Sahid oo 9-jir ah, oo hor taagan naxashkii uu ku jirey aabihiis Allah ha u naxariistee Marrxuum Xassan Yusuf Sawirka: edmontonjournal

Edmonton: Maalinimadii Jimcada (April 15) ayaa meydkii marxuum Hassan Mohammed Yussuf (Allah ha u naxariistee) lageeyey Masjidka Al-Rashid ee magaalada Edmonton si halkaas salaatul Jinaazada loogu tukado looguna duceeyo Marxuumka.

Jariidada Edmonton Journal oo halkaas ka warbixineysey waxa ay tiri: masjidka ugu weyn Edmonton guduhiisa ayaa naxash cagaaran oo meydka marxuumku ku jirey waxaa ag fadhiyey toddoba carruur ah ee marxuumku dhalay. Masjidka ayaa dadkii qaadi waayey, intii uu masjidku ka buuxsameyna waxay istaageen bannaanka masjidka, dhammaantoodna marxuumka ayey u ducaynayeen.

Dadku markii ay u ducaynayeen marxuumka, afar gabdhood oo marxuumku dhalay waxay la fadhiyeen hooyadood, Farha.

Iimaamka Masjidka, Tamer Ali, oo khudbad akhriyey waxa uu dadkii masjidka yimid u sheegay in marxuumku ku dhintay Jihaad uu ugu jirey qoyskiisa. Waxana uu Imimaamku Allah ka baryeey in uu marxuumka u naxariisto.

Marxuum Xassan waxa uu Soomaaliya ka kayimid sannadkii 1992. Da'diisuna waxay ahayd 41-jir.

Markii Salaatul Jinaazadii lagu tukaday, kaddib qiyaastii 2:40 p.m ayaa naxashkii marxuumka laga soo saaray masjidka, waxaana loo qaaaday xabaalaha, waxaana meydka sii raacay xayn gawaarida taxiyada ah.

Wargeyska Edmonton Journal waxaa lagala xiriiri karaa: vjones@thejournal.canwest.com

Kanada: Saynis-yahan Soomaaliyeed oo Meydkiisii laga helay Taxi uu Wadey

The Ottawa Citizen | April 14, 2005 | Updated: April 15 | tajumadii SomaliTalk.com

Hassan Mohammed Yussuf Sawirka: The Ottawa Citizen

Sida ay werisey jariidada The Ottawa Citizen, waxaa magaalada EDMONTON ee gobolka Alberta oo ku yaal galbeedka dalka Kanada meydkiisii laga helay nin Soomaaliyeed oo Ottawa ka ahaan jirey taxi wade, ninkaas oo xaaskiisii iyo toddoba carruur ah oo ay weli ku noolyihiin Ottawa, waxaa meydkiisa laga helay asagoo ku dhex jira dhanka dambe ee gaari taxi ah oo uu asagu wadey.

Hassan Yussuf [Hassan Mohammed Yussuf]oo laajinimo kaga yimid Soomaaliya, kaas oo haystey laba shahaado oo uu ku qaatay cilmiga sayniska, kaas oo awood u lahaa in uu ku hadlo shan luqadood, waxa uu dhowaan tegey magaalada Edmonton asagoo ka soo kicitimay Ottawa si uu halkaas uga kasbada nolol ka fiican. "Ma garanayo waxa aan dareemay xalay markii aan maqlay warkaas" ayey tiri xaaskii Mr.Yussuf oo magaceeda la yiraahdo Farha Yussuf, sidaas oo ay xalay u sheegtay jariidada The Ottawa Citizen.

Xaaska oo 40-jir ah waxaa loo qaaday magaalada Edmonton ayada iyo afar kamid ah toddobadooda carruurta ah. "wuxuu ahaa nin aad u xanaano badan" ayey tiri.

Mr. Yussuf wuxuu Ottawa uga tegey sidii uu uga faa'iidaysan lahaa dhaqaalaha kobcaya ee magaalada Edmonton, asagoo rajaynayey in nolol ka wanaagsan uu qoyskiisa u samayn lahaa, kuwaas oo qorshohoodu ahaa in ay ka daba yimaadaan bisha June. Waxa uu Kanada yimid sannadkii 1992 asagoo markaas kasoo qaxay dalkiisii hooyo ee dagaalku halakeeyey. Xaaskiisuna waxay halkan kaga daba timid sannad ka dib. Waxa uu rajaynayey in uu dalkan Kanada ka helay shaqo wershedaha badan ee beeraha maadaama uu cilmiga beeraha "agricultural sciences" uu kusoo bartay Muqdisho iyo dalka Ruushka.

Jariidada The Ottawa Citizen oo hadalkeedii sii wadata waxay tiri, in kasta oo uu Mr. Yusuf haystey laba shahaado, hadana waxa keliya oo uu helay shaqo ah "part-time" oo ah Taxi-Wade. Waxa uu aadey Edmonton, waxana qoyskiisu qorshaynayey in ay ka daba tagaan bisha June.

Xilli dambe oo ah habeenimadii Talaadada ayaa dembi baarayaasha Edmonton waxay heleen meydka Mr. Yusuf, kaddib markii loo soo sheegay in gaari Taxi ah oo laga tegey uu yaal meel ka dambaysa maqaasiin ah "liquor store". Halkaas oo ay boolisku ka heleen nin lagu qiyaasay afartaneeyo oo meydkiisii lagu qariyey qaybta gadaal ee gaari Taxi ah oo midabkiisu yahay huruud. Garigaas taxi-ga oo laga yaabo in uu halkaas yaaley ilaa horaantii maaliimadii Jimcada (April 8) ee la soo dhaafay, sida uu sheegay Chris McLeod oo ah afhayeenka booliska Edmonton.

Qoyska Marxuum Hassan Mohammed Yussuf Sawirka: The Edmonton Journal

Boolisku waxay sheegeen in aysan meydka si waadax aqoonsigiisa u sheegi karin ilaa dhakhaatiirtu cadeeyaan maanta.

"Waxay ila tahay in qof kasta ay tahay in uu welwelo," ayuu yiri Mr. McLeod oo intaas ku daray "xaqiiqadii waa fal dembiyeed argagax leh, waana arin aan lagu aqoon magaaladan".

Mr. McLeod waxa uu yiri waxaa hal-mar afar boolis ah isku mar loo soo sheegay (tip) arintan habeenimadii Talaada. "Taas oo la yiri in gaari taxi ah uu yaalo dhanka woqooyi ee magaalada, taas oo meyd nin uu ku jiro" ayuu yiri, waxana uu ku daray baaritaanku hadda ayuu bilowday, sidaas daraadeed weli lama garanayo xaqiiqo ahaan waxa arintan sababay".

Arrintaas ilaa hadda cidna looma xirin ayey tiri jariidadu. Dilkan oo ahaa kii sideedaad ee sannadkan ka dhaca magaalada Edmonton. [War arintaas kusoo kor dhay oo ah in qof la xiray hoos ka akhri]

Taxi-wadayaasha Edmonton waxay shalay sheegeen in ay aad uga xumaadeen in shirkada leh taxi-ga aysan wax warbixin ah ka bixin in taxigu maqnaa ilaa fiidkii talaadada. Haddii qiyaasta boolisku ay sax tahay, meydka Mr. Yusuf waxa uu gaarigaas taxi-ga ah dhankiisa dambe ku jirey shan maalmood, kahor intii aan shirkadaasi cidna ku war gelin in wax ka maqan yihiin.

Meydka Mr. Yusuf waxaa la helay qiyaastii 11 p.m. ee maalintii Talaadada.

Agaasimaha shirkada leh taxiga "shirkada Yellow Cab" oo magaciisa la yiraahdo Sid Slach waxa uu sheegay in shirkadu ay booliska kala shaqaynayso baaritaanka, laakiin waxa uu diidey in uu faahfaahin dheeraad ah bixiyo ayey kusoo gabagabaysay jariidada The Ottawa Citizen oo aan warkaan ka soo tarjumney.

Hal Qof oo Loo Xiray Dilkii Marxuumka, labo kalena waa la raadinayaa::

• The Edmonton Journal
  Qorayaashii jariidada The Edmonton Journal waxaa laga xiriiri karaa emailada hoose:
  vjones@thejournal.canwest.com
  bmah@thejournal.canwest.com

sawirka:ottawacitizen

Jariidada kale ee lagu magcaabo The Edmonton Journal waxa ay sheegtay in 24 saacadood ka dib markii lahelay meydka marxuum Hassan Mohammed Yussuf in dilkiisa loo xiray hal nin oo magaciisa la yiraahdo Karl Blair Strongman kaas oo 25-jir ah, waxaana ninkaas la xiray habeenimadii Arbacada. Waxaa kale oo dilkaas marxuumka loo raadinayaa laba nin oo kale oo ah: Ronald Adrian Crane oo 27-jir ah, iyo Deidre Renee Baptiste oo 23-jir ah.

Warar taas ka dambeeyey ayaa sheegay in Ronald Adrian Crane, 27-jir, iyo Deidre Renee Baptiste, 23-jir, ay labaduba isu dhiiben booliska magaalada Edmonton. Waxaya isu dhiibeen habeenidamii Khamiista ee Jimcadu soo geleysey (qiyaastii 11:00pm).

Kulan ay Edmonton ku yeesheen 30-taxi wade ayey ku sheegeen in ay aad ugu xanaaqsan yihiin shirkada taxi-ga leh sabatoo ah waxaa la sheegay in shirkadaas uu wacay qof ay isku guri deganaayeen marxuumka waxana uu wacay maalmihii Jicamadii la soo dhaafay iyo Sabtidii, sida wargeyska hore xusayna shirkadaasi ma soo sheegin in wax ka maqan yihiin.

Lama oga in marxuumku uu meyd ahaa markii Taxiga looga tegey iyo in asagoo meyd ah halkaas lagu ridey. Warkaas waxaa ku soo kordhay in boolisku ay u malaynayaan in marxuumku noolaa markii lagu ridey dhanka dambe ee gaariga.

Warar kale oo ay werisey jariidada The Ottawa Citizen in Hassan Yusuf oo ahaa 41-jir, markii meydkiisa ay dhakhaatiirtu baareen la arkay in minti in badan lala dhacay, taas oo mid kamid ah ay sambabka haleeshay.

Waxaa boolisku sheegay in Hassan Yusuf uu Taxiga ku qaaday laba nin iyo laba naagood, uuna ka qaaday meel u dhow barta la yiraahdo "Mac's convenience store". Waxayna yiraahdeen noo qaad dhankaas iyo meel u dhow Alberta Hospital - waa aaga cirifka woqooyi ee magaalada. Markii uu taxigii istaagey ayey la soo degeen Xassan oo kubilaabeen in ay mindi la dhacaan. Xasan wuxuu isku deyey in uu dagaalamo laakiin mindi ayaa ka haleeshay Sambabka. kaddib mid nimankii ka mid ah ayaa Taxi-ga cillad ka geliyey qalabka lagu garto meesha uu marayo gaarigu ee loo yaqaan GPS (global positioning system), kaddib waxay Xasan Yusuf dhex geliyeen dhanka dambe ee gaariga, waxayna gaarigii kaga tageen meel u dhow maqasiin lagu gado Khamriga (liquor store).

Waxaa wararku intaas ku dareen in ay qaatiliintaasi marxuumka ka qaateen $2,000, shan-jeer ama ka badana ay toorey la dhaceen, oo markaas gaariga dhankiisa dambe ku rideen, halkaasna uga tageen.

Qiyaastii 100 taxi ayaa khamiistii ku wareegastey guriga magaalada Edmonton looga arimiyo ee loo yaqaan City Hall, ayagoo ka bannaanbaxaya dilka Marxuum Hassan Mohammed Yussuf - Allah ha u naxariisto.

ISHA: English Version: Ottawa Citizen and edmontonjournal | Tarjumadii SomaliTalk.com

USA: Ciidanka Booliska ee magaalada GILBERT ee gobolka Arizona ayaa abaaray wax ka qabadshada iska hor imaad dhex maray laba qoys oo ka yimid dalka Soomaaliya kaddib markii qoys kamid ah uu kusoo waramay in qoyska kale uu soo weeraray habeenimadii Talaadada.

Sida ay ku warantay jariidada "The Arizona Republic" cadadkeedii soo baxay April 14, 2005: waxaa loo malaynayaa in iska hor imaadku uu bilowday Isniintii kadib markii nin 21-jir oo deggan Gilbert, Arizona uu ladagaalamay nin kale oo deggan Phoenix, Arizona uuna kula dagaalamay arin la xiriirtay haweeney, sida ay boolisku sheegeen.

Ninka uu qoyskiisu degan yahay Gilbert dagaalkaas waa laga adkaaday, taas oo sida muuqata loo malaynayo in ay tahay sababta ay qoyskiisu uga aargoosaanayeen ninka qoyskiisu deggan yahay Phoenix, sida uu sheegay Lt. Joe Ruet oo afhayeenka booliska Gilbert.

Qiyaastii 11 p.m. Talaadadii, laba walaalo ah oo Soomaali ah oo ka tirsan qoyska deggan Phoenix iyo saddex reer Suudaan ah ayaa soo weeraray guriga qoyska deggan Gilbert, markaas oo ay guriga ku jireen labo dumar ah iyo labo carruur ah, sida uu boolisku sheegay.

Boolisku waxay u malaynayaan in shanta nin ay soo jebiyeen albaab muraaya ah oo xiga dhanka dambe ee guriga (ku yaal aagga 1500 block ee East Cheyenne Street), ayuu yiri boolisku.

Markii hore waxaa loo maleeyey in qof dumar ah oo da'deedu tahay 52 wadnuhu istaagey (arrintaas darteed), laakiin markii dambe cisbitaalka waa laga soo saaray.

::SOOMAALIDA & SACUUDIGA::

Waraysi Nin 15 sano deganaa Sacuudiga... Guji...

Booliisku waxay sheegeen in afar nin ay ku carareen lug, halka mid kamid ah labada walaalaha ah oo magaciisa lagu sheegay Muhsin Abdulkadir oo da'diisu tahay 16-jir uu ku fakaday gaari ah nooca loo yaqaan BMW oo ay wadey walaashiis oo lagu magcaabo Fatima Abdulkadir oo da'deedu tahay 19-jir. Booliisku waxay rumaysan yihiin in ayada lagu soo khasbay in ay shanta nin ee weerarka ah gaariga ugu soo qaado Gilbert ayagoo ka imanaya Phoenix, sida uu sheegay boolisku.

Boolisku waxa ay sheegeen in ay arrintaas ka war heleen markii dad deriska ah ay soo sheegeen in qof dumar ah la jiidayey ayadoo timaha la hayo iyo in niman ay ka soo boodayeen derbiga dhanka dambe ee dayrka oo kusoo boodayeen. Markii nimankii sii cararayeen, waxaa guriga yimid ugu yaraan afar nin oo qaraabo la ah qoyska deggan Gilbert, nimankii markii hore weerarka ahaa ayey cayrsadeen. Mid kamid ah kuwii wax cayrsaneyey oo lagu magcaabo Abdullahi Ahmed oo da'diisu tahay 25, ayaa waxa uu BMW-ga ka daba qaatay gaari noociisu yahay Chrysler in yar markii uu cayrsanayey oo ay gaareen meel u dhow isgoyska Palo Verde Street & Val Vista Drive ayuu gaarigii ku hor gooyey, taas oo sabatay in BMW uu shil galo, ayuu yiri boolisku.

Abdullahi Ahmed iyo kuwo kale waxa gaariga ka soo jiideen Muhsin iyo Fatima Abdulkadir, dib ayeyna gurigii ugula noqdeen, waana garaaceen, ayuu yiri boolisku.

Ali Shairf Maye oo 22-jir ah, Abdul Ahmed oo 26-jir ah, iyo nin saddexaad ayaa qabtay Muhsin walaalkiis (waa Massalah Abdulkadir oo 18-jir ah'e), waxayna ka soo qabteen meel u dhow bartii uu gaariga BMW-ga shilka ku galay, wayna garaaceen, sida uu yiri boolisku.

CARRUURTA QURBAHA: AABO "MIKI IYO OLIVER WAXAA LOO SOO GADAY KUMBUYUUTARKA CIYAARAHA 'GAME'." DHACDO

Massalah waxa uu ka jabay feer, sambabkana dhaawac ayaa ka gaarey.

Boolisku waxa ay sheegeen in ay qabteen saddex nin oo Sudanese ah oo magac yadoodu kala yihiin: Mohamed Nureini Mohamed 16-jir reer Peoria; Seasor Nichola Aufo 22-jir reer Phoenix; iyo Attey Choi Dong 20-jir reer Phoenix.

Suudaaniiska iyo walaalaha ilma Abdulkadir, waxaa dhici karta in lagu soo oogo dembiga ah dhicitaan, dad guryihiis oo ay si ammar la'aan ah u galeen, iyo fal dembiyeed dhaawac geystey.

Ugu yaraan afar nin oo qaraabo la ah qoyska deggan Gilbert waxaa dhici karta in lagu soo oogo fal dembiyeed la xiriira afduub, dhaawac gaarsiin, qeysru mas'uulnimo. Kuwaas oo ay kamid yihiin: Abdullahi Ahmed, Bakar Ahmed, Abdul Ahmed iyo Ali Shairf Maye

ISHA: The Arizona Republic | April 14, 2005 | tajumadii SomaliTalk.com

Minnesota: Soomaali Dembi Loogu Soo oogey Arrimo La Xiriira Cashuur Celinta Dawlada maraykanka

Sida ay qortay jariidada StarTribune (cadadkeedii April 14, 2005) ee kasoo baxda Minneapolis, Dawladda dhexe ee Maraykanka ayaa waxay Yahya Muhumed Shakal Arbacadii ku soo oogtey 43 ah dembiyada loo yaqaan "felony" oo ah in uu caawinayey diyaarinta iyo dirista cashuur celin macmal ah, arintaas oo markii hore kasoo bilaabatay baaritaan lagu sameeyey cashuur celinta jaaliyadda Soomaaliyeed ee ku dhaqan magaalooyinka loo yaqaan mataanaha ee Minneapolis iyo St.Paul.

Shakal oo 35-jir ah, deggana Minnetonka, waxaa hor yaala ugu yaraan saddex sano oo xarig ah iyo ganaax dhan $250,000 oo ah mid kasta oo kamid ah dembiyadaas lagu soo oogey. Go'aankaas waxaa talaadadii gaarey "grand jury" laakiin waa la xafiday si arbacadii loo xiro Shakal, ayey tiri Jariidadu. Waxaana kiiskan baaraya IRS-ta (Internal Revenue Service).

Ayaan Xirsi "Faan miyey mooday faallaadii wargeyskaTime ?" | ikram

Shakal waxa uu ka shaqayn jirey Salama Tax Service oo kutaal Minneapolis, waxana uu sannadkii 2004 diyaariyey 978 cashuur celinta dawlada dhexe (federal), taas oo sida jariidadu sheegtay boqolkiiba 99% ay ku jireen cashuur celin macmal ah oo la xiriirta shidaal taas oo isku darkeedu gaareysey $1.9 million oo ah la xiriirta 2003, sida ku qoran dacwada dawlada dhexe.

Cashuur celinta shidaalka waxaa loola jeedaa: cashuur celin la xiriirta ganacsi la xiriira cashuur shidaal loo adeegsadey meel ka baxsan wadadooyinka waaweyn (off-highway). Inta badan waa qalabka dhismaha ama qalabka culus ee wershedaha, sida cagaf-cagaf-yada alaabta lagu qaado iyo cagaf-cagaf-yada loo yaqaan bulldozers, ayey tiri Startribune.

Saraakiisha dawlada dhexe wax faahfaahin kama bixin baaritaanka. Jerry McClure oo ah agaasimaha waaxda gobolka u qaabilsan dakhliga cashuurta waxa uu yiri gobolku waxa uu baaritaankiisa diirada ku saaray 11 ah jaaliyada Soomaalida oo ah kuwa diyaariya cashuur celinta, oo uu ka mid yahay Shakal, waxaana dib loo eegay 2,500 cashuur celin oo ay u diyaariyeen 2003.

Arinta cashuur celinta la xiriirta gaaska (shidaalka) waxaa dheer ayey tiri jariidadu in gobolku uu xusay dhacdooyin ah mala-awaaley guryo la degan yahay iyo in laga bad-badiyey dakhliga si loo kor dhiyo cashuur celinta.

Jariidadu waxay tiri, markii ugu horeysey saraakiishu waxay arrinta baaritaanka jariidada Star Tribune u bidhaamiyeen bishii May ee sannadkii hore. Magaca Shakal wuxuu ahaa kii ugu horeeyey oo la ogaado sababtoo ah wuxuu ku qornaa warqadii IRS ee baaritaanka. December-tii la soo dhaafay ayaa waxaa la diiwaan geliyey dacwada gobolka ee asaga (Shakal) iyo Abdiraham Adam, Ismail Mohamed iyo Jamal Noor, saddexdaas oo dhammaantood ah reer Minneapolis, dacwadaas oo ah in ay xereeyeen cashuur celinta gobolka oo macmal ah. Mid kasta oo kamid ahna waxaa loo sheegay in uu bixiyo ganaax dhan inta u dhexaysa $7,125 iyo $9,100.

Saraakiishu waxa ay sheegeen in cashuur-celin-diyaariyayaashu ay inta badan u adeegaan macaamiil Soomaali ah kuwaas oo aan aqoon u lahayn qawaaniinta sharciga cashuur celinta, ayadoo in badan oo macaamiishaas ka mid ah aysan arag cashuur celinta ilaa la xereeyo. Qayb kamid ah cashuur-celin-diyaariyayaashu waxay dadka u ballan qaadayeen in cashuur celin ay u soo noqon doonto taas oo ay dadka ka qaadayeen boqolaal doolar ama boqolkiiba xadi inta lacag soo noqota, sida ay sheegeen saraakiishu ayey tiri Jariidadu.

Mr. Mohamed, oo maadax ka ah African Credit Education & Counseling Agency, oo sida ay jariidadu sheegtay ah hay'ada ah "nonprofit" oo kajirta Minneapolis, waxa uu yiri in bishii Janaayo ay arintii ka dhalatay cashuur celintu ay culay saartay jaaliyada Soomaaliyeed iyo hay'adiisa "nonprofit-ka ah", taas oo dadkii aad uga bateen si loo saxo (nadiifiyo) arrintaas cakirantay (qasantay), ayey tiri jariidadu.

Mudaharaad Looga Soo Horjeedo Dowlada Itoobiya oo ka Dhacay Minnesota USA Waxaa mudaharaadkaasi ka dhacay Minnesota State Capital halkaas oo ay isugu yimaadeen dad badan oo.. Guji

Mr. Mohamed waxa uu yiri, lacagahaas loo soo celiyey cashuur celinta oo badankooda la bixiyey, waxay inta badan ahaayeen $2,500 ilaa $5,000 , waxayna badanaa u dhigmeen boqolkiiba 10% ilaa 25% qofkii cashuurta xeraysatay dakhligiisa sannadkii.

John James, oo dhanka dacwada madaniga qareen ugu ah Shakal, jariidadu ma aysan helin si ay arinta wax uga weydiiso. Maalintii Arbacada dhegeysigii dacwada Shakal waxaa loo magcaabay qareen asaga difaaca, kana difaaca kiiska dacwada kaga furan dawlada dhexe. Isla markaas kuxigaha U.S. Attorney, Paul Murphy, waxa uu yiri Shakal waxa uu cashuur celintii sannadkii 2003 ka sameeyey $100,000. Sidoo kale waxaa Shakal lagu amray in uu soo celiyo waraaqaha aqoonsiga ee qaxootinimada [refugee card]. Shakal oo ku dhashay Soomaaliya, kuna noolaan jirey kenya, waxa uu deganaa Maraykanka ilaa sannadkii 1996. Sida ay sheegtay IRS, waxa uu  Shakal ka soo shaqeeyey "Hennepin County welfare department" waxana uu fasax caafimaad qaatay xilligii cashuur celinta ee 2003 & 2004. Waxana uu shaqadaas iskaga tegey sannadkii hore ayey kusoo gabagabeysey jariidada Startribune.

ISHA: Star Tribune | April 14, 2005 |  tajumadii SomaliTalk.com

Khadra Faarax Cali oo Lagu Xiray Maraykanka Kaddib Markii ay Been Abuur La Xiriira Argagixiso Ka Samaysay Ninkeeda oo Deggan Dalka UK...

• ISHA: AP | Tarjumadii SomaliTalk | Apr 12, 2005

COLUMBUS, Ohio - Qof dumar ah ayaa isniintii la xiray kaddib markii lagu soo oogey dembi ah in ay FBI-da Maraykanka u sheegtay been abuur ah in ninkeedu maleegayey shirqool uu rabey in uu qarxiyo safaaradaha Maraykanka iyo Sucuudiga ee London, UK.

Kadrah Farah Ali, oo 42-jir ah, waxaa laga kaxeeyey guriga ay deggan tahay oo ku yaal magaalada Columbus ee gobolka Ohio, waxaana loo taxaabay Xabsiga.

Bishii hore ayaa la soo weriyey in ay Kadrah warbixin u gudbisey FBI-da, warbixintaas oo ah in ninkeeda oo lagu magcaabo Osman Yusef Dirie, uu ayada u sheegay in asaga iyo afar qof oo ah Moroccan ah ay qorshaynayeen in ay qarxiyaan Safaaradaha.

FBI-du waxay arintaas ku wargelisey CIA iyo xukuumada Ingiriiska. Waxayna dalka England waraysi kula yeesheen Osman Yusef Dirie, halkaas oo uu degan yahay, laakiin ninkaas wax dembi ah laguma soo oogen ama labma xirin.

Sida ay sheegtay FBI, markii dambe Kadrah waxay saraakiil u sheegtay in ay sheekadaas samaysay si ay ugu wax yeelayso Dirie (ninkeeda), kaas oo ay tiri waxa uu uu guursadey si uu u qaato dhalashada maraykanka.

Labaduba(Osman & Kadrah) waxay ka yimaadeen dalka Soomaaliya, laakiin Kadrah waxay haysataa dhal;ashada maraykanka, sdia ay sheegtay FBI.

Haddii dembigaas lagu helo, waxaa dhici karta in  Kadrah lagu xakuma shan sano oo xabsi ah, ayey tiri hay'adda wararka ee AP oo warkaas laga soo xigtey.

ISHA: AP | Tarjumadii SomaliTalk | Apr 12, 2005

Faafin: SomaliTalk.com | Apr 14, 2005