Mahad Ilaah baa iska leh,
Nabad iyo Naxariisna Nabi Maxamed korkiisa ha ahaato.
Haddii aan Soomaali nahay
ficilkaan falayno kama fiirsanno. Markaan cabanayno aflabadi baan yeernaa.
Markaan qoslayno hilibdalqadaan muujinnaa!! Markaan baryootamaynana beerkaan
gacanta saarnaa!!
Markii dawladdii ciidammada,
kadibna Kacaanka la baxday laga agabwaayey duco iyo habaarba waa la isku
daray sidii looga hoos bixi lahaa, hasayeeshee ducada laguma darin in mid
dhaanta Ilaah noogu baddelo!! Habaarkana looma meeldeyin!! Kadib markii agab
iyo arxan midna laga waayey af iyo adin baa la isku daray sidii loo ridi
lahaa, hasayeeshee markaanna wax dhaama in lagu beddelo laguma dadaalin,
wixii laga cabanayey inaan lagu dhicinna lagama fiirsan. “Waxaan nahay
ummad waxa markaa horyaal oo kaliya aragta, oo aan fiiro dheer lahayn”.
Haddii la kala irdhoobay oo
qolo waliba tuuladeedii xayndaab ka samaysatay lama xulan xal-yaqaan iyo
xaajo-kalkaal, ee waxaa caado noqotay in la yiraahdo “wax xun wax ka xun baa
loo raadsadaaye”, haddii reerka xurguftu nagadhaxayso madhalays hoggaanka u
hayo innagana madhalays indhoole ah inoo doona!! Waana taas midda keentay in
14 shir oo la isugu yimid wax horumar ah looga gaari waayey, waayo madhalays
iyo indhoolayaal ayaa qolo walba u matalayey.
Aadanaha qalad waa ka dhacaa
oo waa arrin dabiici ah, waxaase doqonniimo ah in qaladka la isaga socdo oo
aan marna laga waantoobin!! Shirkii Carte iyo dawladdii C/qaasim Salaad
madaxda ka ahaa kadib waxaan islahaa xoogaa ayaa waqtiga iyo waayaha laga
faa’iideysan doonaa salfudaydkana laga kori doonaa!!
Waxaan niraahnaa “Gar laba nin
kama wada qosliso”. Waa run oo Soomaalidu run waa maahmaahdaa, runse kuma
dhaqanto. Dhaqan xumadaasna waa arrin salka ku haysa xaasadnimo, fuleynimo
ama maangaabnimo in nin ama kooxi kii ama kuwii tartanka ama tabcada uga
guuleystay ay ka daboqaataan, isqabqabsi iyo muranna aan waligood laga
gudbin.
Sidii aan looga fiirsan
hooshkii, halaambaydii iyo washamsidii lagu qaaday dawladdii Marxuum Maxamed
Siyaad Barre madaxda ka ahaa, ayaan looga fiirsan murankii iyo mucaaradkii
lagala hortagay tii lagu baddalay ee Cali Mahdi madaxda ka ahaa. Sidii aan
looga fiirsan minjoxaabadii iyo magrigii lagala horyimid dawladdii C/qaasim
madaxda ka ahaa ayaa tan C/laahi Yuusuf hormuudka ka yahayna mindiyo
dhaadheer lala goobayaa!!
Waa su’aale haddaba
siyaasiyiin maxaad rabtaan? Odoroskiinnu gaabanaa? Dulqaadkiinnu yaraa?
Damiirkiinnu liitaa? Maxamed Siyaad isagoo da’ ah oo idin leh doorasho
xisbiyo badan ayaan ogolahay ee haloo tartamo ayaad ku diiddeen oo kala
doorransiiseen geeri iyo ihaano (humilation) wuxuuna doortay geeri, in badan
oo aan yarayna waa la dhimatay!! Cali Khalaaif Galaydh isagoo shaqo ugu
maqan dawladdii uu madaxda ka ahaa ayaa shaqadii laga eryey!! C/qaasim mar
uu dalbaday saddex beri oo uu axdigii isagoo maqan la isku raacay kusoo
akhristo ayaa lagu diiday kadibna waxay keentay in bilo badan lagu lumiyo
sidii la isugu soo noqon lahaa oo shirku usii ambaqaadi lahaa!! Cali Maxamed
Geeddina isagoo qalad iyo sax wuxuu soo wadaba idinku soo maqan oo laba ama
saddex beri gudohood idiin imaan lahaa ayaad dawladdiisii kala dirteen!!
Siyaasiyiin salfudaydku waa maxay?
-
Siyaasadda waxaa loo
galaa, ma aha seegseege
-
Saadaashiyo waxaa
laga bartaa, say hadhow noqone
-
Salaqlaha maxaad uga
heshaan, subaxba meel aadka?
-
-
Salfudaydka waa loo
ogaa, wiil sagaal jira’e
-
In siyaasi uu
gebidhacaa, ma aha sooyaale
-
Sida dhaama
nimanyahow xilligu, waa na sigayaaye.
Gunaanad iyo gebagebo waxay
tahay, shacabka Soomaaliyeed waa daallanyahay. Nafi ku simimayso inta aad
kursiga, dhadhanka iyo dheefta wasaarado aan jirin isku haysataan! Waa laga
dheregsanyahay in dhammaantiin ay idinku yartahay waddaniyaddu oo waxa aad
isku haysataan ay tahay dano shaqsi ah iyo colaadin hoose.
Isku xishooda waxaad marti u
tihiin dad idin lamid ah oo idin layaaban! Ka fiirsada in aad xukuumad danbe
deg deg ku riddaan, is barbardhiga carada iyo ficilada dhexdiinna ah iyo
dhibka ay u geysan karto mustaqbalka ummad dhan.
-
Cagtaad dhawrsan
weydaba marbaad, meel xun dhigataaye
-
Dhabaqdhabaqdi hore
iyo la fahan, dhagarfalkiineeye
-
Dhammaan shacabku
waa wada arkaa, dheeshu say tahaye
-
Ka dhursuga marbaa
laga dhex helin, miday ku dhaataane
-
-
Dhallaan iyo
cirrooliyo hablaha, meelkastaba dhooban
-
Gadhmadoobe caatada
la dhacay, dhabarku uu laammay
-
Dhibka adinku aad
geysateen, baa ka dhigay saaye
-
Ka dhursuga marbaa
laga dhex helin, miday ku dhaataane
-
-
Dhabbahaad
istaagtaba kun baa, haadda loo dhigaye
-
Dhurwaagaa ku
meyracda hilbaha, dhooliyo haldhaaye
-
Dhaxantay badh
jiifaan, hablihii dhabancas taahaaye
-
Ka dhursuga marbaa
laga dhex helin, miday ku dhaataane
………………DHAMMAAD…………………………
Ilaah baa maciin leh
Gaalnimaa mugdi leh
Mahadna waalid baa mudan
Cumar Cabdinuur Nuux –
Nabaddoon
omarabdinur@hotmail.com