Adduunyo: Harka labadiisa Gelin

Adduunyo: Harka labadiisa Gelin

amiin W/D: Amiin Yuusuf Khasaaro

Muqdisho, Soomaaliya

Waxaa Maalintii Jimcaha ahayd Magaalada Nayroobi Isbitaal ku yaala ku geeriyooday Madaxweynihii hore ee soomaaliya Aadan Cabdulle Cismaan (Aadan Cade)oo isagu noqday ninkii ugu horeeyey oo afrikaan ahaan oo si Dimuquraadi ah uga diga xilka madaxtinimada, ayaa maalintii shalay ahayd lagu aasay duleedka Magaalada Muqdisho gaar ahaan deegaanka Ceel Cirfiid.

Aadan Cabdulle oo maydkiisa lagu daday calanka Jamhuuriyada ayaa waxaa ka qaybgalay aasaaskiisii saddex madaxweyne oo soo maray Soomaaliya oo kala ahaa Cali Mahdi Max’ed iyo Madaxweynaha haatan C/llaahi Yuusuf Axmed, waxayna saddexda Madaxweyne saarnaayeen Gaari qafilan oo aysan Karin Xabaddu, waxaana la soo gaarsiiyey masjidka weyn ee Isbahaysiga Islaamka halkaa oo lagula tukaday salaaddii Janaasadda, kaddibna waxaa loo galbiyay qabriga oo laga diyaariyey deegaanka Ceel Cirfidiid.

Goobta Aasku ka dhacayey waxaa ka dhacayey Ra’isul Wasaare Cali Max’ed Geedi, waxaana markii ugu horeysay ciid ku shubay Qabriga Cali Mahdi Max’ed, waxaa ku xigay C/qaasim Salaad Xasan, sidoo kale waxaa ku xigay Madaxweyne C/llaahi Yuusuf iyo Ra’isul Wasaare Cali max’ed Geedi.

Aadan Cade oo lagu tilmaamo in uu ka mid ahaa halgamayaashii Xoriyadda ayaa waxaa loogu magacdaray Garoonka Diyaaradaha ee Muqdisho oo wixii haatan ka dambeeya loogu yeeri (Garoonka Caalamiga ah ee Aadan Cade).

C/qaasim Salaad Xasan oo wax laga weydiiyey aqoonta uu u lahaa Allaha u naxariistee Aadan Cadde, ayaa waxa uu yiri “1997 ayaan mar ku kulanay Magaalada Qaahira, waxaana u soo jeediyey in uu u doceeyo ummadda Soomaaliyeed, halkiina ayuuna ugu duceeyey in illaah ka saaro dhibka Ummadda Soomaaliyeed”, wuxuu kaloo sheegay in uu lahaa hal guri iyo hal beer oo uu isagu shaqsiyadiisa lahaa, halkaas oo uu sheegay in uu ku nasan jiray, sidoo kale waxaa isna wax laga weydiiyey Cali Mahd Max’ed,waxa uu hoosta ka xariiqay inuu Aadan Cade ahaa shaqsi aysan hilmaami doonin Bulshada Soomaaliyeed, islaa markaana afrika u horseeday in xukunku uu yahay mid ku yimaada rabitaanka shacabka.

Waxaa kaloo wax laga weydiiyey Xaawo Cawaale Abtidoon oo iyadu mudo la soo shaqeysay Aadan Cade, waxa ayna ku tilmaantay inuu ahaa nin Naxariis badan, Dulqaad badan, isla markaana qayb ka ahaa halgankii Xoriyadda.

C/risaaq Xaaji Xuseen oo isna mar Ra’isul Wasaare ka noqday Soomaaliya ayaa insa waxa uu sheegay in Aadan Cade uu ka mid ahaa raga fara ku tiriska ah ee Ummadda Soomaaliyeed u horsed nabad, waxa uuna sidoo kale tilmaamay in allaha u naxariistee Aadan uu ahaa nin dulqaad badan kartina leh, isla markaana ay ka go’neyd sidii ummadda Soomaaliyeed u midoobi lahaayeen.

C/llaahi Yuusuf Axmed oo isagu iminka madaxweyne ka ah Dalka Soomaaliya ayaa wax laga weydiiyey Allaha u naxariistee Aadan, waxa uuna sheegay in uu aqoon fiican ulahaa isla markaana uu isagoo yar tagi jiray gurigiisa, sidoo kalana ay marararka qaar isku arki jireen guriga Salaad Gabeyre.

Maqaal aan hadda ka hor ka akhriyey mid ka mid ah Web-Site-yada Afka Soomaaliga ku hadla ayaa waxa uu ku aadanaa in markii uu xilka hayey Aadan Cabdulle Cismaan uu maalinta Talaada ah qaabili jiray dadweynaha ha isugu jiraan Ciidan iyo rayidba.

Aadan qaabilaadiisa kama badnaan jirin toban daqiiqo, qof walibana tobankaas daqiiqo ayuu muraadkiisa ku soo koobi jiray.

Maalin maalmaha ka mid ah ayaa waxaa safkii soo galay C\llaahi Yuusuf Axmed oo xiligaa ahAa Kabtan ciidan markii la sii daayey oo Uu u galay Aadan Cade ayaa waxa uu ka codsaday in uu ka dhigo Taliyaha ciidanka Xoogga Dalka Soomaaliyeed, waxayna taasi Aadan Cade ku noqotay la yaab, waxa uuna yiri “Rag kaa sareeya ayaa wadanka ku sugan, adigoo kabtan ah sidee ku noqon kartaa walaal taliyaha ciidanka Xoogga Dalka Soomaaliyeed”, waxa uuna C/llaahi yuusuf ugu jawabaay Madaxweyne, Khibrad ayaan u leeyahay in aan qabto xilkaasi” Allaha u Naxariistee Aadan Cadde la yaab ayey ku noqotay wayna ku adkaatay codsigaasi, tobankii daqiiqo ee loogu talagalay qaabilaadana waxaa ku darsoontay labaatan kale, C/llaahina isaga oo careysan ayuu ka soo baxay Xafiiskii Madaxweynaha, waxaana dhacday in Aadan Cabdulle Cismaan uu banaanka uga soo baxay xafiiska waxa uuna fiirinayey C/llaahi inta uu ka libro, dadweynihii qaabilaada sugayey ayaa Aadan Cade su’aalo weydiiyey, waxayna yiraahdeen “Mudane Madaxweyne soddon daqiiqo ayaad ninkaan qaabileysay, oo sharcigii kuu dhignaa oo taban daqiiqo ah waad jabisay, sidoo kalana banaanka ayaad u soo baxday ilaa uu ka mirqana waad fiirineysay, ee maxaa dhacay?”, waxa uuna ugu jawaabay, “Waa run oo tabankii daqiiqo wuu ka badsaday, waxaana ku murmeynay, arrin la yaab igu noqotay oo ahaa in uu iga codsaday isagoo Kabtan ah in aan ka dhigo Taliyaha ciidanka xoogga dalka Soomaaliyeed”, waxa uuna sii daba dhigay “Sababta aan banaanka ugu soo baxayna waxay ahayd in aan fiiro kale ugu laabto ninkaasi,, waxaana idinka codsanayaa in aad raali iga noqotaan”.

Wuxuu xiligu is bedelaba oo Taariikhdu soo gurguurataba waxaa dhacday in Aadan aaskiisa uu ka qaybgalay C/llaahi Yuusuf isagoo madaxweyne ah waxayna Soomaalidu tiraahdaa (Adduunyo waa harka labadiisa Gelin), Ugu dambeyntii waxay Ummadda Soomaaliyeed isku raacday in uu ahaa nin dulqaad badan oo geesi ah oo aysan marnaba hilmaai doonin.

W/D: Amiin Yuusuf Khasaaro.

Laba Alifle Aweki "Dagaalkii ka Dhacay Muqdisha waxaan ka kororsanay Xeelado Fara Badan".. Akhri...