ra’isul Wasaaraha ayaa la filayaa in maanta uu la
hadlo warbaahinta si uu u faahfaahiyo waxyaabihii uu kala soo kulmay
Magaalada Nairobi.
Tartan lagu xusayo 15-ka
May oo ka furmay Muqdisho.
15-ka May
oo ah maalintii la aasaasay Xisbigii SYL ee dhaliyay Xoriyadda ayaa
tartan ku aadan maalinkaasi waxa uu ka furmay Machadka jir dhiska
Qodxaaleey (Qodxaaley Fitness Centre).
Tartankaan
oo ay ka qaybgalayeen 8–kooxood ayaa waxaa furay Aamiin Yuusuf Khasaaro
oo ka mid ah Musharixiinta Xiriirka Soomaaliyeed ee K/cagta guddiigiisa
fulinta, waxa uuna kula dardaarmay kooxaha ka qaybgalaya tartankaasi in
ay la yimadaan asluub iyo cayaar wanaagsan. Kulankii ugu horeeyay waxaa
lagu furay kooxaha Badda iyo Dowladda Hoose, waxayna isla dhaafi waayeen
3-3, waxaana Rigoorayaal 5-4 ah ku bediyay Kooxda Badda, waxa kalloo
wada cayaaray Jeenyo iyo Batroolka waxaana 3-1 ku bediyay Jeenyo.
Gudoomiyaha Baarlamaanka oo sii sagootiyay Odayaashii siminaarku u
dhamaaday.
Gudoomiyaha Baarla-maanka Shariif Xasan Siikh Aadan ayaa maalintii
shalay ahyad sii sagootiyay 90 Odey dhaqameedyo ka kala yimid
degmooyinka Gobalka Bay, kuwasoo mudooyinkaan simaar ku qaadanayay
Magaalada Baydhabo laguna barayay sida ugu haboon ee loo dhisi karo
maamulka Deegaanka.
Guddoomiyaha loo la dardaarmayay Odoyaasha dhaqanka ayaa waxa uu soo
jeediyay in ay dedejiyaan howlaha maamul sameynta degmooyinka Gobalka
Bay
isagoo sheegay in maamulkaasi uu noqon doono mid wada howlaha adeega
bulshada iyo midkii dowladeedba.
“Waxaad
haysataan mudo taban cisho ah, inkastoo ay yar tahay haddana waxaa loo
baahan yahay in aad soo xushaan dad matali kara golaha Deegaanka” ayuu
yiri Gudoomiye shariif Xasan, waxaa kalloo sii sagootiyay odoyaashaasi
Yuusuf Baadiyow ah sarkaal ka tirsan Hay’adda CRD, waxa uuna u soo
sheegay odoyaashaasi in loo baahan yahay in degmooyinka Bay ay noqdaan
kuwii ugu horeeyay ee loo sameeyo gole deegaan.
Ra’isl
Wasaare Cali Max’ed Geeddi ayaa dhawaan waxa uu sheegay in degmooyinka
iyo golabada dalka dhawaan loo sameyn doono goloyaasha deegaanka,
kuwaasoo ay soo dooran doonaan bulshada ku dhaqan deegaanadaasi.
Guddoomiyaha Gobalka Banaadir oo soo dhaweeyay heshiiskii Sacad iyo
Suleybaan.
Guddoomiyaha Gobalka Banaadir ahna Duqa Magaalada Muqdisho maalintii
shalay ahyd ka qaybgalay kulan ay soo qaban-qaabiyeen Haweenka Beelaha
Sacad iyo Suleymaan, waxaana kulankaasi lagu taageerayay heshiiska
Beelaha Sacad iyo Suleymaan ee ka dhacay Gobalada dhexe.
Haweenka
ka qaybgalay kulankaasi ee ka socday labada dhinac ayaa waxay u
mahadceliyeen intii ka shaqeysay in ay dib u heshiisiin dhex dhigaan
labadaasi iyagoo sheegay inay ka qaybgali doonaan kulanka lagu soo
gebagabeynayo khilaafka labadaasi beelood oo dhaca 15-ka May kana
dhacaya Degmada Cadaado ee Gobalka Galguduud.
Cadde
Gaabow oo ka hadlay kulankaasi ayaa waxa u soo jeediyay labada beelood
waxgarkooda in ay adkeeyaaan si ficil ahna u filiyaan heshiiska dhex
maray labada beelood, waxaa kalloo ka hadlay Max’ed Faarax Jimcaale oo
sheegay in baaddu ay u baahan tahay in ay ka wada shaqeeyaan dhamaan
bulshada Soomaaliyeed, waxa uuna u mahadcelinyay intii ka shaqeysay
nabadeynta labadaasi beelood.
Siminaar maanta loo furayo Xildhibaanada Baarlamaanka.
Maanta
ayaa la filayaa in Xarunta ku meel gaarka ah ee Golaha Baaarlamaanka ee
Magaalada Baydhabo uu ka furmo Siminaar socon doona mudo shan maalmood
ah waxayna Xildhibaanadu ku baran doonaan casho la xiriira dhinaca
Dastuurka iyo Arrimaha Federaalka.
Siminaarkaan ayaa waxaa cashiro ka jeedin doona labo Sharci yaqaan oo u
kala dhalatay Wadamada Nayjeeiya iyo Kenya, waxaana Siminaarkaan
furitaankiisa ka soo qaygali doona Gudoomiyaha Baarla-maanka iyo Kenya,
waxaana Siminaarkaan furitaankiisa ka soo qaygali doona Gudoomiyaha
Baarla-maanka Shariif Xasan Shiikh Aadan Ra’isul Wasaare Cali Max’ed
Geeddi oo isagu shalay dib ugu soo laabtay Magaalada Baydhabo ee Gobalka
Bay.
Ma ahan markii ugu horeysay ee siminaar loo furo
Xildhibaanada Baarlamaanka, iyadoo dhawaan Siminaar socday mudo labo
maalmood ah loo furay Xildhibaanada Barlamaanka kaasoo ay ku baranayeen
arrimaha maamulka iyo sida ay u shaqeeyaan Baarlamaanada kale ee
caalamka.
Faadumo Xasan Diirshe “Hay’adda Fatxa waxay u taagan tahay sidii ay
Bulshada uga suuli lahayd caadadda xun ee FGM-ka
`Mar aan
booqday xafiiska Hay,adda Fatxa Woman Relief Development Organization
ayaa waxaa indhahayga qabteen halkudhigyo ka hadlaya caadada xun ee
Gudniinka Fircooniga iyo halista Cudurka Aids-ka oo ah labo Barnaamij oo
ay Hay,addaan aad bulshada uga wacyi geliso maadaama labadaani ay yihiin
kuwo dhibaato ku haya bulshada Soomaaliyeed,
Hay’adda
Fatxa oo la aasaasay sanadkii 1991-dii ayaa waxaa ay markii ugu horeysay
ka howlgashay xeryaha dadka soo barakacay iyadoo halkaas ka fulisay
Barnaamijyo la xiriira dhinaca caafimaadka, tacliinta iyo quudinta,
maadaama xiligaasi ay jirtay abaar aad u baahsan.
1992- dii
ayaa Hay’adda Fatxa waxay u wareegtay Gobalka Sh/hoose, waxa ayna
halkaasi ka bilowday Barnaamijyo la mid ah kuwii ay ka fulin jirtay
Magaalada Muqdisho.
1992-dii
ayaa Hay’addani ahayd midii ugu horeysay oo Dakhli gelin ku sameysay
qaar ka mid ah Haweenka Soomaaliyeed si ay ugu maareeyaan noloshooda,
maadaama Haweenka Soomaaliyeed intooda badani ay ahaayeen kuwo raggoodii
iyo carruurtoodiiba ku waxyeeloobeen Dagaaladii Sokeeye, waxayna
Hay’addu sheegtay in Barnaaamijkaani ay ka faa’iideysteen Haween aad u
fara badan.
Hay’adda
Fatxa waxay xiriir iskaashi la leedahay Hay’adda UNICEF ee Qaramada
Midoobey u qaabilsan dhinaca carruurta, Hay’adda MSF-France, ICRC, DBG
iyo Hay’ado kale oo ka jiray dalka, waxayna Hay’addu Hay’adahaasi kala
kaashatay dhinaca waxbarashada, caafimaadka iyo Gudniinka.
xilligii
UNISOM ay timid dalka ayaa Hay’addaani waxay sii balaarisay howlaheedii
dhinaca wax u qabashada bulshada, waxayna dayactir ku sameysay Dugsiyo
iyo Ceelal, sidoo kale waxay haweenka Soomaaliyeed siisay waxbarasho aan
toos aheyn iyo dakhli gelin, sidoo kale waxa ay bulshda ka baraarujin
jirtay cudurka AIDS-ka iyo caadada xun ee FGM-ka (Gudniinka Fircooniga).
Hay’adda
Fatxa oo Guddoomiye ay ka tahay Faadumo Xasan Diirshe ayaa waxay
sheegtay in Hay’addooda ay waxbarasho ka bilowday xeryaha dadka soo
barakacay, waxayna sheegtay in 15 carruur ah ay Hay’addu ka bixiso wixii
tasiilaad ah oo ay uga baahnaayeen dhinaca waxbarashada waxayna Faadumo
sheegtay in arrintaani ay gacan ku siiyeen Dugsiga Al-Bilaad oo isagu
balanqaaday in carrurtaasi uusan ka qaadi doonin wax lacag ah, waxayna
Faadumo ugu baaqday Dugsiyada kale in ay ku daydaan dugsiga Al-Bilaad
maadaama ay iyagu ka bixinayaan tasiilaadka kale ee dhinaca Dharka,
Buugaagta iyo Qalimaanta
Faadumo
mar ay ka hadleysay dhinaca caadada xun ee Gudniinka Fircooniga ah ee
FGM-ka ayaa waxay sheegtay in Hay’addoodu ay wacyigelin fara badan ka
gaysatay sidii bulshada looga reebi lahaa caadadaasi oo ay sheegtay in
ay tahay mid dhibaato ku ah gabdhaha Soomaaliyeed, gaar ahaan
caafimaadkooda iyo marka ay gaaraan guurka, iyadoo sheegtay in
wacyigelintaasi ay ka fuliyeen degmooyinka Gobalka Banaadir.
“Hay’ad
ahaan waxaan aaminsan nahay in aan Gabdhaha la taaban, waana midda aan
ka duuleyno mar kasta” ayay tiri Faadumo Xasan Diirshe oo ugu baaqday
Haweenka Soomaaliyeed in ay ka tagaan caadadaasi xun, sidoo kale mar ay
ka hadleysay dhinaca cudurka AIDS-ka waxay sheegtay in wacyigelin fara
badan ay hay’addoodu ka sameysay Degmooyinka Gobalka Banaadir iyo
deegaanada ku dhow dhow, maadaama cudurkaani uu yahay mid halis ku ah
Bulshada Soomaaliyeed gaar ahaan dhalinyarada, Faadumo oo hadalkeeda sii
wadata ayaa sheegtay inay Haween fara badan u fureen Siminaaro la
xiriira dhinaca FGM-ka iyo Cudurka Aids-ka, waxayna sheegtay in ay ka
faa”iideysteen Haween fara badan, sidoo kale waxay sheegtay in Haweenka
ku shaqeysta caadada FGM-ka iyana ay u fureen Siminaaro, taasoo inta
badan ay qaateen wacyigelintaasi. waxay kaloo sheegtay in ay u fureen
Siminaaro wacyigelin ah Ardayda Dugsiyada Gobolka Banaadir iyo Dugsiyada
ku dhow Magaalada Muqdisho. Ugu dambentii Faadumo waxay u soo jeedisay
Haweenka Soomaaaliyeed in ay gebi ahaanba joojiyaan caadada FGM-ka oo ah
mid aan u wanaagasaneyn Gabdhaha Soomaaliyeed.
Sahro
Max’ed oo ah xoghayaha Hay’addaasi ayaa waxay sheegtay in dhawaan
Isbitaalka Xayaat lagu qabta barnaamij daqli uruurin ah oo ay sheegtay
in barnaamijkaasi ay ka soo xarootay lacago loogu talagalay in lagu
fuliso barnaamijyada loogu gargaarayo dadka tabaaleysa iyo sidii
bulshada loogu waxgelin lahaa Gudniinka Fircooniga iyo halista cudurka
Aids-ka.
W/D:
Amiin Yuusuf Khasaaro
E-Mail:
amiinkhasaaro@hotmail.com