WEY ITLAAL DHIGTEE,INDHAHA KA
TUURMIYAA??!!!!!!!!
W/D: Mursal Max'ed Max'uud(Garaad)E-mail:
stethy1@yahoo.com
Tan iyo intii la
dhisay T.F.G-da, gaar ahaana wixii
ka danbeeyey markii Madaxweynaha Somaaliya Col. C/laahi
Yuusuf uu ka dalbday Golaha amaanka Midowga Africa,
Ciidamo shisheeye oo gaaraya ilaa 20 kun oo askari,
kuwaas oo uu sheegay in ay hub ka dhigis ka samayn
doonaan dalka, ayaa waxaa soo ifbaxayey Dagaalo
qaraar oo ka kala dhacay Goboladda Bay, Bakool,
Mudug iyo G/gaduud, waxaana gacanta ka baxay
Xasilooni aan aad laysugu halayn karin oo ka jirtay
Magaalooyin badan haba ugu darnaato Caasimada
Muqdisha,e. Malaha Xaajaddu waa (intaan lagugu imaan,
Ciil ha kaa haro).
Waxa iminka
dhacayaahi ma'ahan wax la arki jiray 14kii sano ee
bur-burka iyo fowdada lagu jiray. Waxbana waxbaa ka
darane, markaan waxaad moodaa in uu socdo mashruuc
aad u balaaran oo Indhaha looga tuurayo Dalka! Waxaa
socda Xusuuq saf-mar ah oo lagu hayo Aqoonyahanka
Soomaaliyeed, gaar ahaan Saraakiisha Ciidamadda
Xooga dalka iyo kuwa Boliskaba.
Waxaa guryaha
loogu dhacay 5tii bilood ee T.F.G-du
jirtay Saraakiil fara badan oo ALAHA u wada
naxariistee ay ka mid ahaayeen: Gen. Max'ed
Cabdi, Gen. Yuusuf Sarenle, Col. Ismaciil gureey,
Col. Max'uud Bataar iyo Col. Xirsi Dhoore
oo noqday Sargaalki ugu danbeeyey ee la khaarijiyo,
waxaa sidoo kale isla bishii ina dhaaftay ee Janaayo gudaheeda
48-saacadood kahor dilkii Col. dhoore isna la
toogtay Sarkaal Wasaaraddii Waxbarashadda ka
tirsanaan jiray. Waxaana lagu magacaabi jiray Aqoontahankaas
Prof. C/raxmaan(Majimoweyne).
Mudaddii Qaran bur-burka waa ay dhici jireen Gabood
faladda iskugu jira Dilka, dhaca, iyo af-duubka ee
lagula kici jiray qaybaha wax-tarka u leh Bulshadda
Sida:- Dhaqaatiirta,madaxdda Ciidamadda,qaybaha
Warbaahinta iyo Aqoonyahanka kaleba, hase yeeshee
Xawaarahan oo kale weli magaarin, taas ayaana in
badani dhafooradda la haystaan, waxna iska
waydiinayaan.
HADAL HAYNTA DADKA EE CIDDA LOO MALEYNAYO IN AY KA
DANBEEYAAN FALALKAAN ARGAGAXA LEH.
Aad ayeey Dadku
ugu kala aragti duwan yihiin, marka ay timaado ka
hadalka dhacdooyinkaan. Dadka waxaad moodaa in ay u
kala jabeen Ilaa 4 koox oo kala Aaminsan Afar
fikradood oo kala duwan...Waxayna kala yihiin sidan:
1. Qaybta 1aad waxay
aaminsanyihiin in waxani ay tahay Mashruuc ay maal
gelinayso Dowladda Ethiopia.
Fikir kani aad ayuu macquul u yahay waayo taa iyo
wax ka waynba waa laga filankaraa in
Ethiopia ku dhaqaaqdo.
Waxaan ognahay oo hubaal ah in jiilka cusub ee da'da
20ka iyo wixii ka sii hooseeyaaba aanay garanayn
waxa Somaliweyn lagala jeedo,islmarkaasna aanay si
saaniya u qeexi karin waxa ay u taagan tahay 5ta
gees ee Xidigta ku asteysan Calanka Buluuga ah ee
Soomaaliyeed, marka laga reebo tiro aad u yar oo
Jaanis waxbarasho helay, iyaguna taariikh ahaan uun
bay u ogyihiine, Ciddii Aqoonta u lahayd una soo
joogay wax badan, loogana fadhiyey in ay soo
dhiciyaan Xuquuqo badan oo Soomali ka maqan, waa
kuwaa iminka ugaarsiga ba'an lagu hayo, si aanay
waxba ugu gudbin uguna faa'iidayn Jiilka Cusub!!
2. Qoladda 2aad
Waxayba si toosa ugu eedaynayaan T.F.G-du,
in ay falalkaan ka danbeyso, gaar ahaan kuwooda
aaminsan bay leeyihiin in Xalku ku jiro Ciidamo
Ajnabiya, iyagoo sidoo kalena leh "Iyaga ayaa
abuuray Waxa dhacaya, Aduunyadda ayeey uga gadayaan
in Dalka waxaasi ka dhacayaan aan Cagta la dhigi
karin, haddii beesha Caalamku, gaar ahaan Africa
aanay ku yaboohin Ciidamo shisheeye" Fikirkani isna
wuxuu kula noqonayaa macquul marka aad eegto sida
Xubnaha Dowladdu ay ugu kala qaybsanyihiin qorshaha
keenista Ciidamo shisheeye. Qaarkood ayaa qaba in
Askari Ajnabiyihi aanu imaan karin Geyiga
Soomaaliyeed, halka qaybta kale oo uu ku jiro
Madaxweynuhuna ay ku adkaysanayaan in Ciidamo
shisheeye loo baahan yahay, iyagoo ku andacoonaya in
aan talaabo la qaadi karin, Muqdishana laga howl
geli karin Ciidamo shisheeye la'aantood.
3. Qaybta 3-dexaad
waxay qabaan in sheekadda lagu soo maleegay dhanka
Somaliland,oo kooxo iskaashaday oo muqdisho jooga
iyo kuwo maamulka somaliland ka tirsani hawshaan
wada jir u fulinayaan. Qaybtani waxay ku doodayaan
in Saraakiisha lagu dilay Muqadisho ay kujirayn Rag
ay ka mid ahaayeen: Gen.Talan oo isaga la dilay Waqtigii
Dowladdi Carta lagu soo dhisay ay Dalka timid.
Wuxuuna ahaa Reer Boorame, Col. Ismaaciil gurey oo
Reer Sool ahaa, iyo Gen.Sarenle oo reer Sanaag ahaa.
Beelaha ay ka soo jeedaan Saraakiishaasi waxay
deganyihiin oo ay ka soo jeedaan Deegaano Gobolada
Waqooyi katirsan, laakiin aysan deganayn qolyaha
sida aadka ah ugu ololeeya gooni-isutaaga somaliland.
Guruubkaan 3edexaad ood moodo in ay Cidiyaha ku
dagaalamayaan waxay ku andacoonayaan in CID-da
somaliland ay howshaas fulinayaan si beelaha kale ee
aan Isaaqa ahayn looga gooyo jacaylka ay somaliweyn
u qabaan, gaar ahaan dadka ku nool Muqdisho.
4. Qaybta 4-aad oo aad
u yar waxay qabaan in Fallalkaas Argagaxa leh ay ka
danbeeyaan Culimaddu, gaar ahaan
Maxkamaddaha. Maadaama bay leeyihiin ay Wadaadadu
horay ugu goodiyeen in ay Jihaad Iclaamin doonaan haddii 1-Askari
yimaado Dalka. Qoladani waxay ku doodayaan in
Saraakisha La,laayey ay ku jiraan qaar aad ugu Ole-olaynayey
keenista Ciidamo shisheeye. Hase yeeshee taasi waxay
beenoowday Markii Madaxdda Maxkamadduhu ay ku
yaboohayn in ay xil gaara iska saari doonaan Sugida
ammaanka Saraakiisha Soomaaliyeed, si ficil ahna
waxay ku soo furteen Sargaal u af-duubnaa koox
dabley ah..dhanka kale Maxkamaduhu waxay noqdeen
Cidda ugu horaysa ee ka hadasha, Xusuuqa lagu hayo
Hantida Dalka(Aqoonyahanka). Isku soo duuboo
midkasta oo ka mid ah 4taa qaybood ee la hadalhayo,
iyo haddii ay qolyo kale soo baxaanba Taariikhda
ayaa Xusi doonta oo kala cadayn doonta, maalin
ayaana la abaal marin doonaa dhagar qabayaashaas.
MAXAA
LA GUDBOON BULSHADDA, SI AY ISKUGU TASHATO????
Markasta oo ay
dhacaan falal qarbudaad ah, waa iska caadi in aad
maqasho Tiro Hay'adaa oo jeedinaya canbaarayn,
Warbaahinta oo dood ka samaynaysa iyo Shaqsiyaad
Magac ku dhex leh Bulshadda oo ku biirinaya Codkooda
sida ay uga xunyihiin waxa dhacay, hase yeeshee
waxaad moodaa in ay Aamusnaan uun ka roontahaye
aanay macno badan samaynayn. Tusaale: Dadku markasta
waxay la kulmaan Falal qarbudaad ah, qof walbaahina
isagoo u jeeda ayuu indhaha ka dadbanayaa,
islamarkaasna wuxuu sheegayaa in uu ka xunyahay.
Hadaad waydiiso Maad gacan siisid qofka hortaada
logula xad gudbayo wuxuu ku leeyahay "sheikh aniga
ha i dakanayn, hadaan naftayda la iigu imaan
meeshaydda u dhaafimaayo". Hadaba waa muuqataa in
Dadkii ka xunyahay Falalka wuxuushtinimada ehe,
waxaa dhiman oo kaliya in si practical ah la'isugu
tashado, oo wax loowada qabsdo. Waxaan jeclaan lahaa
in aan soo bandhigo talooyinka uu Aniga Xalku igula
jiro.
1. In Culimaddu Wacyi
gelin joogto ah sameeyaan, si dadka loogu
baraarujiyo xaqa.
2. In la kor dhiyo
Ciidamadda Maxkamadaha iyo kuwa Madaniga lagana
saaro habaca ku jira.
3. In laba Al-baab
Ganacisi-kasta oo iska soo horjeeda aanay ogolaanin,
in falal burcadnimo dhexdooda laga fuliyo.
4. In Dhaqaale loo
qoon deeyo dhinacyadda ku howlan sugidda nabad
gelyadda, si niyadooda kor loogu qaado.
5. In Saraakiisha
Ciidamadda loo sameeyo Ilaalo gooni ah, gaar ahaan
in ay dhexdooda iska abaabulaan, inta ay ka soo
baxaan Qabiilka ay dabadda la kala galeen.
6. Fulinta Howshan waa
in ay iska kaa shadaan dhinacyadda Warbaahinta,
Ganacsatada iyo Aqooyahanka.