ciid

Ciidii iyo Kaakuma, Gedo, Minneapolis, Qardho, Muqdisho, K/afrika, Toronto iyo Magaalada Leicester.....

Sawirada halkan ka daawo (K/afrika).....

Boqolaal qof oo Soomaaliyeed ayaa maanta isugu soo baxay fagaarayaal ku yaala magalooyin waaweyn ee dalka Koonfurta Afrika iyadoo ay tahay markii ugu horeysey oo ay hal maalin la ciidaan muslimiinta dalkani oo caadi ahaan ka dambeeya maalin aduunka islaamka oo ay Soomaaliya ka mid tahay.

Magaalada Johannesburg oo aan salaada ku tukaday shaqsi ahaan ayaa waxaa aroornimadii hore isugu soo baxay kumanaan Soomaali ah oo caruuro iyo xaasaskooda watta, salaada waxaa lagu tukaday fagaaraha Fordsburg Bowling Club oo aad ugu dhow xaafada ay Soomaalida degto ee Mayfair halkaas oo uu ku yaalo masaajidka kaliya ee ay Soomaalida Johannesburg ku leedahay.

Iyadoo aduunka islaamka oo ay Soomaaliya ka mid tahay laga ciiday shalayto oo talaado ahayd ayaa culumada maamusha dacwada Soomaalida dalka ee magacooda la yiraahdo Al-Bayaan ayaa go’aan ku gaartay in lala soomo, lalana ciido muslimiinta dalka oo iyagu caadi ahaan ka dambeeya aduunka intiisa kale, Sheekh Ibraahim Xirsi oo habeen ka hor ka hadlaya masaajidka Shaafici ayaa sheegey in ay wada tashiyo dheer kadib ay isku raaceen in midnimada islaamka ay muhiim tahay in la illaalsho, arrintaas oo ay fadwoodeen culuma waaweyn oo Soomaaliyed oo sanadihii ugu dambeeyey booqasho ku yimid dalkani.

Takbiirta waxaa la bilaabay abaaro 6:00, aroornimo, waxaana salaada la tukaday abaaro 7:15, waxaa ka horeeyey salaada qudbado ku kala baxay luuqadaha afka Soomaaliga, Afka Oromaha, iyo luuqada English-ka, salaada kadibna waxaa la galay qudbad carabi ah, dhaaman qudbadaha waxaa looga hadlay fadliga ciida, waajibaadka dadka muslimiinta ah saaran, iyo in dadka ay wax sadaqaystaan, fidradana iska baxshaan.

Dadka Soomaaliyeed ee maanta isugu yimid dabaal dega ciida Fadriga ayaa intooda baddan ku joogey gawaari casri ah oo bilicsan, waxaana guud ahaan ka muuqatay dhaqnaan iyo ladnaan, waxaa sidoo kale goobta si weyn oga soo muuqdey haween iyo caruur aad u tiro baddan oo malaha aad is dhahaysay nin kasta oo goobta joogay xaas iyo caruur ayuu wattay, arrintani waxa ay astaan u tahay sida qoysaska Soomaaliyeed ugu soo badanayaan dalka gaar ahaan Johannesburg.

Salaadii kadib ayaa waxaa culumada iyo dadka magaalada ka sharfan ay isugu tageen markazka Al-Bayaan ee mandarasada ah, halkaas oo ururka dacwada ee Al-bayaan uu dadka ugu sameeyey quraac sharaf dad kooban loogu tallo galay.

Dhanka kale waxaa sidoo kale Soomaalida salaada ciida ay ka oogeen magaalooyinka Cape iyo Port Elisaberth, Rustenburg iyo Pretoria iyo magaalooyin kale oo tiro macquul ah ay ku joogaan.

Wallow Soomaalida inteeda baddan ay la afureen oo la ciideen muslimiinta dalka, hadane waxaa jirrey dad aan tiro yarayn oo shalayto ciida tukaday, iyagoo u qiil samaysanaya in Soomaaliya iyo aduunka islaamka laga ciidey.

Soomaalida ayaa ciida u dabaal dagayso iyadoo dalka ay ku heystaan dhibaatooyin dilka iyo dhaca joogtada uu ka mid yahay, todobaadkani horaantiisii waxaa si arxan darro ah loo harag siibey qoys Soomaaliyeed oo ka koobnaa hooyo iyo 3 deeda caruur, dabcan waxayna aheyd sheekada ugu weyn ee la hadal hayay todobaadkani.

Cabdinaasir saxansoxo.
saxansoxo1@hotmail.com

Sawirada sidii looga ciidey Toronto daawo...

Hambaly iyo bogaadiin farabada dhammaan walaalaha Somaliyeed meel kasta oo ay joogaanba gaar ahaanna walaalaha ku nool Toronto. Allah ha idinka aqbalo acmaashiinna wanaagsan oo aad soo gudateen bishii barakaysnayd ee Ramadan. Dadka ayaa waxaa ka muuqata bilicsami, labis qurxoon, iyo farxad aad uga laacaysay wajiyadooda. Waxaa isugu soo baxay makaanka ciidda lagu qabtay muslimiin aad iyo aad u fara badan oo isugu jira dhammaan qaybaha kala duwan ee bulshada kuwaasoo gudanaayey salaadda ciiddul fidriga. Meesha lagu ciidayey oo ahayd meel aad u bilic san, baaxad wayn, gogol aad u nadiif ahina taallay sida ka muuqata sawirrada ayaa waxaa soo agaasimay markaska Darul Hijra, waxayna walaaluhu soo bandhigeen adeegyo (service) aad u qanciyey walaalihii muslimiinta ahaa ee ka soo qayb galay salaadda. Waxaa in badan walaalihii soo ciiday ay ku celcelinaayeen sida quruxda badan oo loo agaasimay madasha ciidda, sida ay u ahayd meel aad ugu dhow meelaha ay dadku ku badan yihiin iyo sida ay u lahayd meel waasac ah oo baabuurta la dhigto.

Ka hor inta aan salaadda la tukan waxaa halkaa hadal qiimo badan ka jeediyey Sh. Adam Mox’ed Ciise oo warbixin ka bixiyey adeegyada kala duwan oo ay Darul hijra u qabato una qaban doonto Ilaahay idankiis walaalohooda muslimiinta ah guud ahaan gaar ahaanna Somalida ku nool Toronto. Sheikha ayaa intaas ku daray in walaaluhu ay taageero naf iyo maal ahba la garab istaageen ururkooda Darul Hijra isagoo sidoo kale ku boorriyey inay sii wadaan taageeradooda iyo waxtarkooda. Waxaa kaloo halkaa ka hadlay Sh. C/risaq Cilmi (Fagare) oo u hambalyeeyey walaalihii soo ciiday uguna duceeyey inay sannadka sannadkiisa ku ciidaan farxad iyo bogaadin, wuxuu kaloo shiikhu aad iyo aad ugu duceeyey dalkeenni Somaliya isagoo ilaahay ka baryay walaalihii joogayna ka codsaday inay ilaahay u waydiiyaan inuu colaadda iyo abaarta ka dulqaado uguna baddalo nabad iyo baraare. Waxaa kaloo duco aad iyo aad u qurxoon una dheer ka jeediyey Oday Mox’ed Nuur Cabdulle oo dalkii iyo dadkiiba gaarsiiyey ducadaas.

Waxaa isaguna halkaa ka hadlay Sh. C/risaq Macallin Abshir (Sancani) oo isagu khudbad aad iyo aad u qiimo badan meelo farabadanna taabanaysay halkaa ka soo jeediyey. Sh. Sancaani oo ku dheeraaday khudbadiisa ayaa in badan muslimiinta ku boorriyey inay caqiidadooda iyo diintooda ku dhagganaadaan, aysanna la falgalin kuna milmin dadyowga diimaha iyo dhaqamada kale haysta oo lagu dhex nool yahay. Shiikhu wuxuu musliminta ku baraarujiyey inay maraakizta diinta iyo masaajiddada ku xirnaadaan arrimaha diintoodana aad uga walwalaan. Shiikhu wuxuu kaloo aad ugu duceeyey muslimiinta ku dhibaataysan daafaha arlada guud ahaan gaar ahaanna ummadda Somaliyeed wuxuuna ilaahay uga baryay inuu hoggaankeeda u dhiiba cidda ugu habboon.

Ugu dambayntii waxaan dhammaan ummadda muslimiinta ah gaar ahaan Somalida ugu hambalyaynaynaa farxadda ciidda annagoo sidoo kale Allaah u waydiinayna inuu badbaadiyo dalka nabad waartana ku soo dabbaalo abaartana si dhaqsa leh uga qaado. Aamiin Aamiin Aamiin.

Maamulka Dar-ul-Hijra Islamic Centre - Toronto
www.darulhijra.org
info@darulhijra.org

ASCWB.

Ugu horrayn ciid mubaarak.

Xeryaha qaxootiga Kakuma (Kakuma one, Kakuma two, Kakuma three iyo Kakuma four) ay degen yihiin bulshooyin kala sinji iyo dhalasho duwan ayaa muslimiinta halkaasi ku nool waxay maanta oo taariikhdu tahay 30/9/2008, u dabaal degayaan ciidul-fidriga Islaamka.

Ummadaha halkaasi ku nool oo salaadda ciidda ku kala tukadey goobo aad u kala fog, waxaa noo suura gashay in aan hal goob oo ka mid ah goobahaasi aan kala qayb-galno tukashada salaadda ciidda barakaysan ee sannadka Islaamka ee 1429 Hijra.

Muslimiinta halkaasi isugu soo baxday ayaa waxay isla dhex marayeen hanbalyo iyo bogaadin, iyada oo aad moodaysid in qof kasta afkiisa ay ka soo horrayo erayga ah "Ciid Mubaarak" . Wajiyadoodana waxaa ka muuqanayey suruur iyo farxad. Waxaana dhegahayaga buuxiyey takbiirta ay caanka ku yihiin salaadaha ciiddaha.

Carruuraha, dhallinyarada, dumarka iyo ragga ayaa dhammaantood soo xirtay dharkii ugu bilicda iyo cusaybka badnaa ee ay haysteen, taas oo goobta salaadda iyo faras magaalahaba ka dhigtay goob aad iyo aad u qurxoon.

Bulshada Soomaalida oo iyadu ka mid ahayd ummadihii halkaasi isugu soo baxay, isla markaana ah dadka ugu badan ee goobtaasi joogay ayaa tibaaxayey ereyo farxad iyo is-jeclaan ku dheehan; haseyeeshee qaar ka mid ah iyaga oo aan wax ka waydiinay arrimaha ciidda ayaa tibaaxay in ay jeclaan lahaayeen in ay maanta ku ciidayaan dhulkoodii hooyo oo nabad ah.

WABILLAAHI TAWFIIQ
C/fitaax Maxamed Jaamac (Atta)
Email: atta98@hotmail.com

Sidee ayaa looga Ciiday Magaalada Leicester

Marka hore mahad idilkeed waxaa iska leh Allaah, naxariis iyo nabadgelyana waxey korkiisa ahaatay Rasuulkeenii Muxamed ahaa. Intaas kadib dhammaan akhristayaasha sharafta iyo qaayaha lahow iga gudooma Hamabalyada Ciidul Fitriga meel walboo aad ka joogtaan Dunida.

Leicester oo ah magaalo ka tirsan magaalooyinka ku yaala East Midland Uk, ahna magaalo ay degan yihiin Mujtamac aad iyo aad u ballaran oo Muslimiin ah, kuwaasoo ka kala yimid waddamada India ( Gujarat ), Pakistan, Bangaladesh, Zensibar, iyo Soomaali. Tirada dadka Muslimiinta ah ee ku nool Leicester waxaa lagu qiyaasa illaa iyo Konton kun oo qofood.

Haddaba maalintii ciida aheeyd ee maanta, ayaa waxaa magaalada looga ciiday si aad iyo aad u weyn, iyadoo ay aad u camirnaayeen dhammaan masaajidyada magaalada kuwaaso aad iyo aad u tiro baddan, qaarkoodna ay ku tukadeen Beerta weyn ee Spinney Hill Park. Waxaa kaloo magaalada Leicester ay uga duwan tahay magaalooyinka kale ee ingiriiska, iyadoo uu Council ku uu calamada islaamka iyo nalalka ciida ku sharaxo xaafadaha ay Muslimiinta ku baddan yihiin, taasoo runtii soo jiidata indhaha dadka muslimiinta ah ee soo booqda magaalada Leicester, iyadoo ay dadka qaar ayba moodaan in ay joogaan waddan ka mid ah waddamada muslimiinta, halkaasoo ay kuwada qoran yihiin boorar lagu tarjumay luqado baddan, oo ay ku qoran yihiin Ciid Mubaarak.

Soomaalida ku nool magaalada Leicester ayaa iyaguna maanta si aad iyo aad ah u camiray saddexda masaajid ee ay soomaalidu ku leeyihiin magaalada Leicester: - { Huda, Quba iyo Kowtharba }. Kadib salaaddii Ciida ayaa waxaa aad iyo aad u camiray waddooyinka xaafadda soomaalidu ay ku baddan yihiin ee
St. Matthews, Soomaali fara baddan oo iyagu halkas si raxan raxan ah isugu hambalyeeynayey, munaasibadda Ciidul Fitriga, iyagoo halkaas ay ku dhamaayeen waayeel, carruur, rag iyo dumarba, wiilal iyo gabdhoba. Xaafadda St. matthews, ayaa waxaa aad iyo aad ay u camireen soomaalidu dhammaan goobihii ganacsiga ee Soomaalida iyo weliba goobihii kale ay lahaayeen dadka muslimiinta ahba.

Waxaa kaloo munaasibaddii maanta bar bar socotay xaflado iyo barnaamijyo ay soo diyaariyeen komuunitiyada Soomaalida ee Leicester.

Guud ahaan magalada Leicester waxaa maanta looga ciiday si aad iyo aad u weyn taasoo waayahan ku reebaysa xusuuta dadka muslimiinta mid ay waayahan ka sheekeeyaan.

Waxaan mar labada fursaddan uga faa’ideysanyaa anigoo u hambalyeeynayaa dhammaan ummadda Soomaaliyeed meel walboo ay joogaanba, haddey noqoto Qurbaha ama waddanka gudihiisaba, waxaana leeyahay ku Ciid Mubaarak, Ciidaan, ciideeda Allaha inagu gaarsiiyo caafimaad qab, Cibaado san iyo weliba kuwii ka shaqeeya sidi aynu dalkeena u badbaadin laheyn, oo aynu gacmaha isu qabsan laheyn.

Qalinkii
Cabdixakiim Jaamac jooje
saicentadv@yahoo.com

Gedo Oo Dadku Ay Maanta Kala Ciideen

Inkastoo xiriiro aan la sameeyay qaar kamid ah culumaa'udiinka Ehlu-sunna waljameeca ay ii xaqiijiyeen in maanta ay u tahay maalin soon ,oo aysan ciidi doonan guud ahaan gobolka ayaa waxaa kumanaan dadweyne ah ay salaada ciida ku tukadeen garoonka k/cagta ee degmadan baardheere.

Waxaa saakay Fagaraha weyn Ee Garoonka Kubada Cagta Ee mgaalada Baardheere i sugu soo baxay kumanaan Qof oo doonayay in ay ku Tukadaan Salaada Ciida ayadoo la Arki karayay Farxada ka Muuqaneysa dadkaasi.
Garoonka Kubada Cagta ayaa waxaa soo buuxiyay Dadweyne aad u farabadan oo ay ka mid ahaayeen haween, Carruur ,dhalinyaro iyo dad da'ah.

Dadka ayaa isugu hambalyaynayay KULU CAAM WA’ANTUM BIKHEYR, waxaana dadkaasi ay isku salaamayeen gacmaha ,iyaga oo ay faxcad ka muuqato.

Hase ahatee dad farabadan ayaan manta aana ciidin waxaana ciid iska daaye ay gaajo ku dubaynaa guryahooda. dadkaasi ayaa ah kuwo horay uga soo cararay dagaalad iyo abaaraha ku dhuftay gobolada dalka.

Maxamed Gaarane Aadan

Baardheere/GEDO,Somalia

Masjidka Abubakar Sadiiq ayaa Hogaan ka iyo majaraha u haya muslimiintaku nool Gobal ka Minnesota
Maantay waa maalin ciida waana maalin ay muslimiinta caalam ku faraxsan nyihiin Allahu Akbar Allahu Akbar Lilaahi Hamdu
Waa Takbiir waa shacuur aad u saraysa Culumo Hooyooyin Aaabayaal Dhalinyarao Madax intaba waa Tuuran yihiin

Dad kuna wa agarbo siman dhar qurux badan ayey xiran yihiin waa faraxsan yihiin waxay u eg yihiin dad danbi dhaaf Rajaynaya

Waxaa Safka hore Fadhiya Culumada Gobal kaan Minnesota allah ha xiftiyee Sh Abdirahman Shiikh Cumar Imaam ka Masjidka Abubakar

iyo Shiikh Waliid Idiris imaan ka masjida Alhudaa iyo Shiikh Faaruq waxaa MUslimiinta si farxad leh u soo dhaweeyey Sh Abdirashid Hassan Aabi oo ku hadlaya masjidka Abubakar oo ah maasjidka majaraha u haya muslimiinta gobal kaan Ciida iyo Mutamarada Diinigaa .

Khudbadii Ciida ayuu Sh Abdirahman kaga hadlay Khayr ka in aan lagu khatimin Shar iyo macsiyo waxuu sheekhu ku cel celiyey in L:aga Fogaado Xumaanta si danbi dhaaf loo helo soon kiina uu noqdo mid mirihiisi ay dhaleen Goobaha baanaan kaa ayaa waxaa yaalay Boorar dhaadheer oo ay ku qoran yihiin Barack Obama u Codee waxaa kaloo banaan ka dad ku ku xoon sanaayeen Senator Keith Illison oo ka mid ah Golaha Congress ka Ah Nin Muslim ah oo Salaaddaha Ciida iyo Mutamarada ka soo qayb gala Senator ka ayaa ah Qof kii ugu horeeyey oo

MUslim ah oo Aqal ka Cad ee looga talaiyo maraykan ka ah qayb islam markaana lagu dhaariyey kitaab ka jaamacaa ka dibna loo ogolaaday Qol uu ku tokodo salaadda waxaana laga doortay Magalada Minneapolis Mr Keith iyo Shiekh Abdirashid Hassan Aabi ayaa waraysi yar ka qaaday Sh Abdirashid Ayaa su,aashii ugu horaysay ee aan waydiiyo ahayd maantay oo ah maalin weyn waxa uu jecel yahay in uu Muslimiinta Gobal kaan MInnesota u soo jeedinayo maadaama uu yahay Xubin ka mida maamulka Masjidka Abubakar saddexdii snao oo ugu danbaysayna masaajid ku ee majaraha u haya ciidaha iyo Mutamarada gobal kaan ? Sh Abdirashid waxuu ku jawaabay Dhammaan Musliinta Caalam ka Danbi dhaaf ayaan allah u weydiinaynaa Gaar ahaan Reer Minnesota Ciid wanaagsan ayaan leeyahay khayr ka in ay sii wadaana wana ku dhiira galinaynaa ? Su,aashii labaad ayaa saan u dhacday Meeshaan Convention Center waa meel weyn hadana qurux badan soo qaalina ah

Marka Lacagtaan yaa idin ka caawiya ? Walaal Musliimta ayaa bixiya rere minnesota

(3) Maalmahan waxaa soo badanaya dhalin yarada dil kooda marka ka maamul ahaan maxada u soo jeedin lahaydeen ? Walaal Inaalilaahi Wa inaa ilayhi raajacuun waa wax laga naxo oo muruga leh waana wax in wax laga qabto u baahan insha allah maamul ku waxbuu ka qaban doonaa Tarbiyada iyo dhaqan celinta dhalinteena aanu jecel nahay

(4) Somalida meel kasta oo ay Joogaan maxaad u soo jeedinaysaa Sh Abdirashid ? Walaal walaalahayga Somaliyeed waxaan leeyahay

Midnimada hala ogaado Culumadana hala jeclaado Waxaan leeyahay Tahniyada Ayuu hawada idin soo marinayaa Maamul ka Masjidka Abubakar Sadiiq ee Gobal kaan Minnesota Danbi dhaaf ayaan kuligeen allah ka rajaynaynaa waxaana somalida ku adkaynayaa Midnimada

Umaddu waa muqadas taas ayaana hor mar lagu gaara kala taguna waa lagu jabaa meelna laguma gaaro in kastoo Videdo naga Xumaaday
Haddana qayb ka mida waraysiga Sh Abdirashid waa kan

Senator Keith Ayaa asna halbayo u diray dhammana muslimiinta dal ka maraykan ka iyo kuwa ku nool Caalam ka kale

Mr Keith waa nin dhalin yaraa oo fur furan lagama waayo Goobaha Mutamar ka iyo Salaaddaha Ciida Somalida Waalidiinta ayuu ku guubaabiyey walaalayala walaalahy muslimiina ayaad tihiin ha is laynina wadan kiinii xabad ayaa idin ka soo saartay waan ka murugaysanahay dhalin yaradeena is laynaysa waarid ku asaga ayaa ka masuula gurigiisa taas waa sharci diini ah ilmihiina la socda dhaq dhaqaaqooda iyo saaxiibadooda mudlimiintu waa in ay ka shaqeeyaan midnimada

Maantay waa maalin weyne Ciida Carruur iyo waayeel iyo dhalin yaro maantay waxay ahayd maalin aad u farxad badan wadooyin Soogala Convention ka ayaa la xiray Muslimiintuna waxay lahaayeen Waar diye adag Takbiirta ayaana ahayd mid meel kasta lagu qaadayo

Ustaad Abdiwali Bashir Dalboon Minnesota

Sidee Looga Ciiday Magaalada Muqdisho Ee Xarunta Wadanka Soomaaliya.

Sept 30, 2008: Ciidan oo si weyn Uga duwan Ciidihii Hore ayaa waxaa magaalada Muqdisho ka Ciiday dadweyne fara badan kuwaasoo salaada Ciida Kusoo Gutay Masaajidada ku yaala xaafadaha dhexdooda islamarkaana aysan Jirin haba yaraatee xarumo waaweyn oo ay dadku ku Kulmaan sida barxadihii Hore Looga bartay inay dadweynaha Reer Muqdisho Salaada Ciida Ku Tukadaan sida Studyow Muqdisho Iyo masaajidka isbaahaysiga islaamka oo Qaarkood fariisimo U ah Ciidamada dalka Ethiopia halka qaarkii kalena ay Ka Ag dhow yihiin Ciidamada Dowlada FKMG ah oo Noqday Goobo Haawanaya oo Cidla ah .

Boqolaal dadweyne ah iyo caruurtooda oo Ciidaya ayaa lagu dhex arkayaa deegaanada Loo barakacay ee gudaha magaalada Muqdisho iyo Duleedkeeda halkasoo ay dadka qaarkoodna ay la degtay Duruuf dhaqaalo xumo iyo Colaado isbiirsaday kuwaasoo aysan Jirin wax farxada oo Iyaga caruutooda ka Muuqanaya marka laga reebo Gudashada salaada Ciida oo lawada tukaday .

Sidoo kale dadka reer Muqdisho oo ay Mudooyinkii Ugu dambeeyey ay ragaadiyeen xaalado adag oo colaado iyo Abaaro ah ayaa badankoodu la tiicayaan dhaqaalo xumo ay u waayeen inay ka farxiyaan caruurtooda halka ay qaarkoodna caruurta Oo Ciidaya aysan La damaashaadi Karin iyagoo cabsi ka qaba in iyagoo caruurtooda gacanta haysta uu qarax ama dagaal dhaco islamrkaana ay isku waayaan iyaga iyo caruutoodu .

Si Kastaba ha ahaatee Ciida Soonfureed ayaa maanta si habsami ah Uga dhacday magaalada Caasimada ah ee Muqdisho iyadoo aysan Jirin khilaaf ka dhex Muuqanaya Ciidan islamrkaana looga wada tukaday Masaajidada ku yaala Muqdisho si isku Mid ah

Yaasiin Maxamed Cali (faytin)
Yaasiinfaytin@hotmail.com

Sidee Looga Ciiday Maanta Magaalooyinka Maamul Goboleedka PuntLand

Sida uu soo werinayo weriye ku sugan Magaalada Qardho ee maamulka soomaaliyeed ee puntland Cumar M Cumar Dheere ayaa sheegaya in badanaaba maanta laga Ciiday magaalooyinka maamulka soomaaliyeed ee Puntland Gaar ahaan Qardho.

Magaaladda Qardho oo kamid ah magaalooyinka waaweyn ee maamulka Puntland ayaa saaka Laysugu soo baxay Fagaaraha weyn ee Buundada Beeyada ee garoonka Kubada cagta ee Xorgoble
Halkaasoo tukashadda Salaada ciidul fidriga ay isugu Yimaadeen Boqolaal dadweyne ah Oo u farabadan oo isugu Hambalyeynayey Muunaasabada Ciidul Fidriga awgeed .

Sidoo Kale kuwaaso ku kala tukaday Masalayaasha waawayn ee magaaalada Qardho sida Barxada way nee buunda, Beenyada iyo garoonkaKubada cagta ee Xorgoble Tukashada Salaada ciida ayaa waxa shacbiga kala qayb galay Wasiir ku xigenka qorshaynta iyo xiriirka caalamiga, Duqa Degmada Qardho Cisman Bux Cali G/xigeenka G/karkaar Faarax Gardheere iyo Culumaaudiinka Gobalka

Waxaana halkaa khudbad ka soo jeediyay Sheikh Daahir Aw Cabdi sheekhu wuxuu aad uga hadlay Munaasabada ay Ciidul Fidrigu u leedahay shucuubta islaamka meel kasta oo ay Ku sugan Yihiin islamrkaana ay soo guteen Waajibaakoodii dii niga ahaa ee saarnaa

Dhinaca kale Sheekha ayaa ka hadlay dhibaatoyinka ka taagan guud ahaan gobolada puntland gaar ahaan arimaha burcada isagoo sheegay in ay haboon tahay in loo noqdo kitaabka quraanka kariimka, umadanana looga baahan yahay inay dawlad Goboleedka La shaqeeyaan si looga baxo dhibaatooyinka In kastoo aysan maanta u dhamayn ciida Soon Fureed bulshada Ku dhaqan Magaalada qardho Oo laga dareemayo kuwo Diidan Ciida islamrkaana ku Adkaysanaya inay maalin soonqaad tahay .

Waxaa Soo Tebiyey Cumar Maxamuud Cumar dheere oo Qardho Jooga.

Cumar M Cumar Dhere
Qardho Somali
ayaanle6@hotmail.com

Faafin: SomaliTalk.com | Sept 30, 2008