Daabaco Boggan | Print

MAALMO MUHIIM AH:::

Maalmo Muhiim ku ah Jadwalka Islaamka 1427-1428

QAABKA QORISTA Qaabka Loo Qoro Wararka.. Akhri ::MUQDISHO & DHURWAAGA:: Ma dhabaa in Dhurwaaga lagu Daweeyo Dadka Jinniga qaba Guji

GABAY::: DAMAANSHAAD

Cali Maxamuud Xiirane 

xiirane2@hotmail.com 

Tixdan gabayga ah ee la yiraa Damaanshaad, waxay soo baxday 16/10/2006, waxaana tiriyey Cali Maxamuud Xiirane oo ku nool UK, London. Tixdu waxay taageero buuxda u tahay ku dhaqanka Diinta Islaamka, waxayna ka soo horjeeddaa ciddii ragaadineysa iyo ciidamada shisheeyaha ah oo iyadoo meelihii dalka ugu nabadgelyada xumaa hadda ay nabad yihiin u soo guuxaya dalka, ciddii is leh dano kuu gaar ah amaad ku gaartaana waxaan u arkaa iney ka hoos baxsantahay. Tixdu waxay u badantahay su’aalo, jawaabohooduna waxay u yaallaan dhammaan ummadda Soomaaliyeed, gaar ahaan suugaanleyda. Tixda habaar iyo ducaba waa lagu khatimay, labadaba allaha iga aqbalee habaarku wuxuu khuseeya oo kaliya qofkii uusan alle hanuun la doonin oo ummmadda luggooyadeeda ka shaqeeynaysa nabadduna ay ka xasili la’dahay ama fitno u jeed ah. Marka qof waliba midkuu rabo ha doorto. 

1. Doorshaan ayaan qurun jecleyn ruux ka duug yiriye
2. Daqsi uus wuxuu doorbidaa inuu dixdaas yaale
3. Yaa dugaafadihii daadsanaa waaga daba jooga?
    

4. Dig-digleeynta Soomaali waa loogu daw galaye
5. Nin danaano ay dilatay waa ducuful iimaane
6. Ma qabyaalad baa door lahayd waa dayuusnimo e?
    

7. Duuduub wixii loo liqaa xumo la daacaaye
8. Daray bay dillaacshaan dirxiga naga dahaarnaaye
9. Maxaa dakano loo doonayaa haatan laga daalye?
    

10. Dambas hoos ka nool iyo digada dogobbadaan qiiqay
11. Dulunkiyo dira-diraha baas ee lala dinnaahyeeyo
12. Dabcilaawe dagaal ooge yaa dan u maleeynaaya?
     

13. Dabadhilifka gaalada ayaan diin la maqashiine
14. Doolar bay ku doonaan waqood ficillo daaquude
15. Ma la diidey diinteennu waa daawo iyo kheyre?
     

16. Is dilkeenna dunidoo dhan baa naluku diimaaye
17. Innagaa is dooxnoo dir kale nooma diirnixine
18. Dal dad waayey miyaan noqonnay iyo duni damiir beeshay?
     

19. Dulmiloowyo daaciyaa jiroo belo u duub weyne
20. Dabkii ay shidaan degel dhan buu diga-digeeyaaye
21. Duqoowdeennii aan duubaniyo diracyadii meeye?
     

22. Wax dhan buu dayeysnaa dadkani diifna uu qabaye
23. Ma dareenno oo shacabka waa laysku dirayaaye
24. Maxaa daaray duulkaan aqoon nabad ku daanshooda?
     

25. Doomaha dadkii laga rogaye moolka lagu daadshey
26. Dumarkeennii oo dawarsadoo dahab daleel yaal ah
27. Dayicii dalkeennii ayaan weli ka diireeynin?
     

28. Badaheenna dihan kheyrka waa laga dur-duurtaaye
29. Sun ayey ku duugeen haddana soo dawarayaane
30. Cudurrada dillaacaaya yaa naga daweeyn doona?
     

31. Dunidaan u qayshanno in badan nama daryeelaane
32. Ayagoo dallaaliinehey mar kale kaaga darayaane
33. Miyaan weli duruustii la helay caga ku soo daalin?
     

34. Dambaaburo cadaabeed ayaa loo dalxiis yahaye
35. Ciidamada la soo dirahayaa waa na dagayaane
36. Damqashada xanuunka leh maxaa dalabka noo saaray?
     

37. Meel ubax la daadshaa ugaar dabin u yaallaaye
38. Rag tigreega soo dumanhayoow waa daciifnimo e
39. Miinadey u daadsheen duqii soo daaqad kama saarin?
     

40. Dhegihiinna daahani ma galo hadal u door-roone
41. Digniintaan waxaan idinku waday taniyo dayrtiiye
42. Damiciinnu adinkuu idin dili dulucdu soo maaha?
     

43. Dannigaad qabtaan maanta waa duumo loo dhimane
44. Idinkaa is dagayoo ma jiro waxaad daryeeshaane
45. Dibindaabyadiinnii miyaan dib idinku soo laaban?
     

46. Dabbaallada walaalkood diloo kibir is daaxuursha
47. Inuu damallo naareed ilaah daakhilka u geeyni
48. Oon cidina daafici kareyn soo daliil maahan?
     

49. Carabtii dugaagoowdayoo ubadka nool duugtay
50. In ilaah rasuulkuu u direy uga dabiib yeelay
51. Ooy duul walaalaa noqdeen soo la dayi maayo?
     

52. Wallee ruuxa dabbakheen sharciga dabamaryeyneynin
53. Inuu labada daarood mid uun darajo weeyn gaaro
54. Ama laysuguba daro miyaan diinta lagu sheegin?
     

55. Cirka da’ay daruurahays qabsaday dalagga noo beermay
56. Daafaha xareedahaan maraye shacabka deeqaaya
57. Duf ku bexe ninkii diidan soo doqon ibliis maahan?
     

58. Ummaddaan dareenkii ka tegey dib ugu soo laabtay
59. Oo inay diinta wada doonayaan dunida gaarsiiyey
60. Daanyeer miyaan loo arkayn ruuxa duufsanaya?
     

61. Dagaal iyo fitno inuu ku jiro oo shacabku daaduumo
62. Qaar baa dadaal ugu jiroon xumaha diideeyne
63. Duul kale miyaa soo dirsaday waa dareen culuse?
     

64. Dibad joogga waayadii wax badan doolka la ahaaye
65. Hadduu eebbe nabad soo dejiyey lagu dekeeynaayo
66. Yaa dagaagga degenaan ka jecel amase duuflaalka?
     

67. Dullinimo ninkii tacaddiyaba loo durbaan tumayo
68. Darxumadu docdaad eegto waa daqay wareen baase
69. Yaa na kala dallaalaye na faray dacar walaaqeenna?
     

70. Dadkeennaan kuwii diinta baray dilaya oo laaya
71. Ummaddaan midkoodii duqiyo kurayba daan-daansho
72. Daacaddiyo lillaahida ayaan samo la dooneeynin?
     

73. Ummaddaan dideeysee sidii deero kala yaacday
74. Dibir kama dhergaankaan dhinteen danaha guud eegin
75. Yaa dastuur ka doorbiday inuu eebbe darajeeyo?
     

76. Ilaahayga dila cidduu doonayoon loona dakanaynin
77. Oo aan difaac kaga baqayn qolo ku soo duusha
78. Oo Dabbara wuxuu doono oon lagula doodeynin
     

79. Adaan kuu dansheegtoon alloow kuu daciif ahaye
80. Adaan deeqda kuu qirahayaa aan dalbahayaaye
81. Dunidaan adaa maamuloon cidina diideeyne
     

82. Dadkanaga didmadu kala gashaye kala dayoobaaya
83. Haddii duunyo wixii yaalla iyo doolar lagu xaaro
84. Inaan ruuxna isu dumi karayn waa daliil dhigane
     

85. Ruuxii da'a weyn waa gartaa doogta loo dhimane
86. Alloow diinta kama maarannee daacad nagu toosi
87. Alloow daafka reeraha ku dhacay cudurku daawoobo
     

88. Daahiri ilaahoow qalbiga daamur baa galaye
89. Daf-dafleynta ilaahoow idlee amase diihaalka
90. Alloow shacabku dalaaqdiisa furo samaha kii diida
     

91. Daacuun u gaarihi Alloow uu gooni ugu duulo
92. Libaax dool ahi uu mar qura daaqad kala boodo
93. Ama duumo lagu soo diraan degenka naafeeynin
     

94. Daltabyada na haysiyo alloow naga dulqaad ceebta
95. Alloow loo dalxiisaa mar kale degelladaan niiley
96. Ilahayoow dareen lama qarshee wuu na daashadaye
     

97. Dan-darrada alloow naga dawee kuu dacwaan ahaye
98. Diilalyada na haysiyo alloow diiftu naga duusho
99. Alloow aan damaashaad galnaa dayrtan gudeheeda

Aamiin---------Aamiin---------Aamiin 

Cali Maxamuud Xiirane
Xiirane2@hotmail.com

Faafin: SomaliTalk.com | Oct 17, 2006

»Gabayga: Hungo | Waxaa tiriyey Xiirane