Wararkii June 24, 2006
-
C/llaahi Yuusuf “Waxaan
ballanqaadeynaa in aanu fulino..”
-
Jaamacadda Carabta oo ballanqaaday in
ay Soomaaliya…
-
Ciidamada Puntland ee ku
sugan Gobalada Baay iyo Bakool oo loo digay …
-
Mareykanka oo soo dhaweeyay heshiiskii..
-
Banaanbax looga soo horjeedo Ciidamo…
-
Salaad Cali Jeele “Dilkii Weriyaha waxaa ka..”
-
Baabuur gumaysiga lagaga
gubay Balliga Marsin.
C/llaahi Yuusuf “Waxaan
ballanqaadeynaa in aanu fulino..”
Madaxweyana DFKMGS Cabdilahi
Yusuf Axmed oo saxaafada la hadlayey kadib markii ay DFKMS iyo Maxaakimta
Islaamiga ah qalinka ku duugeen heshiis horu dhac ah oo ka koobnaa 7 qodob ayaa
sheegay in dawladiisu ay dhaqan gelinayso heshiiska Khartoum.Waxaana uu sheegay
in dawlada federalka ku meel gaarka ah ee Somaliya ay tahay dawlad dib u
heshiisiin Qaran aysan ahayn dawlad dagaal ama dadka kala fogaynaysa isla
markana ay ku hawlan tahay sidii ay u midayn lahayd Somalida oo dhan.
Waxaa madaxweyne Cabdilahi Yusuf
Axmed uu sidoo kale ugu baaqay Maxaakimta Islaamiga ah in ay iyaguna dhaqan
geliyaan heshiiskii Khartoum. Waxaana uu intaa ku daray in Somalida oo dhan laga
doonayo in ay ku cibri qaatan dhacdooyinkii hore ,ayna ka fogeeyan shacabkooda
dagaalo hor leh si dib loogu soo celiyo Somaliya qaranimadii ayna noqoto mid
xoog leh. Waxaa ugu dambayntii uu madaxweynuhu mahadnaq balaaran u jeediyay
Madaxweynaha dalka Sudan Cumar Al-bashir iyo shacabka reer Sudan kuwasoo iyagu
keenay in Khartoum lagu gaaro heshiiskan. Waxaa sidoo kale uu madaxweyne
Cabdilahi Yusuf u amaanay kaalinta J/carabtu iyo xogha yaheeda Guud ay ka
qaateen xaqiijinta heshiiskan.
Dhinaca kale Midowga Maxaakiimta
Islaamiga ah ayaa waxay sheegeen in ay iyana ay dhinacooda ka fulin doonaan
heshiiskaasi si loo helo dowlad Soomaaliyeed, oo dalka ka badbaadisa dhibaatada
iyo nabadgelyada xumada, iyadoo Guddoomiyaha Midowga Maxaakiimta Islaamiga ah
mar uu ka hadlayay xaflad lagu soo gebagabeynayay sanad dugsiyeedkii 2005-2006
waxa uu sheegay in Midowga Maxaakiimta Islaamiga ah ay dib u uruurin doonaan
ciidamadii xoogga dalka Soomaaliyeed iyo Booliiska si ay uga qayb-qaataan
nabadgelyada iyo xasiloonada Magaalada Muqdisho.
Jaamacadda Carabta oo ballanqaaday in ay
Soomaaliya…
Xoghayaha guud ee Jaamacadda
Carabta Caamir Muusaa oo isagu soo qaban-qaabiyay heshiiskii dhex maray Dowladda
Federaalka iyo Midowga Maxaakiimta Islaamiga ah ee ka dhacay dalka Suudaan ayaa
waxa uu sheegay Xoghayuhu in Jaamacadda Carabta ay Soomaaliya ka kaalmeyn doonto
dib u dhiska dalka iyo dib soo celinta adeegyadii bulshada iyo waliba sidii dib
loogu soo nooleyn lahaa kaabayaashii Dowladda ee ku burburay dagaalada sokeeye.
Caamir Muusaa waxa uu sheegay in
maalmaha soo socda dalka Soomaaliya ay Jaamacada Carabtu u soo diro kaalmo, si
gacan loo siiyo dadkii ay abaaruhu waxyeeleeyeen iyo kuwii dhibaatadu ka soo
gaartay dagaaladii dhex maray Midowga Maxaakiimta iyo Isbahaysigii la dagaalanka
Argagixisada.
Jaamacadda Carabta waa markii
ugu horeysay oo kaalmo noocaan ah ay u ballanqaado Soomaaliya, sidoo kale Beesha
Caalamka ayaa iyana ballanqaaday in ay gargaar la soo gaari doonaan dadkii ku
waxyeeloobay dagaaladii ka dhacay Soomaaliya afartii bilood ee la soo dhaafay
kana dhacay Magaalooyinka Muqdisho, Balacad iyo Jowhar.
Ciidamada Puntland ee ku
sugan Gobalada Baay iyo Bakool oo loo digay …
Wararka naga soo gaaraya Magaalada Baydhabo
waxay sheegayaan in Magaalada Baydhabo habeen hore lagu daadiyay qoraalo looga
dalbanayo ciidamada Puntland in ay isaga baxaan gobalada Baay iyo Bakool, kadib
markii gobaladaasi ku dileen dad fara badan, waxana ugu dambeeyay dilkii loo
gaystay dad rakaab ah oo saarnaa Gaari u socday deegaanka Iidaale laguna
rasaaseeyay agagaarka Manaas halkaas oo lagu dilay labo qof oo rayid ah saddex
kalana lagu dhaawacay.
Warqadahaan oo isugu jiray soo jeedin iyo
hanjabaad ayaa waxaa la sheegay in ay daadiyeen urur isku magacaabay
dhallinyarada gobalada Bay iyo Bakool, hase yeeshee afhayeen u hadlay Dowladda
Federaalka waxa uu sheegay in gacnata lagu soo dhigay raggii ka dambeeyay dilkii
loo gaystay dadkii rakaabka ahaa ee saarnaa Gaariga.
Mareykanka oo soo dhaweeyay heshiiskii..
Waxa maalintii khamiista ahayd dalka Suudaan
ka dhacay heshiis dhex maray Midowga Maxaakiimta Islaamiga ah iyo Dowlada
Federaalka, heshiis-kaasi ayaa si weyn looga soo dhaweeyay caalamka iyo waliba
Soomaaliya, waxaana ugu muhiimsanaa Dowladda Mareykanka oo sheegtay in
heshiiskaasi uu wax ka tarayo sidii Soomaaliya ay nabad waarta uga dhici lahayd
isla markaana ay u shaqeyn lahayd Dowladda Federaalka oo iyadu weli aan helin
goob rasmi ah oo ay ku shaqeysto.
Heeshiiskaan ayay Dowladda mareykanku
sheegtay in loo baahan yahay in labada dhinac ay si weyn uga dhabeeyaan taasoo
lagu gaari karo in Soomaaliya ay dib u soo ceshato qarannimadeedii.
Dhinaca kale xoghayaha guud ee Qaramada
Midoobey xoghayaheeda guud Kofi Annan ayaa si weyn u soo dhaweeyay heshiiskaasi
kuna tilmaamay mid ka shaqeynaya in Soomaaliya ay mar kale ka dhex muuqato
beesha Caalamka, waxa uuna u soo jeediyay labada dhinac ee heshiiska gaaray in
ay si ficil ah uga shaqeeyaan heshiiskaasi, isla markaana uu deg deg u dhex maro
is fahan, si ay u soo noqoto amarkii iyo kala dambeyntii, waxaa kaloo
heshiiskaani soo dhaweeyay Jaamacadda Carabta oo iyadu ahayd middii soo
qabanqaabisay heshiiskaasi.
Banaanbax looga soo horjeedo Ciidamo…
Maalintii shalay ahayd ayaa fagaaraha
Tarabuunka ee Magaalada Muqdisho salaaddii jimaca kadib isugu soo baxay dadweyne
aad u fara badan kuwaas oo ka soo horjeeday in Soomaaliya la keeno ciidamo
shisheeye.
Intii uu socday banaanaxu aysanna bilaaban
khudbaduhu ayaa waxaa halkaasi lagu dilay nin ka tirsanaa Taleefishinka Channel
Four ee dalka Ingiriiska, waxa uuna dhasho ahaan ka soo jeeday Wadanka Sweden,
dilkaas markii uu dhacay ayaa dadweynihii isugu soo baxay banaanbaxa waxay
bilaabeen in ay kala firxadaan, iyadoo Mas’uuliyiintii Midowga Maxaakiimta ee
halkaasi ku sugneyd, ayaa waxay dilkaasi ku tilmaameen mid la doonayo in lagu
xumeeyo ama lagu hor istaago guulaha ay gaareen Midowga Maxaakiimta Islaamiga ah
iyo in Caalamka loo muujiyo in Muqdisho ay tahay meel nabadgelyadeedu ay aad u
xun tahay, si dalka loo keeno ciidamo shisheey.
Banaanbaxa dadkii ka qaybgalay ayay waxay
halkaasi ku gubeen calanka Itoobiya, iyadoo dadku ay ku dhawaaqayeen “Itoobiya
dalkeena u ogolaanmeyno, hadii ay soo gashana waxaan ballanqaadeynaa in aanu la
jihaadeyno”.
Salaad Cali Jeele “Dilkii Weriyaha waxaa ka..”
Salaad Cali Jeele oo ah Wasiir ku xigeenka
war-faafinta ee Dowladda Federaalka ayaa mar uu u waramayay warbaahinta waxa uu
ka hadlay dilkii maalintii shalay ahayd loo gaystay Weriyihii u shaqeynayay
Channel4 una dhashay Wadanka Sweden, waxa uuna Salaad Cali Jeele sheegay in
dilkaasi uu ahaa mid la soo qorsheeyay ayna ka dambeeyeen wax uu ugu yeeray
kooxo Argagixiso ah, balse farta kuma uusan fiiqin waxa ay cidda ay ahaayeen.
Salaad waxa uu sheegay in Soomaaliya ay ku
sugan yihiin Kooxo Argagixiso oo aan dooneyn in Soomaaliya ay nabad heshos. Hase
yeeshee ma ahan markii ugu horeysay oo Weriye Ajnabi ah lagu dilo Magaalada
Muqdisho intii ishaysigu u dhexeeyay Dowadda Federaalka kuna kala sugneyd
Muqdisho iyo Johwar ayaa waxaa lagu dilay magaalada Muqdisho Gabar Weriye ah oo
ka tirsaneyd BBC-da, waxaana lagu hor dilay Hotel Saxafi, dilkeedana waxaa la
isku tuurtuuray labada dhinacd, sidoo kale Dowladdii Carta markii ay dalka ku
sugneyd ayaa waxaa Magaalada Muqdisho lagu dilay nin Jeneral ah oo la oran
Yuusuf Tallan.
Isku soo duuboo dhamaan dilalkaasi waxa ay
ahaayeen kuwo la xiriirinayay arrimo siyaasadeed maadaama xiliyadii dilalkaasi
dhacayeen ay dalka isaga soo horjeedeen kooxaha siyaadda, ilaa iyo haataanna ma
jirto dad loo qabtay dadkii ka dambeeyay dilkaasi, xitaa ma jiraa wax baaritaan
ah oo lagu sameeyay dhacdooyikaasi.
Jens Assur:
"Soomaaliya waxey kamid tahay meelaha lugu ugaarsado warfidiyeenada"
W/D Amiin Yuusuf Khasaaro
E-Mail amiinkhasaaro@hotmail.com
Faafin: SomaliTalk.com | June 24, 2006
Barnaamijkii Radio Xoriyo
23 Jun 2006
Baabuur gumaysiga lagaga
gubay Balliga Marsin.
JWXO oo baaq ka soo
saartay qorshe gumaysigu dadka kaga rarayo deegaannadooda.
Ciidammada gumaysiga oo
gubay Sasabane dadna ku xidhxidhay.
Heshiis dhexmaray
maxakimta islamiga ah iyo dawlada ku meelgadhka ah.
G/Xigeenka Jaaliyada
Ogadenya ee Switzerland oo aan ka waraysanay banaanbixii ay ku hor qabteen
xarunta qaramada midoobay(Maqal).
Xubin Jwxo ah oo tuugo
budhcad ah ku dhaawacday wadanka K/Afrika(Maqal).
======================
Wariyaha RX uga soo warrama
dalka Ogaadeenya ayaa noo soo sheeegay in baabuur Uuraal ah ciidammada
gumaysiga Itoobiya lagaga gubay Balliga Marsin.
Wariyuhu wuxuu noo soo
sheegay in markii ay taariikhdu ahayd 19/06/06 ciidammada gumaysiga Itoobiya
baabuur Uuraal ah lagaga gubay Balliga Marsin, iyadoo ay halkaas ku bas-beeleen
baabuurkaas iyo wixii saarnaa oo dhan.
Baabuurkan ayaa waday
ciidammo gumaysiga ka mid ah oo hawlgal u socday, hase yeeshee ciidammada
geesiyiinta ah ee xoreynta Ogaadeenya ayaa halkaas ku baabi’iyay, qaabkaasna
ku baajiyay hawlgalkii ay u socdeen.
Wariyuhu wuxuu kaloo noo soo
sheegay in markii ay taariikhdu ahayd 17/06/06 uu dagaal ku dhexmaray
ciidammada xoreynta Ogaadeenya iyo kuwa gumaystada Itoobiya meel u dhaxaysa
Fidaale iyo Banyare. Waxaa ciidammada cadowga halkaas lagaga dilay 5 askari,
3 kalana waa lagaga dhaawacay.
JWXO oo baaq ka soo
saartay qorshe gumaysigu dadka kaga rarayo deegaannadooda.
Ciidammada gumayiga Itoobiya
ayaa billaabay qorshe aad u xun oo dadwaynaha Ogaadeenya si qasab loogaga
rarayo qaar ka mid ah deegaannada ay degaan. Qorshahan ayuu gumaysigu uga
jeedaa sidii uu dadwaynaha u xakamayn lahaa, isla markaana dhaqdhaqaaqooda u
koobi lahaa.
Qorshahan waxaa hadda lagu
fuliyay dadwaynihii ku dhaqnaa deegaannada u dhexeeya Abaaqorrow,
Qarri-jiqood iyo Iimey, kuwaasoo dhammaantood laga soo raray meelihii ay
degganaayeen, la isuguna keenay Banyare, oo degmada Iimey ka tirsan.
Dadwaynahan, oo xoog lagaga
soo raray meelihii ay degganaayeen, waxaa laga gubay aqalladoodii, si ayna
dib ugu noqonin. Wuxuu sidoo kale gumaysigu dilay 16 nin oo ka mid ah dadkii
deegaannadii degganaa.
Dadkan wuxuu gumaysigu ka
soo raray dhul-daaqeenkii ay degganaayeen, wuxuuna isugu keenay deegaan
kooban oon lahayn daaqsin xoolaad oo ku fillaan karta, sidaas darteed waxaa
dadwayhahan iyo xolohoodiiba la soo deristay xaalad aad u qallafsan, haddii
ayna xaaladdan si degdeg ah uga bixina waxaa ku soo fool-leh xaalad
bani’aadamnimo oo aad u xun.
Sidaas darteed waxay
Jabhadda Waddaniga Xoreynta Ogaadeenya JWXO ugu baaqday dunida in dadkaas
loo gurmado oo arrintooda wax laga qabto intayna talo faraha ka bixin.
Waxay sidoo kale JWXO beesha
caalamka ka codsatay in xukuumadda Itoobiya lagu cadaadiyo inay dadwaynahaas
oodda ka qaado oo u oggolaato inay deggaannadoodii ku laabtaan, isla
markaana ay joojiso qorshayaasha noocanoo kale ee ay ku cadaadinayso
dadwaynaha Ogaadeenya.
Ciidammada gumaysiga oo
gubay Sasabane dadna ku xidhxidhay.
Ciidammada gumaysiga
Itoobiya ayaa gubay tuulada Sasabane, isla markaana ku xidhxidhay dadwayne
rayad ah oon waxba galabsanin.
Ciidammo badan oo gumaysigu
leeyahay ayaa weeraray tuulada Sasabane, wax yar ka dib markii tuulada
duleedkeeda lagaga gubay labo baabuur oo Uuraal ah oo ay ku dhinteen ugu
yaraan 120 askari.
Ciidammadan ayaa markaas ka
dib ku gaydhaday dadawynaha rayadka ah een waxba galabsanin, waxayna dab
qabadsiiyeen tuulada. Waxay sidoo kale tuulada Sasabane kala tageen 17 qof
oo rayad ah, kuwaasoo aan ilaa iyo hadda la garanaynin meesha ay ku
denbeeyaan.
Dhinaca kale magaalada
Awaare waxaa toddobaadkii hore ka baxay toban qof oo isugu jira dhalinyaro
iyo odayaal deegaankaas magac ku lahaa, kuwaasoo ku biiray ciidammada
qalabka sida ee JWXO. Dadkan ayaa magaalada Awaare ka baxay oo ku biiray
ciidammada qalabka sida, ka dib markii ay u adkaysan kari waayeen dhibaatada
uu gumaysigu iyaga iyo dadkooda ku hayo.
Hal toddobaad oo kaliya ayaa
laga joogaa markii ay 21 qof sidanoo kale uga baxeen magaalada Xamaro oo ku
biireen ciidammada qalabka side ee xoreynta Ogaadeenya.
Heshiis dhexmaray
maxaakimta islaamiga ah iyo dawlada ku meelgaadhka ah.
Dawlada ku meelgaadhka ah ee
Soomaaliya iyo Maxkamadaha Islaamiga ah ee awoodda ku qabsaday magaalada
Muqdisho iyo nawaaxigeeda ayaa heshiis ku dhexmaray magaalada Khartuum ee
dalka Suudaan. Heshiiskan ayaa dhigaya in Maxkamadaha Islaamiga ahi ay
aqoonsadaan dawlada ku meelgaadhka ah, iyo in dawlada ku meelgaadhka ah ay
iyaduna dhinaceeda aqoonsato xaaladda siyaasadeed ee cusub ee Soomaaliya ka
dhalatay intii ay Maxkamaduhu guulaysteen.
Waxay kaloo labada dhinac ku
heshiiyeen in laga fogaado arrin kastoo dagaal keeni karta ama calwin karta
xidhiidhka labada dhinac. Waxaa sidoo kale lagu heshiiyay in maxkamad la
horkeeno denbiilayaasha dagaalka. Ugu denbayntii waxay labada dhinac ee
Maxkamadaha Islaamiga ah iyo dawlada ku meelgaadhka ah isku afgarteenin
badhtamaha bisha soo socota lagu kulmo magaalada Khartuum, si looga
wadahadlo arrimaha siyaasada iyo amniga ee dalka Soomaaliya.
Ergooyin ka socda dawlada ku
meelgaadhka ah iyo Maxkamadaha islaamiga ah ayaa talaadadii tegay magaalada
Khartuum, is ay uga wadahadlaan arrimaha Soomaaliya. Kulankan waxaa
dhedhexaadinaysay Jaamacadda Carabta, oo ay hadda madax ka tahay dawlada
Suudaan.
Heshiiskan ay labada dhinac
isla gaadheen waxaa madashii kulanka ka akhriyay xoghayaha guud ee
Jaamacadda Carabta Camri Muusa, waxaana gobjoog ka ahaa madaxwaynaha Suudaan
Cumar Al-bashiir iyo madaxwaynaha Soomaaliya C/llaahi Yuusuf Axmed.
23 Jun
2006.
Axmed Gaal-Eri
Info@radioxoriyo.com
raadioxoriyo@yahoo.com
Radio Xoriyo waxaad ka dhegaysan kartaa Mawjadda 25 MB ee dhererkeedu yahay
11865 KHZ,iyo internetka Radioxoriyo.com,Ogaden.com Maalmaha Talaadada iyo
Jimcaha 7: 30PM waqtiga Afrikada Bari
Wareegtooyin iyo
Bayaano laga soo saaray Xiritaanka Baarlamanka Puntland
»Wareegto: Xafiiska Gudoonka Golaha Wakiiladda
DGPL.
»Bayaan ka soo Baxay Shacabka Puntland.....
»Xisbiga Ramaas oo Bayaan kasoo saaray Xiritaankii..
»Wareegto: Xafiiska Kusimaha Madaxweynaha Puntland..
Wararka oo dhan ka
akhri halkan.... Guji...
Heshiis Khartuum
ku Dhexmaray Midowga Maxaakiimta Islaamiga iyo DFKMG
Qodobada ay wada saxiixdeen waxaa ka mid ah in maxkamad
la soo taago qabqalayaashii dagaalka, iyo in labada dhinac uu midba kan kale...
Guji...
Waraysiyo Ku Saabsan
Guddoomiyihii Baarlamaanka DGPL oo Xilkii Laqa Qaaday....
iyo Puntland oo ka laabatay Qodob ka mid ah
Heshiiskii ay la galeen shirkadda "Range Resources..."...
Guji....
Jun 21
VOA: Safiirkii USA u
Fadhiyi jirey Itoobiya oo Ka Hadlay Xaalada Cusub ee Soomaaliya & Ciidama
Itoobiya
Ka Dhegeyso VOA::
Halkan
ama
Halkan
TAARIIKH KOOBAN EE ISBEDELADA UGU DAMBEEYEY SOOMAALIYA::: Akhri...: