WARARKII MAY 8, 2006

• C/llaahi Yuusuf “Beesha Caalamka waxay diyaar u tahay inay taageerto Dowladda Federaalka”..

• Eng. Siidow Xasan Mahdi “si ay u kala badbaadaan Mirifle waxaan talo ku soo jeedinayaa..

• Maleeshiyooyinkii Reer Puntland ee ku sugnaa Waajid oo soo gaaray Baydhabo..

• Faarax Sendiko oo shalay dib ugu soo laabtay Muqdisho xili loo diyaar-garoobayo…

• In ka badan Boqol Xubnood oo ka qaybgalaysa Doorashada Xiriirka K/cagta…

• ---

  

  ---

C/llaahi Yuusuf “Beesha Caalamka waxay diyaar u tahay inay taageerto Dowladda Federaalka”..

Madaxweyne C/llaahi Yuusuf Axmed ayaa la filayaa in maalinta Arbacada ah dib ugu soo laabto Magaalada Baydhabo kaddib markii uu booqashooyin ku soo kala bixiyay wadamo ka tirsan Yurub, Carab iyo Afirka. Warkaan oo aan ka helnay rag ku dhow dhow Madaxweyne C/llaahi Yuusuf Axmed ayaa la sheegay in madaxweynuhu uu markii hore u aaday dalka Ingiriiska arrimo caafimaad, kaddibna waxa uu u sii gudbiyay wadanka Sweden halkaas oo uu kula kulmay Mas’uuliyiin ka tirsan Dowladda Sweden iyo Jaaliyadda Soomaaliyeed.

Dowladda uu Madaxwey-naha ka yahay C/llaahi Yuusuf ayaa weli helin xarrun rasmi ah oo ay ku howlgasho, waxayna weli ku jirtaa guur guur iyo waliba si rasmi ah u degin Magaalada Baydhabo, waxaana Madaxweynaha hor yaala Howlo fara badan oo uu ku dhaqaajiyo Dowladdiisa, ha noqoto dhinaca ammaanka iyo dib u soo celinta amnigii iyo kala dambeyntii.

Dhinaca kale Madaxweyne C/llaahi Yuusuf Axmed mar uu la kulmay Mas’uuliyiinta Dowladda Sweden waxay u sheegeen in Dowladda Sweden ay soo dhaweyneyso in Soomaaliya loo diro ciidamo nabad ilaalin ah si ay u sugaan ammaanka isla markaana hubka uga dhigaan kooxaha maleeshiyooyinka ah, waxay kalloo Dowladda Sweden ballanqaaday in ay wax ka bixineyso qarashka ku baxaya Ciidamada nabad ilaalinta.

Eng. Siidow Xasan Mahdi “si ay u kala badbaadaan Mirifle waxaan talo ku soo jeedinayaa..

Iyadoo weli uu khilaaf ka taagan yahay cidda loo magacaabayo Guddoomiyaha gobalka Bay ayna isku haystaan Beelaha Mirifle ayaa waxa qoraal na soo gaarsiiyay Guddoomi-yaha Hay’adda Xaquuqda Aadanaha Wanlaweyn Human Rights Eng. Siido Xasan Mahdi, wuxuuna talo ku aadan is qabqab-sigaasi u soo jeedinayaa Beelaha Mirfle, waxa uuna yiri “Haddii aad ku heshiins weysaan Guddoomiyenimada Gobalka Bay waxaad ku sharaftaan oo aad u dhiibtaan nin ka tirsan Beelaha Digil”.

Eng, Siidow Xasan Mahdi waxa uu sheegay in Gobalka Bay oo uu haatan u baahan yahay in loo sameeyo maamul, maadaama xarun uu haatan u yahay Dowladda Federaalka, waxaa kale oo uu u soo jeediyay Beelaha Mirifle in ay ka wada shaqeeyaan nabadgelyada Gobalada Bay iyo Bakool.

Eng. Siidow Xasan Mahdi waxa uu sheegay in Bulshada ku nool Gobalka Bay ay si aad ah ugu baahan yihiin maamul iyo kala dambeyn, waayo mudo dhowr sano ah waxa uu sheegay Injineerku aysan helin wax maamul ah.

Dhawaan ayaa waxaa Siminaar u dhamaaday Odoyaa-sha Dhaqanka Gobalka Bay, waxayna Siminaarkaasi ku baranayeen qaabka ugu haboon ee loo sameyn karo golaha Deegaanka, waxyana haatan dib ugu laabteen Odoyaashaasi deegaanada ay ka yimaadeen ee degmooyinka Gobalka Bay.

Maleeshiyooyinkii Reer Puntland ee ku sugnaa Waajid oo soo gaaray Baydhabo..

In ka badan Kun Askari kuna hubeysan 45 Tikniko ah kana tirsan Maleeshiyooyinkii Reer Puntland ee ku sugnaa deegaanka Waajid ayaa soo gaaray Magaalada Baydhabo, waxaana maleeshiyooyikaasi lagu xareeyay xerada Manaas oo 30Km u jirta Magaalada Baydhabo.

Maleeshiyooyinkaas ayaa halkaasi loo keenay si loo biiriyo Maleeshiyooyin kale oo iyana ku sugnaa deegaanka Baydhabo si halkaasi loogu siiyo tababar dhowr bilood ah, inkastoo dadka deegaanka ay walwal ka muujiyeen haddana Xildhibaan Max’ed Ibraahim Xaabsade ayaa waxa uu sheegay mar uu u waramayay saxaafadda in ciidamadaasi ay yihiin kuwo loo uruurinayo Qaranka Soomaaliyeed, waxa uuna meesha ka saaray in ciidamadaasi ay ku wajahan yihiin deegaano kale.

Dhowr jeer ayaa Magaalada Baydhabo waxa uu isku dhac ku dhex maray Maleeshiyooyinka Deegaanka iyo kuwa ilaalada u ah Madaxweyne C/llaahi Yuusuf, waxaana ku dhintay dhowr qof, hase yeeshee Dowladda Federaalka ayaa dadaal u gashay in ay xakameyso iska hor imaadyada ciidamada.

Max’ed Ibraahim Xaabsade waxa uu sheegay in dhawaan maamul loo sameyn doono Magaalada Baydhabo kaaoso uu sheegay in uu hanan doono ammaanka Magaalada Baydhabo.

Dagaal shalay ka dhacay Magaalada Muqdisho oo u dhexeeyay Kooxaha…

Maalintii shalay ahayd ayaa dagaal la isku adeegsaday hubka culus iyo midka fudud waxa uu ka dhacay Magaalada Muqdisho gaar ahaan xaafadaha Yaqshiid iyo Karaan, waxa uuna dagaalkaasi u dhexeeyay Midowga Maxaakiimta Islaamiga ah iyo kooxo taageersan ururka isku magacaabay la dagaalanka argagixisada uuna hor kacayay nin Magaciisa lagu sheegay Nuur Xasan Cali (Nuur Dhaqle).

Dagaalkaan ayaa waxaa la xaqiijiyay in ay ku dhinteen ilaa iyo afar ruux oo labada dhinac ah waxa uuna ka bilowday markii Maxkamadda Deegaanka CC ay damacday in ay soo qabato nin dacwad loo haystay hase yeeshee waxaa is hor taagay kooxda Nuur Dhaqle, sidaasna uu ku bilowday dagaalkii.

Guddoomiyaha Maxakiimta Islaamiga ah Shiikh Shariif Shiikh Axmed ayaa waxa uu sheegay in kooxo ka amar qaata Isbahaysiga la dagaalanka Argagixisada ay weerar ku soo qaadeen Maxakmadda Deegaanka CC, taasina waxay keentay in Midowga Maxaakiimta Islaamiga ah ay iska difaacaan.

Faarax Sendiko oo shalay dib ugu soo laabtay Muqdisho xili loo diyaar-garoobayo…

Faarax Weheliye Caddow (Sendiko) oo ah Guddoomiyaha Guddiga Olombikada Soomaali-yeed ayaa shalay dib ugu soo laabtay Magaalada Muqdisho xili diyaargarow loogu jiro Doorashadii Xiriirka Soomaali-yeed ee K/cagta taasoo ka dhaceysa 15-ka Bishan Magaalada Baydhabo.

Faarax ayaa inta uu joogo waxa uu la tashiyo la sameyn doonaa qaar ka mid ah bahweynta Isboortiga oo la xiriira Doorshada Xiriirka Soomaali-yeed ee K/cagta, iyadoo la og yahay Faarax in uu ganaaxay Xiriirka K/cagta ee FIFA mudo toban sano ah.

Faarax ayaa la filayaa in uu dhawaan la hadlo saxaafadda si uu faahfaahin uga bixiyo safarkiisa Magaalada Muqdisho iyo aragtidiisa ku aadan qaabka doorshada Xiriirka Soomaaliyeed ee K/cagta.

Faarax waxaa shalay garoonka Diyaaradaha ee Balli-Doogle ku soo dhaweeyay dhamaan xiriirada Soomaaliyeed ee hoos taga Guddiga Olombikada Soomaaliyeed iyo dadweyne kale.

In ka badan Boqol Xubnood oo ka qaybgalaysa Doorashada Xiriirka K/cagta…

15-ka Bishan ayaa la filayaa in Magaalada Baydhabo uu ka furmo Shirweynihii Xiriirka Soomaaliyeed ee K/cagta kaasoo lagu dooranayo afarta sano ee soo socota mas’uuliyiintii hogaamin lahayd, waxaana ka qaybgalaya in ka badan boqol xubnood oo ka kala socota kooxaha wax dooranaya, Musharixiinta, Saxafiyiin iyo mas’uuliyiin ka socota Ururka K/cagta ee Adduunka ee FIFA.

Maalinta Sabtida ah ayaa la filayaa in Magaalada Muqdisho ay ka ambabaxaan mas’uuliyiinta Kooxaha iyo Musharixiinta, iyadoo afar xubnood ay u taagan yihiin Guddoomiyaha Xiriirka Soomaaliyeed ee K/cagta kuwasoo kala ah Yaasiin Abuukar Cariif, Bashiir Max’ed Jaamac (Bashiir Goobe), Muxiyadiin Xasan Cali (Darbaweyne), waxaana Guddoomiye ku xigeenada ku tartamaya ilaa iyo Toban Xubnood iyadoo la rabo 3-Guddoomiye ku xigeen, Xubnaha waxaa isku sharaxay 22- Xubnood, waxaana iyana laga rabaa 9-xubnood.

Qarashka ku baxay doorashadaasi waxaa bixinaya Xiriirka K/cagta Adduunka ha noqoto Cuntada, Gadiidka, Jiifka iyo Tasiilaadka kale, iyadoo maalintii shalay ahayd Dhamaan kooxaha ay ansixiyeen Dastuurka Xiriirka Soomaaliyeed ee K/cagta iyo Qaabka ay u dhaceyso doorashada.

W/D: Amiin Yuusuf Khasaaro
E-Mail: amiinkhasaaro@hotmail.com