W/D:
Amiin Yuusuf Khasaaro
E-Mail
amiinkhasaaro@hotmail.com
Muqdisho, Soomaaliya
Tan iyo markii uu
dhamaaday dagaalkii qaboobaa ee Dunida, kaas oo
ahaa mid u dhexeeyey awoodo isku dheeli tiran oo
ay Dowlado fara badan ka faa’iideen kaddib
markii labadii dhinac oo uu dagaalkaa Qaboobi ka
dhaxeeyey mid waliba ay dooneysay inay hesho
taageero fara badan, balse markii ay meesha ka
baxday mid ka mid ah quwadihii loolanku ka
dhexeeyey ayaa waxaa soo baxay Siyaasad la
yiraahdo Qunyaru-socod oo ah ergey marka aad
fiirisid aad u wanaagsan balse ay ka dambeyso
arrimo fara badan.
Dagaalkii u dhexeeyey Ciraaq iyo Iiraan ee
sanadihii Sideetameeyadii waxaa Aayatullaahi
lagu yiri, Waa Xag-jir, halka Saadaamna lagu
yiri waa qunyaro socod, halkaasna waxaa ka
dhacay dagaal dhaliyey khasaaro naf iyo maalba
leh markii uu dhintay Ayaatullaah ayaa Saadaam
lagu tilmaamay in uu yahay nin Xag-jir ah, waana
la ogaa halkii uu ku dambeeyey Saadaam Xuseen.
Waxaa maalmahan la hadal hayaa in Maxamuud
AxmedNajaad uu yahay nin Xag-jir ah oo madax
adag, waxaana laga yaabaa in Mareykanka iyo
xulafadiisa ay weeraro kaga yimaadaan, Dowladaha
loo isticmaalo ereyga Qunyaru-Socod iyo Xag-jir
aad ayay u fara badan yihiin oo ninkii markaasi
dalka Mareykanka danihiisa ka hor yimaada, waxa
uuna noqonayaa Xagjir ah, kii aan ka hor imaanna
waa lagu oronayaa Qunyaru-Socod oo aad moodaba
in labadaasi erey ay yihiin Miisaan uu
Mareykanku sameystay.
Maalmihii Mareykanku uu galay Dalka Ciraaq uuna
ka saaray Saadaam Xuseen ayaa waxa uu Mareykanku
sheegay in Mukhtada Sadar uu yahay Wadaad
Qunyaru-Socod ah, maanta Mareykanku waxa uu ku
tilmaamaa Sadar in uu yahay nin Xagjir ah, qof
waliba waa uu fahmi karaa ujeedada uu Mareykanku
ka leeyahay arrintaasi oo ah in uu ku baneysto
dagaal uu ku qaado wadadaasi.
Haddii aan u soo laabanayo arrimaha Soomaaliya,
markii Dowladdii Max’ed Siyaad laga saaray dalka,
waxaa la isla lahaa waxay shacabku heli doonaan
dowlad ka wanaagsan tii hore, Mareykanka iyo
Reer Galbeedku waxay bilaabeen in labadii Ruux
ee isaga soo horjeeday Siyaasadda ee ka kala
ahaa Cali Mahdi iyo Caydiid, isla markaana
Caydiid lagu tilmaamay nin Madax-Adag oo xagjir
ah, halka Cali Mahdi lagu tilmaamay in uu yahay
nin Qunyaru-Socod ah, waa la ogaa halkii ay ku
dambeeyeen labadaasi nin iyo wixii kala qabsaday
ee Khasaaro naf iyo maalba leh.
Markii ay yimaadeen Ciidamadii Mareykank uu
horkacayay sanadkii 92-dii, waxa uu Mareykanku
markii hore ku soo galay siyaasad ah in ay gacan
siinayaan dadkii Abaaraha, hase yeeshee waxa uu
waayey cid uu ka hor keeno mid ka mid ah
hogaamiyaashii Siyaasadda ee xiligaasi oo ahaa
Gen. Caydiid, waxa uuna markiiba bilaabay aniga
ayaa Gen. Caydiid soo qabanaya, markii Caydiid
la qaban-waayey oo dad fara badan oo isugu jira
Soomaali iyo Mareykan ku dhinteen ayaa
Mareykanku isaga baxay dalka Soomaaliya.
Markii uu istaagay dagaalkaasi ayaa Si hoose
waxaa loola hadlay Cusmaan Caato oo lagu yiri
waxaa tahay nin Qunyaru-Socod ah, waana ku
garab-taaganahay, waa in aad ninka madaxa adag
ee caydiid meesha ka saartaa, halkaasna waxaa ka
dagaal ay ku naf waayeen Kumanaan qofood, ilaa
iyo haatanna ma jirto cid dib u raacday
khasaarihii dagaalkaasi uu gaystay.
Qabqablayaashii dagaalka ee kala qoqobay Gudaha
dalka Soomaaliya dhibaatana ku yahay shacabka
Soomaaliyeed ayaa markii ay la dagaalameen
Maxaakiimta waxaa Maxaakiimta lagu tilmaamay in
ay yihiin kooxo Qunyaru-Socod, halka
Hogaamiyaasha kooxahana lagu tilmaamay niman
madax adag oo uu dalku ka degi waayey, waxa uuna
Mareykanku sheegay in loo baahnaa in
qab-qablayaasha meesha laga saaro.
Markii Maxaakiimtu ka guuleystay Qabqablayaashii
dagaalka oo ay nabad ku soo dabaaleen Koonfurta
Soomaaliya ayaa waxaa bilaabatay in la furfuro
Maxaakiimtii Islaamiga ahayd lagana qaybgeliyo
shirarar fara badan, waxaa dabadeed dhacday in
Maxaakiimtii oo markii hore Qunyaru-Socodka lagu
tilmaamay in loo soo adeegsado burburintooda
Itoobiya, markii ay ka baxeen Maxaakiimtu
Muqdisho, aynsa soo galeen qabqablayaashii horey
looga awood roonaaday, ayaa Mareykanku waxa uu
bilaabay in uu yiraahdo “Waa in qabqablayaashu
la shaqeeyaan Dowladda Federaalka hubkoodana ku
wareejiyaan, taasina waxay farxad gelisay
bulshada Soomaaliyeed, maadaama ay
qabqablayaashu horey dhibaato ugu gaysteen”.
Haddaba waxaa maalmahan dib u soo laabtay
ereygii Qunyaru-Socod, isagoo u adeegsanaya qaar
ka mid ah Mas’uuliyiintii Maxaakiimta Islaamiga
ah, oo uu ugu horeeyo Sheekh Shariif, waxa uuna
sheegay in loo baahan yahay in xukunka laga
qaybgeliyo raggii qunyaru-Socodka ahaa ee
Maxaakiimta.
Isku soo wada, Qof kasta oo caqli u saaxiibaa
waa uu garan karaa ujeedada uu Mareykanku ka
leeyahay ereyga Qunyaru-Socod, oo marka la soo
duuduubo loola jeedo in Caalamul-Islaami
qalalaase uusa kabixin, gaar ahaan Soomaaliya,
ereyga Qunyaru Socodna waa Mindi labo af leh, oo
uu Mareykanku dhinaca uu doono wax ugu goosto.
W/D: Amiin Yuusuf Khasaaro.
E-Mail:
amiinkhasaaro@hotmail.com
Faafin:
SomaliTalk.com | Jan 24, 2007
EEG BOGGA
ARAGTIDA/MAQAALADA DADWEYNAHA..... GUJI...
Daabaco
Boggan | Print
"waayadii hore soohdinta Itoobiya badda ayay ku
sinnayd, hase ahaatee kolkii ay weydey awood ku filan oo
ay wax isaga caabbido, xoogagga kiristaanka ahina ay wax
kaalmo ah taaran waayeen ayay soohdimahayagii badda
gaarsiisnaan jirey waxay u gacan-galeen quwado muslin
ah" 
Xuseen
Maxamed Faarax Ceydiid Ra'iisul-wasaare K/xigeenka
ahna Wasiirka Arrimaha Gudaha DFKMG ee lagu soo
dhisay Nairobi oo Magaalada Muqdisho dhawr
maalmood kadib markii ay qabsadeen ciidamada
Ethiopia kula hadalyey odayaal dhaqameedyo ayaa
sheegay in la baabi'inayo Xadka Soomaaliya oo
lala midaynayo Ethiopia, oo Hal Ciidan ay
yeelanayaan, Hal dhaqaale yeelanayaan, hal
Baasaboor ay qaadanayaan Soomaalida iyo Itoobiyaanku.
