| w w w . S o m a l i T a l k . c o m |
|
| ||||
|
Maxamed C/qaadir Daa’uud (Stanza) ILA BEEGSA AAYAHA.
Jiiftadan waxaa curiyay Abwaan Maxamed
Cadiqaadir Daauud [Stanza] waxeyna soo baxday 30/7/2004. Waa waddani
iyo jacayl wada jir ah; balse dulucdeeda waa midnimada iyo wada
noolaashaha shanta Soomaaliyeed iyo ammaanta gabadha Soomaaliyeed [garmaamada]
waxaadna ka dhadhansan doontaa micnaha miraha ay ka turjummayaan,
beydba beydbuu ka sii macaanyahay.
ILA
BEEGSA AAYAHA.
Jacaylkii Khadroow bari
Boosaaso igu helay
Baxarsaafka Baydhabo
Igu baantay Baladweyn,
Barka kale Buaaliyo
Beeraha cagaarka'
Bacaadceliska Shalanbood
Libin barashadeennii
Adna timma bad-higilleey
Ila beegsa aayaha
Bandhig iyo aroos wacan.
Shaxda bilan Hargeysiyo
Khadroow Booramaad dagi
Burcaad igula noolaan
Wada booqan doonnaa,
Loo bogay dalkeennuye
Xeebta babacaweyn iyo
Barwaaqada Jabbuutaan
Gacalisooy ku soo bari,
Adna timma bad-higilleey
Ila beegsa aayaha
Bandhig iyo aroos wacan.
Xayaatii Bullaaliyo
Goob badroolku caygaga
Birqod waa dhulkeennee
Baraan kaaga dhigayaa,
Balliyada Ijaaraa
Barda hoos-qaboow iyo
Gaaris waa ban-raaxee
Ku bacaadsan doontaa,
Adna timma bad-higilleey
Ila beegsa aayaha
Bandhig iyo aroos wacan.
Baardheera iyo Luuq
Xammar baanka qarankiyo
Baar-Ubax bil-ciideed
Balcad kugu baxnaanshaa,
Haatan waan baxeynaa
Boqorkii ku dhalay iyo
Baxsan hooyadaa baad
Biyadahab I soo bari,
Adna timma bad-higilleey
Ila beegsa aayaha
Bandhig iyo aroos wacan.
Inanyahay Bureeqiyo
Ubax yaroo baxaayiyo
Cosob roob barbaarshaad
Bilicdoodi leedahay,
Aniguna Billaahiye
U buseylay awgaa
Maalintaan isbarannuu
Igu baahay caashaqa,
Adna timma bad-higilleey
Ila beegsa aayaha
Bandhig iyo aroos wacan.
Buurta Suurad Baarliin
Baladkeenna ugu dheer
Barqo roob bisleeyaad
Bidhaanteedi leedahay,
Bilistii hablaha kacay
Rag u wada birmanayee
Loo baratammaayaay
Ballankeenni ka adkoow,
Adna timma bad-higilleey
Ila beegsa aayaha
Bandhig iyo aroos wacan.
Billad
weeya caashaqa
Maansada
burhaantaan
Ku bacriiminaayee
Waligaa
ha baarfurin,
Khadroow
guur baraara le'
Inta
baal ku duushiyo
Bog-ku-socod dhammaantii
Noo
bogaadin doonaa,
Adna
timma bad-higilleey
Ila
beegsa aayaha
Bandhig
iyo aroos wacan.
Dhammaad Maxamed C/qaadir Daa’uud (Stanza) Faafin: SomaliTalk.com | July 31, 2004
Kulaabo bogga www.SomaliTalk.com | ||||
| © www.SomaliTalk.com | ||||
| >> Usheeg Asxaabtaada |
Daabaco
Boggan | Print
| Allah Is Great | ||||
|
