Dareenka Dadweynaha iyo Toddobaadkan

Waxaa soo diyaariyey
Mohamud Yusuf Garre
Yusuf22@lycos.com 

Febraayo 1, 2003

Waa Taxane Todobadle ah, Faalo iyo Falanqeyn. Waa Fahamka siyaasada fashilan ee Soomaalida. Waa Fiiro Dheer iyo Fahamka Dadweynaha. Waana Faaqidaada Todobaadka ee dhacdooyinkii ugu xiisaha iyo hadal haynta badnaa ee Soomaalida iyo Caalamkaba. Qodobada Todobaadkan:

• 26 Janaayo Maalin Madow Taariikhdana Ku Qoran
• Nelson Mandela: “Bush Waa Nin Aragti Gaaban si wanaagsana  aan u Fekerin”
• Maamulka Somaliland oo Xabsiga u Taxaabay Ergey Nabad Doon ah
• Madasha Shirka Eldoret oo Isu Bedeshay Gole Rabshad
• Maxaa Ku Qornaa Warqada Dr. Cabdiqaasim U Diray Col. Cabdullaahi Yusuf?

Maxaa Ku Qornaa Warqada Dr. Cabdiqaasim U Diray Col. Cabdullaahi Yusuf?

Todobaadkii ina dhaafay ayaa waxaa isa soo tarayey xiriir hoosaad la sheegay inuu dhex maray Madaxweynaha DKMG Dr. Cabdiqaasim Salaad Xassan iyo Col. Cabdullaahi Yusuf. Wararkan oo ka kala imaanayey degaanada  Puntland iyo Muqdisho ayaa badankood sheegayey in Dr. Cabdiqaasim usoo bandhigay Korneylka in la qabto shir dib u heshiisiin Soomaaliyeed laguna qabto gobolada dhexe ee Soomaaliya.

Dowlada kasoo bixi doonta ayuu Cabdiqaasim u bandhigay Col. Cabdullaahi Yusuf inuu qaato jagada Ra’iisul Wasaaraha balse  uu Cabdiqaasim sii haysto jagada Madaxweynenimada.

Maamulka Puntland ayaa markiiba beeniyey wararkan, balse todobaadkan ayaa waxaa qiray xiriirkaas dhex maray labada dhican Col. Cabdullaahi Yusuf laftiisa isagoo sheegay in Dr. Cabdiqaasim u bandhigay laba qodob oo keliya:

1-In shir dib u heshiisiin lagu qabto Soomaaliya
2-In uu Dr. Cabdiqaasim heshiisiiyo Korneylka iyo ninka ay hogaanka Puntland isku haystaan ee Jaamac Cali Jaamac.

Arinku si kastaba ha ahaadee dad badan ayaa rumeysan in Dr. Cabdiqaasim dadaal weyn ugu jiro sidii uu heshiis ula geli lahaa dhamaan kooxaha kasoo horjeeda si uu usii hayo jagada Madaxweynenimada oo kaga eg mudo ay dhowr bilood inaga xigto.

Madasha Shirka Eldoret oo Isu Bedeshay Gole Rabshad

Weerar gacan ka hadal ah oo dhex maray ka qeyb galayaasha shirka Eldoret ayaa keenay dhaawac soo gaaray Prof. Gaandi oo metela Ururada Bulshada Rayidka iyo Mowliid Macaane oo ah gudoomiyaha garab ka tirsan ururka SAMO.

Mowliid Macaane ayaa lagu xiray saldhiga police-ka ee magaalada Eldoret  kadib markii la xaqiijiyey in dhalinyaro isaga ka amar qaata ay weerar u geysteen Prof. Gaandi xili uu ku socday suuq ku yaala magaalada Eldoret oo uu doonayey inuu lacag ka sarifto.

Weerarkan dambe kahor ayaa waxaa jiray dagaal gacan ka hadal ah oo hoolka shirarka ku dhex maray Mowliid Macaane iyo nin ay xulafo ama qaraabo yihiin Profassorka taasoo keentay in Prof. Gaandi usoo hiiliyo ninkaas ay qaraabada yihiin, halkaas oo uu dhaawac kasoo gaaray Mowliid Macaane. Dadaal ay galeen ka qeybgalayaasha shirka ayey ku guuleysteen soo deynta Mowliid Macaane iyo ragii kale ee la xirnaa.

Prof. Gaandi ayaa la sheegayaa inuu dhaawac ka gaaray gacanta   halka Mowliid Macaane madaxa uu dhaawac ka gaaray. Hadaba dad badan ayaa is weydiinaya, Af ku dirir iyo  fadhi ku dirir ayaa leysku ogaa ee waa maxay gacan ka hadalkan?. Nabadse maka sugnaa ragan isku gacan qaadaya goobtii looga fadhiyey xal ka gaarida dhibaatada abaaday ee umada Soomaaliyeed.

Runtii waa ayaan darrooyinka haysta Umada Soomaaliyeed taasoo aan laga gudbeyn inta dagaal oogayaashan hormuudka u yihiin mujtamaca Soomaaliyeed ee ka daalay colaadan   qaangaarka ku dhow.

Maamulka Somaliland oo Xabsiga u Taxaabay Ergey Nabad Doon ah

Muuse Madoobe oo ah Duqii hore ee magaalada Burco ayey ciidamada Somaliland kala baxeen gurigiisa ku yaala Magaalada Burco. Muuse Madoobe iyo wafdi uu hogaaminayey ayaa dhowaan booqasho ku tegey magaalada Garoowe halkaasoo ay kula kulmeen Col. Cabdullaahi Yusuf.

Muuse Madoobe oo sheegtay inuu metelo beesha bariga Burco ayaa socdaalkiisa ku macneeyey qaboojinta xiisad dhowaanahanba u dhexeysay labada maamul goboleed ee Puntland iyo Somaliland kana dhalatay booqasho uu Laas Caano ku tegey Madaxweynaha Dowlad Goboleedka Somaliland Daahir Riyaale.

Maamulka Somaliland ayaa aad uga carooday booqashada Muuse ku tegey Garoowe iyagoo sheegay in Maxkamad lasoo taagi doono. Muuse Madoobe ayaa lagu xiray xabsiga magaalada Burco lamana garayo dembiga lagu oogi doono ama goorta maxkamad lasoo taagi doono.

Maamulka Hargeysa ayaa dhowaanahanba u dhaqmayey sidii urur kamida ururada dagaal u jooga ah ee ka jira Soomaaliya, iyadoo Daahir Riyaale aad moodo mid kaba liita dagaal oogayaasha iminka ku shirsan magaalada Eldoret ee cariga Kenya, maadaama uu had iyo goor u ololeynayo colaad ka bilaabata degaanada Puntland iyo Somaliland taasoo uu dabkii ugu horeeyey ka shiday degaanadaa dhamaadkii sanadkii tegey kadib booqashadii uu tegey magaalada Laas Caano.

Nelson Mandela: “Bush Waa Nin Aragti Gaaban si wanaagsana  aan u Fekerin”

Madaxweynihii hore ee wadanka Koofur Afrika Nelson Mandela ayaa weerar ku qaaday siyaasada qalafsan ee maamulka Madaxweyne Bushka Mareykanka.

“Waa musiibo waxa Bush ka sameynayo Ciraaq, Waxaan dhaleecaynayaa dowlada keliya ee xooga weyn ee iminka jirta uuna hogaaminayo Madaxweyne aan aragti dheereyn isla markaana aan si wanaagsan u fekeri Karin doonayana inuu ku kaco fal xasuuq ah oo aan horay loo arag” ayuu yiri Mandela oo ka hadlayey shir lagu qabtay magaalada Johannesburg ee Koofur Africa.

Taariikhda Nelson Mondela ... GUJI

Mandela ayaa sheegay in Ra’iisul Wasaaraha dowlada Ingiriiska Mr. Tony Blair u dhaqmayo sidii inuu yahay Wasiirka Arrimaha debeda ee Mareykanka. “Blair iyo Bush waxey isku deyayaan sidii ay u daba mari lahaayeen howlaha ay wado Hay’ada Jimciyada Quruumaha ka dhexeysa” Mandela oo hadalka sii wata ayaa yiri “Ma waxey sidaa u yeelayaan maadaama ninka madaxda ka ah Jimciyada Quruumaha ka dhexeysa yahay nin Madow (Ghanaian Kofi Annan). Arintan lagu xaqirayo howlaha Jimciyada Quruumaha ka dhexeysa ma aaney dhicin xiliyadii ay hay’ada madaxda ka ahaayeen niman cadaan ah” ayuu raaciyey Mandela oo ay caro ka muuqatay hadalkiisa.

Mandela ayaa sheegay in Mareykanku fasax ka qaato Jimciyada Quruumaha Ka Dhexeysa haduu doonayo inuu Ciraaq weeraro, isagoo sheegay in weerar aan fasax loo qaadan laguna qaado Ciraaq yahay mid aan la aqbali Karin. “Hadii uu jiro wadan dunida ka galay falal aad u xun oo aan laga hadli Karin wadankaasu waa Mareykanka umana aaba yeelaan bini aadamka” ayuu hadalkiisa kusii daray Mandela.

Mandela ayaa sheegay in muhiimada dagaalkan Mareykanku la damacsan yahay Ciraaq yahay sidii ay Mareykanku gacanta ugu dhigi lahaayeen shidaalka wadankaas, balse wuxuu xusay in ey dembi tahay weerarka shacab aan waxba galabsan.

Mandela oo ah nin horay ugu guuleystay abaal marinta nabada aduunka loona yaqaan (Nobel peace Price) ayaa aad looga ixtiraamaa dhamaan dunidan dacaladeeda, waana siyaasiga keliya ee aan ka gaban maamulka Mareykanka isagoo mar walba runta u sheega.

  26 Janaayo Maalin Madow Taariikhdana Ku Qoran

26 Janaayo: Libta Saas Laguma Helo WQ. Yuusuf Cusmaan Habeen Madow Ayuu La wareegey, Habeen Madowna WSaa Lagala Wareegey WQ. Maxamed Xaaji ingiriis  26 Janaayo waa malin sidee ah?

Laba iyo toban sano horteed, 26kii Janaayo 1991 ayey aheyd markii Maxamed Siyaad laga saaray magaalada Muqdisho. Hadaba Laba iyo Toban sano kadib, todobaadkan ayaa waxaa magaalada Muqdisho lagu qabtay xaflado kala duwan oo lagu xusayey maalintaas iyada ah.

Xafladihii ka dhacay Muqdisho ayaa dadkii ka hadlay muujiyeen in maalintanu aheyd maalin weyn oo mudan in loo dabaaldego leyskana tuuray rajiim gumeysi ku hayey shacabka Soomaaliyeed. Balse su’aasha dad badan is weydiinayaan ayaa waxey tahay:

Ma u darsanay Dowladii Ina Siyaad? Mise waan ka Darsanay?

Jawaabta su’aashan ayaa ah mid aan feker dheer u baahneyn..Gebi ahaana mujtamaca Soomaaliyeed ee samaha jecel ayaa kuugu jawaabaya in Dowladii Ina Siyaad dhaantay Dagaal Oogayaashan, ka ganacsada dhiiga umada Soomaaliyeed, dalkeenii u bedelay daar dagaal, dadkeenii u diiday nabadii ay xaqa u lahaayeen isla markaana dadnimadeenii dowladnimadeenii iyo dalkeeniiba iibsaday.

Hadaba waxaa wax lala yaabo ah beenta cad ee ay siyaasiyiinta Muqdisho ka dhaadhicinayaan shacabka reer Muqdisho ee iyagu qarka u saaranba iney iloobaan wixii ay nabad aheyd ama qiimihii ay nabadu laheyd maadaama ay 12 sano habeen iyo maalin, subax iyo galab, saacad walba iyo daqiiqad walba xabad dhegahooda ka yeereyso.

I  I  D  H  E  H

QORMADII TODDOBAADKII HORE.... GUJI...

Waxaa soo diyaariyey
Mohamud Yusuf Garre
Yusuf22@lycos.com 

AFEEF: Qoraaladan waa kuwo u gaar ah qoraaga ku saxiixan, kana tarjumi mayaan aragtida SomaliTalk.com.

XUSUUSO CINWAANKA QORAALKA..... WIXII JAWAAB AHNA KU HAGAAJI QORAAGA.... 

FAAFIN: SOMALITALK.COM

QORAALADII HORE EE MAXAMUUD Y. GARRE:
  AKHRI HALKAN iyo HALKAN

Powered by www.SomaliTalk.com
All About Somalia and More...