XIL DHIBAANADU MA
XIL DOONBAA MISE WAA XAL DOON?
Ismail A.Hassan (khaliil)
khaliilha484@hotmail.com
“Riwaayaddii
uu arbaha ka ahaa geeddi oo dhammaatay iyadoon bilaabmin”
Tan iyo intii ka
dambaysay markii uu ra’iisal wasaare Cali Maxamed Geeddi ku
dhawaaqay xukuumaddiisa waxaa isa soo tarayay dadka ka biyo diidsan
xukuumaddaas ee ka soo horjeeda.
Waxa ay dad
badani aad u dhaliileen tirade wasiirada oo aad u badan isla
markaana ayna ka dhex muuqan shaqsiyaad lagu tilmaami karo karti iyo
aqoon oo wax ka qaban kara dhibaatada wadanka ka taagan.
Sidoo kale waxaa
jiray qabiilooyin iyo shaqsiyaad ka tirsan baarlamaanka oo ka
cabanaya inaan lagu soo darin dawladdaas iyo kuwo saluugsan xilalkii
loo magaabay oo qaarkood ay horeba isku casileen.
Hadaba
kalsoonida ay hadda xubnaha baarlamaanku kala noqdeen xukuumaddan
ayaa dadku u arkeen siyaabo kala geddisan.
Kuwo badan ayaa
qaba in xildhibaanadu ay muujiyeen xilkasnimo, uuna falkoodu ka
turjumayo walaaca ay shacabku ka muujiyeen xukuumaddan iyo sida
aanay raali uga noqon karin xukuumad tiro badan oo ujeedada keliya
ee laga leeyahay ay tahay in lagu qanciyo shaqsiyaad jago doon ah.
Dhanka kale ayaa
iyana waxaa jira in dad badani ay u arkaan tallabadan ay xubnaha
baarlamaanku qaadeen mid danaystanimo ah oo ujeedadeedu tahay mar
haddii ay ku guuldarraysteen in wasiiro laga dhigo in iyaguna ay wax
qasaan.(cunay ama ciideeyay).
Mudane Cali
Maxamed Geeddi oo intii aan la magacaabin ay saxaafaddu aad u hadal
haysay, laguna tilmaamayay nin ay dawladda Itoobiya wadato ayaanay
dad badani soo dhawayn magacaabistiisa, waxaanay candhuuftooda dib u
sii liqeen ka dib markii uu magacaabay xukuumad u badan
taageerayaasha Itoobiya oo sideetameeye wasiir gaadhaysa.
Waxaa hadaba
immika dad badani isweydiinayaan talaabada uu qaadi doono Madaxweyne
C/laahi Yuusuf iyo inuu mar kale dib u magacaabi doono Mr Geeddi iyo
inuu weji cusub oo kale baarlamaanka soo hor dhigi doono.
Baarlamaanka oo
iyagu horeba isugu koobay in dhexdooda laga soo magacaabo xukuumadda
ayaa meesha ka saartay dad aqoon iyo karti la bidayay shacabkuna aad
ugu qanci lahaa magaabistoodu inay xukuumadda ka mid noqdaan.
Hadaba arinku si
kastaba ha ahaadee waxa ay xildhibaanadani muujiyeen awoodda
dastuuriga ah ee ay leeyihiin iyo in aanay dawladdu ahayn wax ay
shaqsiyaad gaar ahi siday doonaan ka yeeli karaan.
Isku dhaca
hay’adaha dastuuriga ah ee dawladda FKMG ee Soomaaliya ee hadda
bilawday ayay dhici ka kartaa inay noqoto caqabad cusub oo ka
hortimaadda dib u soo celinta dawladnimada iyo sharafta ummadda
Soomaaliyeed.
Waxaa aad looga
cabsi qabaa in ay laba sanno oo kale ay qaadato sidii loo soo dhisi
lahaa dawlad raali gelisa dhammaanba dhinacyada isku khilaafsan,
inkastoo aanay beesha caalamku dulqaad u yeelan doonin inay wakhti
kale ku sii masruufaan wadanka Kenya xildhibaanada gorgortanka ku
jira.
Waxaa iyana isha
aad loogu hayn doonaa dawladda Itoobiya iyo fara gelinta ay arintan
ku samayso sidii horeba looga bartay iyo bal in ay xaalka dibadda ka
fiirsato.
Waxa ay shacabku
isweydiinayeen goorta ay xukuumaddani tegi doonto Soomaaliya ee
marnaba kumaanay tashanayn burburka hadda soo wajahay xukuumaddaas.
Hadaba waxaynu
ka war sugnaa waa madaxweyne C/laahi Yuusuf iyo wax uu ka yeeli
doono arintan iyo bal inay suurto gal noqoto inuu kasbado kalsoonida
xildhibaanada kacdoonka sameeyay ama arinku noqdo i jiid aan ku
jiidee iyo gacmao daalis.
Ismail A.Hassan
(khaliil)
khaliilha484@hotmail.com
Afeef: Aragtida
qoraalkan waxaa leh qoraag aku saxiixan
Faafin:
SomaliTalk.com | Dec 11, 2004
Dawladdii Cali Maxamed Geeddi oo oo La Casiley
iyo Afhayeenka dowladda FKMG oo sheegay inaan waxba ka jirin
go'aankii Baarlamaanku ku riday xukuumaddii Geeddi..
Guji... Dec 11