Alan Johnston muxuu dheeryahay Taysiir Caluuni iyo Sami Al-Xaaji?

amiin W/D: Amiin Yuusuf Khasaaro

Muqdisho, Soomaaliya

Qofku markii yaabo ayuu waxa uu yiraahdaa “Hasha maankeyga gaddayee ma masaar bay liqday”, waxaa kaloo la yiraahdaa “Ma anigaa Waalan mise Cadan ayaa laga heesayaa”, waxaan tusaale uga dhiganayaa markii aan Taleefishinada Caalamka iyo Warbaahinta Adduunka ku mashquuleen siideysmada wariyihii u shaqeynayay British Broadcasting Corpation ee Alan Johnson oo mudo Afar bilood ah ay haysteen koox Falastiiniyiin ah.

Maalin walba intii uu xirnaa waxaa caalamka ka soo yeerayey dhawaaqo lagu dalabanayo in si dhaqsi leh loo sii daayo Alan Johnston, waxaana dhacay banaanbaxyo niyadda kor loogu qaadayo weriyahaasi laguna dalbanayo in xoriyaddiisii dib loogu soo celiyo, waxaana ururka Xamaas lagu cadaadinayey in Weriyahaasi sida ugu dhaqsiyaha badan ku sii daayaan iyadoo la sheegayin weriyahaasi si xaq daro ah lagu haysto.

Inkastoo aan dhihi karo Alan Johnson waa la afduubtay xoriyaddiisiina waa lagu xadgudbay, haddana waxaa jira weriyayaal ku xaquuq ah oo ku xiran wadamada Yurub iyo Ameerika kuwaas oo la dhihi karo si gardaro ah ayay ku xiran yihiin.

Aan soo qaadanayo Taysiir Caluuni waxa uu ahaa weriya ka soo warami jiray goobaha ay ka taagan xasaradaha si la mid ah sida Alan Johnson, wuxuuna Taysiir Caluuni ku xiran yahay xabsi ku yaala dalka Spain, waxaana lagu xakumay 7 sano oo xarig ah, ilaa iyo haatanna cid is weydiisay ama ka damqatay ma jirto, marka laga reebo Taleefishinka Al-jasiira oo uu u shaqeynayay, sidoo kale waxaa gacanka Gutanaama ku xiran Weriye u dhashay wadanka Suudaan oo lagu magacaabo Sami Al-xaaji, oo aan wax Maxkamad ah la soo saarin, iyadoo la sheegay in lagu tuhmay oo keliya in uu la shaqeynayey wax ay Mareykanka iyo Yurub ugu yeeraan argagixisada.

Sii deysamadii Alan Johnson waxaa ka hadlay Ra’isul Wasaaraha wadanka Ingiriiska ee Cusub Gordon Brown iyo Guddoomiyaha baarla-maanka Ingiriiska iyo dhamaan dadka Ingiriiska oo mashxarada ku soo dhaweeeyey, sidoo kale waxaa iyana sii-deysmada Alan Johnson soo dhaweeyey dhamaan wadamada carbeed oo iyagu dadaal u galay in la siiyo ninkaasi, waxaana hadlay madax fara badan oo horkaca wadamada Carbeed oo sheegay in si gardaro ah lagu haystay Alan Johnson, waxayna horey qaarkood wadamadaasi carbeed u ballanqaadeen in ay lacag fara badan bixinayaan si loo sii daayo weriyahaasi.

Iyadoo intaasi oo dhami jiraan ayaa haddana su’aasha isweydiinta mudan tahay sababata ay wadamada carbeed uga hadli la’ yihiin xariga ay xiran yihiin Taysiir Caluuni iyo Sami Al-Xaaji. Mar aan dhawaan ka qaybgalay barnaamij ay soo qaban-qaabisay Taleefishinka Al-jasiirada ayna ka qaybgaleen Hay’adaha xaquuqda Aadanaha ayaa waxaa ka soo qaybgalay ilaa iyo dada gaaraya 20 qofood kuwaas oo ka badin kari waayey in ay cambaareeyaan xariga weriyaashaasi iyagoo banaanbax yar ku dhex qabtay Hoteelkii barnaamijka lagu qabtay, inkastoo ay saareen dhawaaq codsi ah haddana cid dheg jalaq u siisay ma jirto, balse waxaa la dhihi karaa way dadaaleen oo ay wax ka roonaadeen wadamadii Carbeed oo ay ka dhasheen raggaasi oo iyagu xitaa aan isku dayin in ay dhawaaq ku biiriyaan in la sii daayo Taysiir iyo Sami.

Looma Ooyayaasha Taysiir Caluuni iyo Sami Al-Xaaji ayaa iyagu isku haysta inay ka dhasheen tol weyn, waxaanse dhihi karnaa Alan Johnson ayaa ka dhashay tol weyn.

16-kii sano ee Dowladdu la’aantu jirtay ayaa Soomaalida waxaa ku soo kordhay erey cusub oo la yiraahdo “Others” oo ay ula jeedaan dadka aan aarsan Karin marka dhib loo gaysto, waxaase haatan muuqata in Others-ka dhabta ah yihiin Dowladaha Carbeed oo maalin ka gilgilan waayey raggasi ay haystaan wadamada Mareykanka iyo Yurub.

Guntii iyo gebagabadii reer Galbeedka ayaa mar kasta ku celceliya in xaquuqda Weriyaha ay tahay mid sugan oo cid kasta looga baahan yahay inay dhowrto, isla markaana weriyaha qudhiisana ilaaliyo shuruucda saxaafadda , laakiin Reer galbeedka ayaad moodaa in arrintaasi haddaba sidii ay doonaan ka dhigtaan, iyagoo weriyaha ugu marmarsiyooda in uu galay waxyaabo ka baxsan shaqadiisa, halka wariyayaasha dhalasho ahaan ka soo jeeda Reer Galbeedka ee kooxaha Islaamiyiinta ah gacanta ku dhigaan iyagoo ku dhaleecayna in uu qalad ka galeen dhismaha koox ahaantooda ay reer galbeedku si weyn uga soo horjeestaan arrintaasi, haddana su’aasha kor ku xusan waa mid qof kasta oo caqli u saaxiib ah uu garan karo.

W/D: Amiin Yuusuf Khasaaro
e-mail:amiinkhasaaro@hotmail.com

Banaadir iyo Bagdaad: Waxaan maqli jiray dal hebel nabadgelyadiisa faraha ayay ka... Akhri