Turaabiga Soomaaliya, Sheekh Shariif
C/Waaxid
C/hi Khaliif
London, UK
cabdulwaxid@hotmail.com
Ilaah baa mahad leh. Nabadgelyo iyo naxariis nabi Muxamed korkiisa ha
ahaato.
Xasan At-Turaabi wuxuu mar ahaa ninka ugu magac dheer Suudaan looguna
taageero badanyahay. Sida sheekh Shariif u ahaa guddoomiyaha fulinta
ururkii Maxkamadaha ayaa Turaabi ahaa hogaamiyaha dhaqdhaqaaqa Islaamiga
ee Ummadda (Suudaan). Waxaa Turaabi loo doortay wasiirka caddaaladda.
Markuu Suudaan ka dhacay cinqilaabkii uu horkacayey Cumar Al-Bashiirka
hadda madaxweynaha ah 1989 ayaa sumcadda Turaabi cirka sii gashay –
maxaa yeelay markaas labada nin waxay ahaayeen saaxiibbo isku koox ka
soo jeeda. Turaabi waxaa loo doortay inuu ku biiro golihii ummadda oo u
dhigmay barlamaan 1996 wuxuuna ahaa u hadlaha golahaas (sidii guddoomiye
baarlamaan).
Cadaadiska iyo Xil-ka-xayuubintu waxey muujiyaan sawirka saxda ah ee
qofka;
Waxaa cunaqabateyn la saaray Suudaan sida iyagoo lagu eedeeyey
argagixiso iyo kasoo-horjeedka danta reer Galbeedka. Waxaa kaloo lagu
heystay iney ka dambeeyeen isku-deygii dilka Xusni Mubaarak. Markaas
kaddib ayaa hogaamiyaha Suudaan bilaabay inuu iska fogeeyo Turaabi.
Sidoo kale markii maxkamadihii Shariifku guddoomiyaha ka ahaa laga awood
batay wuxuu la soo baxay sheeko kale oon gadaal ku arki doonno.
Saaxibadiisii kale ee wada kacdoonka Soomaaliya markay xoog badnaayeen
iyo hadda oo la joogo waxba iskama bedelin mowqifkooda. Turaabigii
calanwadeyn jiray waxaa xabsiga dhigay ninkii saaxibkiisa ahaa,
Al-Bashiir sanadkii 2004-tii. Sheekh Shariif ogaanteen waxaa xabsiga
dhigay Kenya markuu u adkeysanwaayey keymaha iyo dhoobeydii. Intuu
xirnaa waxaa la showray CIA iyo xubno ka socda safaaradda Maraykanka ee
Kenya.
Turaabi wuxuu la soo shirtagay fikrad ah in Islaamka la hormarinkaro!
Wuxuu fikraddiisa sal uga dhigay sheeko ay caan ku ahaayeen qaar ka mid
ah ururka Ikhwaanka oo ah: xoreynta haweenta muslimka ah.
Cilmaaniyiintuna waa qabtaa arrintaas. Iska daa ka hadalka dhaxalka iyo
jagada dumarku qabankaraane, Turaabi wuxuu aaminsanyahay haddii
haweyneyda Maraykanka ah ee Jendayi Frazer soo muslimto iney labada
Shariif iyo Soomaalidaba imaam salaadeed ugu noqon karto masaajidka
Isbaheysiga Islaamka ee Muqdisho ku yaal! Micnuhu waa hadday muslimto oo
iyagoo la shiraya waqtigii salaaddu soo gesho wey tujin kartaa iyaga!
Turaabi wuxuu aaminsanyahay in la mideynkaro Sunniga iyo Shiicada. In
heesaha iyo fanka la waafajiyo diinta Islaamka. Iyo in xuquuqda Islaamku
siiyey dumarka kor loo qaado! Waxay la tahay in Ilaah iyo Rasuulkiisu
(SCW) hagradeen dumarka! Ogoow waa Islaamka uu nabigu (SCW) lahaa
jannadu waxay ku jirtaa hoosta lugaha hooyada. Waa Islaamka leh:
hooyadaa ka horreysa aabbaha. Sheekh Shariif saaxibadiis qaar baa
aaminsan iney ka dookh fiican yihiin nabiga (SCW) hadduuba isu quuray
inuu guursado gabar 9 sano jirta! Jaahilkaasi wuxuu meesha ka saaray
iney Caa’isho oo 9 sano jirta kheyr lala maagay. Been maaha iney da’
yarayd laakiin Ilaah baa u doortay iney ku barbaarto oo afo ka noqoto
gurigii ugu fiicnaa adduunka. Yaa arkey qof dumar ah oo heysata
xiriirkii iyo ciyaartii ay Caa’isha (RC) ku heysatay nabiga (SCW)? Soow
hooyadeen Caa’isha maaha qofkii nabiga (SCW) ka dalbeysay inuu la
daawado tabobar iyo ciyaar ay qolyo muslimiin ahi ku dhexsameynayeen
masaajidka dabadeedna inta nabigu (SCW) irrida masjidka ee gurooga
hortooda istaagay buu yiri garkaaga soo saaro garabkeyga dabadeedna
daawo. Yaraantaas baa keentay in loo tabobaro caado aysan Carabtu horay
u aqoon oo ah si fiican ula-dhaqanka xaaska. Yaa maqlay Caa’isha (RC) oo
murugeysan markey arooska ahayd? Maalmo kaddib? Bilo kaddib? Sanado
kaddib? Dhimashiii nabiga kaddib? Xitaa intey yarayd oo ay arooska ahayd
waxay sii wadatay xoriyad ka sii badan tey ku heysatay guriga aabbaheed.
Waxay guriga nabiga (SCW) keeni jirtay gabdho. Laanta waxaa la toosin
karaa markey curdan tahay. Ilaah baa Xaakim ah laakiin waxaan fahmayaa
in yaraantu faa’iidadaas lahayd. Marka Caa’isha waxaa lagu barbaariyey
mucaasharada toosan ee saxda ah. Halka lammaane badan oo Yurub u dhashay
oo markey bannaanka joogaana isu qosla laakiin markay khamri cabbaan
nimanku xaasaskooda dilaan. Xitaa reer Galbeedka, lammaanayaashii si
fiican isu dhaqda waxay arrintaas kaga daydeen nabi Muxamed (SCW) ileyn
nabi Ciise (CS) kumeynaan maqal guure.
Sheekh Shariifkii shalay lahaa waxaan diyaar u ahay inaan ummadda
Soomaaliyeed ugu shaqeeyo diintooda ayaa hadda leh waxaan isu keenayaa
Bush iyo muslimiinta! Wuxuu rabaa inuu wax la qeybsado
Ashahaado-la-dirir sida korneylka, Cabdi Qeybdiid iyo Maxamed-dheere
(sheekadii Turaabi ee Sunni iyo Shiico). Waxaad moodda inuu leeyahay
waqtigan oo kale markii la joogo xalka lagama raadsho Islaamka ee waa in
la aqbalo sheekada Bush iyo Golaha Ammaanka oo isla Bush horboodo.
Sheekhu Tusaalihii uu usoo qaatay heshiiskii Xudeybiya oo intuusan
BBC-da ka oran aan maqaal ugu digay in dad badan oo khiyaamo raba ay
tusaale usoo qaataan heshiiskaas. Bal aan wax ka iftiimiyo:
- Xagee Xudeybiya ku taal? Waa Makah duleedkeeda. Nabiga (SCW)
waxaa markaas saldhig u ahaa Madiina mana xukumin Makah. Marka
nabiga (SCW) iyo saxaabadu iyagaa cibaado raadsanayey ee cidna ma
soo weerarin lamana qabsan. Tusaalihiisu wuxuu sax noqon karaa
innagoo rabna inaan Jigjiga iyo Diridhaba qabsanno ama galno oo la
yiri intaad dagaali lahaydeen joojiya oo sanado kaddib baad si nabad
ah ula wareegi doontaan.
- Markii dagaalkii dhufeyska/Axzaab Madiina la soo weeraray ayaa
nabigu (SCW) u turay Ansaar oo wuxuu yiri huwanta Qureysh la socota
qaar aan timir siinno si ay dagaalka uga baxaan. Sacad Binu Mucaad
(RC) baa yiri nabi Allow ma Waxyi baa mise waa talo? Nabigu (SCW)
wuxuu yiri: waa talo. Sacad wuxuu yiri: markaan gaalada ahaynba baad
maanu bixin jirin oo waa naga iibsan jireen timirta marka annagoo
hadda muslim ah ma bixineyno baad. Ummad la hareereeyey baa diiday
iney xoogaa timir ah bixiyaan iska daa iney mabda’ooda Islaamka ah
ka tanaasulaan ama cadow kale u yeertaane. Nasiibdarro dad muslim
sheeganaya baa timir la siinayaa si waddankooda loo gumeysto,
muslimiintana loo laayo.
- Nabiga (SCW) iyo saxaabada (RC) waajib kuma ahayn aadidda
Kacbada markaas keliya waxay u socdeen Cumro aan markaas waajib
ahayn. Waxay ogaayeen iyadoon cidna loo diidin Kacbada. Waxay
ogaayeen in qofku xitaa uusan Xaramka kula dagaalin qofkii aabbihiis
dilay. Marna muslimiintu isma oran iyagoo qaarkood ka yimid Makah
baa loo diididoonaa Guriga Ilaahay. Marka halkaas waxaa ku ceeboobay
Qureysh oo muslimiinta ula soo baxay ged aysan horay u aqoon. Waa
taas midda keenta in reer Galbeedku ka hadlaan caddaalad iyo wanaag
laakiin haddii koox muslimiin ahi wanaagaas keento waa isla iyaga
kuwa la dagaala!
- Xitaa qoddobkii ay muslimiintu ka cabaneysay ee ahaa qofkii naga
soo muslima noo soo cesha ma hirgelin oo qofkii soo muslima Madiina
ma soo aadijirine wuxuu aadi jiray meel dhexe markaasu Qureysh iyo
safarkeeda la dagaali jiray ilaa Qureyshi tiraahdo: wixii naga soo
muslima ha kuu yimaadeen ee naga celi yeysan jidka noo galine.
- Marka Shariifku ha sheego meeshay ku taal iyadoo waddan muslim
la heysto in tusaale loo soo qaato heshiiskii Xudeybiya? Wixii
lalahaa hanaga joogeen Xudeybiya waxay ahaayeen muslimiinta. Marka
sheekhoow mas’aladaas ku noqo.
Marka heshiishkii Xudeybiya ma tusinayo in muslimiintu ay wax ka
badeleen manhajkooda. Heshiishkaas waxaa ceeb iyo guuldarro ka raacday
Qureysh. Halka sheekh Shariif leeyahay ciidamadii UN-ka ah ee la ogaa
waxay ka sameeyeen meelo u dhow meesha Shariifku kasoo jeedo – Jowhar!
Maxaa laga sheegay kuwii la geeyey Baladweyne? Kuwii ciyaalka dabka
korkiisa ku soloyey ee Kismaayo joogay? Kuwii kumaankunka qof ku laayey
Xamar? Ciidamadii UN-ka ee Holland u dhashay ee muslimiintii Bosnia
hoosaasiyey waatii iyagoo indhahoodu shan yihiin ay Serbia hoostooda
kala baxeen. Kuwaan Ugaandha iyo Burundi u dhashay mey ka ceshaan
shacabka Soomaaliyeed Tigreega? Mise sheekhu wuxuu leeyahay kuwa cad baa
naxariis badan? Oo Holland miyeysan caddaan ahayn ileyn caddaankii kale
ee u dhashay Bosnia difaaci waayee? Xitaa haddii la keeno ciidamo UN ka
socda; Zenawi markuu rabuu soo galayaa Soomaaliya haddii aan la xanuujin
oon xoog looga saarin. Marka Shariifku wuxuu rabaa in kacdoonka shacabka
laga dhigo sacabooley.
Dadka waddada Turaabi raaca waxaa u dambeeya ceeb iyo sumcad darro.
Waxaa Ilaahay dabodhigay iney khalad ka raadshaan Islaamka. Intaas oo
xaddiis bey diideen. Xaddiisyo saxiix ah bey diideen markay caqligooda
isticmaaleen. Waxaa ka mid ah haddii diqsi ku dhaco cabbitaan maxaa la
sameyn. Turaabigii ku doodi jiray diinta Islaam hadda wuxuu la ururyahay
kuwo xitaa aan muslim ahayn isagoo cimrigiisa ku soo khatimay inuu u
khidmeeyo Dimuqraadiyad ka dhalata Suudaan. Sidii horay loo yiri soow
Shariifka ma ahan ninkii qorigu deegta u saarnaa meel Baydhabo u dhow?
Meeday Shareecadaad ka hadli jirtay? Dhowr beri ka hor waxay Nairobi ka
lahaayeen waxaan wax ka sugeynaa Golaha Ammaanka/Bush halka muqaamadu
leeyihiin Ilaahay bey xal ka sugayaan. Marka see loo simi dad noocaas
ah.
Shaki iigama jiro haddii Bush iyo Golaha Ammaanku Turaabi usoo
wakiishaan arrimaha Soomaaliya in la arki lahaa dad badan oo Kenya,
Yurub iyo Ameerika jooga oo soo dhoweynaya. Ka warran boqollaalkii
Shariifka ugu tagay hoolka Hilton? Kuwii ergeyga gaarka ee wakiilka
Qaramada Midoobay ugu tagay London? Waa dhici kartaa in Axmed Cabdallah
uu daacad ka yahay laakiin su’aashu waxay tahay yaa soo diray? Xoghayaha
Guud ee Qaramada Midoobay. Yaa doortay xoghayaha? Bush. Yaa Zenawi ku
fasaxay Soomaaliya? Bush. Waagii hore Maraykanku hal mar ma wada
isticmaalijirin usha iyo karootada. Sheekha saaxibadiis waxaa laga
ugaaranayaa keymaha isaguna huteelo buu ku raaxeysanayaa saasooy tahay
waxay la tahay inaysan jirin cid uga dadaal badan qayidda Soomaaliya!
Qolyaha Casmara laftoodu wey ku khaldanyihiin in ay Xuseen Caydiidka
sanka dadka ka geliyaan. Sheekh Xasan Daahir waxba kama sheegi karo
sheekh Shariif haddiiba uu u arko Xuseen Caydiid halgame. Teeda kale
waxaan kula talinlahaa ineysan khiyaamo dambe gelin oo aysan wax la mid
ah Xuseen Caydiid u magacaabin jago. Haddii kale berri buu isagoo
guddoomiye sheeganaya magaciinna la geli doonaa waddan kale. Hadduu rabo
dib buu Zenawi ugu noqon.
Hal xaaraan ahi ma dhasho nirig xalaal ah. Haddii khiyaamo la geeyo
Xaramka ma noqoneyso wax fiican. Soow Cali Mahdi iyo boqollaal odey lama
geyn Sacuudiga bilo ka hor? Maxaa ka soo baxay? Marka haddii labada
Shariif iyo Nuur-cadde tagaan Xaramka ama Sacuudiga maxaa iska bedelaya?
Ilaah baa mahad leh oo Gabre ma tagi karo Makah sabab cad owgeed. Ogoow
haddii Bush ku guuldarreyso inuu Gabre geeyo Xaramka wuxuu si dadban u
geynaa ergeyga Axmed ileyn isagu waa muslime! Haddii ergey Axmed oo
keligiis ah ama waddankiisa ka socdo uu arrimaha Soomaaliya ka
hadlilahaa dhib uma arkeen ciddii u tagta laakiin mar hadduu si dadban
uga socdo Bush micno ma leh wixii meeshaas ka soo baxa. Marka Turaabigii
la ogaa ee adduunkoo dhan ka cabaaday (waxay u qabeen muslim daacad ah)
wakaas maanta ku hadlaya wax aan soo marikarin afka Bush! Sidoo kale
sheekada sheekh Shariif waxaa la yaabban dad badan oo reer Galbeed ah oo
leh: oo ninku cidna ma xukumee maxuu la shirtagayaa? Marka sheekhu wuxuu
jantay inuu ku noqdo meeshuu ka soo bilaabay siyaasadda oo ah gacan-yare
Maxamed-dheere. Marka wuxuu ku dambeyndoonaa inuu gacan-yare u noqdo
Gabre oo isagu sii xukuma korneylka iyo Maxamed-dheere. Sidaan horay u
iri waxaad mooddaa in la soo celin doono dagaalkii ahaa Abgaal iyo
Habargidir si Tigreegu nafis u helaan. Marka bal aan aragno waxa
Shariifku ka dheefo.
C/Waaxid C/hi Khaliif
London, UK
cabdulwaxid@hotmail.com
Abuu Mansuur Vs Sheekh Shariif
Daabaco
Boggan | Print
Xaggee
Marayaa Heshiiskii C/llaahi Yuusuf iyo Shirkadda Militariga Faransiiska...
Kalfadhigii 20aad ee Golaha Wakiillada Puntland oo Ka
Furmay Garoowe...
