Siilaanyo ha inoo dambeeyo ee wersheddii
sibidhka ka warran wasiir!
Cabdillaahi
Cawed Cige
edleh@hotmail.com
Tawradda maanta Somaliland maamushaa
waa mid hodan ku ah warsaxaafadeedka. Waxa aad maalin walba maqlaysaa
waxa saxaafadda xafiiskiisa ugu yeedhay wasiir hebel, oo muxuu u sheegay
ayaa kugu soo dhacaysa, tolow ma mashruuc cusub? Ma shaqo la abuurayo?
Ma daacuunka oo la dawaynayo? Ma dadka badaha ku madhay ee ka soo qaxaya
Somaliland oo uu ka hadlayo?
Maya, waxaas oo dhan wasiirku uma qaban
warsaxaafadeedkiisa, wuxuu u qabtay inuu hadal ka daba carraabiyo hebel
kale oo meel kale, maalin kale, oo cid kale dhegaysanaysay, hadal kale
oo aan isagan wasiirka ah, wasaaraddiisa iyo shaqadiisa midna khusaynin
ka yidhi.
Waxa haddaba bogga wararka ee
Hadhwanaagnews igaga soo baxay mid ka mid ah warsaxaafadeedyadaas
halwadka ah ee dawladdu shaqo ka dhigato. Dabcan sida aan ugu hiloobo
marwalba in dalkaygii wax wanaagsani ka dhaco, in wax u kordhaan, in
garaadka siyaasigeennu kobco ayaan warka wasiirada iyo maamulka u
xiiseeyaa, oo bal in wax manfac u leh dadka iyo in kale ay ku hadleen
isha u mariyaa. Waxa igaga soo baxay boggaas aan tilmaamay sheeko ku
bilaabantay sidatan;
“hadhwanaag 2007-06-07: Hargeysa
(HWN):-Wasiirka warshadaha Somaliland Md. Maxamed Saleebaan Maxamed ayaa
ku eedeeyey qaar ka mida hogaamiyaashi SNM oo uu ku jiro Gudoomiyaha
Xisbiga Mucaaridka ee KULMIYE Axmed Maxamed Maxamuud [Siilaanyo] oo uu
ku tilmaamay Hogaaniye aan jaho-siyaasadeed lahayn. Wasiirku waxa sidaa
ka sheegay shir’jaraa’id oo uu maanta ku qabtay xafiiskiisa magaalada
Hargeysa”
Haddii aynu wasiirka warkiisa ka soo
qaadno mid runta ku raftay oo Axmed Maxamed ka dhigno nin siyaasaddiisu
jaho aanay lahayn, maxaa wasiirka jahadiisa siyaasadeed ee uu
fadalkiisii weli ka sii qoyan yahay agagaarka wershedda sibidhka ee
Berbera ay tolow noqonaysaa?
Wersheddii madaxweynaha, wasiirkan
hadlaya iyo wasiir kale oo maanta aammusani, beri dhexdaas ah dadka ku
maansheeyeen, ee ay dhaarta mijinta hereriga ah gacanta la saarayo dadka
ugu mareen in dhakhso loo dhisayo, tolow wasiirku muxuu aflagaadada
Siilaanyo ka dib wax inoogaga sheegiwaayay?
Mise wersheddiina waxa ay ku dayatay
Siilaanyo oo jihadii farsamo ee ay dhulka ku fadhiisan lahayd ayaa ka
xumaatay? Malaha wasiirku wuxuu ka ilduufay inuu hadalkiisa ku wajahan
odayga raaciyo; “Eeyaahee Axmed, marraa-waaxid siyaasaddaadii jahadu ka
luntay waxa ay asqaysiisay wershedihii la ii diray oo iyaguna diiday in
ay Jarmalka soo dhaafaan”
Muwaadin siyaasadda macmalka ah ee
Somaliland aad u lafagura, Axmed Xaaji Nuur, oo dalka Noorwey ku nool,
islamarkaana aad ula socdey wershed geedkeed ba’ay oo wasiirka
wershedaha, madaxweynaha iyo dhawr nin oo kaleba muddo badan dadweynaha
reer Somaliland ku maaweelinayeen ayaa dhowaan maqaal uu qoray wuxuu
inagu xusuusiyay muddadii dawladda Somaliland inoo qabatay in
wersheddaas jaan dalka ku imanayso, bisha saddexaad ee sannadka 2007,
ayaa la inagu yidhi.
Ma aha gef iyo meel ka dhac midna in
siyaasigu weeraro qofka ay siyaasadda iskaga soo horjeedaan, sidaas
aawadeed wasiirka wershedaha cidi ku qabsanmayso haddii uu Siilaanyo
daaqad kala boodo, waxa se af kala qaad ah xadhigga uu wasiirku ka
garaacayo.
Marka koowaad waa in siyaasiyiinta
noocan ahi xisaabta ku darsadaan in garaadka bulshadu ka sarreeyo kan ay
iyagu ku talagelayaan. Madaxayaga waxa ku jira dareemayaal iyo
maaddooyin kiimiko ah oo intaas ka shaqeeya sidii aannu waxkasta oo
nolosha iyo dabeecaddu na hor keento u lafaguri lahayn, u na areerimi
lahayn. Bulshadu ka ballaadhan ka na aqoon iyo garasho badan wasiirrada,
sidaas aawadeed ma aha in wasiirradu ay bulshada ula dhaqmaan sidii
shandaddooda oo kale oo ay is yidhaahdaan marwalba waxa aad doontaan
ayaad ku ridanaysaan iyada oo aan weydiin laga keenin.
Marka labaad, wasiirradu waa in ay
shaqadooda bartaan. Dalku wuxuu leeyahay saddex urur qaran oo leh saddex
guddoomiye oo isu dhigma, iyaga ayaa habboon in ay isu tuurtuuraan
lafagurka iyo jareexada siyaasadeed ee dhexdooda taalla, maaha in
wasiirka wersheduhu garab ka fuul noqdo oo inta uu wasaaraddiisa
wershedaha saxaafadda ugu yeedho yidhaahdo, Siilaanyo ayaa lumay ee ha
la soo helo. Waa inuu marka hore waxa ka lunsan wasaaraddiisa uu hor
fadhiyo bulshada uga warramaa, waa inuu inoo sheego wershedda maqan ee
badda soo dhaafiweyday waxa haysta iyo sida dhibkaas looga baxayo.
Hadal iyo dan, bulsho waxay ku
leedahay; “Wasiir iska illow Siilaanyo iyo SNM oo wersheddii sibidhka
bal warkeedii u dambeeyay uga warran dadweynaha reer Somaliland?”
Akhri: Qoraaladii hore ee
Cige....
Cabdillaahi Cawed Cige, Liverpool
UK
edleh@hotmail.com