WARAR: MAY 15, 2006

• Xildhibaan Cabdala Xaaji Cali “Waa in Dowladdu ay go’aan kama dambeys ah ka gaartaa...”

• Dagaal dhimasho iyo dhawaac sababay oo ka Magaalada BuuHoodle…

• Wabarka Beesha Cayr “Warka uu sheegay Ugaas Cabdi Daahir waa mid qaarkiis la qariyay”..

• Jabhadda Wadaniga Xoreynta oo warbixin ka soo saartay dagaaladii ugu dambeeyay ee ay wada galaan..

• Baaqyo fara badan kaddib dagaalkii Muqdisho oo u muuqanaya mid..

• Baaq iyo soo dhoweyn xabadjoojinta lagu dhawaaqay Muqdisho.

  ---

Xildhibaan Cabdala Xaaji Cali “Waa in Dowladdu ay go’aan kama dambeys ah ka gaartaa...”

Waxaa kulan shalay isugu yimid Magaalada Baydhabo Golaha Barlamaanka Federaalka Soomaaliyeed, waxaana shir-gudoominayay Guddoomiyaha Baarlamaanka Shariif Xasan Shiikh Aadan, iyadoo shirkaasi ajandaha looga hadlay uu ahaa sidii laga yeeli lahaa dagaalada ka soconaya Magaalada Muqdisho iyo go’aanka kaga aadan Dowladdu in ay ka qaadato iyo waliba sidii Baarlamaanku gacan uga gaysan lahaa qaboojinta dagaalada ka soo cusboonaday ee Caasimadda Muqdisho. Guddoomiye Shariif Xasan oo ugu horeyntii ka hadlay shirka Baarlamaanka ayaa sheegay in Xubnaha Baarlamaanka looga baahan yahay in doodooda ku saleeyaan mid xasilooni ku dheehan tahay si xal looga gaaro arrinta sii daba dheeraatay ee ka taagan Magaalada Muqdisho loona baajiyo dagaalo mar kale qarxa, waxaa sidoo kale iyana hadalo ka soo jeediyay fadhigii Baarlamaanka ee shalay Xildhibaano iyana soo bandhigay fikirkooda ku aadan xal ka gaarista dagaalada iyo go’aan ka qaadashadooda, waxaana ka mid ahaa Xildhibaan Cabdala Xaaji Cali oo si weyn ugu eedeeyay Wasiirada iyo Xildhibaanada Dowladda Federaalka ee ku lugta leh Dagaalada ka socda Muqdisho in ay yihiin kuwo aan dooneyn Qaran Soomaaliyeed oo ka hana qaada dalka, “Waa in Dowladdu ay go’aan kama dambeys ah ka soo saarto raggaasi” ayuu yiri Xildhibaan Cabdala Xaaji Cali, Waxa iyana hadal kulul ka jeedisay kulankii Baarlamaanka ee shalay Xildhibaanad Caasha Axmed Cabdala, iyadoo Dowladda dusha uga tuurtay in ay ka gaabisay wax ka qabashada dhibaatooyinka ka socda gudaha dalka, isla markaana Dowladdu u muuqato mid ku guuldareysaneysa in ay talaabo ay amniga wax uga qabaneyso horey u qaado. Kulankii shalay ayaan wax go’aano ah oo la taaban karo aan laga soo saarin, inkastoo Xildhibaanadu qaar ay soo jeediyeen in Guddoomiyaha Baarlamaanka iyo Wafdi Xildhibaano ah oo uu horkacayo ay ka degaan Magaalada Muqdisho, halka kuwo kalana ay soo jeediyeen in wafdiga Muqdisho loo dirayo laga dhigo mid isku dhaf ah oo ay ku jiraan Golaha Wasiirada iyo midka Baarlamaanka, Waxayna Wararku sheegayaan in fadhigan midka Xiga loo ballamay Maalinka Talaada ah, iyadoo isla maalinkaana la filayo in Madaxweyne C/llaahi Yuusuf isna dib ugu soo laabto Magaalada Baydhabo.

• ---

• Video-gii Laga diyaariyey SHarciga Ayaan Xirsi ee Holland

  ---

Dagaal dhimasho iyo dhawaac sababay oo ka Magaalada BuuHoodle…

Wararka naga soo gaaraya Magaalada Buuhoodle ee Gobalka Sool ayaa waxay sheegayaan in halkaasi dagaal ku dhex maray labo beelood oo halkaasi wada dega, waxaana ku dhintay dagaalkii shalay dhex maray labada beelood ilaa iyo 11-qofood, iyadoo ay ku dhaawacmeen 18 qofood.

Dagaaladaan ayaa wararku waxay sheegayaan in ay ka bilowdeen arrin ku saabsanaa nin la sheegay inuu horey ugu dhintay deegaankaasi, waxaana lagu waramay in ninkaasi uu u dhintay sixir loo adeegsaday, taasoo keentay in beesha uu ka dhashay ninkaasi iyo beel kale oo la degta deegaanka ay dagaalo ka dhex qarxeen, dagaaladaas oo sababay dhimasho iyo dhaawac, waxay kalloo keeneen khasaarooyin kale, waxaana la sheegay in Odoyaal iyo waxgarad ka kala tirsan labada dhinac ah ay haatan ku howlan yihiin sidii loo joojin lahaa dagaalkaasi, isla markaana waan waan loo kala dhex dhigi lahaa labada dhinac.

Wabarka Beesha Cayr “Warka uu sheegay Ugaas Cabdi Daahir waa mid qaarkiis la qariyay”..

Wabarka Beesha Cayr Wabar C/llaahi Orey Caraale ayaa ka hadlay hadal dhawaan uu shaaciyay Ugaas Cabdi Daahir kaasoo ku saabsanaa shirkii ay Beesha Cayr kula yeelatay Magaalada Nairobi Dowladda Mareykanka.

Wabar C/llaahi Orey waxa uu ku tilmaamay hadalkaasi mid qaarkiis la qariyay oo aan laga run sheegin.

“Waxa uu soo bandhigay Ugaas Cabdi Daahir ma dhameystirna ee waxbaa ku hoos qarsan waxaana la doonayaa inuu soo bandhigo qoraalkii ay kala qaateen beesha Cayr iyo Safaaradda Mareykanka ee Magaalada Nayroobi, haddii la waayo qoraal laguma qanci karo war afka un looga sheegay miis qado lagu wada cunay”.

Wabar C/llaahi Orey waxa uu beesha Habargidir ugu baaqay in ay ka digtoonaadaan wararka salka iyo raadka toona lahayn ee lagu marin habaabinayo.

Jabhadda Wadaniga Xoreynta oo warbixin ka soo saartay dagaaladii ugu dambeeyay ee ay wada galaan..

Jabhadda Wadaniga Xoreynta Ogaadeenya oo ku caan baxday ka xoreynta Wadanka Soomaali Galbeed Gumeysiga Xabashida ayaa dagaalo culus waxay isaga hor imaadeen Ciidamada Xabashida, waxaana kuwii ugu dambeeyay ka mid ahaa, dagaal ay Jabhaddu kula gashay Xabashida Degmada Bako oo ka tirsan Gobalka Dhagax-Buur, Dhuxun oo ka tirsan Gobalka Nogob, Sagag oo ka tirsan Gobalka Nogob, Galaalshe oo ka tirsan Gobalka Nogob, Gari Go’an oo ka tirsan Gobalka Nogob, Farmadow oo ka tirsan Gobalka Dhagax-Buur, Jugle iyo Maraacato oo ka wada tirsan Gobalka Qoraxay, Dhoobaweyn oo ka tirsan Gobalka Qoraxay, Horo Hawd oo ka tirsan Gobalka Jigjiga, Xaabulay oo ka tirsan Gobalka Nogob, Gabagabo oo ka tirsan Gobalka Qoraxay, Bulaale, Sasabane iyo Gosolalay oo ka wada tirsan Gobalka Dhagax-Buur, Dheenka oo ka tirsan Gobalka Jigjiga, Baraajisle iyo Miirdanbax oo ka wada tirsan Gobalka Qoraxay, Banbaas oo ka tirsan Gobalka Jigjiga iyo Riiga Galadiid oo ka tirsan Gobalka Qoraxay, waxaana dagaaladaasi ciidamada Xabashida lagu gaarsiiyay khasaaro ba’an, iyadoo isku gaynta Ciidamada Xabashida ah ee ku dhintay ama lagu dilay ay tahay 324 askari, waxaana lagaga dhaawacay 230 askari in ka badan 96 qorina waa laga furtay, waxaana lagaga gubay labo baabuur oo nooca Milatariga ah, waxaana qoraalkaan oo wargeyska la soo gaarsiiyay ku saxiixnaa ku simaha Xafiiska ONLF ee Soomaaliya Mubaarak Shiikh C/llaahi . Warsaxaafadeedk aoo dhan hoos ka akhri...

Baaqyo fara badan kaddib dagaalkii Muqdisho oo u muuqanaya mid..

Iyadoo dagaalo ay ka soconayeen mudo tobaad ah Magaalada Muqdisho kuwasoo u dhexeeyay Midowga Maxaakiimta Islaamiga ah iyo Isbahaysiga la dagaalanka Argagixisada iyo soo celinta Nabadda, kuwasoo sababay dhimasha dad rayid ah, dhaawacyo iyo waliba barakac ayaa waxaa u istaagay sidii ay dagaalkaasi u joojin lahaayeen Waxgarad iyo Odoyaal ku sugan Magaalada Muqdisho, kuwasoo kulan gooni gooni ah la lahaa maalmihii u dagaalku socday, ayaa haatan u muuqda in ay ku guuleysteen wax un in ay ka qabtaan dagaalkasi, iyagoo xabad joojin ku dhawaaqay maalintii shalay ahayd.

Waxgaradka Beesha Mudulood ayaa iyagu kulan mudo socday ku lahaa Hotelka Bin-Ali ee Magaalada Muqdisho iyagoo ka soo saaray qodobo lagu joojinayo dagaalkaasi, waxaana Waxgaradka beesha Mudulood ku taageeray waan waanta ay wadaan Waxgarad iyana ka tirsan Beelaha Habargidir, waxayna u soo jeediyeen waxgaradkaani dhinacyada dagaalku u dhexeeyo in ay si shuruud la’aan ah ku joojiyaan dirita isla markaana wixii khilaaf ah wada hadal ku xaliyaan.

Dhinaca kale waxaa iyana in la joojiyo dagaaladaasi ku baaqay maamulka Gobalka Banaadir iyo Ururada bulshada Rayidka ah.

Dagaalkaan u dhexeeyay Midowga Maxaakiimta Islaamiga ah iyo Isbahaysiga la dagaalanka Argagixisada ayaa galaaftay nolosha dad gaaraya ilaa iyo 140 qofood, waxaana ku dhaawacmay ku dhawaad 280 qofood, waxaa ku barakacay dad aad u fara badan, iyadoo haatan uu dhaqdhaqaaqa dagaalkaasi uu ka soo reynayo sidii hore haatanna ay xaaladdu u muuqato mid degan iyadoo aan wax rasaas waaweyn ah aan la isweydaarsaneyn.

W/D: Amiin Yuusuf Khasaaro
E-Mail: amiinkhasaaro@hotmail.com 

 Baaq iyo soo dhoweyn xabadjoojinta lagu dhawaaqay Muqdisho.

14ka May 2006

Ururka SCG waxay soo dhoweynayaan xabadjoojintii ay waxgaradka reer Muqdisho ku guuleysteen maanta iyo dadaalkii ay ka sameeyeen sidii loo joojin lahaa xabadda. SCG waxey ku dhiirigelineysaa waxgaradkii soo abaabulay arrintan inay sii wadaan dadaalkooda si aysan mar kale dib uga bilaaban dagaal magaalada Muqdisho.

Ururka SCG waxay tacsi u dirayaan dhamaan eheladii iyo qaraabaddii shacabkii ku geeriyooday dagaalka, waxaana EEBBE uga baryeynaa shaqsiyaadkii ku dhaawacmay inuu u fududeeyo soo kabasho deg-deg ah, siiyana caafimaad waara.

SCG waxey baaq u soo jeedineysaa labada garab ee dagaaladu dhex maray inay si shuruud la'aan ah u joojiyaan, kuna dadaalaan inaan dagaalku soo noqon. Hana ogaadaanno inuu xil ka saaran yahay sidii lagu badbaadin lahaa dhiigga shacabka soomaaliyeed iyo inay mas'uul ka noqdaan dagaalka iyo khasaarahiisaba, sida dhimashada, dhaawaca, barakaca iwm. Hay'adaha civil society iyo aqoon yahannada soomaaliyeed ee ku sugan Muqdisho waa inay cilmi baaris buuxda ku sameeyaan falalka noocan oo kale ah, kana diyaariyaan warbixin dhab ah si looga hortago falal noocan oo kele ah inay soo noq noqdaan.

SCG waxey ka codsaneysaa caalamka inay si deg-deg ah ula soo gaaraan kaalmo magaalada Muqdisho, iyo in caalamku uu faragelin buuxda ku soo sameeyo xaaladda waddanka gaar ahaan magaalada Muqdisho.

Mr Abdirahman Omar Osman (Eng. Yarisow)
Guddoomiyaha ururka Somali Concern Group
somali@somaliconcern.org 

Khayraadka dabeeciga ah

                         Midnimo minted iskutashi guul

Mubaarak sh c/llaahi