Dhacdooyinkii Soomaaliya ee Sanadka 2007
Inta aan u guda gelin wixii dhacay sanadkii 2007 bal aan dib u qooraansano
dhacdooyin u baahan in la xuso dabayaaqadii sanadkii 2006 gaar ahaan Bishii
Desember dabayaaqadeedii waxayna ahaayeen dhacdooyinkaas
Qaybtii 1aad
December 2006:
19/12/2006: Waxaa bilowday dagaalkii Daynuunaay iyo Iidaale, waxa uuna
dagaalkaasi socday mudo sagaal maalmood ah, waxaana markii dambe lagu soo
jabiyey Maxaakiimtii Islaamiga oo markii dambe isaga baxay Magaalada Muqdisho,
kadib markii ay soo weerareen ciidamada Itoobiya oo ay la socdaan ciidamada
Dowladda Federaalka, waxa uuna Sheekh Shariif sheegay habeenkii uu ka baxayey
Muqdisho uu dagaalku hadda kadib noqon doono ku dhifoo ka dhaqaaq.
24/12/2006: Waxaa la duqeeyey Garoonka Diyaaradah ee Magaalada Muqdisho, kadib
markii diyaaradaha Xabashida ay gantaal ku dhifteen Garoonka Diyaaradaha oo
xiligaasi Maxaakiimtu u isticmaali jireen wixii sahay oo ay u baahan yihiin iyo
safaradooda dibadda, taasina waxay walwal iyo jab ku abuurtay ciidamadii
Maxaakiimta Islaamiga ee ku jiray safka hore ee dagaalka.
25/12/2006: Waxaa iyana la duqeeyey Magaalada Baladweyne oo ay ka dagaalamayeen
ciidmaada Maxaakiimta Islaamiga ah, duqeyntaasi waxay keentay in ciidamadii ay
kala firxadaan Magaalada Baladweynana ay soo galaan ciidamada Itoobiya, waxayna
ciidamada Maxaakiimta markii dambe isku soo uruursadeen agagaarka Jawhar.
27/12/2006: Waxa iyana safka hore ee dagaalka soo baneeyey ciidamadii
Maxaakiimta Islaamiga ee ka dagaalamayey Aaga Daynuunaay iyo Aaga Jowhar,
waxayna ciidamadu ku soo uruureen Magaalada Muqdisho oo xarun u ahayd Maamulkii
Maxaakiimta.
28/12/2006: Waxaa Magaalada Muqdisho ka baxay Maxaakiimtii Islaamiga oo uu
horkacayey Sheekh Shariif Sheekh Axmed, waxaana maalinkaasi Magaalada Jowhar soo
galay ciidamo uu horkacayo Max’ed Dheere oo xiligaasi xirnaa funaanad ay ku
qoran tahay (I Love Jowhar)
28/12/2006: Waxay ciidamada Itoobiya soo gaareen Magaalooyinka Muqdisho iyo
Afgooye, waxaana xiligaasi la socday Ra’isul Wasaarii DFKMG, Geedi, waxa uuna Magaalada
Afgooye kulan kula yeeshay Odoyaal, Waxgarad iyo Siyaasiyiin ku sugnaa gobalka
Banaadir, waxa uuna kala hadlay dhinaca nabadgelyada, waxa uuna Ra’isul
Wasaaruhu uu sheegay in laga adkaaday wax uu ugu yeeray kooxihii Argagixisada.
31/12/2006: Ciidamada Itoobiya ayaa u dhaqaaqay dhanka Gobalka J/hoose, halkaas
oo ay u carareen Maxaakiimtii Islaamiga, waxayna fariisin ka dhigteen ciidamadii
Maxaakiimta Islaamiga Magaalada Jilib, waxaana habeenimadii dhacay dagaal aad u
qaraaraa, waxayna taasi keentay in Ciidamadii Maxaakiimta Islaamiga ay dib ugu
gurtaan Magaalada Kismaayo, hase yeeshee waxaa la yaab lahayd in nin ka mid ah
Maxaakiimtii Islaamiga uu degmad Jilib ku dilo ilaa iyo lix askari oo uu ku jiro
sarkaal ka tirsan Ciidamada Itoobiya, kadib markii uu dhowr jeer uu werar ku soo
qaaday.
January 2007
1/1/2007: Waxaa Degmada Afgooye soo gaaray Madaxweynaha DFKMG C/llaahi Yuusuf oo isna
kulan kula yeeshay Siyaasiyiin iyo Waxgarad ka soo jeeda gobalka Banaadir oo uu
kala hadlay sidii loo xoojin lahaa Nabadgelyada Gobalka Banaadir, isagoo sheegay
in Dowladdu u soo guuri doonto Magaalada Muqdisho.
1/1/2007: Waxaa xayiraad lagu soo rogay duulimaadyadii Diyaaradaha ee
K/Soomaaliya, gaar ahaan Garoonka Muqdisho, waxa uuna afhayeenkii Dowladda ee
xiligaasi C/raxmaan Nuur Max’ed (Diinaari) uu sheegay in ulajeedada loo xayiray
duulimaadyada ay tahay sidii ay Dowladdu ula socon lahayd waxyaabaha soo galaya
ama ka baxaya dalka.
2/1/2007: Waxaa la qabsaday Magaalada Kismaayo, waxaana isla xiligaasi ka baxay
Magaalada Kismaayo Sheekh Shariif iyo Mas’uuliyiin kale oo uu hogaaminayey, hase
yeeshee maalinkaas subaxnimadeedii ayaa Sheekh waxa uu salaaddii Iidul-Adxaa
kula dukatay dadweyne aad u fara badan, waxa uuna ku wargeliyey in la iska
difaaco caddowga Itoobiya, waxayna ciidamadii Maxaakiimta u dhaqaaqeen dhanka
xuduuda u dhexeysa Soomaaliya iyo Kenya, hase yeeshee ciidamada Itoobiya ayaan
ka harin, waxayna dagaal la galeen ciidamada Maxaakiimta, waxayna ciidamada
Itoobiya xiligaasi ay garab ka helayeen Diyaaradaha Milatariga Mareykanka duqeyn
u gaysanayey ciidankii Maxaaiimta oo iyagu ku jiray Hawd-ka Gudhaa.
4/1/2007: Waxaa Muqdisho soo gaaray Muuse Suudi Yalaxow oo ka mid ahaa
Hogaamiyaashii sameystay Isbahaysigii la dagaalanka Argagixisada, waxa uuna
Muuse ka yimid wadanka Malaysia oo uu ku noolaa, waxaana garoonka ku soo
dhaweeyey dadweyne fara badan, waxa uuna sheegay in hubkiisa uu ku wareejiyey
Dowladda Federaalka.
4/1/2007: Salaad Cali Jeele ayaa ku baaqay in Hubka la wareejiyo, waxaana
shacabka Gobalka Banaadir loo qabtay mudo saddex maalmood ah, hase yeeshee
Dowladda way ku adkaatay in ay hubkaasi uruuriso, waxayna dadweynaha qaar
sheegeen in aysan hubkooda ku wareejin doonin Beel gaar ah.
4/1/2007: Xuseen Caydiid ayaa sheegay in Itoobiya iyo Soomaaliya
xuduudahooda la
isku furi
doono, isla markaana ay yeelan doonaan hal Baasaboor, hal Ciidan, waxa uuna
sheegay in la baabi’iyey xuduudii Soomaaliya ay la lahayd Itoobiya, waxaana
arrintaani si weyn uga carooday shacabka Soomaaliyeed, kuwaas oo qaarkood ku
muujiyey caradooda banaanbaxyo, hase yeeshee Xuseen Caydiid mar dambe ayuu
beeniyey hadalkaasi, isagoo sheegay in uu ula jeeday in Afrika Midowdo.
10/1/2007: Waxaa kulmay C/llaahi Yuusuf iyo C/qaasim Salaad Xasan oo ay isla soo
qaadeen arrimo la xiriira xaaladda Magaalada Muqdisho, waxa uuna C/llaahi Yuusuf
sheegay in C/qaasim uu yaya nin Odey ah oo aan looga maarmin arrimaha Gobalka
Banaadir, waxa uuna C/qaasim siiyey C/llalahi Yuusuf talooyin ku aadan arrimaha
Magaalada Muqdisho.
19/1/2007: Madaafiic ayaa lala beegsaday Villa Somalila, waana markii ugu
horeysay oo Villa Somalia lala dhaco Madaafiic tan iyo markii ay Dowladdu soo
gaartay Magaalada Muqdisho, waxayna madaafiicdaasi keeneen in Madaxweynaha DFKMG
C/llaahi Yuusuf uu amaankiisa qalqal galo, waxayna wararka qaar sheegeen in
C/llaahi Yuusuf loola carary dhanka Dekedda weyn ee Muqdisho oo ay ku
xooganaayeen Ciidamada Itoobiya.
20/1/2007: Maxaabiis u badan Oromo ayaa laga soo dejiyey Garoonka Muqdisho,
kuwaa oo ay tiradoodu gaareysay 43 ruux, isla markaana Indhaha iyo Gacmaha ka
xiran ayaa laga keenay dalka Kenya, waxaana maalinkii xigay Maxaabiistaasi loo
qaaday dalka Itoobiya, waxaana ku jiray Maxaabiis u dhalatay wadamo kale oo aan
Oromo aheyn, waxaana arrintaasi si weyn uga carooday shacabka Soomaaliyeed ee ku
nool dalka Kenya oo Dowladda Kenya ku tilmaamay Dowlad u shaqeyneysa caddowga
Ummadda Soomaaliyeed ee Itoobiya, sidoo kale Hay’adaha Xaquuqda Aadanaha ayaa
cambaareeyey maxaabiistaasi loo gudbiyey dalka Kenya oo ku tilmaamay mid ka
baxsan Sharciyadda Caalamiga ah.
20/1/2007: Max’ed Dheere ayaa 25 Tikniko ah ku wareejiyey Dowladda Federaalka,
waxa uuna sheegay in wixii haatan ka dambeeya la shaqeyn doono Dowladda
Federaalka, hase yeeshee hogaamiye kooxeedyo kale oo ay ka mid yihiin Max’ed
Qanyare Afrax iyo Muuse Suudi ayaa iyana hubkoodii ku wareejiyey ciidamada
Dowladda Federaalka, sidoo kale Madaxweynaha Dowladda Federaalka C/llaalhi
Yuusuf ayaa isna kulamo la yeeshay Hogaamiye kooxeeyadii, isagoo ka dalbaday in
ay Dowladda la sha qeeyaan.
30/12/2007: Waxaa la soo gebagabeeyey dagaalkii Ciidamada Mareykanku ka waday
Koonfurta Soomaaliya, waxa uuna sheegay Mareykanku wax uu ugu yeeray kooxihii
argagixisada ahaa ee ku dhumaaleysanayey Koonfurta Soomaaliya, hase yeeshee
Ciidamada Mareykanku waxay duqeeyeen tuulooyin fara badan oo ay ku dhinteen dad
Soomaali ah oo xoolo dhaqato ah, sidoo kalana Diyaaradaha Mareykanku waxay
duqeeyaan xoolo fara badan, iyadoo Taleefishinada laga daawanayey Kumanaan Xoolo
Soomaaliyeed oo daadsan deegaanadaasi.
February
1/2/2007: Waxaa Nayroobi lagu xiray Xaaji Abuukar Cumar Caddaani, oo ka mid ahaa
maalgeliyayaashii Maxaakiimta Islaamiga, waxayna Dowladda Kenya sheegtay in
Abuukar la soo taagi doono Maxkamad kadib markii lagu eedeeyey in uu si sharci
daro ah ku soo galay, waxaana dhowr jeer Taleefishinada Caalamka la arkay,
iyadoo wiilkiisu ku riixayo Gawaarida lagu riixo dadka cuuryaamiinta ah, waxaana
la arkayey isagoo ka doodaya Maxkamadda horteeda, waxa uuna sheegay in Dowladda
Kenya ku haysato qalad, waxaase dadaal dheer u galay muslimiinta ku nool
dalkaasi Kenya oo aaqirkii ku guuleystay in la siiyo daayo Xaajiga, mar la
wareystayna waxa uu sheegy in uu sii wadi doono halganka uu kula jiro ciidamada
Itoobiya oo uu sheegay in ay qabsadeen dalka Soomaaliya
6/2/2007: Siyaasiin, Waxgarad iyo Ganacsato ka tirsan Beesha Cayr ayaa
Adis-Ababa kulan kula yeelatay Meles Zenawi, waxayna isla soo qaadeen Xaalada
Soomaaliya, waxa uuna Meles Zenawi ka codsaday Beesha in ay gacan siiyaan
Dowladda Federaalka, hase yeeshee Max’uud Max’ed Culusow oo ah Guddoomiyaha
siyaasadda Beesha Cayr ayaa waxa uu sheegay in dhowr shuruudood ay hor dhigeen
Meles Zenawi, hase yeeshee shuuradahaasi ma noqon kuwo ay wax ka fuleen.
6/2/2007: C/llaahi Yuusuf ayaa sheegay in uusan la kulmi doonin "Qunyaru Socod
iyo Xagjir"
toona mar wax laga weydiiyey in uu la kulmayo Maxaakiimta Islaamiga ah, waxa
uuna Maxaakiimta Islaamiga ku tilmaamay kooxo argagixiso ah oo aan sinaba
Dowladdu ula kulmi Karin, waxaana xiligaasi la hadal hayey in Dowladda
Mareykanka dooneyso in ay wada hadal siiso, mas’uuliyiinta Maxaakiimta kuwooda
qunyaru socodka ah iyo Dowladda Federaalka.
7/2/2007: Cali Max’ed Geedi ayaa isku shaadheyn ku sameeyey Golihiisa Wasiirada,
waxaana isku shaadheyntaasi xilalkoodii ku waayey Wasiiro fara badan oo uu ka
mid ahaa Wasiirkii Caafimaadka C/casiis Sheekh Yuusuf oo ay si aad ah isugu
dhawaayeen C/llaahi Yuusuf, waxaana lagu bedelay gabar ay C/casiis si aad ah
isugu dhaw yihiin oo lagu magacaabo Qamar Aadan Cumar.
8/2/2007: Sheekh Shariif ayaa Kenya iska dhiibay, iyadoo mudo la hadal hayey in
Sheekh Shariif uu ku sugan gudaha dalka Kenya, hase yeeshee Sheekh Shariif waxa
uu beeniyey in isku dhiibay ciidamada wadanka Kenya, hase yeeshee safiirka
Mareykanka u fadhiya Kenya ayaa waxa uu sheegay in Sheekh Shariif lagu hayo meel
gaar ah sida ugu dhaqsiyaha baddana kulan ula yeelan doonaan.
9/2/2007: Ciidamada Itoobiya ayaa ka soo baxay Kismaayo oo ay mudo bil iyo dhowr
ku sugnaa, waxayna weeraro kaga imaanayeen kooxaha ka soo horjeeda joogitaanka
Ciidamada Itoobiya, waxayna markii dambe Ciidamada Itoobiya isugu soo uruureen
Degmada Jilib, waxaana Kismaayo la wareegay Ciidamo ka tirsan Dowladda
Federaalka oo uu hogaaminayey Taliyaha Guutada Koowaad Col. C/risaaq Af-guduud.
10/2/2007: Bam ayaa lagu qarxiyey Saraakiil ku sugnaa Kismaayo, waxaana
dhaawacyo ka soo gaareen Saraakiil u badneed Beesha Mareexaan, hase yeeshee
kulan ay isugu yimaadeen Odoyaasha Mareexaan waxay bamkaasi ku eedeeyeen in uu
ka dambeeyey Col. C/risaaq Afguduud, isla markaana laga soo maleegay Magaalada
Muqdisho, iyadoo saraakiishii ku dhaawacantay loo qaaday Magaalada Adis-Ababa.
11/2/2007: Ciidamada Dowladda Federaalka ayaa galay Dugsi Qur’aan oo ku yaala
Xaafadda Buula-Xuubay, waxayna halkaasi ka wateen Macallinkii Dugsi Qur’aanka,
waxaana arrintaani si weyn uga carooday dadweynaha deegaanka oo sheegay in
Ciidamada Itoobiya ay wadaan falal ka dhan ah Diinta Islaamka.
12/2/2007: Waxaa la furay Laanta Afka Soomaaliga ee Idaacadda Codka
Maraykanka -VOA, oo ah
Idaacad ku hadashada Af-Soomaaliga, waxayna wareysigii ugu horeeyey la yeelatay
Madaxweynaha Dowladda Federalka C/llaahi Yuusuf oo la weydiiyey sida uu arko
Idaacadda, waxa uuna yiri "Haddii aysan noqoneyn sida BBC-da waan soo
dhaweynayaa"
13/2/2007: Waxaa Baydhabo soo gaaray Wasiirka arrimaha dibadda Itoobiya Siyuum
Musfin oo xiligaasi u yimid sidii uu u dhameyn lahaa khilaafyo yar yar oo u
dhexeeyey Madaxweynaha DFKMG C/llaahi Yuusuf iyo Ra’isul Wasaare Cali Max’ed oo iyagu
isku haystay arrimo la xiriir dhinaca maamulka, waxaana madaxweynaha iyo Ra’isul
Wasaaruhu aqbaleen talooyinkii uu u soo jeediyey Wasiirka Arrimaha Dibadda ee
Itoobiya.
14/2/2007: Sheekh Shariif ayaa Magaalada Sanca ee dalka Yemen kula kulmay Xubno
Maxaakiimta ka tirsan, waxayna isla soo qaaday Xaaladda dalka, waxa uuna Sheekh
Shariif safarkii dhulka ahaa ee uu ku tagay dalka Kenya, waxa uuna mar kale ku
celiyey in ay sii wadi doonaan dagaalka inta ciidamada Itoobiya ka baxayaan
gudaha dalka Soomaaliya, waxaana xiligaasi burburay qorshe ay waday Dowladd
Mareykanka ee ahaa in ay kulansiiyo Sheekh Shariif iyo Madaxda Dowladda.
15/2/2007: Gacma Dheere oo sheegay in Ciidamada Itoobiya ku saxsan yihiin in ay
madaafiic
ku garaacaan Magaalada Muqdisho, taasina waxay ka careysiisay Bulshada
Soomaaliyeed ee ku nool Magaalad Muqdisho oo ku tilmaamay Gacma Dheere mid aan
ka naxeyn Bulshada Soomaaliyeed.
15/2/2007: Dowladda Mareykanka ayaa walaac ka muujisay xasuuq lagu hayey Oromada
qaxootiga ku ah Magaalada Muqdisho kadib markii ay soo ifbaxeen dilal fara badan
oo ay Ciidamo ka tirsan Dowladda Federaalka kula kaceen Oromada Muqdisho ku
nooleed, isla markaana qaarkood gacanta loo geliyey taliska Dowladda Itoobiya.
24/2/2007: Sheekh Shariif oo qadka Taleefanka kula hadlay Jaaliyadda
Soomaaliyeed ee dalka
Switzerland oo xilgaasi isugu timid klan balaaran, waxa uuna mar kale kula
dardaarmay in ay u diyaar garoobaan sidii ay dhaqaale ugu bixinlahaayeen sidii
dalka looga saari lahaa ciidamada Itoobiya oo uu sheegay in ay dalka ka wadaan
Xasuuq baahsan, Barakicin iyo Kufsi.
27/2/2007: Waxaa Muqdisho soo gaaray wafdi ka socday K/Afrika, oo isgoo u yimid
sidii uu wax uga ogaan lahaa xaaladda nabadgelyo ee Magaalada Muqdisho, maadaama
Dowladda Koonfur Afrika lagu tirinayey dowladaha doonaya inay ciidamo u soo
diraan Soomaaliya, hase yeeshee Wasiirka arrimaha dibadda ee K/ Afrika ayaa waxa
uu sheegay in aysan marnaba Soomaaliya u diri doonin ciidamo, tan iyo inta ay
iska bedeleyso xaaladda Soomaliy...
Akhri Qaybta 2aad....
W/DAmiinYuusuf Khasaaro
E-Mail amiinkhasaaro@hotmail.com
Faafin: SomaliTalk.com | Dec 19, 2007
| 
Daabaco
Boggan | Print
Eng.
Xuseen Maxamed Faarax Caydiid:Webiyada Jubba iyo Shabeelle waxay ki
yimaadaan Itoobiya, waxaana isku dari doonaa xadka labada dal: DHEGEYO