Senator Coleman oo warqad
dacwo ah oo ku saabsan tacadiga iyo barakaca loo geystay
shacabka Muqdisho gaarsiiyey Jendayi Frazer...
Senator
Coleman ayaa warqad dheer oo kulul u qoray haweenayda
dawladda maraykanka waaxda arrimaha dibadda u qaabilsan
arrimaha Afrika Jandayi Frazer ka dib markii ay xafiiskiisa
cabasho kusaabsan ciidamada Ethiopia ee ku sugan Muqdisho
usoo gudbiyeen xubno ka mid ah hogaamiyeyaasha bulshada
Soomaaliyeed ee Minnesota. Xubnahan Soomaaliyeed ayaa
senatorka ka codsaday sidii lagu yiqiin inuu codkooda iyo
dareenkoodaba gaarsiiyo dawladda weyn ee Washington DC.
Senator Coleman waxaa uu waqaddiisa ku codsaday in dawladda
Maraykanka samayso gurmad bani aadamnimo oo la taageero
dadka barakacay ee aan hoy biyo iyo quudba haysan.
Senatorku waxaa uu warqadiisa ku muujiyey inuu ka wel welsan
yahay amaan darrada iyo cudurada sida shubanka oo ka
dilaacay meelahii loo qaxay gaar ahaan agagaarka xamar.
Senatorka waxaa kale oo uu walaac ka muujiyey xuduuda Kenya
xiritaankeeda dhibaatada uga iman karta dadka ku soo
barakacay degmooyinka Qooqaani, Afmadow, Badhaadhe, Dhoobley,
iyo Libooyi. Senatorku waxaa kale oo uu Jendayi Frazer u
sheegay in uu ka walaacsan yahay ciidamada Ethiopia ee ku
sugan Soomaaliya gaar ahaan Muqdisho iyo madaafiicda aan loo
aabo yeelin ee lagu gaacay shacabka. Senatorku waxaa uu
cadeeyey in ay waqtigan ahayd waqtigii goor hore ciidamada
Ethiopianka lagu bedeli lahaa ciidamo African ah loona
baahan yahay in arrintaas dar dar la geliyo.
Senator Coleman ayaa ku celiyey baaqiisii ahaa in dawladda
maraykanka loo baahan yahay inay la timaado siyaasad hufan
oo dhamaystiran oo ay kaga shaqayso nadadda iyo
deganaanshaha Soomaaliya asagoo qalinka ku duugay inaanay ka
fursanayn in ergey loo magacaabo soomaaliya iyo inuusan ka
daali doonin inuu u ololeeyo nabad iyo deganaasho waarta oo
ka dhalata Soomaaliya.
Warqaddii
Sen. Coleman oo dhamaystiran halkan ka akhri....
Isha warka Xafiiska: Senator Norm Coleman.
Faafin: SomaliTalk.com | April 12, 2007
|