Wararkii Maanta:
- Roobab isdaba jooga oo si wayn uga
curtay Garowe iyo nawaaxigeeda.
- Warar ku saabsan sababihii ciidamada Dowladda
Federaalka ay uga soo baxeen…
- Maxaakiimta Islaamiga ah oo looga digay inay
weeraraan Magaalada Baydhabo…
- Meles
Zenawi “Saraakiisha ay qabteen Maxaakiimtu waa
Oromada Qaxootiga ah..
-
Dagaallo cadowga lagu jabiyay iyo dad la laayay...
- JWXO oo
bayaan ka soo saartay hadalkii Zenawi...
-
Jaaliyadda Soomaaliyeed ee Dalka Suuriya Sidee
u Ciideen....
Garowe:
Roobab isdaba jooga oo si wayn uga curtay Magaalada Garowe iyo nawaaxigeeda.
Roobabkan 2dii maalmood ee ugu danbeeyay ayaa
si wayn loogu qaboowsaday mana jiraan wax khasaaro ah oo ay ilaa iyo hada
gaysteen roobabkani.
Dhamaan Magaalada ayay biyo dhigeen roobabkani
waxayna sidoo kale ka de'een meelo badan oo ka mid ah gobalka isaga oo uu
roobkani is haysto ilaa iyo dangorayo ilaa buurtinle oo ka tirsan gobalka
Nugaal ayaan ilaa iyo hada wax khasaro ahna laga soo sheegin degmooyinka iyo
tuulooyinka uu roobkani ka da'ay sida wayna loogu qabowsaday.
Roobabkan sida wayn oo isdaba jooga ah uga
da'ayay 2badii maalmood ee ugu danbeeyay magaalada Garowe iyo Nawaaxigeeda ayaa
ah kuwo ku soo beegmay xili ay muslimiintu Ciidayaan iyaga oo soo gutay
waajibaadkii bisha ramadaan ee aan hada ka baxnay.
Roobabkan ayaa si wayn loogu diirsay iyada oo
lagu guda jiro xili roobaadkii dayrta oo hada maraya gaba gabo sida lawada
ogsoonyahayna hadaan la helin roobabkale run ahaantii meelo badan oo dalka
somalia ka mid ah ay soo food saari karto xaalada abaareed.
A/rizak koronto
Garowe Puntland
Warar ku saabsan sababihii ciidamada Dowladda
Federaalka ay uga soo baxeen…
Wararka naga soo gaaraya magaalada Baydhabo
waxay sheegayaan in Ciidamadii Dowladda Federaalka iyo kuwii Itoobiya ee dhawaan
soo gaaray magaalada Buur-Hakaba ay dib ugu laabteen Magaalada Baydhabo kaddib
markii ay sidaasi lagu amray. Warar kala duwan ayaa ka soo baxa dib u laabashada
ciidamadaasi, waxay wararku sheegayaan in khilaaf dhexdooda ah uu sababay dib u
laabashada ciidamadaasi, iyadoo qaar ka mid ah ciidamada ay sheegeen in aysan
horey uga dhaqaaqeen Buur-Hakaba.
Warar kale ayaa waxay sheegayaan in Ciidamada
ay isugu jireen kuwo Puntlanad, kuwo ka socday Digil iyo Mirifle iyo kuwo iyana
ka socday Beesha Hawiye, waxaana looga shakiyey in ciidamada Digil iyo Mirifle
iyo kuwa Hawiye ay gacan siiyaan Maxaakiimta Islaamiga ah, waxaana dib loogu
celiyay Magaalada Baydhabo, iyadoo lagu xareeyay Xerada Manaas lana sheegay in
Tababar kale ay gali doonaan. Warar kale ayaa waxay sheegayaan in jabkii gaaray
Barre Hiiraale uu sabab u ahaa dib u laabashada ciidamadaasi, waxaana la sheegay
in haddii uu guulo gaari lahaa Barre ciidamadaasi ay u soo dhaqaaqi lahaayeen
dhinacaa iyo Bali Doogle. Dhanka kale
Ra'iisul wasaaraha DFKMG, Cali M. Geeddi oo
arrinta ciidamada ka baxay buurhakaba ka hadlaya waxa uu sheegay in
ciidamada DFKMG ay markii hore Buur Hakaba u tageen inay ammaanka iyo kala
dambaynta soo celiyaan amarka, markii ay ku soo guuleysteena ay ka soo laabteen.
Halka lagu magacaabo Daynuunaay, ayaa waxaa haatan ku
sugan labo rac oo Ciidamo Itoobiyaan oo isku jira 10Km waxayna loogu talagalay
in ay magaalada Baydhabo ka difaacaan Maxaakiimta Islaamiga ah.
Maxaakiimta Islaamiga ah oo looga digay inay
weeraraan Magaalada Baydhabo…
Maxaakiimta Islaamiga ah oo lagu waday inay
weeraraan Magaalada Baydhabo oo xarun u ah Dowladda Federaalka ayaa ciidamadooda
shalay dib uga soo gurteen magaalada Buur-Hakaba kaddib markii sidaasi amreen
qaar ka mid ah wadamada Carbeed ee daneeya arrimaha Soomaaliya.
Maxaakiimta ayaa lagu wargeliyay in aysan wax
weerar ah qaadin tan iyo inta uu ka qabsoomayo shirka Dib u heshiisiinta ah ee u
dhexeeya Maxaakiimta iyo Dowladda Federaalka. Ciidamada Maxaa-kiimta oo watay
tikniko aad u fara badan ayaa haatan fariisin ka dhigtay deegaanka Leego, hase
yeeshee waxaa deegaanka Buur-Hakaba looga soo tagay maleeshiyo beeleedkii
halkaasi horey ugu sugnaa. Ciidamadii Dowladda ayaa iyana dib ugu laabtay
Baydhabo, waxaana meel 10Km u jirta Baydhab ku sugan Ciidamo Itoobiyaan ah.
Meles
Zenawi “Saraakiisha ay sheegeen in ay qabteen Maxaakiimta Islaamiga ah waa
Oromada Qaxootiga ah ee ku sugan Soomaaliya”
Ra’isul
Wasaaraha Dalka Itoobiyaan Milles Zenawi ayaa ka waramay Xaaladda Soomaalia,
waxa uuna sheegay in ciidamada Maxaakiimta ee qabsaday Koonfurta Soomaaliya ay
halis ku yihiin dhamaan ammaanka Wadamada Geeska AFrika, isagoo sheegay in
Maxaakiimta ku jiraan rar mitidiin ah oo doonaya inay falal argagixiso ka
sameeyaan gudaha Wadanka Itoobiya, isagoo sheegay in Maxaakiimta Islaamiga ah ay
doonayaan inay kiciyaan dadka dadka Soomaaliyeed ee ku sugan soonka Shanaad ee
Soomaalida Itoobiya iyo kuwa W/Bari Kenya.
Ra’isul Wasaaraha Itoobiya waxa uu sheegay in
ciidamo Itoobiyaan ah ay ku sugan yihiin gudaha Dalka Soomaaliya, kuwaas oo uu
sheegay inay tiradoodu gaareyso boqolaal Askari, waxa uuna sheegay in
Ciidamadaasi ay yihiin tababarayaal doonaya inay tababar siiyaanb Ciidamada
Dowladda Federaalka.
“Haddii Maxaakiimtu isku dayaan inay u soo
gudbaan gudaha Dalka Itoobiya, waxaan u sheegeynaa in aan iska difaaci doono”
ayuu yiri Milles oo sheegay inaysan marnaba ku deg degi doonin in ay iska hor
yimaadaan iyaga iyo Maxaakiimta Islaamiga ah.
Milles Zenawi waxa uu beeniyey wararka ka soo
yeeraya Maxaakiimta Islaamiga ah ee sheegaya in kumanaan kun oo Askari oo
Itoobiyaan ah ay u soo gudbeen gudaha Dalka Soomaaliya, waxa uuna wararkaasi ku
tilmaamay kuwo aan sal iyo raaad toona laheyn, sidoo kale Milles Zenawi waxa uu
beeniyay in labo sarkaal oo Itoobiyaan ah ay dhawan Maxaakiimtu ku qabteen
Magaalada Muqdisho, waxa uuna Milles Zenawi in raggaasi yihiin Oromada Qaxootiga
ah ee ku sugan Soomaaliya, waxaa kalloo beeniyay in askari Itoobiyaan ah lagu
qabtay dagaalki dhex maray Maxaakiimta iyo kuwa Barre Hiiraale.
Mar uu ka hadlayey hadaladii ka soo yeeray
Maxaakiimta ee ahaa in jihaad lagu qaado Dowladda Itoobiya, ayaa waxa uu yiri
“Waxaa la doonayaa in lagu baneysto sidii falal argagixiso ah looga sameyn lahaa
gudaha Dalka Itoobiya”
W/D Amiin Yuusuf Khasaaro
E-mail:
amiinkhasaaro@hotmial.com
Barnaamijkii Radio
Xoriyo
24 October 2006
-
Ogaadeenya: Dagaallo cadowga lagu jabiyay iyo dad la laayay
-
JWXO oo
bayaan ka soo saartay hadalkii Zenawi.
-
Itoobiya oo
u hanjabtay Soomaaliya.
-
Xubin kale
oo ka tirsanaa guddi ka warbixiyay xasuuqii kal hore oo soo cararay.
-
======================
Ogaadeenya: Dagaallo cadowga lagu jabiyay iyo dad la laayay
Wariyaha
RX uga soo warrama dalka Ogaadeenya ayaa noo soo sheegay dagaallo kala duwan
oo cadowga lagu naafeyay, kuwaasoo ka dhacay meelo kala duwan oo Ogaadeenya
ka mid ah. Dagaalladaasi waxay u dhaceen sidatan;
07/10/06
weerar gaadmo ah oo ciidammada xoreynta Ogaadeenya ku qaadeen kuwa gumaysiga
Itoobiya ee fadhiya magaalada Huuraale, waxay kaga dileen 5 askari, 3 kalana
way kaga dhaawaceen.
12/10/06
ciidammada xoreynta Ogaadeenya ayaa weerar ku qaaday kolonyo babuur ah oo
cadowgu leeyahay, kuwaasoo marayay Uubataale, oo ka tirsan gobolka Doollo,
waxayna halkaas ciidammada gumaysiga Itoobiya kaga dileen 21 askari, waxay
sidoo kale u gaysteen dhaawac badan oon tirakoobkiisa la haynin.
17/10/06
waxay ciidammada xoreynta Ogaadeenya weerareen kololnyo baabuur ah oo
cadowgu leeyahay, kuwaasoo marayay meel u dhaxaysa Dalaad iyo Kabtii-naag,
oo ka tirsan gobolka Qorraxey, waxayna cadowga weerarkaas kaga dileen 35
askari, dhaawac badan way u gaysteen.
18/10/06
ciidammada xoreynta Ogaadeenya weerar mir ah ku qaaday ciidammada gumaysiga
Itoobiya ee fadhigoodu yahay magaalada Fiiq, waxana weerarkaas kaga dileen
in ka badan 17 askari, dhaawac aan faahfaahintiisa la haynin way u gaysteen.
Ciidammada cadowga ayaa xeradii lagu weeraray ka guuray markii dhaawacaas
xun la gaadhsiiyay.
Dhinaca
kale wuxuu wariyahayaga Ogaadeenya noo soo sheegay in markii ay taariikhdu
ahayd 17/10/06 ay ciidammada gumaysiga ee fadhiya Iimey-Bari ka goosteen 8
askari oo hubkoodii wata. Markii ay askartani goosteen waxaa hubkii laga
dhigay askartii kale ee la shaqayn jiray kuwa goostay. Waxaa sidoo kale
magaalada Dhagaxmadow isla taariikhdaas laga qaaday askar labo baabuur laga
buxiyay, kuwaasoo horay hubkii ooga ururiya, ka dib markii laga shakiyay
inay goosanayaan, waxaana askartaas hawlgabka laga dhigay loo qaaday dhinaca
galbeedka.
Wuxuu
kaloo wariyuhu noo soo sheegay in ciidammada nacabka ah ee gumaysiga
Itoobiya ay markii taarikhdu ahayd 18/10/06 ku dileen Alla ha naxariistee
Axmed Nuur Faash meel u dhaxaysa Birqod iyo Baka.
JWXO oo bayaan
ka soo saartay hadalkii Zenawi.
Jabhadda Waddaniga
Xoreynta Ogaadeenya JWXO ayaa bayaan kulul ka soo saartay hadal uu dhawaan
Baarlamaan ku-sheegga hortiisa ka jeediyay kaligii taliye Meles Zenawi,
kaasoo uu ku sheegay inuu si wayn isugu hawlay inuu wadaxaajood la yeesho
JWXO.
Hadalkaas ayay JWXO
ku tilmaantay mid aan sal iyo raadtoona lahayn, isla markaana waxay Meles
Zenawi ku edaysay inuu isagu yahay midka hortaagan in la helo wadaxaajood
lagu baadigoobo is afgarad ku dhisan cadaalad iyo nabadgelyo.
JWXO ayaa sheegtay
inay marar badan caddaysay sida ay diyaarka ugu tahay wadaxaajood nabadeed
oo lagu dhammeeyo dhibaatada Ogaadeenya, iyadoo wadaxaajoodkaas lagu
qabanayo waddan dhexdhexaad, daraf kale ood hexdhexeediye ahna uu goobjoog
ka noqonayo, isla markaana aan wadaxaajoodka lagu xidhin shuruudo hordhac
ah.
Hase yeeshee ay
arrintaasi hirgali kari wayday, ka dib markii uu Meles Zenawi doortay inuu
awood millatari ku baddalo wadaxaajoodka, isla markaana uu hawlgallo
millatari oo aad u ballaadhan ka billaabay Ogaadeenya, kuwaasoo uu ku laayay
dadwayne rayad ah oo kumayaal gaadhaya, qaar kale oo aad u badana ay ilaa
iyo hadda ka buuxaan xabsiyada dulmiga ee gumaystada Itoobiya.
JWXO ayaa bayaankan
ku sheegtay in hadalka Zenawi ee xilligan uu u muqdo mid hordhac u ah
hawgallo kale oo millatari oo taliskiisu doonayo inuu Ogaadeenya ka
hirgeliyo, hase yeeshee waxay JWXO sheegtay inay diyaar u tahay inay
dadwayneheeda ka difaacdo taliska Zenawi een xilkaska ahayn iyo
millatarigiisaba.
Itoobiya oo u
hanjabtay Soomaaliya.
Xukuumadda
gumaysatada ah ee Itoobiya isniintii ku hanjabtay inay si toos ah u gai
doonto dagaallada ka soo cusboonaaday qaybo ka mid gobollada Soomaaliya
haddii ay maxkamadaha islaamiga ahi weeraraan goobaha ay dowladdu ku
meelgaadhka ah ee Soomaaliya daggan tahay.
Xukuumadda Itoobiya
waxay sheegtay inay difaaci doonto dowladda ku meelgaadhka ah ee Somaaliya
haddii ay maxkamadaha islaamiga ahi isku dayaan inay talada kala wareegaan
ama ay soo weeraraan goobaha ay dowladdu deggan tahay.
Xukuumadda
gumaystada Itoobiya waxay sheegtay in maxkamadaha islaamiga Soomaliya ay
donayaan inay khalkhal galiyaan dowladda ku meelgaadhka ah ee Soomaaliya,
isla markaana ay maxkamaduhu soo jiiteen dhammaanba dadka ay ugu yeedhay
inay argagixiso yihiin, sidaas darted ay la dagaalami doonto haddii ay
caddaato inay khatar galinayaan dowladda ku meelgaadhka ah.
Isniintii waxaa
magaalada Buurhakaba ka cararay ciidammadii dhawaan qabsaday oo u badnaa
kuwa Itoobiya, kuwaasoo magaalada ka cararay, ka dib markii ay xoogagga
maxkamadaha islaamiga Soomaaliya ku soo dhawaadeen nawaaxiga Buurhakaba.
Xubin kale oo ka
tirsanaa guddi ka warbixiyay xasuuqii kal hore oo soo cararay.
Xubin kale oo ka
tirsanaa guddi hadda ka hor loo saaray inay soo baadhaan xasuuqii ay
xukuumadda Zenawi u gaysatay dadkii kal hore ka gadooday musuqmaasuqii
doorashada ayaa dalka dibaddiisa u baxsaday, ka dib markii uu naftiisa u
baqay.
Guddigan ayaa
dhawaan soo saaray natiijada baadhistii ay xasuuqaas ku sameeyeen, waxayna
sheegeen in xukuumaddu ay xasuuqaas ku dishay 193 qof oo rayad ah, 40 ka mid
ahi ay carruur ahaayeen, isla markaana ay cidammada xukuumadda oo si toos ah
uga amar qaadanayay Meles Zenawi ay si bahalnimo ah ula dhaqmen dadkii
bannaanbaxyada samaynayay.
Ninkan waxaa lagu
magacaabaa Mitiku Teshome, wuxuuna xubin ka ahaa guddigii soo baadhayay
xasuuqa oo 10 xubnood ka koobnaa. Waxaana horay dalka uga baxsaday
guddoomiyihii guddiga iyo ku xigeenkiisii Frehiwot Samuel iyo Wolde-Michael
Meshesha.
24 October
2006.
|