Xalay ayaa qaybo ka mid ah magaalada Muqdisho waxaa
mar qura laga maqlay madaafiic xoogan oo ay ka dambeeyeen rasaas
mudo socotay oo la isweydaarsaday, waxayna madaafiicdii ugu badneyd
xalay ku soo dhacayeen deegaanka Xamar Jadiid, oo ay khasaaro u
gaysteen dad rayid ah.
Madaafiicdaan oo xalay bilowday abaarihii 11:30
habeenimo ayaa waxay warar soo baxaya sheegayaan in ay is
weydaarsanayeen ciidamada Itoobiya ee ku sugan Garoonka weyn ee
Stadium Muqdisho iyo waliba kooxo aan la garaneyn, waxaan deegaanka
xamar jadiid ku dhacay ilaa iyoi 10 madfac, ma jiraan warar si rasmi
ah u faahfaahinay khasaarha rasmiga ah ee dhacay, waxayna sidoo kale
warrku sheegayaan in warshaddii hore ee Tolmada iyan oo fariisin u
ciidamada dowladda Federaalka is rasaaseyn ka dhacday.
Daryahanka madaafiicda iyo rasaaseynta la is
weydaarsanayey ayaa laga maqlayay Magaalada Muqdisho qaybo badan oo
ka mid ah, waxayna tani ku soo beegmeysaa xili uu Magaalad Muqdisho
ka socdo shirka dib u heshiisiinta qaran ee Beelaha Soomaaliyeed uga
socdo magaalada Muqdisho, sidoo kalana waxaa soo badanay weerarada
lala beegsanayo goobaha ay ku sugan yihiin ciidamada Dowladda iyo
kuwa Itoobiya, iyadoo kal hore weerar ba’an Ciidamada dowladda loogu
gaystay deegaanka Al-Baraka iyo xeradii hore ee Kuulwadayaasha
halkas oo ay ku dhinteen qaar ka mid ah ciidamada Dowladda
Federaalka.
1-da Agoosto oo shalay ahayd waxay ku
beegneed sanadguuradii 10-aad ee ka soo wareegtay geeridii Alaha u
naxariistee Gen. Max’ed Faarax Caydiid, waxaana munaasabad lagu
xusayey lagu qabtay magaalada Muqdisho, kaas oo ay ka qaybgaleen
dhamaan qaybaha kaladuwan ee Bulshada iyo taageerayaashii
Isbahaysigii SNA. Ugu horeyn waxaa halkaasi hadalo ka jeediyey
madaxa arrimaha gudaha ee Isbahayisga SNA Cabdi Siyaad Xasan , waxa
uuna sheegay in General Caydiid ahaa geesi ka gaareiyooday umadda
Soomaaliyee, isla markaana uu ahaa nin aad u necbaa caddowga Ummadda
Somaaliyeed.
Cabdi Siyaad waxaa kale oo uu sheegay in
shacabka Soomaaliyeed aysan marnaba hilmaami doonin waxqabadki Gen.
Max’ed Faarax Caydiid, isagoo sheegay in hadii uu maanta joogi lahaa
uusan cadowga Soomaaliyeed marnaba ku soo deg degeen wadanka. Madaxa
arrimaha gudaha ee SNA waxaa kale oo uu sheegay in Isbahaysiga SNA
aysan markasta xusi doonaan Gen. Max’ed Faarax Caydiid, isla
marakana Isbahaysiga SNA uu sii wadi doono dadaalkiisa ku aadan
sidii loo heli lahaa qaran Soomaaliyeed oo isku keenay dhamaan
shacabka Soomaaliyeed. Xafladaan lagu xusayey Gen. Caydiid ayaa
waxaa ka qaybgalayaashii loogu qaybiyey taariikhii Gen. Max’ed
Faarax Caydiid, waxaana kaloo ka hadlay Maxamuud Guure Guuleed oo ah
madaxa Kicinta iyo abaabulka SNA oo isna si aad ah iskula soo
shaqeeyeen Gen. Caydiid.
Markii uu geeriyooday Gen. Caydiid
1996-dii maalmo yar kadib waxaa dalka soo galay caddowga Ummadda
Soomaaliyeed, hase yeeshee taageerayaasha SNA ayaa iyagu aaminsan in
haddii uu Jananku sii joogi lahaa dalka uusan sidaan xaalku ahaan
laheyn. General Caydiid waxyaabaha lagu xasuusto waxaa ka mid ah
markii uu dalka ka saaray Rajiimkii Max’ed Siyaad Barre, sidoo kale
waxaa lagu xasuustaa dagaalkii uu la galay ciidamada Mareykanka,
iyadoo taageerayaasha SNA suurageliyeen in ciidamadii Mareykanka ay
si hal haleel ah uga baxaan dalka Soomaaliya, waxaa kaloo lagu
xasuutaa Gen. Caydiid sameyntii dowladdii sal balaar, oo ay ka soo
qaybgaleen dhamaan beelaha Soomaaliyeed meel kasta oo ay joogaan,
iyadoo madaxdii SNA ee ka qaybgashay xuskaasi ay sheegeen in
xuskaani uusan aheyn mid siyaasadeed balse uu yahay mid lagu xusayey
halyey ka dhintay Ummadda Soomaaliyeed.
W/D; Amiin Yuusuf Khasaaro.
E-Mail:
amiinkhasaaro@hotmail.com
Minneapolis:
Buundo Baaxad Weyn oo Ku Dul Dhacday Webiga Mississippi, Gawaaridiina ay ku
daateen Webiga.... ilaa 7 qof ay ku
dhintay, 20 qof waa la la'yahay, 61 qofna dhaawacmeen..
Akhri
Daabaco Boggan | Print
