Barnaamijkii Radio Xoriyo
30 Jun 2006
Ciidammada Itoobiya oo dhoolla-tus ku samaynaya Ogaadeenya.
Eritereya oo si wayn u canbaaraysay Itoobiya iyo Maraykanka.
Baarlamaanka Maraykanka oo Itoobiya cadaadinaya.
Banaanbax ka dhaxay xeryaha qaxootiga ee Dhadhaab-Kenya.
======================
Wararka
ka imanaya gudaha Ogaadeenya ayaa sheegaya in ciidammada gumaysatada
Itoobiya ay dhawaan billaabeen dhoolla-tus ciidan oo ay ku samaynayaan meelo
kala duwan oo Ogaadeenya ka mid ah, gaar ahaan gobollada ku ogog-leh xadka
Soomaaliya. Dhoolla-tuskan ciidan ayaa la sheegayaa inay ka qayb qaadanayaan
diyaaradaha dagaalka noocyadooda kala duwan, sida kuwa qummaatiga u kaca iyo
diyaaradaha Miigga ah.
Diyaaradahan ayaa ilaa iyo toddbaadkii hore ku dul-wareegayay hawada
magaalooyinka waawayn ee Ogaadeenya iyo nawaaxiga xadka dheer ee Ogaadeenya
la wadagto Jamhuuriyadda Soomaaliya.
Dhoolla-tuskan ayaa la filayaa inuu la xidhiidho diyaar garowga ay
xukuumadda gumaysatada Itoobiya ugu jirto sidii ay u weerari lahayd dalka
Soomaaliya. Xukuumadda Itoobiya ayaa toddobaadkan dhexdiisa sheegtay inay
ciidammadeeda heegan galisay, isla markaana diyaar u tahay inay gasho gudaha
Soomaaliya haddii ay isa soo tarto waxa ay ugu yeedhay khatarta Maxkamadaha
Islaamiga ee Soomaaliya.
Xukuumadda Itoobiya ayaa, iyadoo taageero ka haysata dalka Maraykanka, ku
talajirta inay faragalin ciidan ku samayso dalka Soomaaliya, si ay u kala
tuurto fursadaha cusub ee u soo gacan galay dadwaynaha soomaaliyeed oo
markii ugu horraysay muddo 15 sano ah nabad iyo xasillooni ka dareemay dalka
intiisa badan, isla markaana rumaysan in mar dhaw xal siyaasadeed loo hali
doono dhibaatada dalkooda.
Eritereya oo si wayn u canbaaraysay Itoobiya iyo Maraykanka.
Dawlada
Eritereya ayaa arrin aan waxba ka jirin ka soo qaadday beenintii ay
xukuumadda Itoobiya beenisay in ciidammadeedu galeen dalka Soomaaliya,
waxayna sheegtay in faragelinta ay Itoobiya ku hayso dalalka deriska ah ay
quwado waawayni ku taageerayaan.
Sargaal u
hadlay wasaarada arrimaha dibada ee Eritereya ayaa sheegay in dawlada
Maraykanku ay siyaasad gurracan ka wado gobolka Geeska Afrika, isla markaana
ay xukuumadda TPLF u adeegsanayso meel-marinta siyaasadeeda. Sargaalkan ayaa
tilmaamay in hadda la wado dadaallo lagu doonayo in lagu wiiqo ifafaalaha
wanaagsan ee lagu yagleelayo qaranimada Soomaaliya, iyadoo laga shaqaynayo
sidii dalka Soomaaliya mar kale looga hurin lahaa dagaal sokeeye.
Sargaalkan u hadlay wasaarada arrimaha dibada ee Eritereya ayaa sheegay in
xukuumadda TPLF ay oggolaansho ka haysato dalal waawayn, iyadoo loo fasaxay
inay door ka qaadato burburinta fursadaha Soomaaliya u soo baxay. Wuxuu
kaloo intaas raaciyay in arrimahaas taageero siyaasadeed iyo mid dhaqaale
labadaba lagu siiyo.
Sargaalkan ayaa sheegay in dawlada Maraykanku ay mar hore saldhigyo
millatari ka samaysatay dalka Jabuuti iyo galbeedka Itoobiya, iyadoo ku
gabbanaysa qorshayaasheeda ah la dagaallanka argagixisada, balse ujeeddada
dhabta ah ee ciidammadeedaasi u joogaan ay tahay maaraynta qaska laga wado
gobolka Geeska Afrika.
Wuxuu
kaloo intaas ku daray in dawlada Maraykanka oo ku guul darraysatay
siyaasaddii ay ka lahayd gobolka Geeska Afrika, ay hadda isku dayayso inay
gabbaad kale samaysato, iyadoo iska dhigaysa inay ka shaqaynayso
xasilloonida iyo horumarka Soomaaliya.
Sargaalkan u hadlay wasaarada arrimaha dibada ee Eritereya ayaa dalalka kala
duwan iyo ururrada ka jira gobolka Geeska Afrika ugu baqay inay fiiro gaar
ah u lahaadaan arrimaha gobolka ka socda, isla markaana ay ka dhawrsadaan
inay gacan ka gaystaan qorshayaasha kala duwan ee Maraykanku ku damacsan
yahay inuu ku dhibaateeyo dadwaynaha soomaaliyeed, kuna curyaamiyo fursadaha
la taaban kara ee hadda horyaalla bulshada soomaaliyeed.
Baarlamaanka Maraykanka oo Itoobiya cadaadinaya.
Qorshe
lagu cadaadinayo xukuumadda kaligii taliye Meles Zenawi ayuu oggolaaday
Guddiga Xidhiidhka Caalamiga ah ee Baarlamaanka Maraykanka, waxaana
qorshahan xubnaha Baarlamaanka la soo hordhigi doonaa bisha Sebtember, si ay
anisixiyaan. Qorshahan, oo ay ka soo shaqeeyeen labo xubnood oo ka tirsan
Guddiga Xidhiidhka Caalamiga ah ee Baarlamaanka, kuwaasoo ka kala tirsan
labada xisbi ee Republican-ka iyo Democrat, waxaa si wadajir ah u oggolaaday
xubnaha Guddiga oo dhan.
Oggolaanshaha qorshahan ayaa ka dhigan in dawlada Maraykanku ay qaadatay
mawqifkii siyaasadeed ee dalalka Midowga Yurub ay ka qaateen xukuumadda
kaligii taliye Meles Zenawi. Qorshahani wuxuu ka dhigan yahay in Maraykanku
uu qiray in xukuumadda Itoobiya ay si nidaamsan oo bahalnimo ah ula dhaqanto
dadka siyaasadeeda mucaaradka ku ah, isla markaana ay ku tumato xuquuqda
aadanaha iyo inay khatar tahay xaaladda madaxda mucaaradka ah ee xabsiga
sharci darrada ah lagu hayo.
Guddiga
Xidhiidhka Caalamiga ah ee Baarlamaanka Maraykanka ayaa intii aanuu
qorshahan oggolaanin wuxuu dhagaystay warbixin dheer oo ku saabsan siyaasada
kaligii taliye Meles Zenawi, taasoo ay soo jeedisay Ana Gomes, oo ah madaxa
Ergada Midowga Yurub u qaabilsan arrimaha Itoobiya.
Arrintan
ayaa ka dhigan farriin cad oo loo dirayo xukuumadda Itoobiya, taasoo loogu
sheegayo in beesha caalamku ay hal meel uga soo wada-jeeddo oo ay ka
dalbayso inay ixtiraamto xuquuqda aadanaha, isla markaana xadhigga ka sii
dayso madaxda mucaaradka ee xidhxidhan, sidaas waxaa tidhi Elizabeth Nega,
oo ka tirsan dadka qorshahan ka denbeeyay, isla markaana ay walaalo yihiin
Berhanu Nega, oo ah ninkii loo doortay duqa magaalada Addis Ababa oo hadda
ku jira dadka Meles u xidhxidhan.
30 Jun
2006.
Axmed Gaal-Eri
Info@radioxoriyo.com
raadioxoriyo@yahoo.com
Radio Xoriyo waxaad ka dhegaysan kartaa Mawjadda 25 MB ee dhererkeedu yahay
11865 KHZ,iyo internetka Radioxoriyo.com,Ogaden.com Maalmaha Talaadada iyo
Jimcaha 7: 30PM waqtiga Afrikada Bari
Faafin: SomaliTalk.com
| June 30, 2006
Xafladdii Gabagabada Sanad-Dugsiyeedkii 2005-2006 ee
dugsiga Imaam Shaafici...
XAFLADDA KA AKHRI HALKAN......
BOSTON, USA: Wiil Soomaaliyeed oo 19-jir ah oo Toogasho Lagu Diley
Magaalada Boston ee dalka Maraykanka ayaa...
Guji...
Is-bedelkii ka
dhacay Muqdisho oo saameyn ku yeeshay Puntland iyo Soomaaliland..
»Xafladdii
Gabagabada Sanad-Dugsiyeedkii 2005-2006..
»Sheekh Xasan Daahir
Aweys oo sheegay in ay soo..
»Culumaa’u-diin ka
yimid Puntland oo soo gaaray Muqdisho
»C/llaahi Yuusuf oo
warqad qoraal ah u diray Sweden...
»Golaha Guurtida
Hawiye oo Maxaakiimta ka dalbaday in ay..
»Wafdi ka socda SCG
oo gaaray Muqdisho...
»Baabuur badan oo
cadowga meelo kala duwan lagaga gubay.
Wararka oo dhan
ka akhri halkan... Guji... June 27
| 
Daabaco
Boggan | Print
