|
Todobaadka iyo Dareenka Dadweynaha
Waxaa soo diyaariyey
Mohamud Yusuf Garre
Yusuf22@lycos.com
Janaayo 18, 2003
AFEEF: Akhri cinwaanka mar-labaad, xusuusnowna waa qoraallo u gaar ah qoraaga ku saxiixan:
Waa Bilowgii Taxane Todobaadle ah kuna qaadaa dhigi doono dhacdooyinka Usbuuca,
soona koobaya arimihii ugu xiisaha iyo hadal haynta hadnaa Todobaadka. Qodobada
Toddobaadkan:
Xaalada Guud ee Gobolka Puntland,
Dad Lagu xir xiray Boosaaso iyo
Dekeda Boosaaso oo 2 casho xirneyd
Bartamihii todobaadkan ayaa maamulka Col. Cabdullaahi Yusuf xabsiga u taxaabeen
rag isugu jira culimo, aqoonyahano iyo ganacsato. Dadkan ayaa waxaa kamid ahaa:
Sheekh Daahir Cali Shire,
Eng. Cabdulqaadir Yaasiin,
Axmed Cawaale iyo
Cali Boqor Muuse
Xariga dadkan ayaa la rumeysan yahay inuu ahaa mid salka ku haya siyaasad,
dadkan la xir xiray oo aad looga yaqaan gobolka ayaa badankood fikrad ahaan
diidan maamulka Col. Cabdullaahi Yusuf. Sidoo kale Sheekh lagu magacaabo
Cabdullaahi Cali Xaashi oo lagu xiray magaalada garoowe bilowgii todobaadkan
ayaa la sheegayaa in la sii daayey walow aan la ogeyn sababta keentay
xiritaankiisa.
Magaalada Boosaaso oo aan khadka telefonka kula xiriiray ayaa dad xog-ogaal ihi
ii sheegaan in cabsi weyni ka jirto magaalada iyadoo dadka fikrad ahaan diidan
maamulka Col. Cabdullaahi ay gabasho ku jiraan.
Falalka noocan ah ayaan ku cusbeyn gobolka iyadoo maamulka Cabdullaahi Yusuf
xiliyo hore oo kala duwan xabsiga dhigeen dad isugu jiray siyaasiyiin iyo
ganacsato walow badankood dib laga sii daayey.
Sidoo kale dekeda magaalada Boosaaso ayaa xirneyd mudo laba casho ah taasoo ka
dambeysay canshuur kordhin gaareysa 15% (boqolkiiba shan iyo toban) oo uu
maamulka Cabdullaahi Yusuf ku daray badeecadii kasoo degeysay dekedaas.
Canshuur kordhintan ayaa keentay mudaaharaad ay sameeyeen ganacsatadii wax kala
soo degeysay dekeda taasoo sababtay in mudo laba cisho ah aaney dekeda wax kasoo
degin waxna ka dhoofin. Canshuuraha noocan ah ayaa in dhowaalaba maamulka
Cabdullaahi Yusuf sare u qaadayey taasoo ka careysiisey ganacsatada gobolka.
Sidoo kale ganacsatada qaarkood ayaa aaminsan in Cabdullaahi Yusuf doonayo inuu
curyaamiyo dhaqaalaha magaalada Boosaaso, iyadoo qaar kalena ka careysan
yihiin canshuurta ay bixiyaan oo uu Cabdullaahi Yusuf u adeegsanayo la
dagaalanka walaalahood kasoo horjeeda maamulka Col. Cabdullaahi.
Ganacsatada qaarkood ayaana sheegay iney wixii hada ka dambeya badeecadooda kala
soo degi doonaan dekedo kale hadii aanu maamulka Col. Cabdullaahi joojin
canshuurtan xad dhaafka ah ee uu maalin walba sare usii qaadayo.
Dr. Cabdiqaasim oo saxaafada xorta ah ku tilmaamay shayaadiin
Dabley hubeysan ayaa usbuucan bilowgiisii la wareegay idaacada Horn Afrik ee
laga dhegeysto magaalada Muqdisho, taasoo sababtay in idaacadu hawada ka
maqnaato saacado. Dableydan oo uu soo amray ganacsade lagu magacabo Maxamed
deylaaf ayaan wax dhib ah u geysan shaqaalihii idaacada iyo qalabkii halkaa
yaalayba.
Mid kamida weriyeyaasha idaacada oo aan la xiriiray ayaa ii sheegay inuu
stuudiyaha idaacada ku sugnaa xiligii weerarku dhacay ayna ka war heleen oo qura
dabley dul taagan oo leh demiya idaacada, “waxaan ka codsanay dableyda iney na
siiyaan daqiiqad si aan u ogeysiino dhegeystayaasha inaan hawada ka baxeyno
balse wey naga diideen” ayuu yiri weriyahaas aan la xiriiray.
Ganacsadaha dableyda soo diray ayaa ka cabanayey war ka baxay idaacada soona
xigtay buug sheegaya in ganacsaduhu maalgelin siiyo ururada loogu yeero
argagixisada ee la sheegay iney ka jiraan Soomaaliya.
Khilaafkan ayaa ugu dambeyntii hab qabiil lagu xaliyey iyadoo uu ganacsadaha
weerarka soo qaadayna raali gelin ka bixiyey falkaas foosha xun ee uu ku kacay.
Hadaba Dr. Cabdiqaasim Salaad Xassan oo ka jawaabayey su’aal laga weydiiy
saxaafada xorta ah isagoo jooga gurigiisa ku yaala degmeda hodan ee Muqdisho
ayaa saxaafada xorta ah ku sifeeyey shayaadiin “ibliis ayaa tababaray waana
shayaadiin xulufo la ah shayaadiinta” ayuu yiri Dr. Cabdiqaasim isagoo intaa sii
raaciyey in saxaafada xorta ahi ay ku shaqeystaan dad ajnabi ah ama yihiin kuwo
lacag uun ku shaqeeya.
Waxaana marna nagu cusbeyn naceybka Cabdiqaasim ee saxaafada isagoo in badan
isku dayey inuu caburiyo saxaafada xorta ah balse awood u waayey maadaama awooda
uu ku leeyahay magaalada Muqdisho ay tahay mid aad u kooban.
Muuse Suudi oo Siyaasad Cusub Kala Yimi Eldoret Una Ololeynaya Mideynta Beelaha
Hawiye
Hogaamiye kooxeedka waqooyiga Muqdisho Muuse Suudi Yalaxow oo mudo sadex bilood
ah ku maqnaa magaalada Eldoret ee uu kaga qeyb galayey shirka dib u heshiisiinta
ee halkaa ka socda ayaa kusoo laabtay magaalada Muqdisho.
Waxaa garoonka kusoo dhoweeyey siyaasiyiinta iyo oday dhaqameedyada magaalada
Muqdisho ayna ku jireen madax sare oo ka tirsan DKMG. Soo dhoweynta uu Muuse
Suudi la kulmay ayaa aheyd mid aan horay loo arag aadna loosoo agaasimay.
Garoonka oo uu kula hadlay weriyeyaasha Muqdisho ayuu Muuse Suudi sheegay inuu
isaga soo tegey shirka Eldoret uuna doonayo inuu wax ka qabto xaalada magaalada
Muqdisho. Muuse Suudi oo horay looga bartay hadalo kul kulul iyo colaad ayaa
waxa markan ka muuqatey degenaan iyo nabad jaceyl, isagoo sheegay inuu dadaal
walba u gelayo sidii uu ula tashan lahaa dhamaan hogaamiye kooxeedyada magaalada
Muqdisho isla markaana loo furi lahaa dekeda iyo garoonka diyaaradaha magaalada
Muqdisho.
Muuse Suudi ayaa markii ugu horeysay muujiyey soo dhoweynta uu ka helay xubno
sar sare oo ka tirsan DKMG isla markaana uu doonayo inuu wada xaajood la yeesho
cid walba oo ay khuseyso nabadgelyada magaalada Muqdisho taasoo ay DKMG soo
geleyso.
Waxaana la saadaalinayaa kulan dhex mara isaga iyo Dr.Cabdiqaasim, iyadoo uu
abaabulka kulan dhex mara labadan hogaamiye ka bilowday magaalada Muqdisho.
Oday Muuse oo wareysiyo kala duwan siiyey idaacadaha kala duwan ee magaalada
iyo jariidadaha kasoo baxa Muqdisho ayaa waxa hadaladiisa ka muuqday isbedel
weyn oo siyaasadeed iyadoo shacabka reer Muqdisho badankood rumeysan yihiin in
hadii Muuse Suudi nabada uu sheegayo ka dhab tahay xal loo heli doono colaada ka
jirta caasimadii umada Soomaaliyeed.
Oday Muuse oo intii uu joogay magaalada Eldoret la kulmay siyaasiyiinta iyo
aqoonyahanadii Soomaaliyeed ee shirka kasoo qeyb galay ayaa hadana xooga saaray
la tashiyo gooni gooni ah oo uu la yeeshay kuwa kasoo jeeda beesha Hawiye.
Muuse Suudi oo bishii hore u waramay idaacada BBC-da laanta afka Soomaaliga
ayaa sheegay in jagada Madaxweynenimada ay xaq u leeyihiin oo keliya beesha
Hawiye ee uu isagu ka dhashay, isagoo sidoo kale muujiyey naceybka uu u qabo
Col. Cabdullaahi Yusuf oo ay wadaagaan jagada wareegta ee gudoomiyaha golaha
SRRC.
Hadaba shacabka reer Muqdisho ayaa is weydiinaya waxa siyaasadan cusub ee Oday
Muuse ka bedali karto xaalada cakiran ee magaalada Muqdisho, iyo goorta uu is
bedelkaasi iman doono.
Waxaanse weli kala cadeyn in Muuse Suudi ku laaban doono magaalada Eldoret marka
ay dib u laabtaan hogaamiye kooxeedyada iminka ku sugan magaalada Muqdisho iyo
Col. Cabdullaahi Yusuf, waxaana muuqata ifafaale in hogaamiye kooxeedyada debeda
ka jooga shirka ay dib ugu laaban doonaan madasha shirka iyadoo uu hogaamiye
kooxeedka degmeda Jowhar Maxamed Dheere ku laabtay magaalada Eldoret.
Mwangala Ergeyga Dowlada Kenya, Maya Maya Ergeyga Itoobiya
Xiligii uu socday abaabulka shirka dib u heshiisiinta Soomaalida ee ka furmay
magalada Eldoret ayaa aheyd xili Madaxweyne Moi uu ku jiray dagaal siyaasadeed
uu doonayey inuu ku badbaadiyo xisbigiisa KANU iyo jagada Madaxweyne-nimada oo
uu la doonayey Uhuru Kenyata.
Arimahan daraadood ayuusan madaxweyne Moi u helin fursad uu door muuqda kaga
cayaaro shirkan dib u heshiisiinta, wuxuuna awoodii dowlada Kenya shirka ku
laheyd gacanta u geliyey Mr.Mwangala oo ah ergeyga Kenya ee shirka.
Hadaba ka maqnaanshaha Moi ee arimaha shirka ayaa fursad dahabi ah u noqotay
melez
Zenawi, Ra’iisul Wasaaraha Dowlada Itoobiya isagoo bilowgii shirkaba majaraha u
qabtay qaab socodkii shirka. Waxaana usbuucii ugu horeeyey ee shirka muuqday in
hogaamiye Kooxeedyada qaarkood ay la kulmeen soo dhoweyn heer sare ah halka qaar
kalena lagaba iloobay hoteeladii ay ku degi lahaayeen.
Dowlada Itoobiya ayaan marna qarsan gacanta ay ku leedahay shirka iyadoo
bilowgii shirka ku eedeysay in Cabdiqaasim doonayo inuu fashilo dadaalkan.
Shirka oo soo maray marxalado kala duwan iminkana guda geli raba tii ugu dhibka
badneyd ee ah awood qeybsiga ayaa waxaad moodaa in si toos ah looga hagayo Adis
Ababa.
Madaxweynaha cusub ee Kenya Mwai Kibaki iyo wasiirkiisa arimaha debeda Kolonzo
Musyoka ayaa labaduba ku mashquulsan sidii ay dhidibada ugu aasi lahaayeen
dowladooda bil jirsatay, taasoo dhaxalsiisey Mwangala inuu ka talo qaato Melez
Zenawi.
Hadaba Mwangala waa ergey ay dantu ku qasabtay inuu matalo Melez Zenawi maadaama
uusan haysan dowlad uu ka talo qaato.
Wafdi Reer Somaliland ah oo Booqasho Ku Tegey Magaalada Garoowe
Wafdi uu hogaaminayo duqii hore ee magaalada Burco oo lagu magacaabo Muuse
Cabdi ayaa booqasho ku tegey caasimada gobolka Puntland. Wafdigan oo mudo Usbuuc
ah ku sugnaa magaalada Garoowe ayaa kulamo la yeeshay madax sar sare oo ka
tirsan maamulka dowlada Cabdullaahi Yusuf oo uu ka mid yahay wasiirka arrimaha
gudaha Axmed Cabdi Xaabsade.
Wafdigan ayaa muhiimada socdaalkooda lagu fasiray iney tahay dejinta xiisada in
dhowaalaba u dhexeysay labada maamul goboleed ee Somaliland iyo Puntland,
xiisadaas oo lugta ku haysa sheegashada midba sheeganayo in gobolada Sool iyo
Sanaag raacsan yihiin maamulkooda.
Hasa ahaatee warar kasoo baxay wasiirka gaashaandhiga ee Dowlada Goboleedka
Somaliland ayaa sheegaya in maxkamad lasoo taagi doono siyaasiyiinta booqashada
ku tegey Garoowe. Wasiirka ayaa laga soo xigtay inuu yiri “Waa arin aan loo
dulqaadan Karin isla markaana aad u fool xun”.
Booqasho uu Daahir Riyaale ku tegey Laas Caano ayaa dhalisay xiisad dagaal,
walow laga hor tagay dagaal halkaa ka dhaca.
Sidoo kale Daahir Riyaale ayaa kasoo laabtay socdaal qaatay todobaad oo uu kusoo
kala bixiyey wadamada Mali, Senegaal iyo Itoobiya, socdaalka Riyaale ayaan wax
faahfaahin ah laga bixin isagoo soo saaray qoraal saxaafadeed uu kaga waramayo
taariikhda wadamadaas uu booqday balse aan waxba ka oran wixii uu kala soo
kulmay wadamadaas.
BOGGA XIGA.... GUJI...
Waxaa soo diyaariyey
Mohamud Yusuf Garre
Yusuf22@lycos.com
AFEEF: Qoraaladan waa kuwo u gaar ah qoraaga ku
saxiixan, kana tarjumi mayaan aragtida SomaliTalk.com.
XUSUUSO CINWAANKA QORAALKA..... WIXII
JAWAAB AHNA KU HAGAAJI QORAAGA....
FAAFIN: SOMALITALK.COM
Jan 18, 2003
QORAALADII HORE EE MAXAMUUD Y. GARRE:
AKHRI
HALKAN iyo HALKAN
Powered by
www.SomaliTalk.com
All About Somalia and More...
|
