Daabaco Boggan | Print

Arrinta Gaalkacyo : waa Guri Muraayad iyo Guri dhagax

W/D: Amiin Yuusuf Khasaaro

E-Mail amiinkhasaaro@hotmail.com

Muqdisho, Soomaaliya

Madaxweynaha Galmudug (Kiimiko) ‘haddii Jufada Beesha Cumar Maxamuud ay idin aqoonsadaan anagana waan idin aqoonsaneynaa’

Waxaa maalmahan si aad ah u xumaanayey xaaladda Nabadgelyo ee Magaalada Gaalkacyo kadib markii Magaaladaasi lagu dilay dhowr qofood oo si weyn looga yaqaanay magaaladaasi, waxaana arrintaani dareen xoog leh ka muujiyey shacabka ku nool labada dhinac ee ay u qaybsan tahay magaalada Gaalkacyo, kuwaas oo sheegay in nabadgelyo xumadaan ay ka dambeeyaan rag doonaya in dib loo soo celiyo colaaddii dhex martay labada Dhinac.

Labada maamul ee ka jira Halkaa ayaa midba midka kale ku eedeeyey in uu isagu ka dambeeyo qalalaasahan iyo rabashadaha ka jira Magaalada Gaalkacyo, waxayna qaar ka mid ah mas’uuliyiinta Maamul Goboladeedka Puntland ku hanjabeen in dib loo soo celin doono khadkii Cagaarnaa, waxay kaloo sheegeen in nabadgelyo xumadda ay ka dambeeyaan dhallinyaro ka soo jeeda dhinaca koonfurta Gaalkacyo, hase yeeshee maamulka Gal-Mudug ayaa arrintaani ku tilmaamay mid aan sal iyo raad toona laheyn.

1993-diii ayay ahayd markii Gen. Max’ed Faarax Caydiid allaha u naxariistee iyo C/llalahi Yuusuf ay heshiis ku kala saxiixdeen Magaalada Gaalkacyo, heshiiskaas oo dhigayey in si nabadgelyo loogu wada noolaado Magaalada, hase yeeshee wixii markaa ka dambeeyey dad ka soo jeeday dhanka Koonfurta aysan u cuntamin heshiiskaasi, waxayna ku tilmaameen mid hal dhinac siinaya sad-bursi.

Garoonka Diyaaradaha oo ku yaala Koonfurta iyo Koontaroolada laga soo galo Koonfurta ayaa waxaa ku sugan ciidamo Puntland kuwaas oo halkaasi ka qaada Canshuur aysan ku qanacsaneyn dadka ku nool koonfurta Magaalada Gaalkacyo.

“Anaga ayaa xaq u leh in aan maamulno oo aan canshuurta qaadno” ayuu yiri wiil dhallinyaro ah oo ka careysan in labadaasi goobood ay maamulaan maamul Gobaleedka Puntland, hase yeeshee Cali Diiriye Aloore oo ah shaqsi ka soo jeeda Koonfurta balse wax la qaybsada Maamul gobaleedka Puntland ayaa waxa uu u soo jeediyey dadka ku nool Koonfurta in ay dhowraan heshiiskii horey loo gaaray ee 1993.

Madaxweynaha Maamul gobaleedka Gal-Mudug C/raxmaan Warsame Kiimiko ayaa waxa uu ku eedeeyey dhinaca Waqooyiga in ay mas’uul ka yihiin nabadgelyo xumida ka soo cusboonaatay Magaalada Gaalkacyo, waxa uuna u soo jeediyey dhamaan dhinacyada halkaasi wada degan in ay ka shaqeeyaan nabadda iyo xasiloonida.

“Mar aan la kulmay Madaxweynaha Gobolka Puntland ayaan waxaan ku iri labada maamul waa in ay ka shaqeeyaan arrimaha nabadgelyada, hase yeeshee waxa uu noogu jawaabay ‘haddii Jufada Beesha Cumar Maxamuud ay idin aqoonsadaan anagana waan idin aqoonsaneynaa’ “ ayuu yiri Kiimiko oo si weyn uga carooday hadalkii ka soo yeeray Caasho Geele in ay dib u soo celinayaan qadkii Cagaarnaa ee kala qaybinayey Magaalada Gaalkacyo, waxa uuna sheegay Kiimiko in ay Caasho Geele ka mid tahay dadkii u soo halgamay in Gaalkacyo si nabadgelyo ah loogu wada noolaado.

Xaaladda Magaalada Gaalkacyo waxaa uga sii daray markii Macalin ka soo jeeda Magaalada Muqdisho oo lagu magacaabo Ciise Xabad Calasow lagala baxay Gurigiisa oo ku yaala Waqooyiga Gaalkacyo Sadex Beri ka dib maydkiisa oo su xun loo jirdiley laga helay Halka lagu magacaabo Yameyska

Nin Dhalinyaro ah ayaa yiri “habeena kuma seexan Gaalkacyaa nabad noqoneysa wxaana iiga dhisan Koofurta Gaalkacyo Bush yar ay dhaxyaaliin laba Joodari marka xaaladu ay gaarto Baraka ma leh waan aqaanaa sida loo cararo marka cidda ay wax ka halaabeyso waa la yaqaanaa waxaana dhihi lahaa ha noqonina “Ninkii Abuurkiisii Cunay”

Mid kalaa yiri”Arrinta Gaalkacyo waxay u ek tahay nin sita Qarsho Subag oo buuxda oo dadka dhahaya” Car yaa iiga jabiya Qarshadaan Subaga ah” Marka reer waqooyiga waxaan dhihi lahaa Fidnada waa hurudaa ee yaan la kicinin, koonfurtana waxaan dhihi lahaa inta aad ku haysaan waxba nagama halaabayaan ogaada in ay nabada dan idiin tahay

Magaalada Gaalkacyo oo ka soo kabsatay dagaalo horey uga dhacay ayaa haatan waxay u muuqataa mid dib ugu laabaneysa xaaladahaasi haddii aan caqliga wanaagsane shaqeynin, waxaa kaloo la dhihi karaa waa qof ku jira guri Muraayad ah oo dhagaxyeynaya Guri dhagax ka sameynsan, waayo Waqooyiga Gaalkacyo waxay si aad ah u dhisan tahay dagaaladii sokeeye kadib halka Koonfurta ay u muuqato mid aan ka soo kabsan dagaaladii sokeeye, iyadoo taasi jirto ayaa haddana dadka reer Waqooyiga waxaa looga baahan in ay la yimaadaan dulqaad iyo samir dheeraad haddii kale guriga Muraayadda ah ayaa la dhagaxyeyn doonaa.

Amiin Yuusuf Khasaaro

E-Mail amiinkhasaaro@hotmail.com

Yaa ka dambeeya dilalka dhacaya? Akhri...

Faafin: SomaliTalk.com |  August 1, 2008

Kulaabo bogga  www.SomaliTalk.com  © www.SomaliTalk.com

La soo xiriir: