Samsam

Xeer Jabjab Lagu Furdaaminayo Dhibaatadii Loo Gaystay Samsam

Waxaa gebi ahaanba socon wayday weecintii kiiska lagu weecinayay ee ahayd Samsam waxay shirqooalaysay Axmed Yuusuf Yaasiin

Cabdi Xasan Somalitalk/Muqdisho
Email: abdi172@hotmail.com

December 8, 2004

Wararka naga soo gaaraya magaalada Hargaysa waxay sheegayaan in si xeer jabjab ah lagu dhamaynayo dhibaatadii iyo tacadigii ka dhashay Samsam Axmed Ducaale, oo si naxariis darro ah ay u faro xumeeyeen ilaalada madexweyne ku xigeenka Somaliland Axmed Yaasiin horaantii bishii ogosto.

Ilo kala duwan oo ku sugan magaalooyinka Hargaysa iyo Boosaaso ayaa noo xaqiijiyay in madexweyne ku xigeenka uu eedda gabadhaas hadda rabo inuu iska fogeeyo oo uu saaro cid kale, kadib markii Samsam ay qof kasta u sheegtay in si xun loola dhaqmay oo waliba guriga madexweyne ku xigeenka lagu faro xumeeyay.

Wararkii u dambeeyay waxay sheegayaan in odayaal kasoo jeeda beesha Samsam hooyadeed kana tirsan maamulka S/Land ay hadda arrinta la wareegeen, kuna dhamaynayaan in marka hore lasoo daayo Samsam iyo waliba ciddii darteed loo xiray sida tagsiilihii geeyay guriga iyo 4tii qareen ee u doodayay samsam, bedelkeediina laga weeciyo dhibkii iyo faroxumayntii loogu gaystay guriga madexwne ku xigeenka, taasoo warar aan la hubin sheegayaan in larabo in la yiraahdo askar fakatay baa faraxumeeyay gabadha, kadibna xaal mastuur dawladdu ula xaajoodaan gabadha ehelkeeda jooga Hargaysa ee abtiyaasheeda.

Waxaa gebi ahaanba socon wayday weecintii kiiska lagu weecinayay ee ahayd Samsam waxay shirqooalaysay Axmed Yuusuf Yaasiin, dhibkii loo gaystay gabdhaas ardayadda ahaydna waxaa ka dhashay in qofkii u dooda xuquuqdeeda loo hanjabo amasse la xiro, Haddase waxaa muuqata in maamulka Hargaysa uu maqlaayo ajnabiga sida Amnesty International oo dhawr qoraal kasoo saaray codsadayna in si dedega loo soo daayo Samsam kuwii gaystay gefkaasna lasoo taago sharci madaxbanaan oo caddalaad ku dhisan.