WARARKII MAY 11, 2006

• Garoonka Kismaayo oo ay Ka bilaabatay Indho shareer ka Qaadida hablaha Soomaaliyeed...

• Maleeshiyaadkii ku dirirsanaa galbeedka Kismaayo oo la kala qaaday

• Isbahaysiga "la dagaalanka Argagixisada" oo sheegay in aysan aqoonsaneyn..

• Wararkii ugu dambeeyay dagaalkii ka socda Muqdisho ...

• Shariif Xasan oo ku gacanseyray Codsi uga yimd Odayaal ka tirsan.

• Beesha Gaal-Jecel oo digniin ka soo saartay odayaal ku xiran Magaalada ..

• Qadaafi oo ballanqaaday in uu Dowladda Federalka ka saacidi doono...

  ---

Isbahaysiga "la dagaalanka Argagixisada" oo sheegay in aysan aqoonsaneyn dhaqdhaqaaqa Bulshada Rayidka ah,..

Amiin Yuusuf | Xamar

Gabar Soomaaliyeed oo Laga Raadinayo Webiga Mississipi ee Dhexmara Minneapolis Guji...

Shir Jaraa’id oo ay shalay qabteen Isbahaysiga labaxay "la dagaalanka Argagixisada" ayaa waxaa si weyn loogu weeraray dhaqdhaqaaqa Bulshada Rayidka ah, waxa uuna Isbahaysigu Bulshada rayidka ah ku tilmaamay kuwo aan kalsooni ka haysan Bulshada Soomaaliyeed.

“Cid soo dooratay iyo cid ay wakiil ka yihiin ma jirto mana aqoonsanin wax la yiraahdo dhaqdhaqaaqa Bulsha rayid ka ah” ayaa lagu yiri Shirkaasi Jaaraa’id.

Shirkaan Jaraa’id ee ay qabteen Isbahaysiga isku magacaabay la dagaalanka Argagixisada ayaa waxa uu ku soo beegmay Xili ay dagaalo culus ka socdaan Magaalada Muqdisho oo u dhexeeya Midowga Maxaakiimta islaamiga ah iyo kooxaha la dagaalanka Argagixisada, iyadoo bulshada rayidka ah ay u soo jeediyeen labada dhinac in ay dagaalka joojiyaan oo ay khilaafkooda ku dhameeyaan wada hadal iyo is afgarad, inkastoo Midowga Maxaakiimta Islaamiga ah ay si weyn u soo dhaweeyaan dadaalka ay wadaan Bulshada rayidka ah.

Wararkii ugu dambeeyay dagaalkii ka socda Muqdisho ...

Waxaa maalintii afraad galay dagaalka ka socda deegaano ka tirsan Yaqshiid iyo Kaaraan oo u dhexeeya Midowga Maxaakiimta Islaamiga ah iyo Isbahaysiga labaxay la dagaalanka Argagixisada, waxa uuna dagaalkii si aad ah u kululaaday gelinkii dambe ee shalay iyadoo la isku adeegsaday hubka culus iyo midka fudud.

Afartii maalmood ee uu dagaalku socday ayaa waxaa ku geeryooday 80 qof ku dhawaad, waxaana ku dhaawacmay ilaa 200 oo qofood oo dhmaantood u badan dad rayid ah oo ay rasaastu ugu timid guryahooda.

Dagaalka oo shalay xooggiisu ka dhacay degaandega hoose ee Hotel Laf-weyn, ayaa waxa uu ahaa mid qolaba mar la riixayay, inkastoo afhayeen u hadlay Midowga Maxaakiimta Islaamiga ah uu sheegay in ay gacanta ku dhigeen bartii saldhiga u ahayd kooxaha maleeshiyooyinka ah ee la dagaalamaya, sidoo kale dagaal socday mudo hal saac ayaa waxa uu ka dhacay Suuqa Xoolaha gaar ahaan Deegaanka Waxara-Cadde, iyadoo la isku adeegsaday hubka culus iyo midka fudud, waxaana ku dhintay labo ruux, waxaana ku dhaawacmay ilaa iyo taban ruux, yase yeeshee dagaalkaasi markii dambe waa uu istaagay.

Inkastoo ay socdaan dadaalo lagu doonayo in lagu joojiyo dagaalkaasi ayaa waxaa maalintii shalay ahayd kulan ku yeeshay Hotel-ka Nabadda qaybaha kala duwan ee Bulshada rayidka ah, waxaana ka soo qaybgalay Guddoomiyaha Midowga Maxaakiimta Islaamiga ah Shiikh Shariif oo sheegay in ay dhinacooda diyaar u yihiin xabad joojin horeyna ay ugu dhawaaqeen.

isku soo wadad duuboo dagaalka haatan ka socda Magaalada Muqdisho, waa mid marba marka ka dambeysa ku sii fidaya deegaano hor leh, haddii aan laga hortagina keeni kara khasaare ka balaaran midkaan.

Shariif Xasan oo ku gacanseyray Codsi uga yimd Odayaal ka tirsan.

Wararka naga soo gaaraya Magaalada Baydhabo waxay sheegayaan in weli si aad ah la isugu khilaafsan qaabka qaybsiga Golaha deegaanka ee Gobalka Bay, gaar ahaan ciddii loo magacaabi lahaa Guddoomiyaha iyo Duqa Magaalada.

Kulan ay isugu yimaadeen Odoyaasha iyo waxgaradka Beelaha Digil iyo Mirifle ayaa looga hadlay qaabka qaybsiga Golaha Deegaanka, iyadoo qaar ka mid ah Odoyaasha ay soo jeediyeen in la kordhiyo tirade Golaha deegaanka laga dhigo 27, halka markii ay hore ay ahayd 21.

Codsigaasi ayaa guddi loo saaray waxay ula tageen Guddoomiyaha Baarlamaanka Shariif Xasan Shiikh Aadan iyo Ra’isul Wasaare Cali Max’ed Geedi, waxaana loo sheeay in aan wax lagu kordhin karin tiradii horey loo gooyay.

“Waa arrin ay Dowladdu goysay horeyna loogu heshiinay, haddii aan maanta kordhino, Gobolo kale ayaa oranaya inagana ha naloo kordhiyo” ayuu yiri Shariif Xasan oo ugu baaqay Odoyaasha in ay dedejiyaan arrimaha Maamulka Gobalada Bay iyo Bakool.

Beesha Gaal-Jecel oo digniin ka soo saartay odayaal ku xiran Magaalada ..

Qoraal ay soo saareen Odoyaal iyo Waxgarad ka tirsan Beesha Gaal-Jecel ayaa waxa ay soo jeediyeen Maamulka Gobalka Sh/hoose in ay si dhaqsi leh ku sii daayaan shan xubnood oo ay ku jiraan nabadoon iyo Gudodomiyhii Beesha ee Degmada Kurtunwaarey oo ku xiran Xabsiga dhexe ee Magaalada Makra.

Waxgaradkaasi ayaa waxay ku tilmaameen xarigaasi mid gardaro ah kana soo horjeeda Shareecadda Islaamka iyo dhaqanka soo jireenka ah ee Soomaaliyeed. Odoyaashu waxa ay sheegeen in xarigaasi uu yahay mid meel ku dhac u ah Beesha, waxayna codsadeen in sida ugu dhaqasiyaha badan loo sii daayo, haddii aan taa la yeelinna ay keeni doono is qabqabsi beeleed oo aan loo baahneyn, waxayna kala yihiin xubnaha xiran, Nabadoon Cumsaan Muxumad Cusmaan, Bakaal Yuusuf Caraale, Xasan Xuseen (Xasan Maarow), C/risaaq Cusmaan Axmed iyo Faarax Macallin Xasan, waxaana qoraalkan na soo gaasiiyay Odoyaasha kala ah Xasan Max’ed Cabdi, Cabdi Xuseen Cali, Max’ed Raage Cabdi iyo Xasan Max’ed Faarax

Qadaafi oo ballanqaaday in uu Dowladda Federalka ka saacidi doono

Mar ay kulan ku yeesheen Magalada Tripuli ee Dalka Liibiya Hogaamiyaha Wadanka Liibiya Mucamar AL-Qadaafi iyo Hogaamiyaha Soomaaliya C/llaahi Yuusuf Axmed, kulankaas oo ka dhacay Beer uu ku raaxeyso Hogaamiyaha Liibiya ayaa waxa uu ahaa kulanka ay Dowladda Federaalka ku dooneysay in ay gargaar uga hesho Dowladda Liibiya.

Hogaamiyaha Liibiya ayaa Dowladda Federaalka u ballanqaaday in uu Dowladda Federaalka uu ka saaci doono arrimaha ammaanka iyo dib u dhisidda Adeegyadii Dowladda Federaalka.

Hogaamiyaha Liibiya waxa uu sheegay in loo baahan yahay Hoaamiyaasha Siyaasad-da Soomaaliya ay dhameeyaan wixii khilaafaad ah si ay Dowladdu u hesho goob ammaan ah oo ay ku shaqeyso, isagoo ballanqaaday in uu gacan ka gaysan doono sidii ciidamo nabad ilaalin ah loogu soo diri lahaa Soomaaliya.

Madaxweyne C/llaahi Yuusuf Axme dayaa la filayaa in uu booqasho ku tago Wadanka Yemen kaddib markii uu martiqaad ka helay Dowladda uu madaxda ka yahay Cali Cabdala Saalax.

E-Mail: amiinkhasaaro@hotmail.com

W/D; Amiin Yuusuf Khasaaro
E-Mail:  amiinkhasaaro@hotmail.com 

Faafin: SomaliTalk.com | May 11, 2006