Macnaha guusha iyo wadada loo maro
Macnaha erayga ‘guul’ waa mid qarniyadii tagay siyaabo kala duwan loo isticmaali
jiray marka aad fiiriso dhanka Greek-ga (Nike) iyo dhanka Roman-ka (Victoria).
Basle macnaha guud ee eraygaan wuxuu yahay: gaaritaanka ujeed aad horey u
iclaantay.
Hadaba sidee lagu xaqiijin karaa in aad gaadhay ujeedkaagii? Waana su’aashaan
midda micnaha erayga ‘guul’ aad u adkeysay.
Tusaale:
Dowlada Itoobiya waxay sheegatay guul in ay ka gaadhay dalka Somaliya. Dad badan
waxay sheegeen Itoobiya in ay Somaliya kala kulantay guul-darro iyagoo markaa
soo bandhigay sawiro muujinayo tirada ciidamda Itoobiya ee lagu dilay dalka
Somaliya.
Waxaa halkaan kaaga muuqan karo in ay adag tahay mideynta argtida labo qeyb oo
iska soo horjeeda ay ka qabaan guul ama guul-darro.
Xaqiijinta guusha
Hadaba xaqiijinta guusha yaa iska leh? Xafiis xaqiijiyo guulaha ma jiraa oo la
tagi karo? Mararka qaar waxaad moodaa wargeysyada aduunka ugu weyn in ay yihiin
xafiisyada xaqiijiya guusha. Iyagoo markaa u maarqaati kaco in Mareykanka uu
guul ka gaaray dalka Ciraaq inkastoo dadka intooda badan ay qabaan in Ciraaq uu
Mareykanka guul-darro kala kulmay.
Wargeysyada intooda badan hadda wey isku raaceen in Ciraaq aan guul laga gaarin,
balse dowlada Mareykanka wali waxay ku adkeysaneysaa in ay guuleysteen.
Wargeysyada
Sandahaan dambe waxay siyaasiinta intooda badan adeegsadaan wargeysyada iyagoo
markaa guul-darradooda u badalo guul. Mar hadii ay gurbaanka kuu tumaan wargeyso
badan, dadka intooda badan waxay xaqiijin doonaan in aad guuleysatay madaama
wargeysyo badan ay quushaada xaqiijiyeen.
Codka shacabka waa muqaddas marka la rabo in guul la xaqiijiyo. Waad la socotaa
waji gabaxnimada uu madaxweynaha Mareykanka la kulmay markii uu kaligii ku
adkeystay in uu Ciraaq iyo Afghanistan guul ka gaaray iyadoo shacabweynaha ay
isku raaceen in uu guul-darrro la kulmay. Qofka sida joogtada ah u sheegto guulo
uusan gaarin, waxaa hubaal ah in asxaabta u la shaqeeyo ee sportiga, siyaasada,
dagaalka iyo masrax walba uu ka shaqeeyaba in ay iska fogeynayaan. Qofka nuucan
ah intabadan waxaa lagu tilmaamaa qof xanuunsan oo hadalkiisa uusan sal lahayn.
Shuruudaha guusha ee qarnigaan:
Heysashada ujeed cad oo hore loo iclaanay
Gaadhista ujeedka
Sheegashada guusha
Wargeysyada oo durbaanka kuu tumo
Shacabka oo kuu ogolaado guusha
Muqaddas maahan in aad qodobadaan kor ku xussan aad la fulisid koox. Inkasta oo
ay adag tahay, hadana waa suuragal in qof kaligii uu qodobadaan fuliyo.
Guul-darro iyo arimaha Somaliya
Marka hore aan si kooban kuugu dulmaro sababta arimaha Somaliya guul looga gaari
la’yahay.
Sida aan qeybta kore ee maqaalka ku xussay, wey adag tahay in laba qeybood oo
warran iyo gashaanka isla dhacaya ay isku raacaan qofka ay guusha raacday isla
markaana uu mid xaqiijiyo guusha uu qofka kasoo horjeedo gaadhay. Hadaba
siyaasiinta Somaliyeed waxay ku hawlan yihiin in arimaha Somaliya guul ka
gaadhaan, iyagoo markaana rabo in guusha ay raali ka ahaadaan isla markaana
xaqjiiyaan una marqaati furaan dalal ay Itoobiya ugu horeyso.
Runtii aad ayey u adag tahay in Somalida iyo dowladaha daris isku sheega ah ay
ku midoobaan aragtida guul ama guul-darro marka laga hadlayo arimaha Somaliya,
waayoo dowlada iyo horumarka ay rabaan shacabka Somaliya waa mid ay dowladahaan
daris isku sheega ah aan raali galin. Itoobiya hore ayey si cad ugu sheegtay in
Somaliya aysan ka hawl gali karin dowlad aan aheyn waxa ay ugu yeereen ‘friendly
government’ oo ay ula jeedaan mid hoos timaada dowlada Itoobiya.
Marka qaladka kowaad waa qancinta iyo raali galinta dowladaha daris isku sheega
iyo quwadaha maal galiyo oo uu Mareykanka ugu horeeyo. Ma dhici kartaa in dowlad
ay cadaawad kala dhaxeyso Somaliya ay xaqiijiyaan guusha ay gaadhaan dadka ama
dowlad Somaliyeed?
Qaladka labaadna waa maqnaasha codka shacabka Somaliya. Siyaasiinta waxay
ilaabeen muhiimadda codka shacabka ay ‘maamulaan’ iyagoo har iyo habeen ku
hawlan helida xaqiijin ‘guul’ oo ay ka helaan dowlado shiysheeye. Waxayna
siyaasiintaan Somaliyeed safar cirka ah ku aadan 4ta jiho si ‘guusha’ ay gareen
ay xaqiijin shisheeye ugu helaan. Siyaasiintaan Somaliyeed waxaad ku arkeysa
gegida duyuuradaha caalamiga iyagoo duyuurad walba oo safreyso rabaan in ay ka
dhax muuqdan. Qaarkood waxay habeen walba jiiftaan mid ka mid ah garoomada
duyuuradaha ee Europe. Waxaana subixii halkaa ka eryo shaqaalaha garoomada,
intaa kadina waxay iyagoo ilka ruman, wajigan iska dhaqin u tuugsi tagaan
siyaasinta reer Europe iyagoo lacag iyo xaqiijin guuleed rabo in ay ka helaan.
Siyaasigaan marka uu dalka Somaliya ku laabto wuxuu qabanayaa shir jaraa’id,
isagoo markaa ka faaloodo halka uu tagay, duyuurada uu raacay midibkeedi iwm ah.
Dhawr bilood ka hor waxaa dhacday in haweenay Kenya ku leh hotel ay afduubato
siyaasi Somaliyeed, oo ay ammartay in uusan ka bixi karin maqsinka uu ku jiro oo
lagu qufulay. Arintaan waxey ka dambeysay kadib markii uu siyaasigaan waayey
lacag uu ku bixiyo kharashkii ku baxay dhawrka bilood ee uu joogay hotelkaas.
Sumcad-darrada ay siyaasiintaan ku hayaan Somaliya maahan mid loo dulqaadan
karo!
Wadada guusha iyo arimaha Somaliya
Waa in la helo qof ama koox ujeed cad usoo bandhiga shacabka. Qofkaan ama
kooxdaan waa in ay si dhab ah isug hawlaan sidii ay ujeedkooda uga rumayn
lahaayeen, loomaha baahna sida siyaasiinta haatan jira, in subax walbo ujeed
cusub la yeehso oo la dawakhiyo shacabka. Marka ay guusha garaan waxaa muqaddas
ah in si wada jir ah guusha u sheegtaan isla markaana ay helaan shacab u
ogolaado guusha una xaqiijyo iyo waliba wargeyso durbaanka u tumo oo xusso
guusha ay kooxda gaadhay.
Ma’ahan oo kaliya qofkaan ama kooxdaan in xaqiijinta guushooda ay ku kooban
tahay oo kaliya gobolka uu kasoo jeedo, ee waxaa loo baahan yahay in ogolaasho
iyo xaqiijin uu ka haysto inta badan gobolada Somaliya.
Marka aad baarto qaabka ay Somaliya uga talaabtay xaaladihii adkaa ee soo maray,
waxaad arkeysa in mar walba uu qof ama koox ay u istaagi jireen sidii guul lagu
gaari lahaa. Waxaana marwalba istaagaan guusha loo istaago bilaabi jiray hal qof
oo kaliya. Bal dib ugu noqo qaabka ay Somaliya guul uga gaadhay gumeysigii soo
maray. Sidoo kale dib ugu noqo sida ay wadama Europe ku gareen guusha iyo
nabada.
Wadan walba oo horumar iyo nabad ka jirto waxaad arkeysaa in dad ama shaqsiyaad
gaara ay usoo dhibaatoodeen.
Ugu dambeyn
Wadad guusha maahan mid sahlan. Waa mid inta badan cadaw iyo colaad lagala
kulmo. Waa mid u baahan karti, dulqaad iyo wada shaqeyn aaminaad ku saleysan.
Waxaase hubaal ah in wadada halka ay ku dhamaato kala kulmi doontid wax
wanaagsan oo ku ilawsiiya cadawga iyo colaada aad la kullantay intii aad dhax
kusoo jirtay. Safarka wadadaan waa mid u baahan dulqaad oo lala matali karo
waraabinta geed aad abuurtay oo aad subax walbo waraabiso, si dhawr sano kadib
cadceeda looga harsado.
C/wahaab Baajeey, Holland
Fadlan wixii feedback ah iigu soo hagaaji
daacad2000@hotmail.com
Qoraaladi hore:
Burcad badeed?
Guul ama geeri!
Faafin: SomaliTalk.com | Nov 1, 2008
Go’aankii
IGAD ee 29kii Oktoober 2008
IGAD ay soo saareen go’aan ku saabsan siyaasadda Somalia |