Minnesota: Shir ay yeesheen Beesha Hawiye

Xaaladaha ka soo cusboonaaday Soomaaliya ee awooda looga qaadey Maxkamadaha Islamka iyadoo la doonayo in Muqdisho xoog lagu geeyo qolada dowlada sheegata ee aan shacbiyada lahayn uuna garwadeenka ka yahay Abdullahi Yusuf ayaa hada isu badashey mid aargoosi iyo hub ka dhigis lagu sameeyo beesha Hawiye iyadoo la isticmaalaayo nidaamka argagixiso la dagaalanka lana dagaal galinayo ciidamada Ethiopia iyo kuwa beelaha ka soo jeeda deegaanka Puntland.

Arintan ayaa ku abuurtey argagax iyo anfariir dhamaan ummadda Somaaliyeed, qaasatan dadka ku abtirsada beesha Hawiye. Dhaqankan ayaa ah mid lidi ku ah sababihii loo soo dhisey TFGda ee ahaa dib u heshiisiinta ummadda Soomaaliyeed ee ay colaadu dilootey. 

Wax garadka, culumaaudiinka & mutacalimiinta beesha Hawiye ee Gobolka Minnesota ayaa shalay, April 1, 2007, galabnimadii qabtey shir lagu taageeraayo go'aanadii gudiga Hawiye ay ka soo saareen Somaliya, Gobolka Banadir. 

Si kastaba, Hawiyaha gobolka Minnesota ayaa shirkan ku muujiyay sida ay uga soo horjeedaan dhaqan xumada, dilka, dhaca, kufsiga iyo aargoosiga Abdullahi Yusuf iyo ciidamada Ethiopianku ka sameynayaan Soomaaliya. Dadkii meesha ka hadley iyo ka soo qayb galayaashii shirka ayaa sidoo kale muujiyey rabitaankooda nabad kula dhaqanka iyo wax wadaaga xalaashaha ah ee beelaha Soomaaliyeed. Dadkii meesha ka hadley oo u badnaa hogaamiye dhaqameedka iyo mutacalimiinta beeshan Hawiye ayaa waxaa ka mid ahaa;  

• Curadka beesha Hawiye Xaaji Ali Soomow                         - Karanle
• Imamka beelaha Hiraab – Imam Abdi Yusuf                        - Mudulood
• Nabadoon. Sh. Abdirahman Sh. Abdullahi Sh. Mohamed        - Shiiqaal
• Ugaas Mohamed Ismail Shuke                                          - Habargidir
• Nabadoon. Abdinasir Macalin Aden (Sanjeex)                      - Gugundhabe
• Nabadoon. Dr. Abdullahi Mohamed Hassan                          - Silcis
• Ugaas Xuseen Ali Iidle                                                    - Xawaadle
• Nabadoon Abdi macalin (Abdi-door)
• Avv. Abdirahman Haji Ereg
• Drs. Zaynab Hassan
• Drs. Halimo Ibrahim
• Col. Isaq Culusow
• Col. Hassan Mohamed (Hassan Korneyl)

---

Beesha Hawiye ee Gobolka

Minnesota, U.S.A.

BAYAAN

Waxgaradka, aqoonyahanada, culumaa’udiinka, iyo siyaasiinta  beesha Hawiye ee ku nool W/Ameerika waxay walaac badan ka muujineyaan xaalada ka soo cusboonaatey gobolka Banaadir iyo in Soomaaliya ay mar kale dib ugu laabaneyso dagaalkii ehliga. Cabdullahi Yusuf oo isticmaalaaya ciidamada cadowga Soomaaliyeed ee Ethiopia iyo ciidamado qabiil ayaa u geysanaya xasuuq dhamaan dadka degan deegaanka oo u badan beesha Hawiye.  Caasimada Soomaaliya, Muqdishu, ee la heysto waa mid khatar galineysa jiritaanka qaranka iyo ummadda Soomaaliyeed. 

Beeshu waxay ka digaysaa cawaaqib xumada laga dhaxli karo dagaalka ehliga ee uu Cabdullahi Yusuf dib uga bilaabey Soomaaliya. Waxay beeshu soo jeedineysaa in beelaha iyo waalidiinta caruurtoodu u dagaalameyso Cabdullahi Yusuf iyo Ethiopianka ey bad baadiyaan ummadda iyo qaranka Soomaaliyeed oo ay ka hor istaagaan xasuuqa ummadda Soomaaliyeed.  

Beeshu waxay dhaleeceyn adag u soo jeedinaysaa dowlada Ethiopia oo si aan kala sooc laheyn u xasuuqeyso shacabka reer Muqdisho. 

Sidaas oo kale waxay beeshu dhaleeceen u soo jeedinaysaa beesha Caalamka oo indhaha ka qabsaday xasuuqa, barakaca iyo xadgudubka ay ciidamada Cabdullahi Yusuf iyo kuwa Itoobiya u geysanayaan shacabka Soomaaliyeed.  

Iyadoo laga tixraacayo erayada kor ku xusan & xaalada wadanku hada galey, Beesha Hawiye ee gobolka Minnesota waxay isku afgarteen qodobadan; 

1. waxay si buuxda u taageereyaan dhammaan baaqyadii ay odayaasha iyo waxgaradka beesha Hawiye ka soo saareen magaalada Muqdisho.
2. Waxay ugu baaqayaan waxgaradka iyo odayaasha beesha Hawiye ee ku nool caasimadda Muqdisho inay ilaaliyaan midnimada beesha kana feejignaadaan kuwa isku dayaya inay kala qeybiyaan.
3. Waxay ka codsanayaan guud ahaan waxgaradka Soomaaliyeed iyo gaar ahaan beesha Hawiye meel kasta oo ay dunida ka joogaanba inay isgarab taagaan dadaallada ay odayaasha iyo waxgaradka Hawiye ee Muqdisho ugu jiraaan xal u helidda xasuuqa iyo barakaca lagu hayo shacabka Soomaaliyeed iyo kuwa reer Muqdisho.
4. Waxay ka dalbaneyaan dhammaan ururada Qaramada Midoobay iyo kuwa caalamka ee ka shaqeeya dhinacyada caafimaadka, xuquuqul insaanka, wax u qabashada qaxootiga, iyo dib u heshiisiinta, inay si deg deg ah gargaar ugu fidiyaan faragalina ugu sameeyaan xasuuqa iyo barakaca ay Itoobiya ku hayso shacabka reer Muqdisho.
5. Waxay ka dalbanaynaa dhammaan odayaasha iyo waxgaradka Soomaaliyeed gaar ahaana kuwa ka soo jeeda gobolka Puntland inay si deg deg ah ugala baxaan magaalada madaxda Muqdisho ciidamadooda iyo inay garab istaagaan shacabka Soomaaliyeed ey walaalaha yihiin ee reer Muqdisho.
6. Waxay gudiga Hawiye soo jeedinayaan in ay kalsoonidii kala noqdeen dawlada maqaarsaarka ah ee loogu adeego cadowga Soomaaliyeed laguna baabinayo ummadda iyo jiritaanka Soomaaliyeed.

Magacyada Dadka Sixiixay Bayaanka