Dabdamis taagan garoonka Wilson Airport, qaraxii
shalay galab ka dib | Sawirka Standard | Oct 18, 2004
|
Saddex qarax oo xiriir ah ayaa ka dhacay garoonka Wilson Airport ee
magaalada Nairobi shalay galab (Octoobar 17, 2004) markey saacadu ahayd 4:30pm, waqtiga Afrikada
Bari. Qaraxaas oo waxyeelo gaarsiiyey garoonka. Waxaa la sheegay
in qaraxaasi uu dillaaciyey derbiga iyo saqafka qol ka mid ah qaybta ay
dadweynuhu ka duulaan, waxa kale oo burburay daaqadaha qolkaas. Waxaa
halkaas ku dhaawacmay laba dumar ah oo markii dambe la geeyay isbitaalka "Mater
hospital". Qaraxaasi markii uu dhacay waxaa garoonka la xiray muddo laba
saacadood ah kadibna dib ayaa loo furay.
Qaraxa kaddib waxaa la arkayey muraayo daadsan garoonka hareerihiisa ilaa 100 miter.
Markii ugu horeysey waxaa la soo weriyey in qaraxaasi uu ka dhashay
bombaano lagu soo qariyey boorso, laakiin dad goobta joogey ayaa sheegay
in ay maqleen saddex qarax oo xiriir ah. Sida ay caawa werisey jariidada
Daily Nation oo k asoo baxda Nairobi, Saraakiil sarsare oo ka tirsan
dalka Kenya ayaa markiiba beeniyey in qaraxaasi uu ka dhashay bombaano,
waxaana saraakiishaas kamid ah wasiirka gaadiidka
John Michuki, Wasiirka Isgaarsiinta
Raphael Tuju
iyo madaxa garoomada kenya George Muhoho.
Afhayeenka dawlada kenya, Dr Alfred Mutua (bidix), iyo
Raphael Tuju [wasiirka
Information] oo warbaahinta kula hadlayey garoonka Wilson Airoport,
kaddib qaraxii ka dhacay garoonka. Sawirka Standard.
|
Mr. Tuju ayaa yiri: "(Qaraxaasi) ma ahayn bombaano. Waxa uu ahaa mid ka dhashay
waxyaabaha gubta ee loo yaqaan "flammable material", laakiin ma
sheegi karo waxa uu sheygaasi yahay ilaa baaritaan lagu sameeyo. u malayn
maayo in uu yahay bomb sababtoo ah waxa uu ka yimid (qaraxu) waxyaabo ku
kaydsanaa maqaasiin".
Sarkaalka booliska
Brig Ali oo asaguna meesha ka saaray in
qaraxaasi uu ka dhashay bomb ayaa sheegay in uu soo sheegi doono halka
baaritaanku marayo 24 saac gudohood.
Dhanka kale sida ay caawa werisey jariidada Standard, ilo ammaanka
qaabilsan waxa ay sheegeen in ay baaritaan ku hayaan xiriirka ka dhexeeya
qaraxaas iyo Soomaaliya, waa sida jariidadu warka u dhigtaye, waxana ay
intaas ku dartay in baarintaankaas la samaynayo sababtoo ah waxa qaraxaasi
dhacay wax yar ka hor intii aan madaxweynaha DFKMG ee Soomaaliya, C/laahi
Yuusuf, kusoo laaban garoonka.
MDFKMG, C/lahi
|
Jariidada oo hadalkeedii sii wadata waxa ay
tiri: ilo ammaanka qaabilsan oo weydiistey in aan la magcaabin ayaa sheegay
in madaxweyne C/laahi iyo wafti la socdey ay socdaal ku tageen
"Maasai Mara
National Park". Waxana ay ku soo laabanayeen magaalada Nairobi markii
diyaaradii ay saarnaayeen si kedis ah loogu weeciyey garoonka caalamiga ah
ee "Jomo Kenyatta International Airport" (JKIA). Madaxweynaha iyo
waftigiisu waxay subaxnimadii shalay (oct 17) ka baxeen Nairobi, waxana ay
qorshaynayeen in ay garoonka Wilson kusoo laabtaan ka hor afurka, qiyaastii 6:30 waqtiga Afrikada Bari..
Markii ay diyaaradii uu la socdey madaxweynaha DFKMG
ee Soomaaliya ka degtey garoonka JKIA, oo halka loo leexiyeyey, waxaa markiiba madaxweynaha loo
qaaday meel aan la magcaabin, ammaankiisana aad ayaa loo adkeeyey, ayey
jariidadu warkeedii kudartay.
Garoonka Wilson Airport waxa uu ka mid yahay garoomada bariga afrika
ee ay diyaaradaha ugu badani ka duulaan. Waxaa garoonka ka hawlgala 27 shirkadood kuwaas oo leh 200 oo diyaaradaha yaryar iyo 400 oo duuliye.
Laakiin Garoonkani waxaa inta badan laga qaadaa ama ka duula xamuul aad uga
tiro badan dadka ka duula.
Waxaa maalintiiba ka duula 500 oo duulimaad, kuwaas oo dadka ay qaadaan ay
gaarayaan ilaa 1,000 qof, halka garoonka caalamaiga ah ee JKIA
ay maalintiiba ka duulaan 120 duulimaad oo qaada 10,000 qof.
Xamuulka ka dhoofa garoonka Wilson Airport waxaa kamid ah QAADKA ka
yimaada Meru ee ku socda Soomaaliya.
ISHA: STANDARD | DAILY NATION |