Xog-hayaha Warfaafinta Is-bahaysiga Dibu-xoreynta Soomaaliya Axmed Cabullaahi oo Jawaab adag ka bixiyey hadalka ka soo yeerey Mele Zanawi (ee bixitaanka Ciidamada Itoobiya)....

Xog-hayaha Warfaafinta Is-bahaysiga Dibu-xoreynta Soomaaliya Axmed Cabdullaahi, islamarkaana ah xubin ka tirsan gudiga wadajirka Arimaha Siyaasada oo iigu waramayey Hoteel Imperial ee Caasimada dalka Jabuuti ayaa ka hadley hadalka ka soo yeerey Mele Zanawi, qaabka ay ku soo galeen ciidamada Ethopia iyo sida ay uga baxayaan dalka, waxyaabihii ugu muhiimsanaa ee ay ka wada hadleen Gudiga Siyaasada ARS iyo TFG ee shirka uga socdey Jabuuti 16-18-ka bishan.

Meles Zenawi oo Dhabarka u Jeedin doona DFKMG In DFKMG ay hanato dalka oo awood yeelato "ma aha shardiga ku xiran bixitaanka Itoobiya" sidaas waxaa yiri Zenawi....

Axmed Cabdullaahi waxaa uu jawaab adag ka bixiyey hadalka ka soo yeerey Ra’iisul Wasaaraha Ethopia Mele Zanawi “waa na soo gaarey hadalka ka soo yeerey xukuumada Ethiopia, hadalkaas micnihiisa waxaan u qaadaneynaa xirfad siyaasadeed oo dhaqaalo loogu raadsanayo mash-ruuca bur burinta ah ee Ciidamada Ethiopia ay ka wadaan dalka Soomaaliya, gaar ahaan dhibkii, gumaadkii iyo barakicintii ee shacabka loo gaysanayey oo taageero siyaasadeed iyo mid dhaqaale lagu doonayo iyo inay keenaan ciidan dheeraad ah ay ku doonayaan, ayaan u aragnaa waana xaqiiqo in ciidamada Ethiopia aysan shacabka Soomaaliyeed aysan soo dhaweynin, taasina ma aysan noqon sidii ay filayeen in dalka ay ku joogaan, oo qorshihii ay rabeen ay ka fuliyaan, shacabka Soomaaliyeed oo kaashanaya Alahooda, iskuna tashadey waxay tuseen darsi, in dhulkooda ciidamada Gumeysiga waxay rabaan ka sameyn karin, dhawaaqaas wuxuu natusinayaa xanuunka soo gaarey, ciidankooda iyo awoodooda dhibaatada soo gaartey ayey muujinaysaa, tan kalena waxay muujinaysaa xeelad kale oo siyaasadeed oo ay mush-tamaca caalamka ay ku beer jileecsanayaan” ayuu yiri Axmed cabdullaahi isagoo hadalka sii wata ayaa intaa ku darey

“ma ahan markii ugu horeysay oo ka soo yeero hadal noocaan oo kale, inay damacsan yihiin in ciidamadooda dib ay ula laabtaan ama si uun ay u tilmaanto, anagu ereyga ka soo yeerey Isha ayaan ku haynaa waana garan karnaa micnaha uu leeyahay, mowqifkayaga wuxuu yahay dhulkani waa dhul Soomaaliyeed, wax xuquuq ah oo siinaya in ciidan Ethiopia ay joogaan ma jirto, abaalna loogama hayo, waa iney baxaan waana xaq uu leeyahay shacabka Soomaaliyeed oo aan daba taaganahay sidii looga saari lahaa, qodobka kale ee meesha ku jira wuxuu yahay Bulshada Caalamka ee u arkayey in ciidamada Ethiopia ay xal ka keenikaraan Soomaaliya, waxaa gaarey sida ay ugu fashilmeen Ethiopia in waxa ay doonto ka sameyn Karin ayaa u cadaatey, waxaa keloo cadaatey sheegashadeedii in ay wakiil uga noqoto beesha caalamka Soomaaliya, arimahaas iyo kuwo kale oo isu tagey ayaa waxay ka mid tahay dhawaaqa hada ka soo yeerayo iyo inta iskaashatey, laakiin waxa runta ah ee Biyo kama dhibcaanka ah, waa dabo taagnaanta Is-bahaysiga uu dama taagan yahay sidii Ethiopia dalka uga saari lahaa isagoo adeegsanaya Muqaawamada iyo Diblamaasiyada, labadaasi dhinac waxay kusoo aruurayaan in Ethiopia dalka laga saaro”

Axmed Cabdullaahi mar uu ka hadlaayey in Is-bahaysigu uu diyaar u yahay hadii uu dhab noqdo bixitaanka ciidamada Ethiopia in wado ay siinayaan iyo in kale ayaa wuxuu yiri “ marka hore lama soo dhoweyn oo xoog ayey kusoo galeen, mana doonayo inaan ka hordhaco, laakiin shacabka Soomaaliyeed iyo mas’uulyiintiisa iyo muqaawamadaba waxay u hawlgalayaan in ciidamada Ethiopia laga saaro wadanka, cid ay abaal uga helayaan in dalka ay ka baxaan ma jirto”.

Mar aan weydiiyey gudigii nabadgelyada labada dhinac TFG iyo ARS balanku wuxuu ahaa in ay dejiyaan jadwalkii ay kaga bixi lahaayeen dalka ciidamada Ethiopia ee arinkaas xagee buu maryaa ayaa wuxuu ku jawaabey Axmed Cabdullaahi “wadahadaladii waxaa ku jirey in gudiga amaanka ay ka shaqeeyaan, Jadwalka ay ku baxaan ciidamada Ethiopia dalka, arintaasna waxaa loo xilsaarey gudigii amaanka ayaa ka shaqeynaya, kulamadooduna waxay u balansan yihiin mudo bil gudahooda, arintaas ayaa loo xilsaarey inay u soo sameeyaan jadwal, wixii noocaas ku yimaada heshiiskaas ayuu dhinac ka marayaa, laakiin hadii wado kale ay ku yimaadaan wax ka duwan heshiiskaas arin kale ayey qaadan kartaa”

Mar uu ka jawaabayey Maloo fasirankaraa hadalkaada in ciidamada Ethiopia aan loo furidoonin wado ay maraan, hadii ay dhacdo in ay dalka ka baxaan ayaa wuxuu yiri “arintaas waxay ku xiran tahay hawsha gudiga amaanka, wixii ku yimaada heshiis iyo is Af-garad gudiga amaanka ayaa u xilsaaran, jadwalka, wadooyinka ay ku bixi lahayd iyo sidii ay ku bixi lahayd gudiga amaanka ayaa soo xadidaaya, in waqtigeeda loo daayo ayey ku fiican tahay,

Gudiga amaanka waxaa la hadal hayaa in shirkiisa soo socda uu ka dhicidoono Magaalada Nayroobi ayna ka qaybgalayaan Mas’uuliyiinta sar sare ee Is-bahaysiga iyo xubnihii gudiyada Amaanka TFG iyo ARS iyo kuwa kale ee siyaasadaba bal kawaran arintaas? Waxaa uu ku jawaabey Axmed Cabdullaahi “sida hada aan og-nahay wadahadalada Jabuuti bay ka socdaan ee wixii intaas ka bedelan waxay u baahan tahay in laysku Af-garto, inta aan ognahay shirarka dibu-heshiisiinta waa in Jabuuti ay ka socdaan, Gudiga amaanka hawshiisa dhabta ah waa inuu gudaha ka hawlgalo, hadii ay daruuf keento ama gudaha uu tegi waayo, in Jabuuti meel aan ahayn ku qabsado shirarka waxaana isleeyahay oo ilaa iyo hada xarun u ah inay Jabuuti ka dhacaan”.

Gudiga siyaasada ARS iyo TFG dhowaantan markii ay shirayeen wax ka badan Kumunikeegii lagama soo saarin, mana jiro wax kabadan intaas oo ay saxaafadu heshey oo gudiga siyaasaduna soo saarey ee arintaas xagee buu ku dambeeeyaa?

Gudiga siyaasadu waxa ay ka wada hadleen waxa ugu muhiimsanaa, qaabka ay u dhacayaan shirarka soo socda, Ajendaha waxa laga hadlidoono, waqtiga ay kulmi doonaan iyo sida uu noqondoono qaabka wadahadlkooda, waxayna u badnaayeen waxyaabo farsamo ah inta badan, waxayna ku balameen mudo bil gudahooda in ay isku soo noqdaan,waxa kale oo xooga la saarey gudiga Amniga oo ka horeeyey arimahaan, siyaasada in isaga hormaro shaqo culus ay qabtaan kadibna marka uu helo gudiga siyaasada fursad sidii uu hore ugu sii talaabsan lahaa, waxaa kale oo xooga la saarey shirka in ay bilaabato bixitaanka ciidamada Ethiopia in lagu dhawaaqo waqtigooda, gudigii hawshaas ka shaqeyn lahaana ay hawlgalaan, sida hada ka muuqatey waxa ka soo baxay waxaa xoog badnaa arimaha Amniga.

Wadahadalada waxa ay ku dhisan yihiin in la fahmo ayaa wanaagsan, waxayna ku dhisan yihiin in Ethiopia dalka laga saaro oo shacabka Soomaaliyeed dilka ku socda, boobka hantidooda iyo barakicinta la joojiyo ay wada hadaladu ku dhisan yihiin, qodobka labaad oo ay muhiim tahay in la fahmo, wada hadalada darafka lagula jiro keliya ma aha ee beesha caalamka ayaa qayb ka ah, hadii shaley Soomaaliya dhib ka jira darteed ciidamada Ethiopia garab loogaa siiyey in loo cadeeyo bulshada caalamka in waxba aysan ka jirin ayuu wada haddalku ku dhisan yahay, arintuna ma ahan in loo fiiriyo shekh-siyaad ee waa in loo fiiriyaa, wax kasta oo suurtagelinaya Ethiopia in dalk ay ka baxdo, Wixii TFG u gaar ah iyada ayaan u deyneynaa


Maxamed Macallin Cismaan(All-man) Somalitalk Jabuuti
fatxumaalik@hotmail.com

Cumar Sh. Cali Idiris “waxayna doonayaan in ay ka dhigaan Soomaaliya Kawaan xiran…” Qaybtii labaad Wareysi Xiiso badan
ee Ku xigeenka Arimaha Dibada Is-bahaysiga Dibu-xoreynta Soomaaliya.. Akhri Aug 30